Read urhobo 1 Ivie 20 Bible Online

1 Ivie 20 - urhobo bible

1 Ivie 20

¹Bẹnhadad ovie ri Siria da ghwẹ unuofovwi rọye koko; ivie ọgban gbe ivẹ vẹ ọye gba herọ, kugbe iyesi kugbe ekpẹrẹ rẹ ofovwi, ọ da yanran re phi Sameria, ọ vẹ ọye da họnre.

²Ọ de ji ikọn kpo obo orere na bru Ehab ovie rẹ Izrẹl ra, ọ da ta kẹ, E nẹ Bẹnhadad tare:

³Idọnọ efuanfon wẹn kugbe iro wẹn e mẹ; eya wẹn ri me yovwi ejobi kugbe emọ wẹn e mẹ.

⁴Ovie rẹ Izrẹl da kpahe, Kirobo wọ tare na, ọrovwovwe, E ovie, mẹvwẹ ọwẹn, kugbe obo ri mi vwori ejobi.

⁵Ikọn na de rhivwi rhe, e da ta, E nẹ Bẹnhadad tare: mi ji ohwo bru we rhe, tanẹ, Ghwẹ idọnọ efuanfon wẹn kugbe iro wẹn, eya wẹn kugbe emọ wẹn rhe vwe;

⁶yẹ ẹkẹvuọvo vwẹ odẹ rọ cha vwẹ oghẹre rẹ ọke ayen cha guọnọ uwevwi wẹn kugbe iwevwi rẹ idibo wẹn, kẹ ayen shabọ phihọ obo ri jẹ ayen ejobi, ka ghwẹ kpo.

⁷Etiyin ovie rẹ Izrẹl de se ekpako rẹ otọ na ejobi, ọ da ta, We no mu, asakiephana, obo rẹ ohwo nana guọnọ ota; kidie o ji ikọn rhe nẹ ọ rhe ghwẹ eya mẹ kugbe emọ mẹ, kugbe idọnọ efuanfon mẹ kugbe iro mẹ, me je sen kẹ-ẹ.

⁸Ekpako na ejobi kugbe ihwo na ejobi da ta kẹ, Wọ rhọvwa-a wọ kerhọ-ọ.

⁹Ọtiọye ọ da ta kẹ ikon ri Bẹnhadad, Ta kẹ ọrovwovwe, ovie, Obo ro wọ ka nọ vwẹ obọ rẹ odibo wẹn ejobi, mi se ruo; ẹkẹvuọvo emu nana mi se ruo-o. Ikọn na da rhe rhe vuẹ.

¹⁰Bẹnhadad de jo bro ra ọ da ta, Ẹdjọ na ru ọtiọye kẹ vwẹ, ọ tobọ no ọtiọye rhe, ọ da dianẹ iwurhie ri Sameria sa vọn ẹkuobọ rẹ ihwo ri che nene uvwe rhe.

¹¹Ovie rẹ Izrẹl da kpahe, Ta kẹ, E jẹn ohwo ro ku ekuakua rẹ ofovwi phihọ rha yoma kerẹ ohwo ro kuro nu-u.

¹²Ọke ri Bẹnhadad vwo nyo ovuẹ na rọ vẹ ivie na vwọ da udi vwẹ ọgarivi na, ọ da ta kẹ ihwo rọye, Wa ghare oma phihọ. Ayen da ghare oma phihọ riariẹ orere na.

¹³Nighere, ọmraro ọvo de rhi si kẹrẹ Ehab ovie rẹ Izrẹl ọ da ta, E nẹ Ọrovwohwo rare, Wọ mrẹ urogho nana? Nighere, mi che phio phihọ obọ wẹn nonẹ na; ku wọ riẹn nẹ mẹvwẹ Ọrovwohwo na.

¹⁴Ehab da ra, Vwẹ oma rẹ ono? ọ da ta, E nẹ Ọrovwohwo tare, Vwẹ oma rẹ idibo rẹ isun re dia ibretọ na. Etiyin ọ da ta, Kono ton ofovwi na phihọ? ọ da kpahe, Wẹ.

¹⁵Etiyin ọ da ghwẹ idibo rẹ isun rẹ ibretọ na koko, ayen da dia ujori ivẹ gbe ọgban gbe ivẹ; rẹ ayen vwọ gba nu ọ da ghwẹ ihwo rẹ Izrẹl ejobi koko, uriori ighwrẹ.

¹⁶Uvo koko ayen vwo vrẹn, vwẹ ọke ri Bẹnhadad vwọ da idi rẹ idi vwo muo vwẹ ọgarivi na, te ọye te ivie ọgban gbe ivẹ ro rhe cha uko na.

¹⁷Idibo rẹ isun rẹ ibretọ na da ka ka obaro. Bẹnhadad de ke ji ihwo re dọrhe, ayen da rhe vuẹ nẹ, Ihwo nẹ Sameria cha.

¹⁸Ọ da ta, ọ da dia ọ rẹ ufuoma ayen vwọ rhe, mu ayen ọkpokpọ; eyẹ ọ da dianẹ ọ rẹ ofovwi, mu ayen ọkpokpọ.

¹⁹Idibo rẹ isun rẹ ibretọ na, de vrẹn nẹ evun rẹ orere na, unuofovwi na da vwọ kpahe ayen.

²⁰Ọ vuẹ ohwo rọye de hwe ihwo ri Siria na da djẹ Izrẹl da vwọ tua ayen, ẹkẹvuọvo Bẹnhadad ovie ri Siria ghwe pho ro iyesi ọ vẹ ihwo re gua iyesi kẹ da djẹ vabọ.

²¹Ovie rẹ Izrẹl da vwọ tua ayen, o de mu iyesi na vẹ ekpẹrẹ na, o de hwe ihwo ri Siria na gangan.

²²Etiyin ọmraro na de rhi si kẹrẹ ovie re Izrẹl na, ọ da ta kẹ, Yanrhe, cha oma wẹn, re wo roro obo ru wo che ru; kidie asan evwru na ovie ri Siria na che rhivwi rhe rhe họnre owẹ.

²³Idibo rẹ ovie ri Siria da ta kẹ, Ẹdjọ rayen ẹdjọ rẹ ugbenu, ọtiọye na kọye ayen vwọ gan nẹ avwanre; ẹkẹvuọvo gbe jẹ avwanre ra họnre ayen vwẹ otọ diodi, uyota na kẹ avwanre gan nọ ayen.

²⁴Gbe ru ọna si ivie na ọvuọvo nẹ ẹdia rọye, rere wo phi onotu phihọ ẹdia rayen;

²⁵si unuofovwi koko gbidi kerẹ unuofovwi re ehweri na, iyesi sun iyesi, ekpẹrẹ sun ekpẹrẹ kẹ otọ diodi avwanre da họnre ayen, avwanre ke gan nọ ayen. O de nyo ota rayen na, o de ru ọtiọye.

²⁶Vwẹ asan evwru na Bẹnhadad da ghwẹ ihwo ri Siria koko gbidi, ọ da yanran kpo Afẹk, ra họnre Izrẹl.

²⁷A da ghwẹ ihwo rẹ Izrẹl koko gbidi, ayen je ghwa emuọre cha oma, ayen da ra ghare oma; ihwo rẹ Izrẹl de re mu erhọn phihọ obaro rẹ ayen kerẹ emekrun rẹ ẹvwe ivẹ, ẹkẹvuọvo ihwo ri Siria da rhe vọn asan ejobi kpisi.

²⁸Ohwo rẹ ọfuanfon ọvo de rhi si kerẹ oviẹ rẹ Izrẹl ọ da ta kẹ, E nẹ Ọrovwohwo tare, Fikirobo rẹ ihwo ri Siria vwọ ta, Ọrovwohwo vwonẹ ẹdjọ rẹ igbenn ẹkẹvuọvo yọ dia ẹdjọ rẹ iyara-a na, fiki rẹ ọtiọye na ki mi che phi urogho rode nana phihọ owẹ obọ, ko wọ riẹn nẹ Mẹvwẹ hẹ Ọrovwohwo na.

²⁹Ayen ohwo de mu erhọn hirhe aro ku ohwohwo ẹdẹ ighwrẹ. Vwẹ ẹdẹ righwrẹ ofovwi de rhi she; ihwo rẹ Izrẹl de hwe ihwo ri Siria re vwẹ owọ yan uriori ujori vwẹ ẹdọke.

³⁰I ri chekọ da djẹ kpo orere rẹ Afẹk; igbẹhẹ de rhe she teye ihwo uriori uje gbe ighwrẹ ri chekọ. Bẹnhadad da je djẹ rhe, o de re sioma nu vwẹ uvun ọvo vwẹ orere na.

³¹Idibo rọye da ta kẹ, Nighere, asakiephana, avwanre nyori nẹ ivie rẹ uwevwi rẹ Izrẹl vwonẹ i nẹ arodọvwẹ gangan; jẹn avwanre vwẹ esiso rhuo re avwanre jẹ ufi phihọ ohọre, rẹ avwanre bru ovie rẹ Izrẹl; ọkeọvo o mi jẹ uwe vwo ehwe.

³²Ọtiọye ayen da vwe esiso rhuo, ayen da jẹ ufi phihọ, ayen da yan bru ovie rẹ Izrẹl ayen da ta, odibo wẹn Bẹnhadad tare, Biko wo hwe vwe-e. ọ da ta, ọ tobọ je herọ? Ọniọvo mẹ o ruẹ.

³³Asakiephana yẹ asan esiri re se ayen, ayen de ghwe bru okpakpa nyo kẹ ayen da ta, E, oniọvo wẹn Bẹnhadad. Etiyin ọ da ta, Yanran ra reyọ rhe. Etiyin Bẹnhadad de bro rhe; o de se rhi tidia evun rẹ akpẹrẹ rọye.

³⁴Etiyin Bẹnhadad da ta kẹ, Irere rẹ ọsẹ mẹ mie ọsẹ wẹn mi siobọ nẹ ayen kẹ wẹ; rere wọ rha bọn eki phihọ Damaskọs, kirobo rẹ ọsẹ mẹ bọn phihọ Sameria. Ahab da ta, Fiki rẹ Ọnana ki mi siobọ nẹ uwe. Ọtiọye na ọ vẹ ọye da re ọphọ, o de siobọ no kpo.

³⁵Ohwo ọvo vwẹ usun rẹ emọ rẹ emraro na da ta kẹ otu rọye ọvo kirobo rẹ Ọrovwohwo vuẹrẹ na, Ghwiẹ vwẹ, Me rẹ wẹ. Ẹkẹvuọvo ohwo na rhọvwe ghwiẹ-ẹ.

³⁶Etiyin ọ da ta kẹ, Fikiridie wọ rhe mu ọghọ kẹ urhuru rẹ Ọrovwohwo na-a, nighere wọ de ghwe nẹ asan re mie pha nu okpohrokpo ko hwe we. Ro ghwe vwo vrẹn nẹ asan ro epha nu, okpohrokpo da vwa o de hwe.

³⁷Etiyin ọ da rha mrẹ ohwo ọfa, ọ da ta, Ghwie vwẹ, Me rẹ wẹ. Ohwo na da ghwiẹ, ọ ghwiẹrẹ ọ da wan oma.

³⁸Ọtiọye na ọmraro na de kpo, ọ da ra hẹrhẹ ovie na vwẹ idjerhe, o de wene oma rọye ọ da vwẹ ukpoyibo gba ibiẹro rọye.

³⁹Rẹ ovie na vwọ wanvrẹn, o de kperi se ovie na ọ da ta, odibo wẹn yanran kpo uherevie rẹ ofovwi na; nighere, ohwo rẹ ofovwi ọvo de kuoma rhẹriẹ ọ da vwẹ ohwo ọvo rhe vwe, ọ da ta, Yọnrọn ohwo nana; ọ da dianẹ o ghwruru, ke hwe wẹ sohọ, ọ rha dia ọtiọye ku wọ hwa talẹnt rẹ idọnọ ọfuanfon.

⁴⁰Rẹ odibo wẹn vwo ruẹ hwrahwrahwra vwẹ etinẹ ọ da djẹ. Ovie rẹ Izrẹl da ta kẹ, Kẹ ọtiọye ọye orhiẹn wẹn dia; wẹ ọvo ri brorhiẹ na.

⁴¹Etiyin o de ghwe bru okpakpa si ukpoyibo na nẹ ibiẹro rọye, ovie rẹ Izrẹl de ghwe vughe nẹ ọye ọvo vwẹ usun rẹ emraro na.

⁴²Ọ da ta kẹ, E nẹ Ọrovwohwo tare, Fikiridie wo siobọ nẹ ohwo ri mi vwo ze kẹ ughwu na, ọtiọye na ke ji hwe we sohọ; ke ji hwe ihwo we sohọ ihwo rọye.

⁴³ovie rẹ Izrẹl da yanran kpo uwevwi rọye vwi Sameria vẹ ophu kugbe opharo zogha.