Read urhobo Ivie rẹ Ivẹ 21 Bible Online

Ivie rẹ Ivẹ 21 - urhobo bible

Ivie rẹ Ivẹ 21

¹Ikpe ihwivẹ Manasse kpako te ọke ro vwo mu uvie phihọ ẹriọ, ọ da re uvie ikpe ujuvẹ gbẹ ihwe gbẹ iyori vwi Jerusalẹm. Odẹ rẹ oni rọye Hefiziba.

²O de ru obo ri miovwiri vwẹ obaro rẹ Ọrovwohwo, uruemu rẹ ẹgua rẹ ihwo rẹ Ọrovwohwo djẹnẹ otọ na kẹ ihwo rẹ Izrẹl.

³Kidie ọ rhoma bọn egbada ri Hẹzikaya ọsẹ rọye guọghọre na; ọ da so agbada kẹ Baal, ọ da rha ma Ashera kirobo rẹ Ehab ovie rẹ Izrẹl ruru, ọ da gọ ekuakua ri obenu na, o de ze kẹ ayen.

⁴Ọ da so egbada phihọ evun rẹ uwevwi rẹ Ọrovwohwo, rẹ Ọrovwohwo ta kpahe nẹ, Evun ri Jerusalẹm mi che phi odẹ mẹ phihọ.

⁵Ọ da so egbada kẹ ekuakua rẹ obenu na vwẹ eguan ivẹ re hẹ evun rẹ uwevwi rẹ Ọrovwohwo na.

⁶Ọ da vwẹ ọmọ rọye vwo ze izobo, o de yono arọẹmrẹ vẹ epha, ọ vẹ idiẹbo te eriedan ki ruẹ kugbe. Ọ de ru obo re chọre gangan vwẹ obaro rẹ Ọrovwohwo, ọ da nẹrhẹ Ọrovwohwo mu ophu.

⁷Ọ da reyọ oma rẹ Ashera re duvwuru na phihọ evun rẹ uwevwi rẹ Ọrovwohwo ta kẹ Devid vi Solomon ọmọ rọye, Vwẹ evun rẹ uwevwi nana kugbe evun ri Jerusalẹm, re me sanọ reyọ vwẹ orua ejobi rẹ Izrẹl na, Mi che phi odẹ mẹ phihọ bẹdẹ.

⁸Me gbe cha rhọvwe nẹ owọ rẹ Izrẹl beghe nẹ otọ re me vwọ kẹ esẹ raye-en, siẹ rẹ ayen da vwẹ ẹro te otọ ru dẹndẹn ru obo me ta kẹ ayen, ayen da yọnrọn urhi ejobi ri Mosis odibo mẹ ji kẹ ayen.

⁹Ẹkẹvuọvo ayen kerhọ-ọn, Manasse da riẹriẹ ihwo na re ru umwemwu nọ obo rẹ ẹgborho ri chekọ na ruru rẹ Ọrovwohwo ghwọrọ nẹ obaro kẹ ihwo rẹ Izrẹl.

¹⁰Ọrovwohwo tare vwẹ oma rẹ idibo rọye emraro na,

¹¹Fiki robo ri Manasse ovie ri Juda vwo ru obo ragha, ro vwo ru emu ẹgua nọ obo rẹ ihwo rẹ Amor ejobi ruru, re ka obaro kẹ na rọ vwọ nẹrhẹ Juda ru umwemwu fiki rẹ ẹdjọ rọye;

¹²Fiki rẹ ọtiọye na enẹ Ọrovwohwo Ọghẹnẹ rẹ Izrẹl na tare, Nighe, Me vwẹ umiovwo rode cha Jerusalẹm vi Juda, erhọ rẹ ohwo kohwo ro nyoro ko che shegbe.

¹³Ke me cha riẹn nene Jerusalẹm ovwanvwọn re me vwọ vwanvwe Sameria kugbe ubiurhe re me vwọ ma uwevwi rẹ Ehab; ki mi ririe Jerusalẹm kirobo re ririe ọsete, mi ririe me me bọvwọ ruotọ.

¹⁴Ke me cha kpare umuku rẹ iruiku mẹ na kufia, ki mi phi ayen phihọ obọ rẹ ivwighrẹ rayen, kẹ ayen cha dia eranvwe rẹ uyo kẹ ivwighrẹ rayen ejobi,

¹⁵fikiridie ayen ru obo re chọre vwẹ obaro mẹ, ayen ru vwe te ophu, nẹ ọke rẹ esẹ rayen vwo nẹ Ijipt rhe ri te ẹdẹ ri nonẹ na.

¹⁶Ọ rọ marho Manasse sun ọbara rẹ evwata buebu te otọ vwi Jerusalẹm nẹ oba ọvo re te oba rivẹ, je vwọ ba umwemwu rọ nẹrhẹ Juda ru rere ayen vwo ru obo ri miovwiri vwẹ obaro rẹ Ọrovwohwo na.

¹⁷Asakiephana iruo ri chekọ ri Manasse, kugbe obo ro ruru ejobi, vẹ umwemwu ro ruru, e rhe si ayen phihọ Ọbe rẹ Ikun rẹ Ivie ri Juda?

¹⁸Manasse da vwerhẹ kugbe esẹ rọye, e de sho phihọ ogba rẹ uwevwi rọye, hẹ evun rẹ ogba rẹ Uza; Amọn, ọmọ rọye da re uvie vwẹ ẹdia rọye.

¹⁹Ikpe uje gbẹ ivẹ Amọn kpako te ọke ro vwo mu uvie phihọ ẹriọ, ọ da re uvie ikpe ivẹ vwi Jerusalẹm. Odẹ rẹ oni rọye Meshulimẹt ọmọtẹ ri Haruz ri Jotiba.

²⁰O de ru obo ri miovwiri vwẹ obaro rẹ Ọrovwohwo kirobo ri Manasse ọsẹ rọye ruru.

²¹Ọ yan phihọ idjerhe ejobi rẹ ọsẹ rọye yanre ọ da gọ ẹdjọ rẹ ọsẹ rọye gare, ọ da gọ ayen,

²²Ọ da siẹn Ọrovwohwo na, Ọghẹnẹ rẹ esẹ rọye, ọ rha yan phihọ idjerhe rẹ Ọroywohwo na-a,

²³Emeshare rẹ Amon da ro ero rhurho, ayen de hwe ovie na vwẹ evun rẹ uwevwi rọye,

²⁴Ẹkẹvuọvo ihwo re otọ na de hwe ihwo na ejobi re ro ero kpahe Ovie Amọn, ihwo rẹ otọ na da reyọ ọmọ rọye, Josaya, vwọ mu ovie vwẹ ẹdia rọye.

²⁵Asakiephana iruo ri chekọ rẹ Amọn ruru, e rhe si ayen phihọ Ọbe rẹ Ikun rẹ Ivie ri Juda?

²⁶E de sho phihọ ushi rọye vwẹ evun rẹ ogba rẹ Uza; Josaya, ọmọ rọye da re uvie vwẹ ẹdia rọye.