Read urhobo Ivie rẹ Ivẹ 20 Bible Online

Ivie rẹ Ivẹ 20 - urhobo bible

Ivie rẹ Ivẹ 20

¹Vwẹ ọke yena Hẹzikaya kọ họnvwan, ko muegbe rẹ ughwu. Aizaya rẹ ọmraro na ọmọ rẹ Emoz de bro rhe, ọ da ta kẹ, Enẹ Ọrovwohwo tare, Rhuẹrẹ uwevwi wẹn phihọ; kidie wo che ghwu, wo che se vrẹn nẹ ọga na-a.

²Hẹzikaya de hirhe opharo ku igbẹhẹ, ọ da nẹ ẹrhovwo kẹ Ọrovwohwo, tanẹ,

³Karohọ asakiephana, E Ọrovwohwo, me rẹ wẹ, obo ri mi vwẹ segbuyota vẹ udu mẹ ejobi vwọ yan kpahe owẹ, mi de ru obo ri shehọ vwẹ obaro wẹn. Hẹzikaya da viẹ gangan.

⁴Tavwe rẹ Aizaya ki rhi nẹ ọguan rẹ uherevie na ro otafe, ota rẹ Ọrovwohwo de bro rhe.

⁵Rhivwi yanran wọ ta kẹ Hẹzikaya, ovie rẹ ihwo mẹ, Enẹ Ọrovwohwo, Ọghẹnẹ ri Devid ọsẹ wẹn tare. Mi nyo orẹ wẹn, Mi nyo oviẹ wẹn, nighe, Mi che sivwi uwe; ẹdẹ rerha ku wo kpo uwevwi rẹ Ọrovwohwo.

⁶Ke me cha vwẹ ikpe ihwiori vwọ ba arhọ wẹn. Mi che sivwi uwe vẹ orere nana nẹ obọ rẹ ovie rẹ Asiria, Mi che sivwi orere na vwi fiki mẹ vẹ fiki ri Devid.

⁷Aizaya da ta, A vwẹ ikara ri fig rhe, e jẹn a vwẹ ayen hẹ enu ri iribẹ na, rere oma rọye kpo.

⁸Hẹzikaya da ta kẹ Aizaya, Didi oka Ọrovwohwo che vwo sivwi uvwe, re me da yan kpo uwevwi rọye vwẹ ẹdẹ rerha?

⁹Aizaya da ta, Ọnana ọye oka ro nẹ obọ rẹ Ọrovwohwo bru we rhe, nẹ Ọrovwohwo che ru obo ro veri na gba. Kẹ uhoho na cha vwẹ ichiyi ihwe kpo obaro gbe nẹ ọ cha vwẹ ichiyi ihwe kpo obuko?

¹⁰Hẹzikaya da kpahe, Ọnana emu ọlọlọhọ vwọ kẹ uhoho rọ vwọ vwẹ ichiyi ihwe gro kpo obaro; ẹkẹvuọvo e ji uhoho na vwẹ ichiyi ihwe gro kpo uko.

¹¹Aizaya rẹ ọmraro na da viẹ se Ọrovwohwo; ọ da vwẹ uhoho na kpo uko ichiyi ihwe, rẹ ọnre na vwọ yan kpo uko vwẹ ichiyi rẹ Ehaz.

¹²Ọke yena Mẹrodak-baladan ọmọ ri Baladan, ovie ri Babilọn de ji ihwo re ghwẹ ẹbe vẹ ẹsẹ rhe Hẹzikaya; kidie o nyori nẹ Hẹzikaya mworo gangan.

¹³Hẹzikaya de dede ayen reyọ, ọ da vwẹ ekuakua rẹ efe rẹ uwevwi rọye vwọ nẹ ayen, idọnọ, oro, egẹ, evwri ọghaghare, iwun rẹ ofovwi, emu kemu rọ hẹ evun rẹ uwevwi rẹ efe rọye ejobi ọye ọ vwọ nẹ ayen; ọ vwọ omu ọvuọvo rọ hẹ evun rẹ uwevwi rọye eyẹ evun rẹ uvie rọye na Hẹzikaya je vwọ nẹ aye-en.

¹⁴Etiyin Aizaya rẹ ọmraro na de bru Ovie Hẹzikaya rhe, ọ da ta kẹ, Die eshare nana tare? Ọkevọ ayen vwo bru we rhe? Hẹzikaya da ta, Ogboko ayen nurhe, Babilọn ayen nurhe.

¹⁵Ọ da ta, Die ayen mrẹre vwẹ evun rẹ uwevwi wẹn na? Hẹzikaya da kpahe kẹ, Ayen mrẹ emu ejobi rẹ hẹ evun rẹ uwevwi mẹ, o vwo emu ọvuọvo rọ hẹ evun rẹ uvun rẹ efe mẹ ri mi je djẹ kẹ aye-en.

¹⁶Aizaya da ta kẹ Hẹzikaya, Nyo ota rẹ Ọrovwohwo na.

¹⁷Nighe, ẹdẹ cha, ra cha vwọ ghwa ekuakua rẹ uwevwi wẹn vẹ ekuakua rẹ esẹ wẹn kọn phihọ otọ na vwo kpo Babilọn, a cha yan jẹ ọvuọvo vwo-o, enẹ Ọrovwohwo tare.

¹⁸Emọ wẹn evọ, re vwiẹ kẹ wẹ na, ke che mu ayen yanran; ayen ke cha dia eghwara vwẹ ighẹn rẹ ovie ri Babilọn.

¹⁹Etiyin Hẹzikaya da ta kẹ Aizaya, Ota rẹ Ọrovwohwo wọ tare na ọ yoma. Kidie o rori nẹ, Ufuoma vẹ ofuvwegbe herọ vwẹ ọke mẹ na?

²⁰Iruo ri chekọ ri Hẹzikaya vẹ ẹgba rọye kugbe obo ro ru ẹtẹrhe rẹ ame vẹ egbogho rọ vwọ ghwa ame rhe evun rẹ orere na, e rhe si ayen phihọ Ọbe rẹ Ikun rẹ Ivie ri Juda?

²¹Hẹzikaya da vwerhẹ kugbe esẹ rọye Manasse ọmọ rọye da re uvie vwẹ ẹdia rọye.