Read urhobo 1 Ivie 8 Bible Online

1 Ivie 8 - urhobo bible

1 Ivie 8

¹Etiyin Solomọn de se ekpako rẹ Izrẹl kugbe igbuyovwi rẹ erua na, isun rẹ evwruwevwi rẹ esẹ rẹ ihwo rẹ Izrẹl koko kẹ Ovie Solomọn vwi Jerusalẹm, rere e mu ekpeti rẹ ọphọ rẹ Ọrovwohwo na nẹ orere ri Devid na rhe, rọ hẹ obi Zayọn.

²Ihwo rẹ Izrẹl ejobi de rhi si koko kẹ ovie Solomọn vwẹ orẹ na vwẹ emeranvwe rẹ Etanim, kọye eghwrẹ.

³Ekpako rẹ Izrẹl na ejobi da rhe, irherẹn na de mu ekpeti na.

⁴Ayen de mu ekpeti rẹ Ọrovwohwo na rhe, utughẹ rẹ a da vwa oma na, kugbe ekuakua efuanfon re hẹ evun rẹ utughẹ na; irherẹn na kugbe ihwo ri Livae na de mu ayen rhe.

⁵Ovie Solomọn kugbe ukoko rẹ Izrẹl, ri rhi si koko kẹ, vẹ ọye de mudia vwẹ obaro rẹ ekpeti na, rhe vwẹ igodẹ buẹbu kugbe irhuẹn eshare buebu rẹ unu je se kere vwo ze izobo.

⁶Etiyin irherẹn na de mu ekpeti rẹ ọphọ rẹ Ọrovwohwo na kpo asan rọye, vwẹ obo ẹtan rẹ ẹshẹ rẹ uwevwi na, vwẹ asan rọ ma fon na, vwẹ obotọ rẹ ibekpe ri shẹrobim na.

⁷Kidie shẹrobim na bẹrẹ ibekpe rayen sa asan ekpeti na, ọtiọye na shẹrobim na ko rhurhu ekpeti na vẹ ekpọghọ rọye.

⁸Ekpọghọ na grori gangan ka mrẹ urhurhuvwu rẹ ayen vwẹ obo asan ọfuanfon na rọ hẹ obaro rẹ ẹshẹ na; ẹkẹvuọvo asan dia obo otafe da mrẹ aye-en; ayen je hẹ etiyin rhi te nonẹ na.

⁹Emuọvo hẹ evun rẹ ekpeti na-a, jokpa rẹ ephapha rẹ elalọ ivẹ na ri Mosis phihọ vwi Horẹb, asan rẹ Ọrovwohwo vẹ ihwo rẹ Izrẹl da re ọphọ, rẹ ayen vwo nẹ otọ rẹ Ijipt cha.

¹⁰Ọke rẹ irherẹn na vwo nẹ asan ọfuanfon na rhe, egho de rhi mu vwẹ uwevwi rẹ Ọrovwohwo na,

¹¹Ọtiọye na irherẹn na gbi se mudia ga ẹga-a fiki rẹ egho na; kidie urinrin rẹ Ọrovwohwo na vọn uwevwi rẹ Ọrovwohwo na.

¹²Etiyin Solomọn da ta, Ọrovwohwo phi ọnre phihọ obọ odjuvwu, ẹkẹvuọvo ọ tare nẹ evun rẹ ebri hwi ọye ọye dia.

¹³Me bọn okpo uwevwi nana kẹ wẹ, asan rọ wọ dia bẹdẹ.

¹⁴Etiyin ovie de kuoma rhẹriẹ, ọ da nẹ ẹrhovwo kẹ ọghwẹgbe rẹ Izrẹl na ejobi, yẹ ọghwẹgbe rẹ Izrẹl ejobi mudia.

¹⁵ọ da ta, Ebruba kẹ Ọrovwohwo, Ọghẹnẹ rẹ Izrẹl, rọ vwẹ obọ rọye ru ive rọ vwẹ unu rọye ve kẹ Devid ọsẹ mẹ gba, tanẹ,

¹⁶Rhanwẹ ẹdẹ re Me vwo reyọ ihwo mẹ Izrẹl nẹ Ijipt rhe na, Me jẹ orere ọvuọvo vwẹ orua rẹ Izrẹl na ejobi, ra bọn uwevwi phihọ-ọ, rere odẹ mẹ vwọ dia etiyin; ẹkẹvuọvo Me da jẹ Devid nẹ ọ dia enu rẹ ihwo mẹ Izrẹl.

¹⁷Asakiephana ọ hẹ udu ri Devid ọsẹ mẹ nẹ ọye bọn uwevwi kẹ odẹ rẹ Ọrovwohwo, Ọghẹnẹ rẹ Izrẹl

¹⁸Ẹkẹvuọvo Ọrovwohwo da ta kẹ Devid ọsẹ mẹ, Dede na nẹ wọ jẹn iroro vwẹ udu wẹn wọ vwọ bọn uwevwi kẹ odẹ mẹ, wọ riẹn ru wọ vwọ jẹn iroro nana vwẹ udu wẹn;

¹⁹ẹkẹvuọvo wọ cha bọn uwevwi na-a, ọmọ wẹn ru wo chie vwiẹ ọye cha bọn uwevwi kẹ odẹ mẹ.

²⁰Asakiephana Ọrovwohwo ru ive ro veri gba; mẹvwẹ kọye rhi mu vwẹ ẹdia ri Devid ọsẹ mẹ, ro tidia vwẹ enu rẹ ekete rẹ Izrẹl, kirobo rẹ Ọrovwohwo veri, me da bọn uwevwi na kẹ odẹ rẹ Ọrovwohwo na, Ọghẹnẹ rẹ Izrẹl.

²¹Kẹ etiyin me da vwe asan kẹ ekpeti na, re ọphọ rẹ Ọrovwohwo vẹ esẹ rẹ avwanre rere, vwẹ ọke rọ vwọ reyọ ayen nẹ otọ rẹ Ijipt rhe.

²²Etiyin Solomọn de mudia vwẹ obaro re agbada rẹ Ọrovwohwo na vwẹ irharo rẹ ọghwẹgbe rẹ Izrẹl na ejobi, ọ da bẹrẹ abọ sa odjuvwu;

²³ọ da ta, E Ọrovwohwo, Ọghẹnẹ rẹ Izrẹl, o vwo Ọghẹnẹ ọfa rọ họhọ owẹ-ẹ, vwẹ odjuvwu vwẹ obenu yẹrẹ vwẹ obotọ rẹ akpọ obonẹ-ẹ, rọ yọnrọn ọphọ, o me rha vwẹ ẹguọnọ ro je rhẹriẹ rọye vwo ni idibo rọye re yan nene uwe vẹ udu rayen ejobi;

²⁴rọ yọnrọn ive ro ve kẹ odibo rọye Devid ọsẹ mẹ, uyota, wọ vwẹ ugbunu wẹn vwọ ta nu, wọ da rhe vwẹ obọ ruo gba nonẹ na.

²⁵Asakiephana, E Ọrovwohwo, Ọghẹnẹ rẹ Izrẹl, gba yọnrọn ive ru wo ve kẹ odibo wẹn Devid ọsẹ mẹ obo ru wo ve kẹ, tanẹ, nẹ ohwo cha kanre owẹ rọ tidia vwẹ enu rẹ ekete rẹ Izrẹl na-a, rọ da dianẹ emọ wẹn kẹnẹ oma kẹ idjerhe rayen, vwọ yan nene uvwe kirobo wọ yan nene uvwe na.

²⁶Asakiephana, E Ọghẹnẹ rẹ Izrẹl, gbe jẹn ota wẹn na sẹ, ru wọ ta kẹ odibo wẹn Devid ọsẹ mẹ,

²⁷Ẹkẹvuọvo kẹ Ọghẹnẹ sa tobọ dia otọ rẹ akpọ na? Nighere, odjuvwu kugbe odjuvwu ro me kpenu na sa gba wẹ-ẹ; komavọ uwevwi ọhahavwe nana re me bọnre na.

²⁸Yi wo ji se ẹrhovwo rẹ odibo wẹn gbemu kugbe orẹ rọye, E Ọrovwohwo Ọghẹnẹ mẹ, ru wo vwo nyo oviẹ kugbe ẹrhovwo rẹ odibo wẹ kẹ wẹ nonẹ na;

²⁹rere ẹro wẹn vwo rhie ason vẹ uvo kẹ uwevwi nana, asan ru wọ tare nẹ 'Odẹ mẹ dia etiyin', re wọ vwọ mrasan nyo ẹrhovwo rẹ odibo wẹn nẹ vwẹ etinẹ

³⁰Re wọ rha kerhọn rẹ orẹ rẹ odibo wẹn kugbe ihwo wẹn Izrẹl, siẹ rẹ ayen da nẹ ẹrhovwo vwẹ etinẹ na; uyota, nyo vwẹ obo odjuvwu vwẹ asan wọ dia; wo de nyo, gbe vwo ghovwo.

³¹Ọ da dianẹ ohwo ru umwemwu kpahe ọrivẹ rọye ra da tanẹ o duvwu iyori, ọ da rhe rhi duvwu agbada wẹn vwẹ uwevwi nana,

³²gbe nyo vwẹ obo odjuvwu, re wo ru, ru wo brorhiẹ rẹ idibo wẹn, bruhwe ọ rọ reabe re wo kru uruemu rọye nyẹ uyovwi rọye, re wo rhe brorhiẹ kẹ ọvwata rere ase rọye phia kirobo rẹ ọvwata rọye teri.

³³Ọke rẹ ivwighrẹ de phi ihwo wẹn Izrẹl kua fikiridie ayen ru umwemwu kpahe owẹ, re ayen da rhoma kurhẹriẹ bru uwe rhe, rhe rhọvwe odẹ wẹn, rẹ ayen da nẹ ẹrhovwo rẹ ayen da re orẹ kẹ wẹ vwẹ uwevwi nana;

³⁴gbe nyo vwẹ obo odjuvwu, re wo vwo ghovwo imwemwu rẹ ihwo wẹn Izrẹl, re wọ vwẹ ayen rhivwi kpo otọ ru wọ vwọ kẹ esẹ rayen.

³⁵Ọke re de huhu ẹchẹ rẹ odjuvwu na rẹ osio gbe rhọ-ọ fiki rẹ ayen ru umwemwu kpahe owẹ, ọ da dianẹ ayen hirhe aro ku etinẹ na nẹ ẹrhovwo, rẹ ayen da rhọvwe odẹ wẹn, rẹ ayen de kurhẹriẹ nẹ umwemwu rayen, vwẹ ọke wo vwo kpokpo ayen,

³⁶gbe nyo vwẹ obo odjuvwu, wo vwo ghovwo umwemwu rẹ Idibo wẹn, ihwo wẹn Izrẹl, vwẹ ọke wo de yono ayen idjerhe rẹ esiri re ayen yan nene; re wọ rhọ osio phihọ otọ wẹn, ru wọ vwọ kẹ ihwo wẹn nẹ e vwo reuku.

³⁷Ọ da dianẹ owẹvwe firi vwẹ otọ na, ọ da dianẹ ọtiekọ eyẹ emu ghwọphe eyẹ akprẹn eyẹ ebaka eyẹ ihori; ọda dianẹ ivwighrẹ rayen kpare ofovwi rhe ọvo vwẹ usun rẹ orere rayen na; kọtiekọ kọtiekọ kemiavwe kemiavwe rọ herọ;

³⁸kẹrhovwo kẹrhovwo, korẹ korẹ rẹ ohwo ọvo nẹre eyẹ ihwo rẹ Izrẹl ejobi, rẹ ohwo ọvuọvo da riẹn ukpokpogho rọ hẹ udu rọye rẹ da riẹn abọ rọye hirhe ku uwevwi nana;

³⁹gbe nyo vwẹ obo odjuvwu asan ru wọ dia, re wo vwo ghovwo, re wo ru, re wọ hwa osa kẹ ohwo ọvuọvo ru wọ riẹn udu rọye, kirobo rẹ idjerhe rọye ejobi epha (kidie wẹ, wẹ ọvo, re riẹn udu rẹ emọ rẹ ihwo);

⁴⁰rere ayen vwọ djẹ oshọ ke wẹ vwẹ ẹdẹ rẹ akpọ rayen ejobi rere ayen sa dia otọ ru wọ kẹ esẹ rẹ avwanre na.

⁴¹Ọtiọye ji rhe ọke rẹ ọrhorha, rọ dia usun rẹ ihwo wẹn Izrẹli-i, de nẹ isiorho rhe fiki rẹ odẹ wẹn.

⁴²(kidie ayen che nyo usi rẹ odẹ wẹn rode na, kugbe egba rẹ obọ wẹn, kugbe igbabọ wẹn re riẹn phia), ọke rọ da rhe rhe nẹ ẹrhovwo vwẹ uwevwi nana,

⁴³nyo vwẹ obo odjuvwu asan re wọ dia, re wo ru kirobo rẹ ọrhorha na vwi fiki rọye se we ejobi; rere ihwo rẹ akpọ na ejobi sa vwọ riẹn odẹ wẹn rere ayen djẹ oshọ wẹn, kerẹ, ihwo wẹn Izrẹl, rere ayen sa riẹn nẹ uwevwi nana re me bọnre na odẹ wẹn e vwo se.

⁴⁴Ọ da dianẹ ihwo wẹn kpare ofovwi vwọ so ivwighrẹ rayen, kidjerhe kidjerhe ri wo ji ayen wan ejobi, ayen da nẹ ẹrhovwo kẹ Ọrovwori vwo kpahe orere rẹ wo jẹreyọ na kugbe uwevwi nana re me bọnre kẹ odẹ wẹn na,

⁴⁵gbe nyo ẹrhovwo rayen vwẹ obo odjuvwu vẹ orẹ rayen, rere ayen phi kparobọ.

⁴⁶Ọ da dianẹ ayen ru umwemwu kpahe owẹ — kidie o vwo ohwo ro jẹ umwemwu eruo-o rẹ ivun rẹ ayen de miovwo uwe, ru wo de siobọ nẹ ayen kẹ ọvweghrẹ, re de mu ayen ighuvwu kpo otọ rẹ ivwighrẹ na, ọ kẹre eyẹ o sheri;

⁴⁷ayen da rhe karohọ vwẹ otọ rẹ mu ayen ighuvwu ra na, ayen de kurhẹriẹ, rẹ ayen da rẹ wẹ vwẹ otọ re mu ayen ra na, tanẹ, Avwanre ru imwemwu, avwanre ru chọ brabra;

⁴⁸rẹ ayen de kurhẹriẹ nẹ otọ rẹ udu rayen rhe vẹ iroro rayen vwẹ otọ rẹ ivwighrẹ rayen na, ri mu ayen ighuvwu na, re ayen de hirhe aro ku otọ rayen na nẹ ẹrhovwo kẹ wẹ, otọ re wọ vwọ kẹ esẹ rayen, orere ru wọ jẹreyọ na, kugbe uwevwi re me bọn kẹ odẹ wẹn na;

⁴⁹gbe nyo ẹrhovwo vẹ orẹ rayen vwẹ obo odjuvwu asan rọ wọ dia na, rere ayen phi kparobọ,

⁵⁰wo vwo ghovwo ihwo wẹn ri ru umwemwu kpahe owẹ, kugbe ogbeku rẹ ayen vwo gbe we ku; rere wọ kẹ ayen ehrọre vwẹ obọ rẹ ihwo re mu ayen ighuvwu na, re ayen re ehrọre rẹ ayen

⁵¹fkidie ayen ihwo wẹn, ireuku wẹn, ru wọ reyọ nẹ otọ rẹ Ijipt rhe, nẹ uherevie rẹ ẹkuerhanre rẹ utehru.

⁵²Gbe jẹn ẹro wẹn rhie phihọ kẹ orẹ rẹ odibo wẹn, kugbe orẹ rẹ ihwo wẹn Izrẹl, kerhọn rẹ ayen vwi kọke kọke rẹ ayen vwo kperi se we.

⁵³Kidie wẹ re hẹriẹ ayen nẹ ohri rẹ ihwo rẹ akpọ na, ne dia iriuku wẹn, kirobo wọ wan oma ri Mosis, odibo wẹn ta, vwẹ ọke wọ vwọ reyọ esẹ rẹ avwanre nẹ otọ rẹ Ijipt rhe, E Ọrovwohwo Ọghẹnẹ.

⁵⁴Asakiephana ri Solomọn vwọ nẹ ẹrhovwo rọye ejobi kugbe orẹ rọye kẹ Ọrovwohwo nu, o de vrẹn nẹ obaro rẹ agbada rẹ Ọrovwohwo na, ro shiguẹ bẹrabọ sa odjuvwu phihọ;

⁵⁵o de vrẹn, ọ da nẹ ẹrhovwo kẹ ọghwẹgbe rẹ Izrẹl ejobi vẹ urhuru ọgangan, tanẹ,

⁵⁶Ebruba kẹ Ọrovwohwo rọ vwẹ omaerovwo kẹ ihwo rọye Izrẹl, kirobo ro veri ejobi; o vwo ọvuọvo ro she kufa vwẹ ive esiri rọye ejobi na-a, rọ wan oma ri Mosis odibo rọye ta.

⁵⁷Ọrovwohwo Ọghẹnẹ rẹ avwanre vẹ avwanre dia, kirobo rọ vẹ esẹ rẹ avwanre diarọ; e jọ yan jẹ avwanre vwo-o eyẹ ọ sen avwanre-e;

⁵⁸rere ọ vwẹ udu rẹ avwanre kpahọ, vwọ yan vwẹ idjerhe rọye ejobi, rere a vwọ yọnrọn irhi rọye, iji rọye, kugbe egha rọye, ro ji kẹ esẹ rẹ avwanre.

⁵⁹Jẹn eta mẹ nana, re me vwọ rẹ Ọrovwohwo na, ji si kẹrẹ Ọrovwohwo Ọghẹnẹ rẹ avwanre te ason te uvo, e jọ vwẹ obọẹkparọ kẹ odibo rọye, kugbe ọ rẹ ihwo rọye Izrẹl, kirobo rẹ ẹdọke ọvuọvo guọnọre;

⁶⁰rere ihwo rẹ akpọ na ejobi vwọ riẹn nẹ Ọrovwohwo ọye Ọghẹnẹ; Ọfa gbe herọ-ọ.

⁶¹Gbe jẹn udu wẹn dia ọsoso kẹ Ọrovwohwo Ọghẹnẹ rẹ avwanre, vwọ yan nene iji rọye kugbe vwọ yọnrọn irhi rọye, kirobo rọ epha nonẹ na.

⁶²Etiyin ovie na, kugbe Izrẹl ejobi re vẹ ọye gba herọ, de ze izobo kẹ Ọrovwohwo na.

⁶³Solomọn de ze izobo rẹ ufuoma kẹ Ọrovwohwo irhuẹn eshare uriori uje gbẹ ivẹ kugbe igodẹ uriori ujosan. Ọtiọye ovie na kugbe ihwo rẹ Izrẹl ejobi de ru uwevwi rẹ Ọrovwohwo na fon.

⁶⁴Vwẹ ẹdẹ yena ọvuọvo na ovie na de ru uherevie rẹ ọguan na rọ hẹ obaro rẹ uwevwi rẹ Ọrovwohwo na fon; kidie etiyin o de ze izobo rẹ ẹtorhẹ kugbe izobo rẹ ọka kugbe ibro rẹ ivwri rẹ izobo rẹ ufuoma na, fikiridie agbada rẹ ẹrovwo na rọ bẹ obaro rẹ Ọrovwohwo na ọ hanvwe nọ ọ sa gba izobo rẹ ẹtorhẹ na vẹ izobo rẹ ọka na kugbe ibro rẹ eranvwe re vwo ze izobo na-a.

⁶⁵Ọtiọye na Solomọn da rẹ orẹ na vwẹ ọke yena, kugbe Izrẹl ejobi vẹ ọye, Ọghwẹgbe rode na, nẹ unu ri Hamat re te Ẹtẹrhe rẹ Ijipt, vwẹ obaro rẹ Ọrovwohwo Ọghẹnẹ rẹ avwanre ẹdẹ ighwrẹ.

⁶⁶Vwẹ ẹdẹ rẹrenre o de siobọ nẹ ihwo na kpo; ayen da nẹ ẹrhovwo kẹ ovie na, ayen de kpo iwevwi rayen vẹ aghọghọ vẹ omavwerhovwẹ vwẹ udu rayen fiki rẹ emu esiri ejobi rẹ Ọrovwohwo ru kẹ Devid odibo rọye kugbe Izrẹl ihwo rọye.