Read urhobo Ivie rẹ Ivẹ 10 Bible Online

Ivie rẹ Ivẹ 10 - urhobo bible

Ivie rẹ Ivẹ 10

¹Asakiephana Ehab vwo emọ ujorha gbẹ ihwe vwi Sameria. Jehu de si ọbe vwo kpo Sameria, vwo rhe isun rẹ orere na, vẹ ekpako, kugbe ihwo re vwẹ ẹro te emọ rẹ Ehab, tanẹ.

²Asakiephana rẹ ọbe nana de te ovwan obọ, ovwan da mrẹ vughe nẹ emọ rẹ ọrovwo ovwan vẹ ovwan etiyin, nẹ ekpẹrẹ vẹ iyesi je herọ, irere ra gba ogba phihọ je herọ rhe, vẹ ekuakua rẹ ofovwi re herọ,

³sanọ ọ ro me yovwi vẹ ọ ro me fo vwẹ emọ rẹ ọrovwo ovwan na re e vwo tidia vwẹ ekete rẹ ọsẹ rọye, rere ọ họnre kẹ uwevwi rẹ ọrovwo ovwan.

⁴Ẹkẹvuọvo oshọ de mu ayen gangan, ayen da ta, Ivie ivẹ na se mudia hẹrhẹ-ẹ; ke mavọ avwanre se vwo mudia.

⁵Ọtiọye na ọ ro kpenu vwẹ ighẹn rẹ ovie na vẹ ọ ro kpenu vwẹ orere na vẹ ekpako na kugbe otu re vwẹ ẹro te orere na de ji ikọn bru Jehu ra, tanẹ, Avwanre idibo wẹn, avwanre ru obo wọ ta kẹ avwanre. Avwanre cha vwẹ ohwo ọfa muẹ ovie-e ru ọ ro shehọ vwẹ ẹro wẹn.

⁶Etiyin o de si ọbe rivẹ, tanẹ, Ọ da dianẹ ovwan da hẹ ẹbẹre mẹ, rẹ ovwan da choma we vwo mu ọghọ kẹ vwẹ ovwan gba ra reyọ iyovwi rẹ emọ rẹ ọrovwo ovwan, rere ovwan bru vwe rhe Jẹzril ọke ọtiọna rẹ odẹ rọ cha na. Asakiephana emọ ujorha gbẹ ihwe rẹ ovie na hẹ obọ rẹ ikpihwo rẹ orere na re ghẹrẹ ayen.

⁷Ọke rẹ ọbe na vwo te ayen obọ, ayen da reyọ emeshare rẹ ovie na, ayen de hwe ayen ihwo ujorha gbẹ ihwe na, ayen da kua iyovwi rayen phihọ evun rẹ ibere, ayen da vwẹ ayen kpo obo Jẹzril.

⁸Ọke rẹ ikọn na vwọ rhe ra vuẹ, Ayen vwẹ iyovwi rẹ emọ rẹ ovie na rhire ọ da ta, E mu ayen koko ẹko ivẹ, phihọ anurhoro rẹ ughere na bẹsiẹ rẹ ọke vwo rhie.

⁹Vwẹ irhiọke, ọke rọ vwọ ro otafe, o de mudia, ọ da ta kẹ ihwo na ejobi, Ovwavwan evwata. Mẹvwẹ ohwo rọ ruero kpahe ọrovwovwe mi de hwe; ẹkẹvuọvo kono rha ghwiẹ enana ejobi teye otọ?

¹⁰Gba riẹn nẹ ota rẹ Ọrovwohwo tare che se ghwru phihọ otọ-ọ. Ọ rọ tare kpahe uwevwi rẹ Ehab; Ọrovwohwo ko ruru kirobo rọ wan oma Ilaija rẹ odibo rọye ta.

¹¹Kọye Jehu hwe ihwo ri chekọ vwẹ uwevwi rẹ Ehab vwi Jẹzril, ihwo ride rọye ejobi, igbeyan rọye ro vugheri, kugbe irherẹn rọye bẹsiẹ rẹ ayen ejobi rhi vwo re.

¹²Etiyin o de mu oyan kpo Sameria. Rọ vwọ hẹ idjerhe yanran, o rhi vwo te Bẹtẹkẹd rẹ Isuigodẹ,

¹³Jehu da mrẹ imoni rẹ Ahazaya ovie ri Juda, ọ da ta, Wẹ ono? Ayen da kpahe, Avwanre imoni rẹ Ahazaya avwanre rhere rhe mrẹ emọ rẹ ovie vẹ e rẹ oni rẹ ovie.

¹⁴Ọ da ta, Mu ayen ọkpokpọ. Ayen de mu ayen ọkpokpọ, Ayen hwe ayen vwẹ asan ọgodọ ri Bẹtẹkẹd, ayen ihwo ujuvẹ gbẹ ivẹ, o jẹ ọvuọvo vwo-o.

¹⁵Ọke ro vwo nẹ etiyin, ọ da vwa Jehonadab rẹ ọmọ ri Rekah ro bro cha, o de yere ọ da ta kẹ, Udu wẹn fon kẹ udu mẹ kirobo rẹ ọmẹ epha kẹ owẹn na? Jehonadab da kpahe kẹ, Ọtiọye ọ epha. Jehu da ta, Ọ da ghine dia ọtiọye, gba riẹn obọ wẹn kẹ vwẹ. Ọ riẹn obọ rọye kẹ. Jehu da yọnrọn obọ o de sio phihọ evun rẹ akpẹrẹ na.

¹⁶Ọ da ta, Nene uvwe, rere wọ mrẹ oruru mẹ kpahe Ọrovwohwo na. Kọye ọ vẹ ọye da gua yanran vwẹ akpẹrẹ rọye.

¹⁷Ro rhi vwo te Sameria, o de hwe ihwo rẹ Ehab ri chekọ vwi Sameria, bẹsiẹ ro rhi vwo phoro ayen ejobi nẹ otọ na, kirobo rẹ ota rẹ Ọrovwohwo epha rọ ta kẹ Ilaija.

¹⁸Etiyin Jehu de ghine ghwẹ ihwo ejobi koko, ọ da ta kẹ ayen, Ehab ga Baal emerha, ẹkẹvuọyo Jehu cha gọ Baal mamọ.

¹⁹Asakiephana gbe se emraro ri Baal kẹ vwẹ, emọrhan rọye kugbe irherẹn rọye, e jẹ ọvuọvo ghwrẹ-ẹ, kidie mi vwo izobo ri mi che ze kẹ Baal; ohwo kohwo ra mrẹree gbe sa dia-a. Ẹkẹvuọvo Jehu ruro vẹ ẹghwanre rere ọ vwọ sa ghwọrọ ihwo ri Baal ejobi .

²⁰Jehu de ji urhi, E jẹ ihwo na ejobi phorho oma re ayen ghwẹ oma koko kẹ Baal. Ayen de ghwoghwo urhi.

²¹Jehu de ji ihwo wan Izrẹl ejobi, ihwo re gọ Baal de rhi koko, o vwo ohwo ọvuọvo ro chekọ ro jẹ cha-a. Ayen da ro uwevwi ri Baal, uwevwi ri Baal da rhe ro vọn nẹ oba ọvo re te orivẹ.

²²Ọ da ta kẹ ohwo rọ vwẹ ẹrọ te idọrọ rẹ iwun rẹ ẹga na, Vwẹ iwun rhe rere ihwo re gọ Baal ku phihọ, kọye ọ da vwẹ iwun na rhe ayen.

²³Etiyin Jehu vẹ Jehonadab rẹ ọmọ rẹ Reshab da ro uwevwi ri Baal; ọ da ta kẹ ihwo re gọ Baal, Hiẹn oma rẹ ovwan rere ovwan ni mu nẹ odibo rẹ Ọghẹnẹ ọvuọvo hẹ ohri rẹ ovwa-an, jokpa rẹ ihwo re gọ Baal ọvo.

²⁴Etiyin ọ da yanran ro evun rẹ uwevwi re ze izobo rẹ ẹtorhẹ. Asakiephana Jehu vwẹ eshare ujọne ri mudia vwẹ otafe, ọ da ta, Ohwo rọ fọ kẹ ọvo vwẹ usun rẹ ihwo nana nẹ ọ djẹ kẹ hwe suọ.

²⁵Ọtiọye na ro ghwe vwo ze izobo kugbe izobo rẹ ẹtorhẹ na nu, Jehu da ta kẹ ohẹrhẹ na vẹ ilori na, Wa ro uwevwi na re we hwe ayen; wo jẹn ohwo ọvuọvo vabọ-ọ. Kọye ọke ra vwọ nyavwe ayen ejobi hwe nu, ohẹrhẹ na vẹ ilori na de mu irivwi rẹ ayen phihọ otafe, ayen da yanran ra ro ivun rẹ uwevwi ri Baal.

²⁶Ayen de mu osunsun rọ hẹ evun rẹ uwevwi ri Baal phia, ayen da torhẹ.

²⁷Ayen de kporo osunsun ri Baal, ayen de rhe kporo uwevwi ri Baal te otọ, ayen de vwo ru erhurhu rhi te ẹdẹ ri nonẹ na.

²⁸Enẹ Jehu vwo phoro Baal nẹ Izrẹl.

²⁹Ẹkẹvuọvo Jehu siobọ nẹ umwemwu ri Jeroboam rẹ ọmọ ri Nebat na-a, oruchọ rọ nẹrhẹ Izrẹl ru umwemwu, ipene rẹ irhuẹn ra vwẹ iro duvwu phihọ Bẹtẹl, vi Dan.

³⁰Ọrovwohwo da ta kẹ Jehu, Fikiridie wọ riẹn ru wo vwo ru obo ro shehọ vwẹ ẹro mẹ, ri wo vwo ru kẹ uwevwi rẹ Ehab kirobo rẹ ẹnwẹ mẹ guọnọre na, emọ wẹn rẹ uvwiẹ rẹne ki che tidia phihọ enu rẹ ekete rẹ Izrẹl.

³¹Ẹkẹvuọvo Jehu rha vwẹ oma kpotọ yan phihọ idjerhe rẹ urhi rẹ Ọrovwohwo Ọghẹnẹ rẹ Izrẹl na-a, o kurhẹriẹ nẹ imwemwu ri Jeroboam ruru-u, rọ nẹrhẹ Izrẹl ru umwemwu.

³²Vwẹ ọke yena Ọrovwohwo de mu Izrẹl họ ebrono. Hazel de phi ayen kua vwẹ otọ robọ rẹ Izrẹl na.

³³Nẹ Jọdan kpo obaro ọnrẹ yanran, etọ ejobi ri Giliad, ri Gad, ri Rubẹn, ri Manase, nẹ Aroa rọ hẹ oma rẹ iyara rẹ Anọn na, kọye Giliad vi Bashan.

³⁴Asakiephana iruemu ri chekọ ri Jehu vẹ iruo ro ruru ejobi, vẹ ẹgba rọye ejobi, e rhe si ayen phihọ Ọbe rẹ Ikun rẹ Ivie rẹ Izrẹl?

³⁵Kọye Jehu da vwerhẹ kugbe esẹ rọye, ayen de sho phihọ Sameria. Jehoahaz ọmọ rọye da re uvie vwẹ ẹdia rọye.

³⁶Ikpe ujẹ gbẹ ẹrenre ọye Jehu sun Izrẹl vwi Sameria.