Read urhobo 1 Ivie 16 Bible Online

1 Ivie 16 - urhobo bible

1 Ivie 16

¹Ota rẹ Ọrovwohwo de bru Jehu ọmọ ri Hanani rhe vwọ kpahe Baasha, tanẹ,

²Ri mi vwo si we nẹ evun rẹ iwurhie rhe me da vwẹ owẹ mu osun kẹ ihwo mẹ Izrẹl, wo de nenesi ri Jeroboam, wọ vwọ nẹrhẹ ihwo mẹ Izrẹl ru umwemwu, rẹ ayen vwọ vwẹ imwemwu rayen kpare ophu mẹ,

³nighe, ki mi hwerhe Baasha vẹ uwevwi rọye kufia kakare, ki mi ru uwevwi wẹn kerẹ uwevwi ri Jeroboam ọmọ ri Nebat.

⁴Kohwo kohwo ri Baasha ro ghwuru vwẹ orere eranko ke riọ; o re rhe ghwu vwẹ aghwa ephran rẹ obenu na ke riọ.

⁵Asakiephana eyenre ri Baasha, kugbe obo ro ruru, ẹgba rọye, e rhe si ayen phihọ Ọbe rẹ Ikun rẹ Ivie rẹ Izrẹl?

⁶Baasha de ghwu bru esẹ rọye, e de sho phihọ Tirzah; Elah rẹ ọmọ rọye da re vwẹ ẹdia rọye.

⁷ọ rọ marho ota rẹ Ọrovwohwo da wan oma rẹ ọmraro Jehu ọmọ rẹ Hanani bru Baasha vẹ uwevwi rọye rhe, fiki rẹ emu ọbrabra ejobi ro ruru vwẹ obaro rẹ Ọrovwohwo, rọ vwọ vwẹ iruo robọ rọye vwọ kparọ ophu, rọ vwọ dia kerẹ uwevwi ri Jeroboam, ji kugbe obo rọ vwọ guọghọ.

⁸Vwẹ ikpe uje gbe esan rẹ Asa ovie ri Juda, Elah ọmọ ri Baasha de mu ẹriọ phihọ vwẹ Izrẹl vwi Tirzah, ọ da re ikpe ivẹ.

⁹Ẹkẹvuọvo odibo rọye Yimri, osun rẹ abọvo rẹ ekpẹrẹ rọye, da ro ẹro kpahọ. Ọke rọ hẹ Tirzah, rọ vwọ da udi mu oma fian vwẹ uwevwi Arza,

¹⁰Zimri da ro uwevwi ghwiẹ she teye otọ o de ghwu, vwẹ ikpe uje gbe ivẹ rẹ Asa ovie ri Juda, ọ da re vwẹ ẹdia rọye.

¹¹Ọke ro vwo mu ẹriọ phihọ re, ro vwo tidia enu rẹ ekete na nu, o de hwe uwevwi ri Baasha ejobi re; o jẹ ọshare ọvuọvo vwo kẹ imoni rọye eyẹ igheya rọye-e.

¹²Kẹnẹ Zimri guọghọ uwevwi rẹ Baasha, kirobo rẹ ota rẹ Ọrovwohwo epha Jehu ọmraro na tare kpahe Baasha,

¹³rẹ umwemwu ri Baasha ve imwemwu rẹ ọmọ rọye ruru, rẹ ayen vwọ nẹrhẹ Izrẹl ru umwemwu, rọ kpare ophu rẹ Ọrovwohwo Ọghẹnẹ rẹ Izrẹl kpahe ẹdjọ raye.

¹⁴Asakiephana eyenre rẹ Elah ri chekọ kugbe obo ro ruru ejobi, e rhe si ayen phihọ ọbe rẹ Ikun rẹ Ivie rẹ Izrẹl?

¹⁵Vwẹ ikpe ruje gbe ighwrẹ rẹ Asa ovie rẹ Juda Zimri da re ẹdẹ ighwrẹ vwi Tirzah. Asakiephana unuofovwi da rhe hwa phi hẹrhẹ Gibbetọn, rọ he otọ ri Filistia,

¹⁶unuofovwi re hwa hẹrhẹ na de nyo ra vwọ tanẹ, Zimri ro ero kpahọ, ro de hwe ovie fiki rẹ ọtiọye na Izrẹl ejobi da vwẹ Omri, onotu rẹ ofovwi na, ru ovie kẹ Izrẹl vwẹ ẹdẹ yena vwẹ evun rẹ erhọn na.

¹⁷Ọtiọye Ọmri de nẹ Gibbẹtọn, ọ vẹ Izrẹl ejobi, ayen de re phi Tirzah.

¹⁸Ri Zimri vwọ mrẹ nẹ a reyọ orere na nure, o de kpo uwevwi ohẹrhẹ rẹ ovie, ọ da torhẹ uwevwi rẹ ovie ghene, o de ghwu,

¹⁹fiki rẹ imwemwu rọye ro ruru, brabra vwẹ obaro rẹ Ọrovwohwo ro vwo nene idjerhe ri Jeroboam, fiki rẹ umwemwu rọye ro ruru, rọ vwọ nẹrhẹ Izrẹl ru umwemwu.

²⁰Asakiephana eyenre ri Zimri ro chekọ kugbe ẹro rọ roro, e rhe si ayen phihọ Ọbe rẹ Ikun rẹ Ivie rẹ Izrẹl?

²¹Etiyin ihwo rẹ Izrẹl da ghare oma akava; abọvo rẹ ihwo na de nene Tibni ọmọ ri Ginat, rẹ ayen vwọ ma ovie, abọvo de nene Omri.

²²Ẹkẹvuọvo ihwo ri nene Omri da kparobọ nọ ihwo ri nene Tibni rẹ ọmọ ri Ginat; ọtiọye na Tibni de ghwu, Omri da rhe dia ovie.

²³Vwẹ ikpe rẹ ọgban gbẹ ọvo rẹ Asa ovie ri Juda, ọmri de mu ẹriọ phihọ vwẹ Izrẹl, ọ da re ikpe ihwivẹ; ọ rere ikpe esan vwi Tirzah.

²⁴ọ da dẹ ugbenu ri Sameria mie Shema talẹnt ivẹ rẹ idọnọ efuanfon; ọda gba ogba yariẹ ugbenu na, o de se odẹ rẹ orere rọ bọnre na Sameria, kerẹ odẹ ri Shema, ro vwo ugbenu na.

²⁵Omri de ru obo re brare vwẹ obaro rẹ Ọrovwohwo, o de ru umwemwu nọ ihwo ejobi re ka obaro kẹ.

²⁶Kidie o nene idjerhe ejobi ri Jeroboam ọmọ ri Nebat neneri, ji kugbe imwemwu rọ nẹrhẹ Izrẹl ru, rọ vwọ vwọ ẹdjọ rayen kpare ophu rẹ Ọrovwohwo, Ọghẹnẹ rẹ Izrẹl.

²⁷Asakiephana eyenre rẹ Omri ro chekọ ro ruru, ẹgba ro vwori, e rhe si ayen phihọ Ọbe rẹ Ikun rẹ Ivie rẹ Izrẹl?

²⁸Omri de ghwu bru esẹ rọye, e de sho phihọ Sameria; Ehab rẹ ọmọ rọye da re vwẹ ẹdia rọye.

²⁹Vwẹ ikpe rọgban gbẹ ẹrenre rẹ Asa ovie ri Juda, Ehab ọmọ rẹ Omri de mu ẹriọ phihọ vwẹ Izrẹl, Ehab rẹ ọmọ rẹ Omri da re vwẹ Izrẹl vwi Sameria ikpe uje gbe ivẹ:

³⁰Ehab rẹ ọmọ rẹ Omri de ru umwemwu vwẹ obaro rẹ Ọrovwohwo nọ otu re ka obaro kẹ ejobi.

³¹O de no frae ro vwo nenesi rẹ imwemwu ri Jeroboam ọmọ ri Nebat, ọ da reyọ Jẹzebẹl ọmọtẹ rẹ Etbaal ovie ri Sidọn vwọ rọvwọ, ọ da ra ga Baal, o de shiguẹ kẹ.

³²Ọ da so agbada kẹ Baal vwẹ uwevwi ri Baal, rọ bọn phihọ Sameria.

³³Ehab da bọn uwọrha. Ehab de ru emu efa rọ vwọ kpare ophu rẹ Ọrovwohwo, Ọghẹnẹ rẹ Izrẹl, nọ ivie efa re ka obaro kẹ vwẹ Izrẹl.

³⁴Vwẹ ọke rọye Hiel ri Bẹtẹl da bọn Jeriko; Abiram rẹ ọmọkpako rọye o hwe vwọ uchivwo rẹ orere na viotọ, o de rhe hwe Segub ubrevwiẹ rọye vwọ ghwẹ unurhoro rọye phihọ, kirobo rẹ ota rẹ Ọrovwohwo rọ wan unu ri Joshua ọmọ ri Nọn ta epha.