Read urhobo Ivie rẹ Ivẹ 17 Bible Online

Ivie rẹ Ivẹ 17 - urhobo bible

Ivie rẹ Ivẹ 17

¹Vwẹ ukpe rihwivẹ rẹ Ehaz ovie ri Juda, Hoshea ọmọ rẹ Ela de mu Izrẹl phihọ esuo vwi Sameria, ọ da re ikpe irhiri.

²Ọ de ru obo ri miovwiri vwẹ obaro rẹ Ọrovwohwo, dede na umiovwo rọye ghwa rho te e rẹ ivie rẹ Izrẹl re karo kẹ-ẹ.

³Shamlneza ovie rẹ Asiria da rhe họnrọn; Hoshea da rhe dia otọ rọye kọ ghwa ẹga vwo rhe.

⁴Ẹkẹvuọvo ovie rẹ Asiria da rhe mrẹ ero vughe vwẹ oma ri Hoshea; kidie o ji ikọn bru ovie rẹ Ijipt ra, ọ gbe rha ghwa ẹga rhe ovie rẹ Asiria-a kirobo ro ruẹ kukpe kukpe jovwo na; fiki rẹ ọtiọye na ovie rẹ Asiria de re muo, ọ da kanrọn phihọ uwodi.

⁵Etiyin ovie rẹ Asiria da rhe họnre otọ na ejobi, o de rhi te Sameria, ọ da họnrọn ẹgbukpe erha.

⁶Vwẹ ukpe rirhiri ri Hoshea ovie rẹ Asiria de mu Sameria, ọ da kua ihwo rẹ Izrẹl kpo Asiria, ọ da ghwa ayen phihọ Hala, kugbe Habo, urhie ri Gozan, kugbe evun rẹ irere rẹ ihwo ri Mid.

⁷Ọnana o ruru, fikiridie ihwo rẹ Izrẹl ru umwemwu kpahe Ọrovwohwo Ọghẹnẹ rayen, rọ reyọ ayen nẹ otọ rẹ Ijipt rhe, nẹ abọ ri Fero, ovie rẹ Ijipt na kẹ ayen djẹ oshọ rẹ edjọ efa;

⁸e da yan nene uruemu rẹ ẹgborho efa rẹ Ọrovwohwo djẹ ihwo nu kẹ ihwo rẹ Izrẹl dia, kugbe uruemu rẹ ivie rẹ Izrẹl cho miẹ ayen rhe.

⁹Ihwo rẹ Izrẹl da bẹbẹ ru umwemwu kpahe Ọrovwohwo Ọghẹnẹ rayen. Ayen da so egbada kẹ oma rayen vwẹ irere rẹ ayen ejobi na, nẹ uwevwi rẹ ohẹrhẹ re te orere ra gba ogba yariẹ na,

¹⁰ayen de ma osusun vẹ ighriki kẹ omobọ rayen vwẹ enu rẹ ugbenu kugbe otọ ri kurhe kurhe ọkpokpọ;

¹¹kẹ etiyin ayen da torhẹ insẹns vwẹ enu rẹ egbada ejobi, kirobo rẹ ẹgborho na ruẹ rẹ Ọrovwohwo mu nẹ otọ na kẹ ayen dia na. Ayen de rhi ru emu umwemwu, ayen da kpare Ọrovwohwọ ophu,

¹²ayen da gọ ema, rẹ Ọrovwohwo ta kẹ ayen nẹ, Ovwan se ru ọnana-a.

¹³Dede na yẹn Ọrovwohwo ji ọmraro kọmraro kugbe ọmrẹ kọmrẹ ra nẹ Izrẹl vi Juda iroro, nẹ, Kurhẹriẹ nẹ idjerhe umwemwu rẹ ovwan na rere ovwan sẹro rẹ irhi mẹ kugbe iji mẹ, ovwan yọnrọn ayen kirobo ri mi ji urhi vwọ kẹ esẹ rẹ ovwan, kirobo ri mi ji idibo mẹ emraro na rhi yono ovwan.

¹⁴Ẹkẹvuọvo ayen kerhọ-ọ, ẹkẹvnọvo ayen de fi udu gbere kirobo rẹ esẹ rẹ ayen ruru ri jẹ Ọrovwohwo Ọghẹnẹ rayen esegbuyota.

¹⁵Ayen da jẹ irhi rọye fia, kugbe ọphọ rọ vẹ esẹ rayen rere, kugbe okpa rọ kpa kẹ ayen. Ayen da yan nene ema rẹ efian, ayen de nene ẹgborho re yariẹ ayen phihọ, rẹ Ọrovwohwo kpa ọkpa kẹ ayen nẹ ayen nene-e na.

¹⁶Ayen da siẹn irhi rẹ Ọrovwohwo Ọghẹnẹ rayen, ayen de duvwu upene rẹ irhuẹn ivẹ kẹ oma rayen, ayen da ma Ashera, ayen da gọ ema rẹ obo odjuvwu, ayen da gọ Baal.

¹⁷Ayen tọrhẹ emeshare rayen vẹ emetẹ rayen vwo ze izobo, ayen bọ epha hworo ẹbo, ayen da shẹ oma rayen kẹ umiovwo vwẹ obaro rẹ Ọrovwohwo, ayen da kparọ ophu.

¹⁸Fiki rẹ ọtiọye na Ọrovwohwo de mu ophu kpahe Izrẹl gangan, o de si ayen nẹ obaro rọye; ọvuọvo rhe chekọ-ọ, jokpa rẹ orua ri Juda ọvo.

¹⁹Juda je yọnre irhi rẹ Ọrovwohwo Ọghẹnẹ rayen na-a, ẹkẹvuọvo ọ je ghwẹ obo phihọ iruemu rẹ Izrẹl ghwa rhe na.

²⁰Ọrovwohwo da siẹn ekrun rẹ Izrẹl ejobi, Ọ da vwẹ oja re ayen, o de siobọ nẹ ayen kẹ ihwo re ghwọrọ ihwo, bẹsiẹ rọ rhe vwọ djẹ ayen ejobi nẹ obaro rọye.

²¹Ọke rẹ Ọrovwohwo vwọ hẹriẹ Izrẹl nẹ uwevwi ri Devid nu, ayen da reyọ Jeroboam ọmọ rẹ Nebat ovie. Jeroboam da djẹ Izrẹl nẹ ayen gbe ga Ọrovwohwo-o, ọ da nẹrhẹ ayen ru umwemwu rode.

²²Ihwo rẹ Izrẹl da yan phihọ imwemwu rẹ Jeroboam ruru, ayen gbe obọ nyẹ aye-en,

²³bẹsiẹ rẹ Ọrovwohwo ri vwo si Izrẹl nẹ obaro rọye kirobo rọ wan oma rẹ idibo rọye emraro ejobi na ta. Kọye a da kua Izrẹl nẹ otọ rayen vwo kpo Asiria ra dia ighuvwu re te ẹdẹ ri nonẹ na.

²⁴Ovie rẹ Asiria da kua ihwo nẹ Babilọn rhe, vẹ Kuta, vẹ Ava, Hamat, vi Sefavem rhe, ọ da ghwẹ ayen phihọ irere ri Sameria ra kua ihwo rẹ Izrẹl nu na, ayen de rhe vwo Sameria, ayen de yeri irere rọye.

²⁵Ọke rẹ ayen vwo tu dia etiyin na, ayen gbe djẹ oshọ rẹ Ọrovwohwo-o; Ọrovwohwo de ji ikpohrokpo phihọ ohri rayen, ikpohrokpo na de hwe evo vwẹ ihwo na.

²⁶E de rhi gbe ikun na kẹ ovie rẹ Asiria, Ẹgborho ru wọ kua rhe rhe dia vwẹ irere ri Sameria na riẹn irhi rẹ Ọghẹnẹ rẹ otọ na-a; fiki rẹ ọtiọye na o vwo ji ikpohrokpo phihọ otọ na, nighe, ikpohrokpo na rhi hwe ihwo na, fikiridie ihwo na riẹn urhi rẹ Ọghẹnẹ rẹ otọ na-a.

²⁷Etiyin ovie rẹ Asiria de ji urhi, Siobọ nẹ ọvo vwẹ irherẹn re mu nẹ oboyi rhe na; rere i kpo oboyi ra dia rere o yono ihwo na urhi rẹ Ọghẹnẹ rẹ ọto na.

²⁸Kọye ọvo rẹ irherẹn ra kua yanran nẹ Sameria na da rhe Bẹtẹl rhe dia, o de yono ihwo na oshẹdjẹ rẹ Ọrovwohwo.

²⁹Ẹkẹvuọvo orho ọvuọvo vẹ edjọ rọye ji vwo, ayen da rhuẹrẹ ayen phihọ uwọrhan rẹ ihwo ri Sameria bọnre, kuẹgborho vwẹ evun rẹ orere rẹ ayen dia;

³⁰eshare ri Babilọn da ma Sukotbenot, eshare ri Kut da ma Nagal, eshare ri Hamar da ma Ashima,

³¹Ihwo rẹ Ava da ma Nibhaz vi Tatak; ihwo ri Sefavem da vwẹ emọ rayen tọn erhanre kẹ Adramẹlẹk vẹ Anamẹlẹk, ẹdjọ ri Sefavem.

³²Yẹn ekpuyovwi rẹ ayen je djẹ oshọ rẹ Ọrovwohwo, ayen da dia omoma rayen sanẹ eghẹre rẹ ihwo vwo ru irherẹn rẹ agbada na, ihwo nana ke eye gọ iye kẹ ayen vwẹ iwevwi rẹ edjọ rẹ agbada ri kpenu.

³³Kẹ ayen djẹ oshọ rẹ Ọrovwohwo ẹkẹvuọvo yẹn ayen je gọ edjọ robọ rayen kirobo rẹ a gọ ayen vwẹ ẹgborho ra kua ayen nurhe.

³⁴Rhi te ẹdẹ ri nonẹ na ayen ji siobọ nẹ uruemu rayen ri jovwo-o. Ayen djẹ oshọ rẹ Ọrovwohwo-o, ayen yan phihọ iji rọye-e, ayen yọnrọn ẹgha rọye, ayen yọnrọn urhi rọye rọ vwọ kẹ emọ ri Jekọp re se Izrẹl na-a.

³⁵Ọrovwohwo vẹ ayen da rẹ ọphọ, o de ji urhi kẹ ayen, Wa djẹ oshọ rẹ edjọ efa-a, we she iguẹ kẹ ayẹ-en, wa ga aye-ẹn, eyẹ we ze izobo kẹ aye-en.

³⁶Ẹkẹvuọvo ovwan djẹ oshọ rẹ Ọrovwohwo, rọ reyọ ovwan nẹ otọ ri Ijipt rhe vwẹ ẹgba rẹ obọ rọye vẹ igbabọ ro rhie phihọ wa vwẹ uyovwi kpotọ kẹ, kẹ ọye ovwan ji ze izobo kẹ.

³⁷Tẹ iji vẹ ẹgha kugbe urhi ro si kẹ ovwan, wa yọnrọn vwẹ ọke ejobi. Wa djẹ oshọ rẹ edjọ efa-a,

³⁸wo jẹ ọphọ na re me vẹ ovwan rere na chọrọ ovwan ẹro-o. Wa rha djẹ oshọ rẹ eghẹnẹ efa-a,

³⁹ẹkẹvuọvo ovwan ke djẹ oshọ rẹ Ọrovwohwo Ọghẹnẹ rẹ ovwan, ko che sivwi ovwan nẹ abọ rẹ ivwighrẹ rẹ ovwan ejobi.

⁴⁰Ẹkẹvuọvo ayen je kerhọ-ọ, ẹkẹvuọvo ayen de ru uruemu rẹ ayen ruẹ jovwo.

⁴¹Kẹ eriyin ẹgborho nana djẹ oshọ rẹ Ọrovwohwo na, yẹn ọ vẹ oma ro duvwuru go; emọ rayen, je vwẹ otiọye rhe, kugbe emọ rẹ emọ rayen — kirobo rẹ esẹ rayen ruru, eriyin ayen ji ruẹ te ẹdẹ ri nonẹ na.