Read urhobo Ivie rẹ Ivẹ 1 Bible Online

Ivie rẹ Ivẹ 1 - urhobo bible

Ivie rẹ Ivẹ 1

¹Ehab vwo ghwu nu, Moab da vwẹ ohọre so Izrẹl.

²Ọke nana Ahazaya de fi wan ọdjẹvwe rẹ uvun rẹ egedege rọye rọ hẹ Sameria she, kọ hovwan; o de ji ikọn, ọ da ta kẹ ayen nẹ, Ovwan yanran, ovwan ra nọ vwẹ obọ rẹ Bẹlzibọb, ẹdjọ rẹ Ekrọn, sẹ mi se nẹ ọga nana.

³Amakashe rẹ Ọrovwohwo da ta kẹ Ilaija ohwo ri Tish nẹ, Vrẹn, yanran ra vwa ikọn rẹ ọvie ri Sameria, wọ ta kẹ ayen nẹ, Ọghẹnẹ gbe hẹ Izrẹl re nẹrhẹ ovwan kpo obo ri Bẹlzibọb, ẹdjọ rẹ Ekrọn kpo epha?

⁴Enẹ Ọrovwohwo tare, Wo che se vrẹn nẹ ehwa rẹ ọga ru wo sherhẹ na-a, ẹkẹvuọvo wo che ghwu. Ilaija da yanran.

⁵Ikọn na de rhivwi bru ovie na ra, ọ da ta kẹ ayen nẹ, Die sorọ ovwan vwo rhivwi rhe?

⁶Ayen da ta kẹ nẹ, Ọshare ọvo bru avwanre rhe, ọ da ta kẹ avwanre nẹ, Ovwan rhivwi bru ovie ro ji ovwan na ra, rere ovwan ta kẹ nẹ, Enẹ Ọrovwohwo tare, sẹ Ọghẹnẹ gbe herọ vwẹ Izrẹl na-a kọyẹ wo vwo ji ikọn kpo epha ẹbọ vwẹ obọ ri Bẹlzibọb rẹ ẹdjọ rẹ Ekrọn? Fiki rẹ ọtiọye na wo gbi che se nẹ ehwa rẹ wọ epha na rhe-e, ẹkẹvuọvo ku wo che ghwu.

⁷Ọ da ta kẹ ayen, Didi oghẹrẹ rẹ ohwo ovwan vẹ ọye gba vwa oma rọ ta emu nana kẹ ovwan?

⁸Ayen da kpahe kẹ, O ku ewun rẹ ẹto phihọ, ọ vwẹ umwamwa rẹ ophiẹn vwo mu ehun rọye. Kọye ọ da ta nẹ, Ohwo na Ilaija ohwo ri Tish.

⁹Ovie na de ji onotu ro suẹn ituofovwi ujuvẹ gbẹ ihwe vẹ ituofovwi ujuvẹ gbẹ ihwe rọye bro ra. Onotu na de bru Ilaija ra vwẹ asan ro tidia vwẹ obenu rẹ ugbenu, ọ da ta kẹ, E ohwo rẹ Ọghẹnẹ, ovie tare nẹ, Wotọ rhe.

¹⁰Ilaija da kpahe kẹ onotn ro suẹn ituofovwi ujuvẹ gbẹ ihwe na nẹ, Mi de ghine dia ohwo rẹ Ọghẹnẹ, e gbe jẹ erhanre nẹ odjuvwu rhe otọ re torhẹ owẹ vẹ ituofovwi ujuvẹ gbẹ ihwe na muotọ. Erhanre de ghinẹ nẹ odjuvwu rhe, rhe torhẹ vẹ ituofovwi ujuvẹ gbẹ ihwe na muotọ kakare.

¹¹Ovie na da rhoma ji onotu rẹ ituofovwi ujuvẹ gbẹ ihwe ọfa vẹ ituofovwi ujuvẹ gbẹ ihwe ra. Onotu na de yenri bro ra, ọ da ta kẹ nẹ, E ohwo rẹ Ọghẹnẹ, urhi rẹ ovie ta re nẹ, Wotọ rhe phẹphẹre.

¹²Ilaija da kpahe kẹ ayen nẹ, Mi de ghinẹ dia ohwo rẹ Ọghẹnẹ, e gbe jẹn erhanre nẹ odjuvwu rhe otọ re torhẹ owẹ vẹ ituofovwi ujuvẹ gbẹ ihwe na muotọ.

¹³Ovie na de rhe ji onotu rerha vẹ ituofovwi ujuvẹ gbẹ ihwe ra. Onotu rerha na ro suẹn ituofovwi ujuvẹ gbẹ ihwe na de yenri kpo enu bro ra, o de she iguẹn ivẹ vwẹ aro rẹ Ilaija, ọ da bọrọ nẹ, E ohwo rẹ Ọghẹnẹ, me rẹ wẹ, jẹ arhọ mẹ vẹ arhọ rẹ idibo ujuvẹ gbẹ ihwe nana rho vwẹ ẹro wẹn.

¹⁴Nighe, erhanre wotọ nẹ odjuvwu rhe rhe torhẹ inotu ivẹ rẹ ọvuọvo rọye suẹn ituofovwi ujuvẹ gbẹ ihwe vẹ ituofovwi rẹ ayen suẹn; ẹkẹvuọvo asakiephana gbe jẹ arhọ mẹ rho vwẹ ẹro wẹn.

¹⁵Kọye amakashe rẹ Ọrovwohwo da ta kẹ Ilaija nẹ, Yan nene kpo otọ, wo jẹ oshọ rọye mu we-e. O de ghinẹ vrẹn yan nene kpo otọ bru ovie na ra,

¹⁶ọ da ta kẹ ovie na nẹ, Enẹ Ọrovwohwo tare, Die nẹrhẹ wo ji ikọn kpo epha vwẹ obọ rẹ Bẹlzibọb rẹ ẹdjọ rẹ Ekrọn — Fikiridie Ọghẹnẹ gbe hẹ Izrẹl re wọ nọ ota mie-e? Fiki rẹ ọtiọye na wo bi che se nẹ ehwa ro wọ ephan na rhe-e, ẹkẹvuọvo ku wo che ghwu.

¹⁷Obo rẹ Ilaija ta ota rẹ Ọghẹnẹ kẹ wan na kẹ ọtiọye o ghwu wan Jehoram rẹ oniọvo rọye rẹ ọmọshare da rhe re ovie vwẹ ẹdia rọye vwẹ ukpe rivẹ ri Jehoram ọmọ ri Jehoshafat, ovie ri Juda, fikiridie Ahazaya vwiẹ ọmọshare-e.

¹⁸Asakiephana eranvwọn efa rẹ Ahazaya ruru e rhe si ayen phihọ evun rẹ Ọbe rẹ Ikun egbe rẹ Ivie rẹ Izrẹl?