Read urhobo Ivie rẹ Ivẹ 24 Bible Online

Ivie rẹ Ivẹ 24 - urhobo bible

Ivie rẹ Ivẹ 24

¹Vwẹ ọke rọye Nebukadreza ovie ri Babilọn vwọ phia, Jehoyakin da dia odibo rọye ikpe erha; o de phren oma, ọ da vwẹ ẹghwọ vwọ suọ.

²Ọrovwohwo de ji ihwo ri Kaldia vẹ ihwo ri Siria vẹ Moab kugbe ihwo rẹ Ammọn ne ra họnre Juda rere ayen ghwọrọ, kerẹ ota rẹ Ọrovwohwo rẹ odibo rọye emraro na tare.

³Uyota ọnana rhe phia kẹ Juda kirobo rẹ urhi rẹ Ọrovwohwo na tare, rere o vwo si ayen nẹ obaro rọye, fiki rẹ umwemwu ri Manasse, kirobo ro ruru ejobi.

⁴Kugbe ọbara rẹ eku ro sun te otọ, kidie ọ vwẹ ọbara rẹ eku vọn Jerusalẹm, yẹ Ọrovwohwo se vwo ghovwo-o.

⁵Asakiephana iruo ri chekọ ri Jehoyakin, kugbe obo ro ruru ejobi, e rhe si ayen phihọ otọ vwẹ evun rẹ Ọbe rẹ Ikun rẹ Ivie ri Juda?

⁶Etiyin Jehoyakin da vwerhẹ kugbe esẹ rọye, Jehoyakin ọmọ rọye da rhe re uvie vwẹ ẹdia rọye.

⁷Ovie rẹ Ijipt gbe rhe nẹ otọ rọye phia ọfa-a, kidie ovie ri Babilọn reyọ ẹtẹrhe rẹ ovie rẹ Ijipt suẹn nẹ uto rẹ Ijipt re te urhie ri Yufretis.

⁸Ikpe ihwe gbẹ ẹrenre Jehoyakin kpako tẹ ọke ra vwọ ma ovie, ọ da re uvie emeranvwe erha vwẹ evun ri Jerusalẹm. Odẹ rẹ oni rọye Nehushita, ọmọtẹ rẹ Elnatan ri Jerusalẹm.

⁹O de ru umwemwu vwẹ obaro rẹ Ọrovwohwo kirobo rẹ ọsẹ rọye ruru.

¹⁰Ọke yena idibo ri Nebukadreza ovie ri Babilọn vwọ rhe Jerusalẹm, ayen da yariẹ orere na phihọ.

¹¹Nẹbukadreza ovie ri Babilọn da rhe orere na, ọke rẹ idibo rọye na vwọ riarẹ orere na.

¹²Jehoyakin ovie ri Juda da vwẹ oma rọye kẹ ovie ri Babilọn, oma rọye, vẹ oni rọye, vẹ idibo rọye, vẹ isun rọye kugbe ediaguare rọye ye vwẹ oma rayen kẹ. Ovie rẹ Babilọn de mu Jehoyakin phihọ uwodi rọ vwọ re uvie ikpe ẹrẹnre nu.

¹³Ọ da ghwa efe rẹ uwevwi rẹ Ọrovwohwo na, kugbe efe rẹ evun rẹ uwevwi rẹ ovie na, ọ da nyavwe iwawa rẹ iro ri Solomọn ovie rẹ Izrẹl ru phihọ uwevwi rẹ Ọrovwohwo na ibribro, kirobo rẹ Ọrovwohwo na tarọ jovwo.

¹⁴Ọ da kua Jerusalẹm ejobi, vẹ isun na, kugbe ẹgba rẹ eshare na ejobi, ighuvwu uriori ihwe, kugbe ewena rẹ eshare vẹ ihwo ri duvwẹ owanre; ọvuọvo chekọ-ọ, jokpa rẹ igbere gangan rẹ otọ na.

¹⁵O de mu Jehoyakin kpo Babilọn; ọ da kua oni rẹ ovie na, vẹ eya rẹ ovie na, vẹ ediaguare rọye vẹ imiragua rẹ otọ na, ọ da vwẹ ayen ru ighuvwu nẹ Jerusalẹm re te Babilọn.

¹⁶Ovie ri Babilọn de mu ighuvwu rhe Babilọn egba rẹ eshare uriori ighwrẹn, ewena rẹ eshare vẹ ihwo ri duvwẹ owanre uriori ọvo, ayen ejobi ihwo vẹ oma kpokpọ gbrọgbrọ ri vwo egba rẹ ofovwi.

¹⁷Ovie ri Babilọn da reyọ Matanaya ọmọ rẹ oniọvo ri Jehoyakin ọ da vwọ ma ovie vwẹ ẹdia rọye ọ da rhẹriẹ odẹ rọye kpo Zẹdikaya.

¹⁸Ikpe uje gbẹ ọvo Zẹdikaya kpako te ọke ra vwọ ma ovie, ọ da re uvie ikpe uhwọvo vwi Jerusalẹm. Odẹ rẹ oni rọye Hamutal ọmọtẹ ri Jerimaya ri Libna.

¹⁹O de ru obo ri miovwiri vwẹ obaro rẹ Ọrovwohwo, kirobo ri Jehoyakin ruru ejobi.

²⁰Kidie fiki rẹ ophu rẹ Ọrovwohwo na ọye o rhi vwo te asan rọ vwọ kpare Jerusalẹm vi Juda kufia nẹ obaro rọye. Zẹdikaya da vwẹ ẹghwọ so ovie ri Babilọn.