Read urhobo Ivie rẹ Ivẹ 22 Bible Online

Ivie rẹ Ivẹ 22 - urhobo bible

Ivie rẹ Ivẹ 22

¹Josaya ikpe ẹrenre ọ kpako te ọke ro vwo mu uvie phihọ ẹriọ, ọ re uvie ikpe ọgban gbẹ ọvo vwẹ evun ri Jerusalẹm. Odẹ rẹ oni rọye Jedida, ọmọtẹ rẹ Adaya ri Bozikat.

²O de ru obo ri yovwiri vwẹ obaro rẹ Ọrovwohwo, ọ yan phihọ idjerhe ri Devid ọsẹ rọye, ọ yan gẹre kpo obọrhe eyẹ obọhwẹre-e.

³Vwẹ evun rẹ ikpe rihwe gbẹ ẹrenren rẹ Ovie Josaya, ovie na de ji Shafan ọmọ rẹ Azalaya, ọmọ ri Meshulam, osiọbe rẹ uwevwi rẹ Ọrovwohwo, tanẹ,

⁴Yanran kpo enu bru Hildaya, orherẹn ro kpenu na, nẹ o roro unu igho ra vwọ rhe evun rẹ uwevwi rẹ Ọrovwohwo na, rẹ ihwo re vwẹ ẹro te anurhoro na toro miẹ ihwo;

⁵E ja vwẹ igho na kẹ iruiruo re vwẹ ẹro te uwevwi rẹ Ọrovwohwo na; rere ayen vwọ kẹ iruiruo re wian owian vwẹ evun rẹ uwevwi rẹ Ọrovwohwo na, re rhuẹrẹ uwevwi na,

⁶kọye, otu rẹ ewena na, vẹ ẹbọn uwevwi na, vẹ otu re ma uwevwi rere a je vwọ dẹ irhe, vẹ eragha re hweri ra cha vwọ rhuẹrẹ uwevwi na.

⁷Ẹkẹvuọvo a rha cha fuẹrẹ obo ra ghwọrọ igho na wa-an, kidie ayen rhẹrhẹ evun gangan.

⁸Hilkaya rẹ orherẹn ro kpenu na da ta kẹ Shafan osiọbe na, Me mrẹ ọbe rẹ urhi na vwẹ evun rẹ uwevwi rẹ Ọrovwohwo na. Hilkaya da vwẹ ọbe na kẹ Shafan, o de se.

⁹Shafan osiọbe na de bru ovie na rhe, ọ da nẹ iyẹnrẹn kẹ ovie na, Idibo wẹn keri igho ra mrẹre vwẹ evun rẹ uwevwi na nure vwọ kẹ iruiruo re vwẹ ẹro te uwevwi rẹ Ọrovwohwo na.

¹⁰Kọye Shafan osiọbe na da ta kẹ ovie na, Hilkaya orherẹn na kẹ vwẹ ọbe. Shafan de se ọbe na kẹ ovie na.

¹¹Ọke rẹ ovie na vwo nyo eta rẹ ọbe rẹ urhi na, ọ da bẹrẹ emwa dje oma.

¹²Ovie na da ta kẹ Hilkaya orherẹn na, kugbe Ahikam ọmọ ri Shafan, kugbe Ashibo ọmọ ri Maikaya, kugbe Shafan osiọbe na, kugbe Asaya odibo rẹ ovie na nẹ,

¹³Yanran ra nọ Ọrovwohwo kẹ vwẹ, vwọ kẹ ihwo na, kugbe Juda ejobi, vwọ kpahe eta rẹ ọbe nana ra mrẹre na, kidie ophu rẹ Ọrovwohwo ọ rhuarho vwọ kpahe avwanre, fikiridie esẹ rẹ avwanre mu ọghọ kẹ eta rẹ ọbe nana rẹ ayen de ru emu nana ejobi kirobo re si ayen kpahe avwanre-e.

¹⁴Kọye Hilkaya rẹ orherẹn na vẹ Ahikam kugbẹ Ashibo, vi Shafan, kugbe Asaya de bru Hulda ọmraro rẹ aye, aye ri Shalum, ọmọ ri Tikiva, ọmọ ri Hahaz, ọ rọ vwẹ ẹro te idọrọ re iwun (ọke nana ọ dia Jerusalẹm vwẹ urhuvwu rivẹ); ayen de nene ta ota.

¹⁵Ọ da ta kẹ ayen nẹ, Enẹ Ọrovwohwo Ọghẹnẹ rẹ Izrẹl tare, ohwo ro ji ovwan bru vwe rhe na,

¹⁶Enẹ Ọrovwohwo tare, Nighe, Me cha ghwa umiovwo rhe etinẹ na vẹ ihwo re dia, eta ejobi re ọbe na rẹ ovie ri Juda seri na.

¹⁷Fikiridie ayen sen vwẹ ayen da torhẹ insẹns kẹ edjọ, rere ayen vwọ kpare ovwẹ ophu vẹ iruo rẹ abọ rayen, fiki rẹ ọtiọye na ophu mẹ kọ cha tua kpahe etinẹ na, e gbi se fuo-o.

¹⁸Ẹkẹvuọvo vwọ kpahe ovie ri Juda na ro ji ovwan rhe rhe nọ mie Ọrovwohwo na, enẹ ovwan cha ta kẹ, Enẹ Ọrovwohwo na, Ọghẹnẹ rẹ Izrẹl tare. Vwọ kpahe eta ru wo nyori,

¹⁹Fikiridie udu wẹn kurhẹriẹ, wọ da vwẹ oma wẹn kpotọ vwẹ obaro rẹ Ọrovwohwo na, ọke wo vwo nyo obo me ta kpahe etinẹ na, vẹ ihwo rọye, nẹ ayen cha kua fiotọ, wọ da bẹrẹ emwa djẹ oma, wọ da viẹ vwẹ obaro mẹ, Mi ji nyo wẹn rhe, ọtiọye Ọrovwohwo tare.

²⁰Fiki rẹ ọtiọye na, nighe, Me cha ghwe owẹ vwo rhe esẹ wẹn, ka cha ghwa wẹ kpo ushi wẹn vwe ufuoma, ẹro wẹn rha cha mrẹ umiovwo re me cha vwọ rhe etinẹ na-a. Ayen de rhivwi ra nẹ iyẹnrẹn rẹ ota na kẹ ovie na.