Read urhobo Ivie rẹ Ivẹ 16 Bible Online

Ivie rẹ Ivẹ 16 - urhobo bible

Ivie rẹ Ivẹ 16

¹Vwẹ ukpe rihwe gbẹ ighwrẹ ri Peka ọmọ rẹ Ramalaya, Ehaz ọmọ ri Jotam, ovie ri Juda, de mu uvie phihọ ẹriọ.

²Ikpe uje Ehaz kpako te o de mu uvie phihọ ẹriọ, ọ da rha re ikpe ihwe gbẹ esan vwi Jerusalẹm. O rhe ru obo ri shehọ vwẹ obaro rẹ Ọrovwohwo Ọghẹnẹ rọye-e, kirobo ri Devid ọsẹ rọye ruru-u.

³Ẹkẹvuọvo ọ da yan nene idjerhe rẹ ivie rẹ Izrẹl. Ọ ji muobọ torhẹ ọmọ rọye vwo ze izobo, kerẹ uruemu rẹ ẹgua rẹ ẹgborho rẹ ihwo rẹ Ọghẹnẹ djẹ nẹ etiyin kẹ Izrẹl.

⁴O de ze izobo ọ da torhẹ incẹns vwẹ enu rẹ agbada vẹ enu rẹ igbenu, vẹ otọ rẹ irhe ekpokpọ.

⁵Rezin, ovie ri Siria vi Peka ọmọ ri Ramaiaya, ovie rẹ Izrẹl, da kpare ofovwi rhe Jerusalẹm, ayen da gba phihọ Ehaz ẹkẹvuọvo ayen se phio kparobo-ọ.

⁶Ọke yena ọye ovie rẹ Idọm vwọ rhoma reyọ Elat, ọ da djẹ ihwo ri Juda nẹ Elat, ihwo rẹ Idọm da rhe dia asan na, etiyin ayen je epha rhi te nonẹ na.

⁷Etiyin Ehaz de ji ikọn bru Tigiatpileza ovie rẹ Asiria, tanẹ, Mẹvwẹ odibo wẹn vẹ ọmọshare wẹn. Yan rhe wo ri sivwi uvwe nẹ abọ rẹ ovie ri Siria vẹ ọ rẹ ovie rẹ Izrẹl re họnrẹ ovwẹ na.

⁸Ehaz da reyọ idọnọ vẹ iro rọ mrẹre vwẹ evun rẹ uwevwi rẹ Ọrovwohwo kugbe uwevwi rẹ efe rẹ ovie, ọ da phare ayen rhe ovie rẹ Asiria.

⁹Ovie rẹ Asiria de nyo ọrọye; ovie rẹ Asiria da yanran kpo Damaskọs, ọ da kua, ọ da kua ihwo rọye kpo Kai, o de hwe Rezin.

¹⁰Ọke rẹ Ehaz vwo kpo Damaskọs ra vwa Tiglatpileza ovie rẹ Asiria, ọ da mrẹ agbada rẹ izobo ri Damaskọs. Ovie Ehaz da ma agbada rẹ izobo na ọ da vwẹ oma rọye vẹ obo re herọ ejobi vwo rhe Uraya orherẹn na.

¹¹Uraya orherẹn na da tọn ọkpọ rẹ agbada rẹ izobo ọtiọye phihọ, o de ruo kirobo rẹ Ehaz djere nẹ Damaskọs rhe, kẹ eriyin Uraya orherẹn na ruro tavwe rẹ ovie Ehaz ki rhivwi nẹ Damaskọs rhe.

¹²Ọke rẹ ovie na vwo nẹ Damaskọs rhe, ọ da mrẹ agbada rẹ izobo na. Ọ de si kẹrẹ agbada na, o de yeri kpo enu rọye,

¹³ọ da torhẹ izobo rẹ ẹtorhẹ rọye vẹ izobo rẹ ọka rọye, o de ku udi rẹ egagọ rọye kuo, ọ da fẹrẹ ọbara rẹ izobo rẹ ufuoma rọye ku agbada na,

¹⁴Agbada rẹ ẹrovwo rọ hẹ obaro rẹ Ọrovwohwo na o de ghwie nẹ obaro rẹ uwevwi na, nẹ uvwre rẹ asan agbada na vẹ uwevwi rẹ Ọrovwohwo na, o de muo phihọ ẹbẹre rẹ obọrhe ọnre rẹ agbada rẹ izobo rọye na.

¹⁵Ovie Ehaz da vwẹ urhi kẹ Uraya orherẹn na, tanẹ, Dia enu rẹ agbada nana torhẹ izobo rẹ ẹtorhẹ rẹ urhiọke, vẹ izobo rẹ oka vwẹ ovwọnvwọn, vẹ izobo rẹ ẹtorhẹ rẹ ovie, vẹ izobo rẹ ọka rọye, vẹ izobo rẹ ẹtorhẹ rẹ ihwo rẹ otọ na ejobi, vẹ izobo rẹ ọka, vẹ izobo rẹ udi rayen; vwọ fẹrẹ ọbara rẹ eranwe ra vwo rhe izobo rẹ ẹtorhẹ na kuo, vẹ ọbara rẹ eranvwe ejobi rẹ ayen vwọ rhe ẹga; ẹkẹvuọvo kẹ a yan jẹ agbada rẹ izobo rẹ ẹrovwo na vwo kẹ vwẹ rere mia dia etiyin da nọ ekpẹ rẹ ọdavwẹ mẹ.

¹⁶Uraya orherẹn na de ru enana ejobi kirobo rẹ ovie Ehaz ji urhi kẹ nẹ o ru.

¹⁷Ehaz da nyavwe edovi ro vwo mudia na kufia, o de si oze na nẹ ayen, o de si abadi na nẹ irhuẹn rẹ eshare ra vwẹ ẹrovwo ma phihọ otọ rọye na, ọ da vwọ rẹrẹ ẹbẹre rẹ olalọ.

¹⁸O de gbe idjerhe ra wan vwẹ edidjala rẹ ọ hẹ evun rẹ ighẹn rẹ ovie na, vẹ ọ rẹ ovie wan ruẹ otafe nẹ uwevwi rẹ Ọrovwohwo na, vwi fiki rẹ ovie rẹ Asiria.

¹⁹Asakiephana iruo ri chekọ rẹ Ehaz ruru, e rhe si ayen phihọ Ọbe rẹ Ikun rẹ Ivie ri Juda?

²⁰Ehaz da rha vwerhẹ kugbe esẹ rọye, e de rhe sho kugbe esẹ rọye vwẹ orere ri Devid; Hẹzikaya ọmọ rọye da rha re uvie vwẹ ẹdia rọye.