Read urhobo Ivie rẹ Ivẹ 12 Bible Online

Ivie rẹ Ivẹ 12 - urhobo bible

Ivie rẹ Ivẹ 12

¹Vwẹ ukpe righwrẹ ri Jehu ọye Jehoash vwo mu ẹriọ phihọ, ọ da re uvie ẹgbukpe ujuvẹ vwi Jerusalẹm. Odẹ rẹ oni rọye Zibaya rẹ Biẹsheba.

²Jehoash de ru obo ri fori vwẹ ẹdẹ rẹ akpọ rọye ejobi vwẹ obaro rẹ Ọrovwohwo, fikiridie Jehoyada rẹ orherẹn na nẹrẹ iroro.

³Ẹkẹvuọvo e se si asan ri kpenu na no-o; ihwo na ki ji ze izobo ayen je torhẹ insens vwẹ asan ro kpenu na.

⁴Jehoash da ta kẹ irherẹn na, Igho rẹ ekuakua efuanfon ra ghwa rhe uwevwi rẹ Ọrovwohwo na, igho re bru kẹ ọshare ọvuọvo rọ dia igho re bru kẹ ihwo ejobi na kugbe igho rẹ udu rẹ ohwo ọvuọvo vuẹrẹ nẹ ọ hwa kpo uwevwi rẹ Ọrovwohwo na,

⁵e jẹn irherẹn na reyọ igho nana mie dohwo dihwo rọye; rere e jẹn ayen rhuẹrẹ asan kasan rọ guọnọ ẹrhuẹrẹ vwẹ uwevwi na.

⁶Ẹkẹvuọvo vwẹ ukpe rẹ uje gbẹ erha ri Jehoash, ovie na, irherẹn na rhuẹrẹ asan ọvuọvo vwẹ uwevwi na-a.

⁷Fiki rẹ ọtiọye na Jehoash ovie de se Jehoada orherẹn na vẹ irherẹn efa ẹguare ọ da ta kẹ ayen, Die sorọ rẹ ovwan vwo jẹ uwevwi na ẹrhuẹrẹ? Asakiephana ovwan rhe mie ihwo rẹ ovwan igho ọfa-a, ẹkẹvuọvo ovwan gbe siobọ nẹ igho na kẹ ihwo re rhuẹrẹ uwevwi na.

⁸Irherẹn na da rhọvwe nẹ ayen gbi miẹ ihwo na igho ọfa-a, kugbe nẹ ayen gbe je rhuẹrẹ uwevwi na rhe-e.

⁹Etiyin Jehoada rẹ orherẹn na de mu ekpeti, ọ da rharhe uphrophro phihọ urhurho rẹ ekpeti na, o de mu phihọ akakọ rẹ agbada na vwẹ obọrhe siẹn ra da ro uwevwi rẹ Ọrovwohwo na, irherẹn na re rhẹrẹ anurhoro na de phi igho ra ghwa rhe uwevwi rẹ Ọrovwohwo na phihọ evun rẹ ekpeti na.

¹⁰Kọke kọke rẹ ayen da mrẹ nẹ igho na buru vwẹ evun rẹ ekpeti na, osiọbe rẹ ovie vẹ orherẹn rọ kpenu ke cha che kere igho na re hẹ evun rẹ uwevwi rẹ Ọrovwohwo na phihọ evun rẹ isiso gba.

¹¹Etiyin ayen me vwẹ igho na ra vwanvwere na phihọ obọ rẹ ayen iruiruo rẹ wian owian vwẹ uwevwi rẹ Ọrovwohwo na; ayen me rha hwa osa vwọ kẹ ewena vẹ ebuwevwi re wian owian vwẹ uwevwi rẹ Ọrovwohwo na,

¹²vẹ otu re ma uwevwi vẹ otu ri bru elalọ, kugbe rere a je dẹ ephapha vẹ eragha re hweri ra vwọ rhuẹrẹ uwevwi rẹ Ọrovwohwo na, vẹ igho ra vwọ choma kẹ ẹrhuẹrẹ rẹ uwẹvwi rẹ Ọrovwohwo na.

¹³Ẹkẹvuọvo e ji ru ize rẹ idọnọ kẹ uwevwi rẹ Ọrovwohwo na-a, akpẹn, ogebule, ewanre, eyẹ ekuakua rẹ oro, eyẹ idọnọ, nẹ usun rẹ igho ra ghwẹ rhe uwevwi rẹ Ọrovwohwo na-a,

¹⁴kidie ọyena a vwọ kẹ ihwo re rhuẹrẹ uwevwi rẹ Ọrovwohwo na.

¹⁵Kidie a rha nọ ekpẹn rẹ igho eroro vwẹ obọ rẹ ihwo ra vwẹ igho na kẹ vwo iruiruo na-a, kidie ayen vẹ evun fuanfon.

¹⁶Igho ri nẹ izobo rẹ abe rhe kugbe igho ri nẹ izobo rẹ umwemwu rhe a rha ghwa ayen rhe uwevwi rẹ Ọrovwohwo na-a; eyena e rẹ irherẹn na.

¹⁷Ọke yena Hazẹl ovie ri Siria da kpare ohọnre vwọ so Gat, ọ da reyọ. Ẹkẹvuọvo ọke rẹ Hazẹl vwo hirhe opharo rọye ku Jerusalẹm,

¹⁸Jehoash ovie ri Juda da reyọ ekuakua re vwo ru ẹse rhe uwevwi rẹ Ọrovwohwo nẹ ọke ri Jehoshafat vẹ Jehoram Ahazaya, rẹ esẹ rọye, ivie ri Juda, vwo ve kẹ ẹga rẹ Ọrovwohwo, kugbe ekuakua rẹ ẹse robọ rọye, kugbe iro ejobi ra mrẹre vwẹ uwevwi rẹ efe rẹ uwevwi rẹ Ọrovwohwo vẹ uwevwi rẹ ovie, ọ da vwẹ ayen rhe Hazẹl ovie ri Siria. Etiyin Hazẹl de rhivwi nẹ Jerusalẹm kpo.

¹⁹Asakiephana iruemu ri chekọ ri Joash vẹ iruo ro ruru ejobi, e rhe si ayen phihọ Ọbe Rẹ Ikun Rẹ Ivie Ri Juda?

²⁰Idibo rọye da ta phihọ, ayen de hwe vwẹ uwevwi ri Milo, vwẹ idjerhe rọ wanvrẹn kpo Sila.

²¹Jozaka ọmọ ri Shimeat vi Jehozabad ọmọ ri Shoma, idibo rọye, re ghwiẹrẹ she teye otọ, o de ghwu. E de sho ba esẹ rọye vwẹ orere ri Devid, Amazaya rẹ ọmọ rọye da re uvie vwẹ ẹdia rọye.