Read urhobo Ivie rẹ Ivẹ 25 Bible Online

Ivie rẹ Ivẹ 25 - urhobo bible

Ivie rẹ Ivẹ 25

¹Vwẹ ukpe rirhiri rẹ ẹriọ rọye, vwẹ emeravwe rihwe, vwẹ ẹdẹ rihwe rẹ emeranvwe na, Nebukadreza ovie ri Babilọn vẹ ituofovwi rọye ejobi rhe vwọ họnrọn Jerusalẹm, ọ da vwẹ ituofovwi yariẹ phihọ, ayen da gba ogba rẹ ofovwi yariẹ phihọ.

²Ayen da họnre orere na re te ukpe rihwọvo rẹ Ovie Zẹdikaya.

³Ẹdẹ irhiri rẹ emeranvwe rẹne rẹ ukpe yena owẹvwe de rhi fi gangan kidie emuọre rha herọ kẹ ihwo rẹ otọ na-a.

⁴Orere na kọ rhe vẹn; ovie na vẹ ituofovwi rẹ eshare na ejobi da djẹ vwẹ ason wan anurhoro rọ hẹ uvwre rẹ igbẹhẹ ivẹ na rẹ oma rẹ ogba rẹ ovie na, dede na yẹn ihwo ri Kaldia yariẹ orere na phihọ. Ayen da yan gare opharo vi obo Araba.

⁵Ẹkẹvuọvo ituofovwi ri Kaldia da vwọ tua ovie na, ayen da djẹ muo vwẹ ogo ri Jẹriko; ituofovwi rọye ejobi da hrabọ jovwo.

⁶Etiyin ayen de mu rhe ovie rẹ Babilọn vwẹ Ribla, o de bru orhiẹn hwe.

⁷Ayen de hwe emeshare ri Zedikaya vwẹ irharo rọye, ayen de rhe yoghro ibiẹro ri Zẹdikaya no, ayen da vwẹ igoni karọ, ayen de muo kpo Babilọn.

⁸Vwẹ ẹdẹ ighwrẹ rẹ emeranvwe riyori rẹ ukpe rihwe gbẹ irhiri rẹ Ovie Nebukadreza, ovie ri Babilọn Nebuzaradan, olotu rẹ ohẹrhẹ, odibo rẹ ovie ri Babilọn na da rhe Jerusalẹm.

⁹Ọ da torhẹ uwevwi rẹ Ọrovwohwo na, kugbe ighẹn rẹ ovie na, kugbe iwevwi ejobi rẹ Jerusalẹm; ọ da torhẹ ikpi iwevwi na ejobi muotọ.

¹⁰Ituofovwi ri Kaldia ejobi re vẹ olotu na gba hẹ etiyin de kporo igbẹhẹ ra vwọ gba ogba yariẹ Jerusalẹm te otọ.

¹¹Ihwo ri chekọ vwẹ evun rẹ orere na, vẹ ihwo re djẹ va ovie ri Babilọn abọ jovwo, kugbe umuku rẹ ihwo ra yan jovwo vwẹ evun rẹ orere na, yẹ Nebuzaradan onotu rẹ ohẹrhẹ na mu kpo Ighuvwu.

¹²Ẹkẹvuọvo olotu rẹ ohẹrhẹ na da yan jẹ ihwo rẹ ma dia igbere vwo vwẹ otọ na rere ayen vwẹ ẹro te egba ri vain na, rere ayen ru udju vwẹ otọ na.

¹³Osusun rẹ ẹrovwo rẹ uwevwi rẹ Ọrovwohwo na, kugbe igburhukpẹ vẹ abadi rẹ ẹrovwo re hẹ evun rẹ uwevwi rẹ Ọrovwohwo na, ihwo ri Kaldia na hwe ayen kẹnẹ kẹnẹ ayen da ghwa ayen kpo Babilọn.

¹⁴Ayen da kua etaso, esaboro kugbe akpẹn, kugbe igebule ra vwọ torhẹ incens, kugbe iwawa ẹrovwo ra vwọ ga ẹga vwẹ evun rẹ uwevwi rẹ Ọrovwohwo na kpo Babilọn,

¹⁵Tẹ evwẹrẹ rhe, kugbe udjokpo. Obo ra vwẹ oro ru olotu rẹ ohẹrhẹ na da reyọ kpo kerẹ oro, oravwọ rẹ a vwẹ idọnọ ru ọ da reyọ kerẹ idọnọ.

¹⁶Vwọ kẹ ẹshẹ ivẹ na, ọvo abadi, kugbe ogburhukpẹ na, ri Solomọn ruru kẹ uwevwi rẹ Ọrovwohwo na, ẹrovwo re vwo duvwu ekuakua nana a sa vwavwa aye-en.

¹⁷Enuẹra rẹ ẹshẹ ọvuọvo kubit ihwe gbẹ ẹrẹnre, erhu rọ obenu rọye da dia ẹrovwo, enu ẹra rọye da dia kubit erha; irhuerhuo ra vwọ yan kẹ pomegranate, ejobi na ẹrovwo, e de vwo rhurhu erhu na riariẹ. Ẹshẹ rivẹ de ji vwo oghẹre ọvo na, vẹ irhuerhuo rọye.

¹⁸Olotu rẹ ohẹrhẹ na da reyọ Seraya olori rẹ irherẹn na, kugbe Zefanaya orherẹn rọ vwọ kpahọ, kugbe ihwo erha na re vwẹ ẹro te anurhoro na;

¹⁹ọ da dia evun rẹ orere na reyọ oruiruo ọvo ro suẹn unuofovwi, kugbe eshare iyori evo vwẹ ediaguare rẹ ovie na ra mrẹre vwẹ evun rẹ orere na, kugbe osiẹbe rẹ olotu rẹ unuofovwi rọ ghwẹ ihwo rẹ otọ na kpo ofovwi, kugbe eshare ujorha rẹ ihwo na ra mrẹre vwẹ evun rẹ orere na.

²⁰Nebuzaradan rẹ olotu rẹ ohẹrhẹ na da reyọ ayen, ọ da vwẹ ayen rhe ovie ri Babilọn vwi Ribla.

²¹Ovie ri Babilọn na da teyọ ayen hwe, o de hwe ayen ghwu vwi Ribla rọ evun rẹ otọ ri Hamat. Ke mu Juda nẹ otọ rọye kpo ighuvwu.

²²Vwẹ enu rẹ ihwo ri chekọ vwẹ evun rẹ otọ ri Juda na, ri Nebukadreza ovie ri Babilọn yan jovwo, ọ da vwẹ Gedaliah ọmọ rẹ Ahikam, ọmọ ri Shafan, vwo ru osun.

²³Asakiephana ilotu rẹ ofovwi vẹ ihwo rayen vwo nyo nẹ ovie ri Babilọn vwi Gedalaya ma osun ayen vẹ ihwo rayen de bru Gedalaya rhe Mizipa, Ishmẹl ọmọ ri Netanaya, Johanan ọmọ ri Karia, kugbe Seraya ọmọ ri Tanhumet, ohwo ri Netorat, vi Jazanaya ọmọ rẹ Maakat.

²⁴Gedalaya de ve ta kẹ ayen vẹ ihwo rayen nẹ, Ovwan djẹ oshọ vwi fiki rẹ ihwo ri Kaldia ri vwo oganga-an; ovwan dia otọ na, ovwan ga ovie ri Babilọn, ko che yovwi kẹ ovwan.

²⁵Ẹkẹvuọvo vwẹ emeranvwe righwrẹ na, Ishmael ọmọ ri Netanaya, ọmọ rẹ Elishama, rẹ orua rẹ ovie na, vẹ eshare ihwe da rhe, ayen da họnre, ayen de hwe Gedalaya vẹ ihwo ri Ju vẹ ihwo ri Kaldia re vẹ ọye gba hẹ Mizpa

²⁶Kọye ihwo na ejobi, te itete tẹ iride kugbe inotu rẹ ofovwi na de vrẹn, ayen de kpo Ijipt; fikiridie ayen djẹ oshọ rẹ ihwo; ri Kaldia.

²⁷Vwẹ ẹdẹ uje gbẹ ighwrẹ re emeranvwe rihwe gbẹ ivẹ rẹ ukpe rọgban gbẹ ighwrẹ ri Jehoyakin ovie ri Juda vwọ ijọpha, Ivomerodak ovie ri Babilọn da vwẹ ẹnwẹ esiri si Jehoyakin nẹ imu vwẹ evun rẹ ukpe yena rọ vwọ to uvie ẹriọ phihọ na.

²⁸O da vwẹ ẹnwẹ rẹ ọghọ vwọ ta ota kẹ, ọ da kẹ ẹdia ro kpenu vrẹn ẹdia rẹ ivie re vẹ ọye gba herọ vwẹ evun ri Babilọn.

²⁹Kọye Jehoyakin da ghwiẹ iwun rẹ uwodi rọye phihọ otọ. Kẹdẹ kẹdẹ rẹ akpọ rọye kọye ọ vwọ re emu vwọ imẹjẹ rẹ ovie na siẹ rẹ ọke rẹ emuẹriọ de te.

³⁰Vwọ kẹ ẹkẹn ughwẹ rọye, ovie na da vwẹ omosa kẹ kọke kọke, uchọke rọ tọn te.