Read urhobo Ivie rẹ Ivẹ 18 Bible Online

Ivie rẹ Ivẹ 18 - urhobo bible

Ivie rẹ Ivẹ 18

¹Vwẹ ukpe rerha Hoshea ọmọ rẹ Ela, ovie rẹ Izrẹl, Hẹzikaya ọmọ rẹ Ehaz, ovie ri Juda, de mu uvie phihọ ẹriọ.

²Ikpe uje gbẹ iyori ọ kpako te vwẹ ọke ro vwo mu uvie phihọ ẹriọ, ọ da re uvie ikpe uje gbẹ irhiri vwi Jerusalẹm. Odẹ rẹ oni rọye Abi ọmọtẹ ri Zekaraya.

³O de ru obo ri shehọ vwẹ obaro rẹ Ọrovwohwo kirobo ri Devid ọsẹ rọye ruru.

⁴Ọ de kporo egbada na ejobi, o de rhe kporo ẹshẹ na, ọ da nyavwe Ashera na she teye otọ. Ọ da guọghọ ọrọdekọ ri Mosis vwẹ ẹronvwo duvwu na ivwivwuvwu kidie ihwo rẹ Izrẹl torhẹ izobo kẹ ri te ẹdẹ yena; e de se Nehushitan.

⁵Ọ da vwẹ ẹro so Ọrovwohwo na Ọghẹnẹ rẹ Izrẹl; fiki rẹ ọtiọye na o rhe vwo ovie ọvuọvo rọ họherọ-ọ vwẹ usun rẹ ivie ri sun kpahọ vwi Juda, eyẹ vwẹ usun re karọ kẹ na o vwo ọvuọvo rọ jẹ họhọ-ọ.

⁶Kidie ọ ghanọ Ọrovwohwo boma, o chuko ku Ọrovwohwo-o, ẹkẹvuọvo ọ nabọ yọnrọn irhi rẹ Ọrovwohwo ji ki Mosis.

⁷Ọrovwohwo vẹ ọye da herọ; asan kasan rẹ rare ejobi ko yovwi kẹ. Ọ de mukpahe ovie rẹ Asiria, o gbe rhọvwe ga-a.

⁸O de hwe otu ri Filiastia re te Gaza vẹ ubrotọ rọye, nẹ asan ohẹrhẹ ra ro orere ra gba ogba yariẹ.

⁹Vwẹ ukpe rẹne rẹ Ovie Hẹzikaya, rọ dia ukpe righwrẹ ri Hoshea ọmọ rẹ Ela, ovie rẹ Izrẹl Shamaneza ovie rẹ Asiria da kpare ofovwi rhe Sameria, ọ da họnrọn.

¹⁰Ikpe erha vwọ wan nu ọ da kua. Vwẹ ukpe resan ri Hẹzikaya, rọ dia ọ rẹ ukpe irhiri ri Hoshea, ovie rẹ Izrẹl ọye a vwọ reyọ Sameria.

¹¹Ovie rẹ Asiria da kua ihwo rẹ Izrẹl kpo Asiria, Ọ da ghwa ayen phihọ Hala vẹ orhoma ri Habọ, urhie ri Gozan, kugbe evun rẹ irere rẹ ihwo ri Mid,

¹²Fikiridie ayen mu ọghọ kẹ urhuru rẹ ota rẹ Ọrovwohwo Ọghẹnẹ rayen na-a, ẹkẹvuọvo ayen da shariẹ ọphọ rọye vrẹn, eriyin ayen je chọ irhi ri Mosis odibo rẹ Ọrovwohwo na ji kẹ ayen; ayen kerhọ-ọn, eyẹ mu ọghọ-ọ.

¹³Vwẹ ukpe rihwẹne rẹ Ovie Hẹzikaya Senakarib ovie rẹ Asiria da rhe re họnre irere ri Juda ejobi ra gba ogba yariẹ ọ da reyọ ayen.

¹⁴Hẹzikaya ovie ri Juda de ji ikọn bru ovie rẹ Asiria ra vwi Lakish, tanẹ, Mi ru chọ , si oma uko kẹ vwẹ; obo wo bru kẹ vwẹ ejobi me reyọ. Ovie rẹ Asiria da nọ ekpẹn vwẹ obọ ri Hẹzikaya ovie ri Juda talent ujori erha rẹ idọnọ kugbe talent ọghan rẹ oro.

¹⁵Hẹzikaya da vwẹ idọnọ rọ mrẹre vwẹ uwevwi rẹ Ọrovwohwo na, vẹ uwevwi rẹ efe rẹ uwevwi rẹ ovie na vwọ kẹ.

¹⁶Vwẹ ọke Hẹzikaya da kpare oro ra vwọ rhuẹre ẹchẹ rẹ uwevwi rẹ Ọrovwohwo na, kugbe uchivwo rẹ anurhoro na ri Hẹzikaya ovie ri Juda nabọ vwọ pharọ, ọ da vwẹ ayen kẹ ovie rẹ Asiria na.

¹⁷Etiyin ovie rẹ Asiria de ji Tatan kugbe Rabsaris vi Rabshake nene ituofovwi buebu nẹ Lakish kpo Jerusalẹm ra vwa Hẹzikaya. Ayen de yeri kpenu re te Jerusalẹm. Ayen rhi vwo te oboyi, ayen de mudia kẹrẹ asan ogbogbo rẹ ame djẹ wan kpo ẹtẹrhe ro obenu, kọye ro kpo obo Anurhoro ra da fọnrhọn emwa.

¹⁸Ọke rẹ ayen vwọ nọ ekpẹn rẹ ovie, Elayakim ọmọshare ri Hilkaya, rọ vwẹ ẹro te uwevwi na kugbe Shebna osiọbe na kugbe Joa ọmọshare rẹ Asaf, rẹ okeri na.

¹⁹Rabshake da ta kẹ ayen, Ta kẹ Hẹzikaya, Enẹ ovie rode na ovie rẹ Asiria tare. Die wọ tobọ vwẹ ẹro vwọ so?

²⁰Wo rori nẹ eta ghevweghe eyẹ iroro vẹ ẹgba rẹ ofovwi! Ono wọ vwẹ oma da, ru wo vwo muẹ kpahe ovwẹ?

²¹Nighe, wọ vwẹ ẹro so Ijipt, ro vwirhẹ ro che duvwun obọ rẹ ohwo kohwo rọ vwẹ oma rẹrẹ. Eriyin Fẹro ovie rẹ Ijipt ephan vwọ kẹ ohwo kohwo rọ vwẹ ẹro suọ.

²²Ẹkẹvuọvo wọ da ta kẹ vwẹ, Avwanrẹ vwẹ ẹro so Ọrovwohwo Ọghẹnẹ rẹ avwanre, ọ dia ọye Hẹzikaya ghwiẹ ekuakua rẹ asan ri kpenu kugbe egbada rọye reyọ, rọ da ta kẹ Juda vi Jerusalẹm nẹ, Obaro rẹ agbada nana ovwan da cha gọ vwi Jerusalẹm?

²³Yanrhe asakiephana, rere wọ vẹ Ọrovwohwo ovie rẹ Asiria yeya. Me vwẹ iyesi uriori ivẹ kẹ wẹ su wọ sa mrẹ ihwo re djẹ ayen vwọ kpahe otọ.

²⁴Mavọ wo ru sa djẹ olotu ọvo rhivwi vwẹ idibo rẹ ọrovwovwe na, ọke re wọ da vwẹ ẹro so Ijipt vẹ ekpẹre rẹ ofovwi kugbe ihwo re sa gua ayen.

²⁵Ọ rọ marho, ku wo rori nẹ obuko rẹ Ọrovwohwo me wan rhe etinẹ na rhe vwọ ghwọrọ na? Ọrovwohwo re ta kẹ vwẹ, Yanran ra vwọ so otọ na rere wọ ghwọrọ.

²⁶Kọye Elayakim ọmọ ri Hilkaya, vẹ Shebna kugbe Joa da ta kẹ Rabsheke, Biko, ta kẹ idibo wẹn vwẹ ephẹrẹ rẹ Aramea, kidie avwanre nyo, wọ vwẹ ephẹrẹ ri Juda ta kẹ avwanre-e ihwo rẹ asan igbẹhẹ na de nyo.

²⁷Ẹkẹvuọvo Rabshake na da kpahe kẹ ayen, Ọrovwovwe onini mẹ ji uvwe rhe re ta ota nana kẹ ọrovwowe vẹ ovwan, ọ gbe rha dia eshare re dia obi igbẹhẹ na-a, re vẹ ovwan che ghwẹ kufia na re ayen re isọn da ephẹ robọ rayen?

²⁸Rabshake na de mudia ọ da van ta vwẹ ephẹrẹ ri Judah, Nyo ota rẹ ovie rode, ovie rẹ Asiria!

²⁹Enẹ ovie na tare. Wo jẹn Hẹzikaya phiẹn ovwa-an, kidie o se sivwi ovwan nẹ obọ mẹ-ẹ.

³⁰Wo jẹn Hẹzikaya phiẹn ovwan vwẹ ẹro so Ọrovwohwo tanẹ, Ọmuẹro nẹ Ọrovwohwo se sivwi avwanre, nẹ ọ cha vwẹ orere nana phihọ obọ rẹ ovie rẹ Asiria-a.

³¹Wa kerhọ ri Hẹzikaya-a; kidie enẹ ovie rẹ Asiria tare. Wa rhuẹrẹ kẹ vwẹ re we bru vwe rhe; ọke yena dohwo dẹ vain robọ rọye kọ cha re, dọhwo dowe rọye kọ cha fọn, ọ vẹ ame rẹ orhanre rọye kọ cha da;

³²bẹsiẹ re me cha vwọ reyọ ovwan yanran vwo kpo otọ rọ họhọ otọ rẹ ovwan na, otọ rẹ eka vẹ udi, otọ rẹ ikara vẹ ọgbọ ri vain, otọ rẹ irhe rẹ oliv vẹ ame rẹ ọnyọn, rere wa vwọ rhọ, rere ovwan vwo je ghwo. Wa kerhọ ri Hẹzikaya siẹn ro de sun ovwan ghwrẹ rọ da tanẹ, Ọrovwohwo che sivwi avwanre.

³³Ọvo vwẹ edjọ rẹ ẹgborho na se sivwi otọ rọye nẹ obọ rẹ ovie rẹ Asiria re?

³⁴Edjọ ri Hamat vẹ e rẹ Apad rhọ? Edjọ rẹ Sefavim vẹ e rẹ Hena kugbe Iva rhọ? Ayen se sivwi Sameria nẹ obọ mẹ re?

³⁵Edjọ vọ vwẹ edjọ rẹ ẹgborho na ri se sivwi irho rayen nẹ obọ mẹ re, rẹ Ọrovwohwo che vwo sivwi Jerusalẹm nẹ obọ mẹ?

³⁶Ẹkẹvuọvo ihwo na da fọ gbie ayen kpahe ota ọvuọvo kẹ-ẹ, fikiridie ovie rayen tare nẹ, Wa kpaha kẹ-ẹ.

³⁷Kọye Elayakim ọmọ ri Hilkaya, rọ vwẹ ẹrọ te uwevwi na kugbe Shebna osiọbe na kugbe Joa ọmọ rẹ Asaf, okeri na, da bẹrẹ emwa djẹ oma bru Hẹzikaya rhe, ayen da nẹ iyẹnrẹn re eta ri Rabshake na tare kẹ.