Read urhobo Ivie rẹ Ivẹ 11 Bible Online

Ivie rẹ Ivẹ 11 - urhobo bible

Ivie rẹ Ivẹ 11

¹Asakiephana ọke rẹ Atalaya oni rẹ Ahazaya vwọ mrẹ nẹ ọmọ rọye ghwuru, o de vrẹn ọ da ghwọrọ orua rẹ ovie na ejobi.

²Ẹkẹvuọvo Jehosheba, ọmọtẹ rẹ ovie Joram, oniọvo rẹ ọmọtẹ rẹ Ahazaya, da reyọ Joash ọmọ rẹ Ahazaya, o de cho nẹ ohri rẹ emọ rẹ ovie na re hwe na, o de sionu vẹ ohwo rọ vwẹ ẹro te vwẹ otọ rẹ ehwa vwẹ evu uvun. Eriyin na Atalaya gbi se hwe-e.

³Ọ vẹ ọye da dia ẹgbukpe esan, ro vwo sionu vwẹ evun rẹ uwevwi rẹ Ọrovwohwo yẹ Atalaya ria uvie vwẹ otọ na.

⁴Ẹkẹvuọvo vwẹ evun rẹ ukpe righwrẹ rọye Jehoyada de ji ikọn ra ra reyọ ilori rẹ ekru rẹ ihwo ri Kar vẹ erhẹrotọ na, ayen de bro rhe vwẹ obo uwevwi rẹ Ọrovwohwo na, ọ vẹ ayen da re ọphọ, ọ da vwẹ ayen duvwu iyori vwẹ evun rẹ uwevwi rẹ Ọrovwohwo, ọ da vwẹ ọmọ rẹ ovie na vwọ nẹ ayen.

⁵O de ji urhi kẹ ayen, Ọnana obo rẹ ovwan ru; ẹkerha rẹ ovwan ri jẹ iruo vwo vwẹ ẹdidjala, kugbe otu re rhẹrẹ uwevwi rẹ ovie na

⁶(ẹkerha ọfa vwẹ anurhoro ri Sho, kugbe ẹkerha ọfa vwẹ anurhoro rọ obuko rẹ erhẹrotọ na) ke cha rhẹrẹ ighẹ rẹ ovie na.

⁷Ẹko ivẹ rẹ ovwan re cha dia iruo vwẹ edidjala na re rhẹrẹ uwevwi rẹ Ọrovwohwo na,

⁸ke cha yariẹ ovie na phihọ, yẹ ọ vẹ ekuakua rẹ ohọnre vwọ yọnrọn obọ; kohwo kohwo ro si kẹrẹ edje na ke hwe. Ovwan vwọ kpahe ovie na vwẹ ọke rọ da ro otafe vẹ ọke rọ da ro uwevwi.

⁹Ilori na de ru kirobo ri Jehoyada, orherẹn na ta kẹ ayen, ọ vẹ ihwo rọye ri che ji iruo vwo vwẹ edidjala na da vwọ rhe, vẹ ayen otu ri che ru iruo vwẹ ẹdidjala na ayen de bru Jehoyada rẹ orherẹn na rhe.

¹⁰Orherẹn na da vwẹ adjara vẹ ekpọfia ri Devid, ovie na, rẹ hẹ uwevwi rẹ Ọrovwohwo na vwọ kẹ inotu na.

¹¹Erhẹroto na de vrẹn mudia, dohwo dekuakua rẹ ohọnre rọye da vwọ yọnrọn obọ nẹ obọhwẹre ọnre re te obọrhe ọnre rẹ uwevwi na, yariẹ agbada vẹ uwevwi na phihọ.

¹²Ọ da vwẹ ọmọ rẹ ovie na phia, ọ da vwẹ erhu rẹ ovie tughẹ, ọ da vwẹ ọbe rẹ irhi na kẹ; ayen de ghwoghwo nẹ ọye ovie, a da vwẹ evwri ghworo uyovwi, ayen da teye abọ rayen, ayen da ta, E jẹn ovie tọn.

¹³Ọke rẹ Atalaya vwo nyo edo rẹ erhẹrotọ na vẹ e rẹ ihwo na, ọ da yan kpo uwevwi rẹ Ọrovwohwo bru ihwo na rhe.

¹⁴Ọke ro vwo ni, ọ da mrẹ ovie na ro mudia kẹrẹ ẹshẹ na, kerẹ obo rẹ uruemu na epha, ilori na vẹ ihwo ri hworo ewanre na de mudia yariẹ ovie na, ihwo rẹ otọ na ejobi ra ghọghọ hworo owanre. Atalaya da bẹrẹ emwa dje oma. Ọ de kperi, A ta vwẹ họ! A ta vwẹ họ!

¹⁵Etiyin Jehoyada rẹ orherẹn na de ji urhi kẹ ilori rẹ otuofovwi na, Reyọ phihọ uvwre rẹ edje ivẹ na ro otafe, rere a vwẹ ọlọkọ hwe kugbe kohwo kohwo ro nenire. Kidie orherẹn na tare, E jẹn e hwe vwẹ evun rẹ uwevwi rẹ Ọrovwohwo na-a.

¹⁶Ayen de shabọ phihọ, ọ da wan anurhoro rẹ iyesi kpo obo ighẹ rẹ ovie na, e de hwe ghwu vwẹ etiyin.

¹⁷Jehoyada vẹ Ọrovwohwo da re ọphọ kugbe ovie vẹ ihwo na, nẹ ayen dia ihwo rẹ Ọrovwohwo; ọtiọye ọ je epha kẹ ovie vẹ ihwo na rhe.

¹⁸Etiyin ihwo rẹ otọ na da yanran kpo uwevwi ri Baal, ayen de kporo te otọ; ayen da guọghọ egbada rọye vẹ ema rọye ivwivwuvwu, ayen de hwe Matan rẹ orherẹn ri Baal ghwu vwẹ obaro rẹ egbada na. Orherẹn na da ghare erhẹrotọ phihọ uwevwi rẹ Ọrovwohwo na.

¹⁹Ọ da reyọ inotu na vẹ ilori na, vẹ erhẹrotọ na, vẹ ihwo rẹ otọ na ejobi, ayen da reyọ ovie na nẹ evun rẹ uwevwi rẹ Ọrovwohwo na phia vwọ wan anurhoro rẹ erhẹrotọ na vwo kpo ighẹ rẹ ovie na. O de rhi tidia asan rọye vwẹ ekete rẹ ivie na.

²⁰Ọtiọye ihwo rẹ otọ na ejobi da ghọghọ, orere na da fọ dọe ra vwọ vwẹ ọlọkọ hwe Atalaya vwẹ obo evun rẹ uwevwi rẹ ovie nu.

²¹Jehoash ẹghukpe ighwrẹ ọkpako te e de vwo mu ovie.