Read urhobo 1 Ivie 19 Bible Online

1 Ivie 19 - urhobo bible

1 Ivie 19

¹Ehab da vuẹ Jezibẹl obo rẹ Ilaija ruru ejobi, obo rọ vwẹ ọlọkọ hwe emraro na ejobi;

²etiyin Jezibẹl de ji ikọn bru Ilaija tanẹ, ọtiọye ẹdjọ na ru kẹ vwẹ, e je nọ ọtiọye rhe, ri mi gbe rhe hwe we vwẹ ọke ọtiọna odẹ rọ cha na-a kirobo ru wo hwe ọvo vwẹ usun rẹ ayen na.

³Etiyin oshọ de muo, o de vrẹn ọ da djẹ kpo Beer-sheba, ri Juda, fiki rẹ arhọ rọye, ọ da yan jẹ odibo rọye vwo vwẹ etiyin.

⁴Ẹkẹvuọvo ekpuyovwi rọye da yan oyan rẹ ẹdọke soso ro evun rẹ aghwa, ọ da rhe o de rhi tidia otọ rẹ urhe rẹ uhwerhe; ọda guọnọ nẹ ọye ghwe ghwu siẹvo, tanẹ, O teri, asakiephana, E Ọrovwohwo, reyọ arhọ mẹ, kidie mi yovwi nọ esẹ mẹ-ẹ.

⁵O de shevwerhẹ kọ vwerhẹ vwẹ otọ rẹ urhe rẹ uhwerhe na; nighere, amakashe da rhọvwọ, ọ da ta kẹ, Vrẹn wọ re emu.

⁶ọ de gheghe rhe, nighere, e mu ikara rọ rhorha ghwoghwo kugbe ọtoto rẹ ame kẹrẹ asan uyovwi rọye. ọ da re ọ da da, ọ da rhoma shevwerhẹ.

⁷Amakashe rẹ Ọrovwohwo na da rhoma rhe vwẹ obọ rivẹ, ọ da rhọvwọ, ọ da ta, Vrẹn wọ re emu, oyan na de rhi gro nọ kẹ wẹ.

⁸ọ de vrẹn, ọ da re ọ da da, ogangan rẹ ọyena kọye ọ vwọ yan uvo ujuvẹ kugbe ason ujuvẹ vwo kpo ugbenu rẹ ọfuanfon re se Horẹb.

⁹Etiyin o de rhi te ẹmwa ọvo, o de wo phihọ etiyin; nighere, ota rẹ Ọrovwohwo de bro rhe, ọ da ta kẹ, Die wo ruẹ vwẹ etinẹ, Ilaija?

¹⁰Ọ da ta, A rioma kpahe ovwẹ fiki rẹ Ọrovwohwo, Ọghẹnẹ rẹ otuofovwi na; kidie ihwo rẹ Izrẹl sen ọphọ wẹn, ayen kporo egbada wẹn she, ayen nyavwe emraro wẹn hwe; ko mẹvwẹ, mẹvwẹ ọvo kpoi, ri chekọ; yẹ ayen je guọnọ arhọ mẹ, rẹ ayen hwe.

¹¹Ọ da ta, Yan phia, re mudia enu rẹ ugbenu vwẹ obaro rẹ Ọrovwohwo. Nighere, Ọrovwohwo ra wanvrẹn, aphopho rode rhi dju igbenu na, o de hwe eragha na ibribro vwọ obaro rẹ Ọrovwohwo, ẹkẹvuọvo Ọrovwohwo hẹ evun rẹ odju na-a; rẹ odju na vwo fue nu otọ de kpogho, ẹkẹvuọvo Ọrovwohwo hẹ evun rẹ otọ ro kpogho na-a;

¹²rẹ otọ na vwo kpogho nu kẹ erhanre, ẹkẹvuọvo Ọrovwohwo hẹ evun rẹ erhanre na-a; rẹ erhanre na vwo fun nu kẹ umurhuru bọrọ bọrọ.

¹³Ọke rẹ Ilaija vwo nyo, ọ da vwẹ okpan rọye vwo rhurhu opharo rọye o de re mudia vwẹ unu rẹ emwa na. Nighere, urhuru de bro rhe, ọ da ta, Die wo ruẹ vwẹ etinẹ, Ilaija?

¹⁴ọ da ta, A rioma kpahe ovwẹ gangan fiki rẹ Ọrovwohwo, Ọghẹnẹ rẹ otuofovwi na: kidie ihwo rẹ Izrẹl sen ọphọ wẹn, ayen kporo egbada wẹn she, ayen nyavwe emraro wẹn hwe; ko mẹvwẹ, mẹvwẹ ọvo kpoi, ri chekọ, yẹ ayen je guọnọ arhọ mẹ, rẹ ayen hwe.

¹⁵Ọrovwohwo da ta kẹ, Yanran, rhivwi ra wan idjerhe rẹ aghwa ri Damaskọs; wo de te etiyin, ko wọ vwẹ evwri ghworo Hazael rọ dia ovie ri Siria;

¹⁶gba rha vwe evwri ghworo Jehu rẹ ọmọ ri Nimshi ro dia ovie rẹ Izrẹl; kugbe re wọ rha vwẹ evwri ghworo Ilaesha ọmọ ri Shafat rẹ Abelmeholah rọ dia ọmraro vwẹ ẹdia wẹn.

¹⁷Ọ rọ vabọ rẹ ọlọkọ ri Hazael, Jehu ko hwe; ọ rọ rha vabọ rẹ ọlọkọ ri Jehu kọye Ilaesha rhe hwe.

¹⁸Dede na yi mi che jẹ ihwo uriori ighwrẹ vwo vwẹ Izrẹl, igbo ejobi ri ji diguẹ ki Baal dẹvo-o, kugbe unu kunu rọ jẹ fiọnfiọn dẹvo-o.

¹⁹Ọtiọye o de vrẹn nẹ etiyin, ọ da mrẹ Ilaesha rẹ ọmọ ri Shafat, rọ vwẹ ekru rẹ irhuẹn ihwivẹ voro ivoro, ọ vẹ ekru rẹ ọ rihwivẹ na ri gbe mudia kẹrẹ oma. Ilaija da wanvrẹn o de phi okpan rọye na yan.

²⁰ọ da yan jẹ irhuẹn na vwo, ọ da djẹ nene Ilaija, ọ da ta, Jẹn uvwe ra fiọnfiọn ọsẹ mẹ vẹ oni mẹ, re mi rhi nene uwe. ọ da ta kẹ, Rhivwi kpo; kidie mi ru kẹ wẹ?

²¹O de rhivwi jovwo, ọ da reyọ ekru rẹ irhuẹn na, o de hwe ayen, o de chere ekru rẹ irhuẹn na, ọ da vwẹ ayen kẹ ihwo na, ayen da re. Etiyin ọ de vrẹn o de nene Ilaija, o de gbe odibo kẹ.