Read urhobo 1 Ivie 9 Bible Online

1 Ivie 9 - urhobo bible

1 Ivie 9

¹Ọke ri Solomọn vwọ bọn uwevwi rẹ Ọrovwohwo na nu kugbe uwevwi rẹ ovie na kugbe obo ri Solomọn guọnọ bọn ejobi,

²Ọrovwohwo da vwẹ oma phia vwẹ ọbo rivẹ kẹ Solomọn vwi Gibiọn.

³Ọrovwohwo da ta kẹ, Mi nyo ẹrhovwo wẹn kugbe orẹ wẹn, ru wọ nẹ kẹ vwẹ; mi ru uwevwi nana ru wọ bọnre na fon, mi de phi odẹ mẹ phihọ bẹdẹ; ẹro mẹ kugbe udu mẹ kọ dia etiyin vwẹ ọke ejobi.

⁴Vwọ kẹ wẹ, wọ da yan nene uvwe, kirobo ri Devid ọsẹ wẹn yanre, vẹ udu esiri kugbe ọvwata, wo de ru kirobo ri mi ji urhi kẹ wẹ ejobi, ru wọ da yọnrọn iji mẹ kugbe egha mẹ,

⁵ke Me vwẹ ekete rẹ uvie wẹn ghwaotọ vwẹ enu rẹ Izrẹl bẹdẹ, kirobo ri mi ve kẹ Devid ọsẹ wẹn ta nẹ, Ohwo cha kanre owẹ ro tidia vwẹ enu rẹ ekete rẹ Izrẹli-i.

⁶Ẹkẹvuọvo wo de chuko ku wo gbi nene uvwe-e, wẹ eyẹ emọ wẹn, wọ gbe rha yọnrọn irhi mẹ kugbe iji mẹ re Me vwọ kẹ wẹ na-a, ẹkẹvuọvo wọ da ra ga edjọ efa wọ da gọ ayen,

⁷Etiyin ke Me nyavwe Izrẹl kufia nẹ otọ re Me vwọ kẹ ayen na; kugbe uwevwi ri mi ru fon kẹ odẹ mẹ na ki mi sio nẹ obaro mẹ; ka vwẹ Izrẹl bru isẹ vẹ ohare vwẹ ohri rẹ ihwo na.

⁸Uwevwi nana ko che hirhe phihọ erhurhu; kohwo kohwo rọ wanvrẹn ejobi ko gbe unu, kọ fiọn unu; kẹ ayen ta, Die Ọrovwohwo vwo ru enẹ kẹ otọ nana kugbe uwevwi nana?

⁹Etiyin kẹ ayen ta, Fikiridie ayen sen Ọrovwohwo Ọghẹnẹ rayen rọ reyọ esẹ rayen nẹ otọ rẹ Ijipt rhe, ayen da ra djẹ gbane edjọ efa, ayen da gọ ayen fiki rẹ ọtiọye na ọye Ọrovwohwo vwọ vwẹ ukpokpogho nana vwo rhe ayen.

¹⁰Vwẹ oba rẹ ikpe uje, ri Solomọn vwọ bọn iwevwi ivẹ na nu, uwevwi rẹ Ọrovwohwo na kugbe uwevwi rẹ ovie na,

¹¹ri Hir ovie ri Taya vwọ ghwẹ igẹdu kugbe owangha rhe Solomọn kugbe oro, kirobo rọ guọnọre nu, Ovie Solomọn da vwẹ irere uje kẹ Hiram vwẹ otọ ri Galili.

¹²Ẹkẹvuọvo ọke ri Hiram vwo nẹ Taya rhe rhe mrẹ irere ri Solomọn vwọ kẹ na, i gbi je-e.

¹³Fiki rẹ ọtiọye ọ da ta, Didi oka rẹ irere wọ vwọ kẹ vwẹ oniọvo mẹ? Ọtiọye na ke se ayen otọ Kabul rhi te nonẹ na.

¹⁴Hiram vwi talẹnt ujosan rẹ oro vwo rhe Solomọn jovwo.

¹⁵Ọnana kọye unu rẹ arhọghọ rẹ Solomọn tori vwọ bọn uwevwi rẹ Ọrovwohwo na vẹ uwevwi rẹ obọ rọye kugbe Milo na kugbe igbẹhẹ ri Jerusalẹm kugbe Hazọr Mẹgido kugbe Geza

¹⁶(Fero ovie rẹ Ijipiti da yanran re mu Geza, ọ da vwẹ erhare torhẹ, o de hwe ihwo ri Kenan re dia evun orere na, ọ da reyọ vwọ hẹriẹ ọmọtẹ rọye rọvwọ Solomọn uwevwi;

¹⁷Ọtiọye Solomọn kọ rhoma bọn Geza) kugbe Bẹt-họrọ rọ hẹ obotọ

¹⁸kugbe Baalat vi Tamar vwẹ obo evun rẹ aghwa, vwẹ obo otọ ri Juda,

¹⁹kugbe irere re evun ejobi ri Solomọn vwori, kugbe irere rọ ghwẹ ekpẹrẹ rẹ ofovwi rọye phihọ, kugbe irere rẹ ihwo re gua iyesi rọye dia, kugbe kemu kemu ri Solomọn guọnọ bọn vwi Jerusalẹm, Lẹbanọn, kugbe evun rẹ etọ ro suẹn na ejobi.

²⁰Ihwo re Amọr ri chekọ ejobi, ihwo ri Hẹt, ihwo ri Pẹrẹz, ihwo ri Hiv, kugbe ihwo ri Jebu, re dia ihwo rẹ Izrẹli-i

²¹uvwiẹ rayen ri chekọ kẹ ayen vwẹ otọ na, rẹ ihwo rẹ Izrẹl sa guọghọ re kakare-e — enana keye Solomọn vwo ru eviẹn rọ gba vwo ru iruo, kẹ ọtiọye ayen epha rhi te nonẹ na,

²²Ẹkẹvuọvo Solomọn vwẹ ihwo rẹ Izrẹl ru eviẹ-ẹn; ayen keye otuofovwi, iruiruo rọye, isun rọye, inotu rọye, isun rẹ ekpẹrẹ rọye vẹ ihwo re gua iyesi rọye.

²³Enana keye ilori rẹ iruiruo ri Solomọn vwo mu phihọ enu rẹ iruo rọye: ujori iyori gbẹ ujuvẹ gbẹ ihwe, re vwẹ ẹro te ihwo ri ruiruo na.

²⁴Ẹkẹvuọvo ọmọtẹ ri Fero de vrẹn nẹ orere ri Devid na kpo uwevwi rẹ obọ rọye ri Solomọn bọn kẹ; etiyin ọ da bọn Milo.

²⁵Asiarha ẹgbukpe ọye Solomọn zẹ izobo rẹ ufuoma vwẹ enu rẹ agbada rọ so kẹ Ọrovwohwo na, rọ da torhẹ ugboduma vwẹ obaro rẹ Ọrovwohwo. Ọtiọye kọye ọ vwọ bọn uwevwi na re.

²⁶Ovie Solomọn da kare ekpo buebu vwẹ Eziọn-geba, rọ kẹrẹ Elọt vwẹ obo erhuru rẹ Abadi ọvwavwanre na, vwẹ otọ rẹ Edọm.

²⁷Hiram de ji idibo rọye nene ekpo na, ihwo ri biekọ rẹ abadi riẹriẹ oma, vwo kugbe idibo ri Solomọn;

²⁸ayen da yanran kpo ọfar, ayen da ghwẹ oro buebu nẹ oboyi rhe, ro bu te talẹnt ujori ẹne gbe uje; ayen da ghwẹ ayen rhe ovie Solomọn.