Read urhobo Ivie rẹ Ivẹ 19 Bible Online

Ivie rẹ Ivẹ 19 - urhobo bible

Ivie rẹ Ivẹ 19

¹Ọke rẹ Ovie Hẹzikaya vwo nyo iyẹnrẹn rẹ eta na nu, ọ da bẹrẹ emwa dje oma rọye, ọ da vwẹ isiso vwo phopho, ọ da yan kpo evun rẹ uwevwi rẹ Ọrovwohwo na.

²Ọ de ji Elayakim, rọ vwẹ ẹro te uwevwi na, kugbe Shebna osiọbe kugbe ekpako rẹ irherẹn re vwẹ isiso vwo phopho bru ọmraro na Aizaya ọmọ rẹ Emoz ra.

³Ayen da ta kẹ, Enẹ Hẹzikaya tare, Nonẹ na ẹdẹ rẹ ukpokpogho, nonẹ ẹdẹ rẹ ekan, nonẹ na ẹdẹ rẹ ophọphọvwe; unwe rẹ emọ na phire, ẹgba rha herọ ra vwọ chuẹ uvwiẹ raye-en.

⁴Siẹvo yẹn Ọrovwohwo Ọghẹnẹ wẹn nyo eta ejobi ri Rabshake, rẹ onini rọye ovie rẹ Asiria ji rhe rhe ta vwọ reyọ Ọghẹnẹ ro vwo arhọ vwọ jehwẹ, kẹ Ọrovwọhwo Ọghẹnẹ wẹn na ọvo cha oja rẹ ota rẹ o nyori na; fiki rẹ ọtiọye na gba nẹ ẹrhovwo kẹ umuku ra yan jovwo na.

⁵Ọke rẹ idibo rẹ Ovie Hẹzikaya vwo bru Aizaya rhe,

⁶Aizaya da ta kẹ ayen, Ta kẹ ọrovwovwan onini rẹ ovwan, Enẹ Ọrovwohwo na tare. Wọ vwi fiki rẹ eta nana re wo nyori na djẹ oshọ-ọ, eta rẹ idibo rẹ ovie rẹ Asiria rọ vwọ phọphọ ovwẹ na.

⁷Nighe, mi che phi erhi phihọ oma, ko che nyo usi rẹ ofovwi ko che rhivwi kpo otọ robọ rọye, ke me cha nẹrhẹ o ghwu ughwu rẹ ọlọkọ vwẹ otọ robọ rọye.

⁸Rabshake na de rhivwi kpo, ọ da mrẹ nẹ ovie rẹ Asiria vẹ Libna họnran; fikiridie o nyori nẹ ovie na kpare oma nẹ Lakish.

⁹Ọke rẹ ovie na vwo nyo kpahe Tarhakah ovie rẹ Etiopia, Nighe, o se ofovwi ra cha vwọ họnre owẹ, Ọ da rhọma ji ikọn bru Hẹzikaya ra nẹ,

¹⁰Enẹ wọ cha ta kẹ Hẹzikaya ovie ri Juda; Wo jẹ Ọghẹnẹ wẹn re wo vwẹ ẹro so na phiẹn wẹ-ẹ vwẹ oma rẹ ive ro veri nẹ a sa vwẹ Jerusalẹm vwọ kẹ ovie rẹ Asiria-a.

¹¹Nighe, wo nyo obo rẹ ivie rẹ Asiria ruru vwẹ otọ na ejobi, obo rọ ghwọrọ ayen muotọ ko che sivwi uwe?

¹²Kẹ edjọ rẹ ẹgborho na sivwi ayen re, ẹgborho rẹ esẹ mẹ guọghọre na — Gozan, Heran, Rezef kugbe ihwo rẹ Idẹn ri Telesa?

¹³Ovie ri Hamat rhọ? Ovie rẹ Apad rhọ? Ovie rẹ orere rẹ Sefavem rhọ? Ovie rẹ Hena rhọ? Eyẹ ovie rẹ Iva rhọ?

¹⁴Hẹzikaya da reyọ ọbe na mie ikọn na, o de se; Hẹzikaya da yan kpo uwevwi rẹ Ọrovwohwo na, o de rhie ọbe na phihọ obaro rẹ Ọrovwohwo na,

¹⁵Hẹzikaya da nẹ ẹrhovwo vwẹ obaro rẹ Ọrovwohwo na, ọ da ta, E Ọrovwohwo Ọghẹnẹ rẹ Izrẹl, — tidia ekete vwẹ ohri rẹ chẹrobim, Wọwẹ ọvo ọye Ọghẹnẹ rẹ ivie rẹ akpo na ejobi; We re ma odjuvwu vẹ akpo.

¹⁶Rhie erhọn wẹn, E Ọrovwohwo, rere wo nyo; rhie ẹro wẹn E Ọrovwohwo, rere wọ mrẹ; nyo eta ri Senakarib vuẹ rhe re vwọ reyọ Ọghẹnẹ ro vwo arhọ vwọ jehwẹ.

¹⁷Ghine uyota, E Ọrovwohwo, ivie rẹ Asiria ghwọrọ ẹgborho na vẹ etọ rayen,

¹⁸ayen da kpare edjọ rayen phihọ erhanre; kidie ayen diẹ edjọ-ọ, ẹkẹvuọvo iruo rẹ abọ rẹ ihwo rẹ akpọ, irhe vẹ elalo; fiki rẹ ọtiọye na a da ghwọrọ ayen.

¹⁹Ọtiọye asakiephana, E Ọrovwohwo Ọghẹnẹ rẹ avwanre, sivwi avwanre, me rẹ wẹ, nẹ obọ rọye, rere ivie rẹ akpo na ejobi vwọ riẹn E Ọrovwohwo nẹ wọwẹ ọvo Ọghẹnẹ na.

²⁰Etiyin Aizaya ọmọ rẹ Emoz da vuẹ rhe Hẹzikaya, tane, Enẹ Ọrovwohwo Ọghẹnẹ rẹ Izrẹl tare. Mi nyo ẹrhovwo wọ nẹ kẹ vwẹ kpahe Senakarib ovie rẹ Asiria.

²¹Ọnana ota rẹ Ọrovwohwo ta kpahọ. Ọ phọphọ owẹ, ọ vwẹ owẹ jehwẹ — ọmọtobẹ ri Zayọn, o kpogho uyovwi rọye vwẹ obuko wẹn ọmọtẹ ri Jerusalẹm.

²²Ono wọ vwọ jehwẹ, ono wọ ghwo ku? Ono wọ kpare urhuru vwọ ta ota kẹ ono wọ wiẹ ẹro ku? Vwọ kpahe Ọfuanfon Ọvuọvo rẹ Izrẹl na!

²³Wo ji ikọn wẹn rhe rhe vwọ phọphọ Ọrovwohwo na, Wọ je ta Ekpẹrẹ buebu mẹ nana mi vwo yeri kpenu rẹ igbenu, re tẹ otọ ri Lebanọn; Mi she igẹdu rọye ri mi gro, vẹ owangha ri muẹ udidi; Me yan te oba rẹ urhuẹn rọye, Asan rọ ma dia oghwaghwo vwọ.

²⁴Me tọn erhare. Me da ame rẹ erhorha, Me da vwẹ ẹhẹrhowọ mẹ chiyi irhie rẹ Ijipt ejobi kpo ya.

²⁵Wo ji nyo-o Ne me jẹ iroro rọye krire? Iroro re me jẹre rhabae rhe Me rhe vwọ phia asakiephana re, Nẹ wọ hirhe irere ra gba ogba yariẹ phihọ erhurhu,

²⁶Ọke rẹ ihwo re dia ayen, de dje ẹgba rayen ofu ko dje ayen vẹ ibeghe, ayen da rhe họhọ ẹbe rẹ aghwa, kẹrẹ ẹbe ọboban, kerẹ odi rọ hẹ enu rẹ uwevwi; Ro ghwuvo tavwe ro ki gro.

²⁷Ẹkẹvuọvo me riẹn etidia otọ wẹn Vẹ ada ẹra vẹ uwevwi ẹcha wẹn, Vẹ ophu wo muẹ kpahe ovwẹ.

²⁸Fikiridie wo mu ophu kpahe ovwẹ Mi de rhi nyo usi rẹ omephuo wẹn, Me cha jẹ oghọre mẹ phihọ unwe wẹn Me cha gba utehru phihọ owẹ unu Mi che ku we rhẹriẹ kpo idjerhe ru wọ wan rhe.

²⁹Ọnana kọ cha dia oka kẹ wẹ; ukpe nana ku wọ cha re ekakọn ri mu djẹ, ukpe rivẹ ekakọn yena re djẹrhe, ukpe rerha, ko wọ kọn, ku wo vun, ku wọ kọn egbo ri vain ku wọ re ibi rayen.

³⁰E re rhọre vwẹ umuku rẹ uwevwi ri Juda ke cha rhoma tọn owọ vi otọ, kẹ ayen cha mọ ibi vwẹ obenu;

³¹Kidie nẹ evun ri Jerusalẹm umuku ke tanrhe, nẹ Ugbenu ri Zayon rhe otu ri ghwu chekọ ke cha rhe. Oruru rẹ Ọrovwohwo che ru ọnana.

³²Enẹ Ọrovwohwo ta kpahe ovie rẹ Asiria. Ọ cha rhe orere nana-a, Ọ cha sa odada phihọ etiyi-in, eyẹ ọ cha rhe vẹ ekpọfia eyẹ o che bro dje-e.

³³Idjerhe rọ wan rhe ọ je cha wan rhivwi kpo, ọ cha sa yan rhe orere nana-a, enẹ Ọrovwohwo tare.

³⁴Kidie me cha chochọ rẹ orere na ri mi sivwo, vwi fiki mẹ vẹ fiki ri Devid odibo me.

³⁵Vwẹ ason yena amakashe rẹ Ọrovwohwo da yan phia, o de hwe ihwo uriori ujori gbẹ ujọne gbẹ iyori vwẹ erhọn rẹ ihwo rẹ Asiria; ọke rẹ eshare na vwọ rhọvwọn vwẹ urhiọke rhirhi, nighe enana ejobi kẹ iririvwi.

³⁶Etiyin Senakerib ovie rẹ Asiria de vrẹn, ọ da yanran kpo, ọ da ra dia Ninive.

³⁷Rọ vwọ gọ iye vwẹ uwevwi ri Nisrok rẹ ẹdjọ rọye, Adramelẹk vi Shareza, emọ rọye da vwọ ọlọkọ hwe, ayen da djẹ kpo otọ rẹ Ararat. Esaradon ọmọ rọye da re uvie vwẹ ẹdia rọye.