Read urhobo 1 Ivie 22 Bible Online

1 Ivie 22 - urhobo bible

1 Ivie 22

²Ẹkẹvuọvo vwẹ ukpe rerha Jehoshafat ovie ri Juda de bru ovie rẹ Izrẹl rhe.

³Ovie rẹ Izrẹl da ta kẹ idibo rọye, Wa riẹn Ramot-gilead ọ rẹ avwanre, yẹ avwanre rha je reyọ mie ovie ri Siria?

⁴Ọ da ta kẹ Jehoshafat, Wo se sun vwo kpo ofovwi vwẹ Ramot-gilead? Jehoshafat da ta kẹ ovie rẹ Izrẹl, Ọbo wọ epha ọye mi epha, ihwo mẹ kerẹ ihwo wẹn, iyesi mẹ kerẹ iyẹsi wẹn.

⁵Jehoshafat da ta kẹ ovie rẹ Izrẹl duoto rọye vwẹ obọ rẹ Ọrovwohwo

⁶Etiyin ovie rẹ Izrẹl da ghwẹ emraro koko, re joma bute ujori ẹne, ọ da ta kẹ Me ra họnre Ramot-gilead, gbenẹ mi jovwo? Ayen da ta, Ra, kidie Ọrovwohwo che phio họ obọ rẹ ovie.

⁷Ẹkẹvuọvo Jehoshafat da ta, Ọmraro rẹ Ọrovwohwo ọfa gbe hẹ etinẹ ro se duotọ rọye?

⁸Ovie rẹ Izrẹl da ta kẹ Jehoshafat, Ohwo ọvo ji chekọ re duotọ rẹ Ọrovwohwo vwẹ obọ rọye, Maikaya ọmọ rẹ Imlah, ẹkẹvuọvo o tu vwe oma, kidie ọ mraro esiri kpahe ovwẹ-ẹ, ẹkẹvuọvo umiovwo. Jehoshafat da ta, E jẹn ovie ta ọtiọye-e.

⁹Etiyin ovie rẹ Izrẹl de se oruiruo ọvo ọ da ta, Re se Maikaya rẹ ọmọ rẹ Imlah rhe vwe jọphẹre.

¹⁰Asakiephana ovie rẹ Izrẹl vi Jehoshafat ovie ri Juda tidia vwẹ enu rẹ ekete rayen, ku edagba rayen phihọ vwẹ utuwevwi re de wuye ọka rọ hẹ ughere vwẹ unurhoro ri Sameria; yẹ emraro na ejobi ra mraro vwẹ obaro rẹ ayen.

¹¹Zẹdikaya ọmọ ri Chenaanah de duvwu lghoro rẹ utehru kẹ oma rọye, ọ da ta, E nẹ Ọrovwohwo tare, Ighoro nana we che vwo dje ihwo ri Siria bẹsiẹ rẹ ayen vwọ ghwọrọ.

¹²Emraro na ejobi da mrẹ ọtiọye, ayen da ta, Kpo Ramot-gilead re phi kparobọ; Ọrovwohwo che phio phihọ obọ rẹ ovie.

¹³Ikọn re ji re se Maikaya na da ta kẹ, Nighe, emraro na ejobi ku unu gbe ọvo ta ota vwevwerhe kẹ ovie; gbe jẹ ota wẹn je họhọ ọ rẹ ayen, re wọ ta ota ọvwevwerhe.

¹⁴Ẹkẹvuọvo Maikaya da ta, Kirobo rẹ Ọrovwohwo vwọ herọ na, obo rẹ Ọrovwohwo ta kẹ vwẹ, ọye Me ta.

¹⁵Ọke ro rhi vwo te asan rẹ ovie, ovie na da ta kẹ, Maikaya, avwanre kpare ofovwi kpo Ramot-gilead, gbenẹ avwanre jovwo? Ọ da kpahe kẹ, Ra re phi kparobọ; Ọrovwohwo che phio phihọ obọ rẹ ovie.

¹⁶Ẹkẹvuọvo ovie da ta kẹ, Bro ọke me ta ota kẹ wẹ nẹ ta uyota ọvo kẹ vwẹ vwẹ odẹ rẹ Ọrovwohwo?

¹⁷Ọ da ta, Me mrẹ Izrẹl ejobi re hrabọ nene enu rẹ ugbenu na, kerẹ igegede ri vwo osu-un; Ọrovwohwo da ta, Enana vwo onini-i; jẹn dohwo duwevwi rọye ra vwẹ ufuoma.

¹⁸Ovie rẹ Izrẹl da ta kẹ Jehoshafat, Me ta kẹ wẹ nẹ ọ cha mraro oyoyovwi kpahe ovwẹ-ẹ, ẹkẹvuọvo omiomiovwi?

¹⁹Maikaya da ta, Vwẹ ọtiọye na gbe nyo ota rẹ Ọrovwohwo: Me mrẹ Ọrovwohwo ro tidia vwẹ enu rẹ ekete rọye, otu rẹ odjuvwu ejobi de mudia kẹrẹ vwẹ obọrhe vẹ obọhwẹre rọye;

²⁰Ọrovwohwo da ta, Ono re riẹriẹ Ehab, rere e re hwe vwi Ramọt gilead? ọvo ta ọvo, ọrivẹ ra ta ọfa.

²¹Etiyin erhi ọvo de rhi mudia vwẹ obaro rẹ Ọrovwohwo, tanẹ, Me ra riẹriẹ.

²²Ọrovwohwo da ta kẹ, Didi idjerhe? Ọ da ta, Me ra, rere me ra dia erhi rẹ efian vwẹ unu rẹ emraro rọye ejobi. ọ da ta, Wọ ra ra phiẹn, ku wọ kparobọ; yanran wo re ru ọtiọye.

²³Asakiephana gbe nighe, Ọrovwohwo phi erhi rẹ efian phihọ unu rẹ emraro wẹn nana; Ọrovwohwo ta ota omiomiovwi kpahe owẹ nure.

²⁴Etiyin Zẹdikaya ọmọ ri Chanaanah de si kẹrẹ ọ da ghwiẹ Maikaya ohwa, tanẹ, Mavọ Erhi rẹ Ọrovwohwo vwo nẹ uvwe oma ra ta ota kẹ wẹ?

²⁵Maikaya da ta, Nighe, wọ cha mrẹ vwẹ ẹdẹ yena ru wọ da cha djẹ ro uvun re sioma wẹn nu.

²⁶Ovie rẹ Izrẹl da ta, Shabọ phihọ Maikaya, re wọ reyọ vwo rhe Amọn osun rẹ orere na kugbe Joash ọmọ rẹ ovie;

²⁷re wọ ta, E nẹ ovie tare, phi ohwo nana phihọ uwodi, re wọ vwẹ ikara phẹphẹghẹ vwọ kẹ kugbe ame, bẹsiẹ me vwọ rhe vwẹ ufuoma.

²⁸Maikaya da ta, Wo de rhivwi rhe vwẹ ufuoma, yẹ Ọrovwohwo rha ta ota kẹ vwẹ-ẹ. Ọ da ta, Nyo, ihwo na ejobi.

²⁹Ọtiọye ovie rẹ Izrẹl kugbe Jeboshafat ovie ri Juda de kpo Ramot-gilead.

³⁰Ovie rẹ Izrẹl da ta kẹ Jehoshafat, Mi wenoma ri mi kpo ofovwi na, ẹkẹvuọvo ku edagba wẹn phihọ. Ovie rẹ Izrẹl de wenoma rọye o de kpo ofovwi na.

³¹Asakiephana ovie ri Siria de ji urhi kẹ inotu rọye ọgban gbe ivẹ re gua ekpẹrẹ rọye, We nene ohwo rode eyẹ otete họnra-a, ẹkẹvuọvo jokpa rẹ ovie rẹ Izrẹl ọvo.

³²Ọke rẹ inotu rẹ ekpẹrẹ na vwọ mrẹ Jehoshafat, ayen da ta, Uyota Ọnana ovie rẹ Izrẹl. Ọtiọye na ayen de kuoma rhẹriẹ nẹ ayen ra họnro; Jehoshafat de kperi phia.

³³Ọke rẹ inotu rẹ ekpẹrẹ na vwọ mrẹ nẹ ọ dia ovie rẹ Izrẹli-i, ayen de chuko kuo.

³⁴Ẹkẹvuọvo ohwo ọvo de di gbe uvwrogho si umurhabọ rọye, o de re she muo ovie rẹ Izrẹl asan ophapha rẹ udu na; vwẹ ọtiọye na ọ da ta kẹ ohwo rọ gua ekpẹrẹ rọye, Rhoma, ru wo mu vwe kpo nẹ ofovwi na, kidie a wan vwẹ oma.

³⁵Ofovwi na da rhe gan vwẹ ẹdẹ yena, ka de vwẹ obọ cha ovie vwẹ evun rẹ ekpẹrẹ rọye yo hirhe opharo ku ihwo ri Siria na, bẹsiẹ rẹ ovwọnvwọn vwo te o de ghwu; ọkẹre rẹ ọbara re era ra sa rọ na da djẹ kpo obotọ rẹ ekpẹrẹ na.

³⁶Rẹ ọnre vwo she re e de kudje se unuofovwi na, Dohwo dorere rọye da ra, dohwo dorho rọye da ra.

³⁷Ọtiọye ovie na de ghwu, e de muo rhe Sameria; e de shi ovie na phihọ Sameria.

³⁸Ayen ke hworhẹ akpẹrẹ na vwẹ ẹtẹrhe ri Sameria, eranko da rare ọbara rọye, igberadja na da họ oma rayen vwẹ evun rọye, kerẹ ota rẹ Ọrovwohwo tare.

³⁹Asakiephana eyenre rẹ Ehab ro chekọ, kugbe obo ro ruru ejobi, uwevwi rẹ akeni rọ bọnre, kugbe irere rọ họnre, e rhi si ayen phihọ Ọbe rẹ Ikun rẹ ivie rẹ Izrẹl?

⁴⁰Ọtiọye na Ehab de ghwu bru esẹ rọye; Ahazaya rẹ ọmọ rọye da re vwẹ ẹdia rọye.

⁴¹Jehoshafat ọmọ rẹ Asa de mu ẹriọ phihọ vwi Juda vwẹ ukpe rẹne rẹ Ehab ovie rẹ Izrẹl.

⁴²Jehoshafat da dia ikpe ọgba gbe iyori vwẹ ọke ro vwo mu ẹriọ phihọ vwi Jerusalẹm. Odẹ rẹ oni rọye Azubah ọmọtẹ ri Shilhi.

⁴³Ọ da vwọ kpahe idjerhe ejobi rẹ ọsẹ rọye Asa; o gbobọ nyẹ-ẹ, o de ru obo ri yovwiri vwẹ obaro rẹ Ọrovwohwo; dede na a sa guọghọ asa ri kpenu na-a, yẹ ihwo na ji ze izobo ayen je torhẹ insẹns vwẹ asan ri kpenu na.

⁴⁴Jehoshafat vẹ ovie rẹ Izrẹl da rhuẹrẹ kugbe.

⁴⁵Asakiephana eyenre ri Jehoshafat ro chekọ, kugbe ẹgba ro vwori, obo ro phi ofovwi te, e rhe si ayen phihọ Ọbe rẹ Ikun rẹ Ivie ri Juda?

⁴⁶Emerha ro chekọ vwẹ ẹgbẹ rẹ igberadja re eshare da rọvwọ eshare re herọ vwẹ ọke rẹ Asa ọsẹ rọye, o de sionẹ otọ na kakare.

⁴⁷O vwo ovie vwẹ Edọmu-u; ohwo ghevweghe kọye ru iruo rẹ ovie.

⁴⁸Jehoshafat da kare ekọ ri Tarshish ri kpo ọfa ra ghwẹ iro; ẹkẹvuọvo e gbe rha ra-a, kidie ekọ na i shuru vwẹ Eziọn-geber.

⁴⁹Etiyin Ahazaya ọmọ rẹ Ehab da ta kẹ Jehoshafat, Jẹn idibo mẹ nene idibo wẹn ro ekọ na, ẹkẹvuọvo Jehoshafat gbe rhọvwe-e.

⁵⁰Jehoshafat de ghwu bru esẹ rọye, e de sho kugbe esẹ rọye vwẹ orere ri Devid ọsẹ rọye; Jehoram rẹ ọmọ rọye da re vwẹ ẹdia rọye.

⁵¹Ahazaya ọmọ rẹ Ehab da re vwẹ Izrẹl vwi Sameria vwẹ ukpe rẹ ihwe gbe ighwrẹ ri Jehoshafat ovie ri Juda, ọ da re ikpe ivẹ vwẹ Izrẹl.

⁵²O de ru obo re brare vwẹ obaro rẹ Ọrovwohwo, o de nene idjerhe rẹ ọsẹ rọye, kugbe idjerhe rẹ oni rọye, kugbe idjerhe ri Jeroboam ọmọ ri Nebat, rọ nẹrhẹ Izrẹl ru umwemwu.

⁵³Ọ da ga Baal ọ da gọ, ọ da kpare ophu rẹ Ọrovwohwo, Ọghẹnẹ rẹ Izrẹl, vwi kidjerhe kidjerhe ejobi rẹ ọsẹ rọye ruru.