Read urhobo Ivie rẹ Ivẹ 23 Bible Online

Ivie rẹ Ivẹ 23 - urhobo bible

Ivie rẹ Ivẹ 23

¹Etiyin ovie na de se, ekpako ri Juda vẹ ri Jerusalẹm ejobi de bro rhe.

²Ovie na da yanran kpo uwevwi rẹ Ọrovwohwo na, eshare rẹ Juda ejobi vwọ ba vẹ ihwo ri Jerusalẹm ejobi, vẹ irherẹn na kugbe emraro na, ihwo na ejobi imitete te ekpako. O de se eta rẹ ọphọ na ejobi kẹ ayen nyo rọ mrẹre vwẹ evun rẹ uwevwi rẹ Ọrovwohwo na.

³Ovie na de mudia kerẹ asan ẹshẹ na, ọ da re ọphọ vwẹ obaro rẹ Ọrovwohwo, nẹ ọye yan kpahe Ọrovwohwo ọye me je yọnrọn irhi rọye vẹ iji kugbe iseri rọye, vẹ iji rọye vwẹ udu rọye ejobi vẹ ẹnwẹ rọye ejobi, vwo ru eta rẹ ọphọ nana re si phihọ ọbe nana; ayen ihwo na ejobi de kuoma gbe re ọphọ na.

⁴Ovie na da ta kẹ Hilkaya, orherẹn ro kpenu na, vẹ irherẹn re edje rivẹ, kugbe ihwo re sẹro rẹ anurhoro na, nẹ ayen ghwa iwawa re ru kẹ Baal vẹ Ashera vẹ otu rẹ obo odjuvwu ejobi nẹ uwevwi rẹ ẹga re Ọrovwohwo na phihọ otafe; ọ da torhẹ vwẹ ogo ri Kidron vwẹ ughere ri Jerusalẹm, a da ghwa iwurhie rayen kpo Bẹtẹl.

⁵O de si irherẹn re gọ ẹdjọ na ni ẹdia rẹ irherẹn rẹ ivie ri Juda vwo mu nẹ etorhẹ ugboduma vwẹ asan ri Kpenu vwẹ irere ri Juda re yariẹ Jerusalẹm phihọ; eriyin je hẹ otu re torhẹ ugboduma kẹ Baal, vwọ kẹ ọnre vẹ emeranvwe vẹ isio, vẹ ekuakua ejobi rẹ hẹ idjuvwu na.

⁶Ọ da reyọ Ashera na nẹ uwevwi rẹ Ọrovwohwo rhe, ọ da reyọ nẹ Jerusalẹm vwo kpo uto ri Kidrọn, ọ da torhẹ vwẹ uto ri Kidron, o de duvwo ivwivwuvwu, o de tue ivwuvwu rọye phihọ enu rẹ ishi rẹ ihwo gheghe.

⁷O de kporo iwevwi re de gbe igberadja rẹ hẹ evun rẹ uwevwi rẹ Ọrovwohwo na she, asan rẹ eya na de rhuo osirhere kẹ Ashera.

⁸Ọ da reyọ irherẹn na ejobi nẹ irere ri Juda na rhe o de gbe egbada na ẹgua rẹ irherẹn na dia da torhẹ insẹns nẹ Geba re te Biesheba, o de kporo egbada rẹ idjerhe rẹ unu rẹ ughere ri Joshua osun rẹ orere na, rọ obọhwẹre, rẹ a da ro ughere rẹ orere na.

⁹Dede na, irherẹn rẹ egbada ride na rha rhe rhi mudia obaro rẹ agbada rẹ Ọrovwohwo vwi Jerusalẹmu-u, ẹkẹvuọvo ayen da re ikara ri jephuo vwẹ ohri rẹ imoni rayen.

¹⁰O de gbe Tofet ẹgua, rọ hẹ evun rẹ iyara rẹ emọ ri Hinọm, rere ohwo ọvuọvo vwo jẹ ọmọshare rọye eyẹ ọmọtẹ rọye ẹ vwọ tọn vwo ze izobo kẹ Molẹk.

¹¹Ọ da rhan iyesi rẹ ivie ri Juda vwo ze kẹ ọnrẹ na, vwẹ asan ra wan ruẹ uwevwi rẹ Ọrovwohwo na, vwẹ orhoma rẹ uvun rẹ Netanmelek, ọrhẹrẹvun na, rọ he evun rẹ egodo na. Ọ da vwẹ erhanre torhẹ ekpẹrẹ rẹ ọnrẹ na.

¹²Kugbe egbada rẹ okpo rẹ uvun rẹ enu rẹ Ahaz, rẹ ivie ri Juda soro, kugbe egbada ri Manasse so phihọ eguan ivẹ re hẹ evun rẹ uwevwi rẹ Ọrovwohwo na, o de ghwiẹ ayen notọ ọ da guọghọ ayen ivwivwuvwu, o de tue iwurhie rayen phihọ uto ri Kidrọn.

¹³Ovie na de gbe egbada rẹ hẹ obaro ọnrẹ vwi Jerusalẹm na ẹgua rhiri re te obọhwẹre ọnre rẹ ugbenu rẹ ogbiru, ri Solomọn ovie rẹ Izrẹl bọnre kẹ Ashtarọt ẹgua rẹ ihwo ri Saidọn, rọ bọnre ki Shemosh ẹgua ri Moab, rọ bọnre kẹ Milkọm ẹgua rẹ ihwo rẹ Amọn.

¹⁴Ọ da guọghọ ẹshẹ na ivwivwuvwu, ọ da nyavwe ighriki na bruotọ, ọ da vwẹ ibekun rẹ ihwo gbe asan rayen ephan.

¹⁵Ọ rọ marho agbada na rọ hẹ Bẹtẹl agbada ri Jerobaom ọmọ rẹ Nebat, ohwo rọ nẹrhẹ Izrẹl ru umwemwu na vwo vi, agbada yena vẹ egbada efa eye o ghwie she ọ da guọghọ eragha rọye ibribro, ọ da ghwọrọ ayen ivwivwuvwu; ọ da torhẹ Ashera na.

¹⁶Ri Josaya vwọ rhẹriẹ oma, ọ da mrẹ ishi vwẹ etiyin rẹ ughenu na; o de ji ihwo ra tọn ibeku rẹ ishi na phia, ọ da torhẹ ayen vwẹ enu rẹ agbada na, o da gbe ẹgua, kerẹ ota rẹ Ọrovwohwo na rẹ ohwo rẹ Ọghẹnẹ na ghwoghwori, ohwo rọ mraro kpahe imu nana.

¹⁷Etiyin ọ da ta, Didi ushi me kparo mrẹ na? Ihwo rẹ orere na da ta kẹ, Ọye na ushi rẹ ohwo rẹ Ọghẹnẹ ro nẹ Juda rhe re mraro rẹ imu nana ri wo ru kẹ agbada na rọ hẹ Bẹtẹl na.

¹⁸Ọ da ta, jọ dia, e jẹ ohwo ọvuọvo ghwẹ ibeku rọye-e, Kọye ayen da yan ji ibeku rọye vwo, vẹ ibeku rẹ ọmraro ro nẹ Sameria rhe na.

¹⁹Kugbe uwevwi rẹ edjọ na ejobi rhe rẹ egbada na ejobi re hẹ evun rẹ orere ri Sameria, rẹ ivie rẹ Izrẹl mare, re nẹrhẹ ophu rẹ Ọrovwohwo kpare na, Josaya de ghwie ayen; o ru kẹ ayen kirobo rẹ ru kẹ ayen ejobi vwi Bẹtẹl.

²⁰Ọ de hwe irherẹn ejobi rẹ egbada na re vware vwẹ etiyin, phihọ enu rẹ agbada na, ọ da torhẹ ibeku rẹ ihwo vwẹ enu rẹ ayen. Etiyin o de rhivwi kpo Jerusalẹm.

²¹Ovie na de ji urhi kẹ ihwo na ejobi, We ruorẹ rẹ ẹwanvrẹn na kẹ Ọrovwohwo Ọghẹnẹ wẹn na, kirobo re siro phihọ otọ vwẹ evun rẹ ọbe rẹ ọphọ na.

²²Kidie a je rẹ orẹ rẹ ẹwanvrẹn ọtiọye dẹvo-o nẹ ọke rẹ iguẹdjọ na ri guẹdjọ vwẹ Izrẹl na, eyẹ ọke rẹ ivie rẹ Izrẹl ejobi eyẹ ọke rẹ ivie ri Juda.

²³Ẹkẹvuọvo vwẹ ikpe rihwe gbẹ ẹrenren ri Ovie Josaya, a da re orẹ rẹ ẹwanvrẹn na kẹ Ọrovwohwo na vwi Jerusalẹm.

²⁴Ọ rọ marho Josaya da djẹ ihwo re vwẹ ẹbo mraro vẹ eriendan rẹ eshare vẹ utẹ vẹ ema vẹ igbiru ejobi ra mrẹre vwẹ otọ ri Juda kugbe Jerusalẹm rere ọ mrẹ asan vwẹ eta rẹ urhi na vẹ i re si phihọ evun rẹ ọbe ri Hilkaya orherẹn na mrẹre vwẹ evun rẹ uwevwi rẹ Ọrovwohwo na.

²⁵O vwo ovie ọvuọvo rọ họherọ-ọ, rọ vwẹ udu rọye ejobi vẹ ẹnwẹ rọye ejobi vẹ ẹgba rọye ejobi, hirhe bru Ọrovwohwo kirobo rẹ irhi ri Mosis ephan; eyẹ o vwo ovie ọfa ro muru ro ruru kerẹ ọye-e.

²⁶Dede na Ọrovwohwo gbobọ nyẹ ophu rọye ọgangan na-a, ophu ro muru kpahe Juda, vwi fiki rẹ ophu ẹkparọ ri Manasse kpaerọ.

²⁷Ọrovwohwo na da ta, Mi che si Juda nẹ obaro mẹ kirobo ri mi ru Izrẹl, ke me cha kpare orere nana re me jẹreyọ na kufia, Jerusalẹm, uwevwi re me tare, nẹ ọde mẹ cha dia etiyin.

²⁸Asakiephana iruo ri chekọ ri Josaya, kugbe obo ro ruru ejobi e si ayen phihọ evun rẹ Ọbe rẹ Ikun rẹ Ivie ri Juda?

²⁹Ọke rọye ọye Fero Niko ovie rẹ Ijipt vwọ kpare ofovwi bru ovie rẹ Asiria vwẹ urhie ri Yufretis. Ovie Josaya da ra vwa Fero Niko de hwe Josaya vwi Megido ọke rọ vwọ mrẹ.

³⁰Idibo rọye de mu orivwi rọye phihọ ekpẹrẹ vwi Megido, ayen da ghwa rhe Jerusalẹm, ayen de sho phihọ evun rẹ ushi robọ rọye. Ihwo rẹ otọ na da reyọ Jehọahaz ọmọ ri Josaya rhe, ayen da vwẹ evwri ghworo uyovwi, ayen de vwo mu ovie vwẹ ẹdia rẹ ọsẹ rọye.

³¹Ikpe uje gbẹ erha Jehoahaz kpako te vwẹ ọke ra vwọ ma ovie, ọ da re uvie emeranvwe erha vwi Jerusalẹm. Odẹ rẹ oni rọye Hamutal, ọmọtẹ ri Jerimaya rẹ Libna.

³²O de ru obo ri miovwiri vwẹ obaro rẹ Ọrovwohwo, kirobo rẹ esẹ rọye ruru.

³³Fero Niko de muo gba phihọ uwodi vwi Ribla vwẹ otọ ri Hamat, rere o je suo vwi Jerusalẹm, o de bru arhọghọ kẹ otọ na nẹ ayen jẹ, talent ujori rẹ idọnọ vẹ oro.

³⁴Fero Niko da vwẹ Elayakim ọmọ ri Josaya ma ovie vwẹ ẹdia ri Josaya, ọsẹ rọye, o de wene odẹ rọyẹ kpo Jehoyakin. Ẹkẹvuọvo ọ da reyọ Jehoahaz yanran; ọ da vwọ rhe Ijipt, etiyin kọye o de ghwu.

³⁵Jehoyakin da vwẹ idọnọ vẹ iro na vwọ kẹ Fero, ẹkẹvuọvo o de roro igho na mie ihwo rẹ otọ na kirobo rẹ urhi rẹ Fero tare. Dohwo deyenre uwevwi rọye o roro bru idọnọ vẹ iro ro vwi mie ihwo re otọ na ra vwọ kẹ Fero Niko.

³⁶Ikpe uje gbẹ iyori ọye Jehoyakin kpako te ọke ro vwo mu uvie phihọ ẹriọ, ọ da re uvie ikpe uhwọvo vwi Jerusalẹm. Odẹ rẹ oni rọye Zebida ọmọtẹ ri Pedaya ri Ruma.

³⁷O de ru obo ri miovwiri vwẹ obaro rẹ Ọrovwohwo, kirobo rẹ esẹ rọye ejobi ruru.