Read urhobo 1 Ivie 18 Bible Online

1 Ivie 18 - urhobo bible

1 Ivie 18

¹Rẹ ẹdẹ buebu vwọ wan nu ota rẹ Ọrovwohwo de bru Ilaija rhe, vwẹ ikpe rerha tanẹ, Yanran, ra vwẹ oma wẹn nẹ Ehab; ke me cha rhọ osio phihọ otọ na.

²Ọtiọye Ilaija da ra vwẹ oma nẹ Ehab. Asakiephana yẹ owẹvwe re fiẹ gangan vwi Sameria.

³Ehab de se Obadaya, ro suẹn uwevwi rọye. (Asakiephana Obadaya mu ọghọ kẹ Ọrovwohwo gangan;

⁴ọke ri Jezibẹl vwo hwe emraro rẹ Ọrovwohwo na, Obadaya da reyọ emraro ujori o de si ayen nu ujuvẹ gbe ihwe ẹko vwẹ evun re emwa, ọ da vwẹ emu kẹ ayen re ọ da vwẹ ame kẹ ayen da.)

⁵Ehab da ta kẹ Obadaya, Yan kpo etọ na ejobi kpo lgbugbu rẹ ame na kugbe iyara na ejobi; ọkeọvo sa sa mrẹ egbri re de sivwi iyesi na vẹ irhuẹn na rhọ, rere e vwọ jẹ ẹvo rẹ eranvwe na ekuofia.

⁶Ọtiọye na ayen da ghare otọ na kẹ omoma rẹ ayen rere ayen re kio; Ehab ọvo de nene abọvo, Obadaya ọvo de rhe nene abọ ọfa.

⁷Rẹ Obadaya vwọ hẹ idjerhe na, nighere Ilaija da rhe vwa, Obadaya de vughe, o de gbe opharo hẹ otọ ọ da ta, Ọna owẹ, ọrovwovwe Ilaija?

⁸Ọ da kpahe kẹ, Mẹvwẹọ, Yanran, ta kẹ ọrovwovwe, Nighe Ilaija hẹ etinẹ.

⁹Ọ da ta, Tivọ mi vwo ru chọ ru wo vwo siobo nẹ odibo wẹn kẹ Ehab, nẹ o hwe vwe?

¹⁰Kerobo rẹ Ọrovwohwo Ọghẹnẹ wẹn herọ na, o vwo ẹgborho eyẹ uvie rẹ ọrovwovwe ja guọnọ owẹ ra-a; ọke rẹ ayen da ta, ọ hẹ etinẹ-ẹ, ọ me vwẹ ẹgborho na eyẹ uvie yena vwo duvwu iyori, nẹ ayen mrẹ wẹ-ẹ.

¹¹Asakiephana wọ ta kẹ vwẹ nẹ, Yanran ra ta kẹ ọrovwovwe, Nighe, Ilaija hẹ etinẹ,

¹²Ri mi de ghwe vrẹn nẹ asan wọ epha nu, sẹ Erhi rẹ Ọrovwohwo che mu we kpo asan ri mi jẹriẹn me riẹnre-e; kọye, ọke re me da rhe rhe vuẹ Ehab rọ gbe rha mrẹ wẹ-ẹ, ko hwe vwe, dede na odibo wẹn mu ọghọ kẹ Ọrovwohwo nẹ ọke-emọ mẹ rhe.

¹³A vuẹ ọrovwovwe vworẹ, obo ri mi ruru vwẹ ọke ri Jezibẹl vwo hwe emraro rẹ Ọrovwohwo, obo ri mi si emraro rẹ Ọrovwohwo ujori nu ujuvẹ gbe ihwe ẹko vwẹ evun rẹ emwa, re me da vwẹ emu kugbe ame vwọ ghẹrẹ aye-ẹn?

¹⁴Asakiephana wọ ra tanẹ, Yanran ta kẹ ọrovwovwe, Nighe, Ilaija hẹ etinẹ; ko hwe vwe.

¹⁵Ilaija da ta, Kirobo rẹ Ọrovwohwo herọ na, ri mi mudia vwẹ obaro rọye na, Me ghene vwẹ oma mẹ phia kẹ nonẹ.

¹⁶Ọtiọye Obadaya da yanran ra vwa Ehab, ọ da ta kẹ, Ehab da yanran ra vwa Ilaija.

¹⁷Ọke rẹ Ehab vwọ mrẹ Ilaija, Ehab da kẹ, ọna owẹ, ro kpokpo Izrẹl na?

¹⁸Ọ da kpahe, Mi kpokpo Izrẹli-i, ẹkẹvuọvo wẹ, uwevwi rẹ ọsẹ wẹn, fikiridie wọ sen iji rẹ Ọrovwohwo na wo de nene Baal.

¹⁹Asakiephana gbe ji ohwo se re Izrẹl ejobi rhi koko vwẹ Ugbenu ri Karmẹl, ji se emraro ujori ẹne gbe ujuvẹ gbe ihwe ri Baal kugbe emraro ujori ẹne ihwo rẹ Ashera, re re emu vwẹ imẹjẹ ri Jezibẹl.

²⁰Ọtiọye Ehab de ji ihwo re se ihwo Izrẹl ejobi, ọ da ghwẹ emraro na koko vwẹ Ugbenu ri Karmel.

²¹Ilaija dẹ rhi sikẹre ihwo na ejobi, ọ da ta, Mavọ ovwan vwo iroro ivivẹ krite? ọ da dianẹ Ọrovwohwo ọye Ọghẹnẹ, we nene; ẹkẹvuọvo ọ da dia Baal, we gbe nene. Ihwo na kpahe ọvuọ kẹ-ẹ.

²²Etiyin Ilaija da ta kẹ ihwo na, Mẹvwẹ, ọvo kpoi, ọye ọmraro rẹ Ọrovwohwo ro chekọ; ẹkẹvuọvo emraro ri Baai ujori gbe ujuvẹ gbe ihwe soso.

²³E jẹn a kẹ avwanre irhuẹn ivẹ; e jẹn ayen jẹ erhuẹn ọvo kẹ oma rẹ ayen, re ayen nyavwọ ibribro ghwẹ kpahe urhe, ẹkẹvuọvo e koko erhre phihọ-ọ; ke Me je nyavwe omẹ ibribro ghwẹ kpahe urhe, e koko erhanre phihọ-ọ.

²⁴wo se odẹ rẹ ẹdjọ wẹn rere mi se odẹ Ọrovwohwo. Ọghẹnẹ rọ vwẹ erhanre mie kọye hẹ ọfuanfon. Ihwo na ejobi da kpahe Wọ riẹnre ta.

²⁵Etiyin Ilaija da ta kẹ emraro ri Baal, Wa jẹ erhuẹn ọvo kẹ oma ovwan re wa va, kidie ovwan pha buebu; we se odẹ rẹ ẹdjọ rẹ ovwan, we koko erhre phihọ-ọ.

²⁶Ayen da reyọ erhuẹn na, ayen da va, ayen de se odẹ ri Baal nẹ irhiọke te oghẹruvo, tanẹ, E Baal nyo avwanre Ẹkẹvuọvo e nyo urhuru ọvuọvo-o, ohwo ọvuọvo nyori-i. Ayen de pho kreikrei riariẹ agbada rẹ ayen soro na.

²⁷Vwẹ oghẹruvo Ilaija da vwẹ ayen jehwẹ, tanẹ, Van gan kidie ẹdjọ o ruẹ; ọkẹọvo jẹ oma ra vwerhọ eyẹ ọ ghwẹ oma phihọ akakọ, eyẹ o kpo asan eyẹ ọkeọvo yọ vwerhẹ ka rhọvwọ.

²⁸A da van gangan, ayen da vwẹ erakivẹ bru oma kirobo rẹ uruemu rayen epha, bẹsiẹ rẹ ọbara ki rhi hwẹ ku ayen oma.

²⁹Rẹ ọnre vwọ gẹrẹ re, yẹ ayen di muẹ gbọ rhiri rhi te ọke re izobo rẹ ovwọnvwọn, ẹkẹvuọvo e nyo urhuru ọvuọvo-o; ohwo ọvuọvo nyori-i ohwo ọvuọvo davwerhọ-ọ.

³⁰Etiyin Ilaija da ta kẹ ihwo na ejobi,. sikẹrẹ ovwẹ; ihwo na ejobi de sikẹrẹ. ọ rhuẹrẹ agbada rẹ Ọrovwohwo ro rhurie she jovwo na;

³¹Ilaija da tọrọ ibieragha ihwivẹ, kirobo rẹ orua rẹ emọ ri Jekọp epha, rẹ ota rẹ Ọrovwohwo bru rhe, tanẹ, Izrẹl re cha dia odẹ wẹn;

³²ibieragha na ke eye ọ vwọ so agbada vwẹ odẹ rẹ Ọrovwohwo na. ọ da tọn ukpotọ riariẹ agbada na phihọ, hẹhẹre kerẹ ẹrhẹ ọnẹ ivẹ.

³³Ọ da rhuẹrẹ irhe na phihọ, ọ da nyavwe erhuẹn na ibribro ọ da ghwẹ kpahe enu rẹ irhe na. Ọ da ta, Vo ame vọn echẹ na, re kuo ku izobo rẹ ẹtorhẹ na, ji kugbe irhe na.

³⁴ọ da ta, Wa vwariẹn; ayen da vwariẹn. ọ da ta, We ruo obọ rerha; ayen de ruo obọ rerha.

³⁵Ame na da djẹ riariẹ agbada na phihọ, ukpotọ na da rhe vọn vẹ ame.

³⁶Ọke rẹ izobo rẹ ẹtorhẹ na vwo te, Ilaija rẹ ọmraro na de si kẹrẹ ọ da ta, E Ọrovwohwo, Ọghẹnẹ rẹ Ebraham, Aizik, kugbe Izrẹl, jẹn a riẹn nonẹ na nẹ wẹ ọfuanfon rọ hẹ Izrẹl, nẹ mẹvwẹ kẹ odibo wẹn, nẹ ota wẹn mi vwo ruẹ imu nana.

³⁷Nyo vwe, E Ọrovwohwo, nyo vwe, rere ihwo nana vwọ sa riẹn nẹ wẹ, E Ọrovwohwo, ọye Ọghẹnẹ, rọ rhẹriẹ udu rayen kpo uko.

³⁸Etiyin erhanre rẹ Ọrovwohwo de shotọ, ọ da torhẹ izobo na, vẹ irhe na, vẹ ibieragha na, vẹ iwurhie na, ọ da rare ame rọ hẹ ukpotọ na kpae.

³⁹Ọke rẹ ihwo na ejobi vwọ mrẹ, ayen de she bọvwọ epharo rayen rhuotọ; ayen da ta, Ọrovwohwo na, ọye Ọghẹnẹ Ọrovwohwo na, ọye Ọghẹnẹ.

⁴⁰Ilaija da ta kẹ ayen, We shabọ phihọ emraro ri Baal na; we jẹn ọvuọvo rẹ ayen djẹ vabọ-ọ. Ayen de shabọ phihọ ayen; Ilaija de sun ayen kpo uto ri Kishọn, o de hwe ayen vwẹ etiyin.

⁴¹Ilaija da ta kẹ Ehab, Yanran, ra re re wọ da; kidie umri rẹ osio re do cha,

⁴²Ọtiọye Ehab da yanran ra re ra da. Ilaija da yanran kpo obenu ri Karmel; o de rhuẹ kpotọ, ọ da vwẹ opharo hwa asan igbo rọye.

⁴³Ọ da ta kẹ Odibo rọye, Yanran Asakiephana, ni obo abadi na. Ọ da yanran re no, ọ da ta, Emuọvo herọ-ọ. Ọ da ta, Rhoma yanran asiẹghwrẹ.

⁴⁴Vwẹ obọ righwrẹ na ọ da ta, Nighere, umukori rẹ egho kerẹ obọ rẹ ohwo ra va nẹ obo abadi na cha. ọ da ta, Yanran, ra ta kẹ Ehab, Rhuẹrẹ ekpẹrẹ wẹn re we kpo, osio de rhe ke we phihọ.

⁴⁵Nanana enu de ghwe rhi bi hwi vẹ odju, okposio rode da rhe rhọ. Ehab da gua kpo Jezril.

⁴⁶Obo rẹ ọfuanfon da hẹ enu rẹ Ilaija; ọda chobiẹ amwa rọye ọ da vwọ tua Ehab re te ughere ri Jezril.