Read urhobo Ivie rẹ Ivẹ 13 Bible Online

Ivie rẹ Ivẹ 13 - urhobo bible

Ivie rẹ Ivẹ 13

¹Vwẹ ukpe rẹ uje gbẹ erha ri Joash ọmọ rẹ Ahazaya, ovie ri Juda Jehoahaz ọmọ ri Jehu, de muphihọ ẹriọ vwẹ Izrẹl vwi Sameria, ọ da re ikpe ihwe gbẹ ighwrẹ.

²O de ru emu omiomiovwi vwẹ obaro rẹ Ọrovwohwo, o de nene umwemwu ri Jeroboam ọmọ ri Nebat rọ nẹrhẹ Izrẹl ru umwemwu, o bi oma nẹ aye-en.

³Ophu rẹ Ọrovwohwo da rhe tua kpahe Izrẹl, kọke kọke kọye o vwo phi ayen phihọ obọ ri Hazẹl ovie ri Siria kugbe obọ ri Bẹnhadad ọmọ ri Hazẹl.

⁴Kọye Jehoahaz da nọ miẹ Ọrovwohwo, Ọrovwohwo na de nyo, fikiridie ọ mrẹ oshenyẹ rẹ Izrẹl, obo rẹ ovie ri Siria shenyẹ ayen te.

⁵Kọye Ọrovwohwo da vwẹ osivwi kẹ Izrẹl, ayen da rhe vabọ rẹ ihwo ri Siria; ihwo rẹ Izrẹl da rhe dia iwevwi rayen kirobo rẹ ayen dia jovwo.

⁶Ẹkẹvuovo ayen ji siobọ nẹ imwemwu rẹ uwevwi ri Jeroboam na-a, rọ nẹrhẹ Izrẹl ru umwemwu, ẹkẹvuọvo ayen da yan phihọ ayen; ayen da yan jẹ Ashera vwo vwi Sameria.

⁷Ituofovwi ra yan jovwo kẹ Jehoahaz rha vrẹn eshare re gua iyesi ujuvẹ gbẹ ihwe-e kugbe ekpẹrẹ ihwe kugbe eshare re vwẹ owọ yan otọ uriori ihwe-e, kidie ovie ri Siria guọghọ ayen ivwuvwuvwu kerẹ ema rẹ ọmema.

⁸Asakiephana iruo ri Jehoahaz ri chekọ vẹ obo ro ruru ejobi vẹ ẹgba rọye ejobi, e rhe si ayen phihọ Ọbe Rẹ Ikun rẹ Ivie ri Izrẹl?

⁹Jehoahaz de ghwu bru esẹ rọye, e de sho phihọ Sameria; Jehoash rẹ ọmọ rọye da re uvie vwẹ ẹdia rọye.

¹⁰Vwẹ ukpe rẹ ọgban gbẹ ighwrẹ ri Joash ovie ri Juda ọye Jehoash ọmọ ri Jehoahaz vwo mu phihọ ẹriọ vwẹ Izrẹl vwi Sameria, ọ da re ikpe ihwe gbẹ esan.

¹¹Ọ de ji ru emu omiomiovwi vwẹ obaro rẹ Ọrovwohwo; o bi oma nẹ imwemwu ejobi rẹ Jeroboam ọmọ ri Nebat ruru na-a, rọ nẹrhẹ Izrẹl ru umwemwu, ẹkẹvuọvo ọ da yan vwẹ evun rayen.

¹²Asakiephana iruo ri chekọ ri Joash vẹ obo ro ruru ejobi, vẹ ẹgba rọ vwọ họnre Amazaya ovie ri Juda, e rhe si ayen phihọ Ọbe Rẹ Ikun rẹ Ivie rẹ Izrẹl na?

¹³Ọtiọye Joash da vwerhẹ kugbe esẹ rọye, Jeroboam de tidia ekete rọye; e de shi Joash phihọ Sameria ba ivie rẹ Izrẹl na.

¹⁴Asakiephana ọke rẹ Ilaesha vwọ họnvwan ọga ro che vwo ghwẹ, Joash ovie rẹ Izrẹl de bro ra, ọ da viẹ vwẹ obaro rọye, tanẹ, Ọsẹ mẹ, ọsẹ mẹ ekpẹrẹ rẹ Izrẹl kugbe ituofovwi rọye.

¹⁵Ilaesha da ta kẹ, Reyọ umurhabọ vẹ edada, kọye ọ da reyọ umurhabọ vẹ edada.

¹⁶Etiyin ọ da ta kẹ ovie rẹ Izrẹl, Si umurhabọ na, o de sio. Ilaesha da ghwa obọ rọye kpahe obọ rẹ ovie na.

¹⁷Ọ da ta kẹ, Rhie evakpo na kpo oba rẹ obaro ọnre; o de rhie. Ilaesha da ta kẹ, Sa, ọ da sa. Ọ da ta, Ọna odada rẹ obọẹkparo rẹ Ọrovwohwo, odada re vwo phi Siria kparobọ. Fikiridie wọ cha họnre ihwo ri Siria vwẹ Afẹk bẹsiẹ wo vwo hwe ayen to oba.

¹⁸Ọ da ta, Reyọ edada na, ọ da reyọ ayen. Ọ da ta kẹ ovie rẹ Izrẹl, Vwẹ ayen fa otọ, ọ da vwẹ ayen fa otọ asiarha, ọ da da obọ ji.

¹⁹Etiyin ophu rọye de mu ohwo rẹ Ọghẹnẹ na, ọ da ta, Mane abọ iyori eyẹ esan ọye wa vwẹ ayen fa otọ; kẹ ọtiọye wa vwẹ Siria fa otọ bẹsiẹ ro vwo te oba, ẹkẹvuọvo asakiephana abọ erha kọye wọ cha vwẹ Siria fa otọ.

²⁰Ọtiọye Ilaesha de ghwu, ayen de sho. Ihwo ri Moab ke cha imu vwẹ otọ na vwẹ ọke evwru.

²¹Ọke re vwo shi ọshare ọvo, igbunegbu de yoro phia, e de do orivwi na phihọ ushi rẹ Ilaesha; orivwi rẹ ọshare na vwo te ibekun rẹ Ilaesha, ọshare na da rhọvwọn, o de vrẹn mudia.

²²Asakiephana Hazẹl ovie ri Siria de kpokpo Izrẹl vwẹ ẹdẹ ri Jehoahaz ejobi.

²³Ẹkẹvuọvo Ọrovwohwo da vwẹ aroesiri vwo ni ayen, o de ni aruẹdọn rayen, o de rhivwi bru ayen rhe vwi fiki rẹ ọphọ rẹ ọ vẹ Ebraham, vẹ Azik kugbe Jekọp gba re, nẹ ọye gbe ghwọrọ aye-en, ọ rha djẹ ayen nẹ oma rhiri te nonẹ na-a.

²⁴Ọke ri Hazẹl ovie ri Siria vwo ghwu, Bẹnhadad rẹ ọmọ rọye da rhe dia ovie vwẹ ẹdia rọye.

²⁵Etiyin Jehoash ọmọ ri Jehoahaz da rhoma reyọ mie Bẹnhadad ọmọ rẹ Hazẹl irere rọ reyọ mie ọsẹ rọye vwẹ ofovwi jovwo. Abọ erha Joash phiro kua, ọ da reyọ irere rẹ Izrẹl na mie.