Read urhobo Ivie rẹ Ivẹ 3 Bible Online

Ivie rẹ Ivẹ 3 - urhobo bible

Ivie rẹ Ivẹ 3

¹Vwẹ ukpe rihwe gbẹ ẹrenre ri Jehoshafat ovie ri Juda, Jehoram ọmọ rẹ Ehab da rhe dia ovie rẹ Izrẹl vwi Sameria, ọ da re uvie ikpe ihwivẹ.

²Ọ de ru obo ri je fo vwẹ obaro rẹ Ọrovwohwo, ẹkẹvuọvo oruchọ rọye họhọ ọ rẹ ọsẹ vẹ oni rọye-e, fikiridie ọ guọghọ ẹshẹ ri Baal rẹ ọsẹ rọye vwo vi.

³Ẹkẹvuọvo o ji churu obọ mu umwemwu ri Jeroboam ọmọ ri Nebat, ro si Izrẹl ejobi ro umwemwu; o kurhẹriẹ no-o.

⁴Asakiephana Mesha ovie ri Moab ochuru igegede; kukpe kukpe ọye o vwo kru igegede uriori ujori, kugbẹ ẹton rẹ oghwanran uriori ujori vwo rhe ovie rẹ Izrẹl.

⁵Ẹkẹvuọvo ọke rẹ Ehab vwo ghwu nu ovie ri Moab da vwẹ ẹghwọ so ovie rẹ Izrẹl.

⁶Ọtiọye Jehoram rẹ ovie de mu oyan nẹ Sameria vwẹ ọke yena ọ da ghwẹ Izrẹl ejobi koko gbidi.

⁷Ọ da vuẹ ovuẹ rhe Jehoshafat ovie ri Juda, Ovie ri Moab vwẹ ẹghwọ vwọ so vwẹ; ku wo nene uvwe kpare ofovwi kpo Moab? Ọ da kpahe, Me ra, obo me ephan ọye wọ ephan, ihwo mẹ ephan kerẹ ihwo wẹn, iyesi mẹ kerẹ iyesi wẹn.

⁸Etiyin ọ da ta, Kẹ idjerhe rhọ a wan? Jehoram da kpahe, Idjerhe rẹ aton rẹ Idọm.

⁹Kọye ovie rẹ Izrẹl vẹ ovie ri Juda kugbe ovie rẹ Idọm da kpare ofovwi. Ayen vwọ yan ohrohribo ẹdẹ ighwrẹ nu ame gbe herọ kẹ ituofovwi eyẹ eranvwe ri nene aye-en.

¹⁰Etiyin ovie rẹ Izrẹl da ta, Eghwo! Ọrovwohwo se ivie erha nana rhe re o rhi phi ayen phihọ obọ ri Moab.

¹¹Jehoshafat da ta, Ọmraro rẹ Ọrovwohwo hẹ etinẹ, rọ vuọ avwanre obo rẹ avwanre guọnọ riẹn miẹ Ọrovwohwo? Ọvo vwẹ usun rẹ idibo rẹ ovie rẹ Izrẹl na da kpahe, Ilaesha rẹ ọmọ rẹ Shafat hẹ etinẹ, ro ku ame ku Ilaija abọ ye,

¹²Jehoshafat da ta, Ota rẹ Ọrovwohwo herọ oma. Kọye ovie rẹ Izrẹl vi Jehoshafat kugbẹ ovie rẹ Idọm de wotọ bro rhe.

¹³Ilaesha da ta kẹ ovie rẹ Izrẹl, Die me vẹ owẹ gbi ru? Yan bru emraro rẹ ọsẹ wẹn vẹ emrarọ rẹ oni wẹn. Ẹkẹvuọvo ovie rẹ Izrẹl da ta kẹ, Ẹjo; Ọrovwohwo ọye se ivie erha nana rhe kọn ro Moab abọ.

¹⁴Ilaesha da ta, kirobo rẹ Ọrovwohwo rẹ otuofovwi na herọ na, rọ dia ohwo me ga na, ọ gbe dianẹ fiki rẹ Jehoshafat rẹ ovie ri Juda vwo-o, Mie ni we-e, Mia mrẹ wẹ-ẹn.

¹⁵Ẹkẹvuọvo asakiephana gbe se ohworihwehworo kẹ vwẹ. Ohworihwehworo vwo hworo ẹgba rẹ Ọrovwohwo da rhe ruọ oma.

¹⁶Ọ da ta, Enẹ Ọrovwohwo tare, Mi che ru ugbo ọyaya nana vọn vẹ ame.

¹⁷Kidie enẹ Ọrovwohwo tare, Ovwan cha mrẹ odju eyẹ osio-o, ẹkẹvuọvo ugbo yena cha vọn vẹ ame, re ovwan vẹ irhuẹn kugbe eranvwe rẹ ovwan da cha mrẹ da.

¹⁸Ọna orọnvwọn ọphapharhẹ vwẹ aro rẹ Ọrovwohwo; Ọ je cha vwẹ ihwo rẹ Moab kọn ro ovwan abọ.

¹⁹Ovwan ki che phi korere korere ra gbe ogba phihọ kua, kugbe korere korere ro yovwiri ovwan ki che she irhe esiri rọye ejobi ghwiẹ otọ, ovwan ki che gbe ogbugbu rẹ ame ejobi, ovwan kẹ vwẹ ibieragha miovwi etọ esiri na ejobi.

²⁰Vwẹ urhiọke rivẹ, kerẹ oma rẹ ọke re vwo ze izobo na, nighe, ame de won nẹ ẹbẹre rẹ Idọm rhe ri phoro asan ejobi phihọ.

²¹Ọke rẹ ihwo ri Moab ejobi vwo nyo nẹ ivie na kpare rhe rhe họnre ayen, ọmobọ te ọmowọ rẹ ayen ri se rhuon irhuon rẹ ofovwi de re koko oma vwẹ ughwru.

²²Ọke rẹ ayen vwo vrẹn vwẹ irhiọke ride, rẹ ọnre vwo bẹre mu ame na re, ihwo ri Moab ke mrẹ ame na vwẹ obaro rayen vwavware kerẹ ọbara.

²³Ayen da ta, Ọnana ọbara; uyota, ivie na họnre omoma rayen, ayen hwe ohwohwo. Asakiephana, Moab, ra ghwẹ ekuakua rayen.

²⁴Ẹkẹvuọvo rẹ ayen vwo te erhọn rẹ Izrẹl, ihwo rẹ Izrẹl da gua vrẹn ra họrhọ ro ayen, ihwo ri Moab da vẹn; ayen da vwọ tua ayen ayen hwe ayen jẹ ayen djẹ.

²⁵Ayen da guọghọ irere rayen, ayen de phi ibieragha phihọ otọ esiri na bẹsiẹ e vwọ vọn; ayen de gbe ogbugbu rẹ ame ejobi, ayen de she ivi rẹ irhe ejobi phihọ otọ; bẹsiẹ rẹ ibieragha ri Kahareset ọvo ri chekọ; esedada da yariẹ phihọ, ayen da guọghọ.

²⁶Ọke rẹ ovie ri Moab vwọ mrẹ nẹ ofovwi na miovwi kẹ ọye, o de se ituofovwi ujori ighwrẹ re ghwa elọkọ rere ayen ra họrhọ wan ẹbẹre rẹ ovie rẹ Idọm; ẹkẹvuọvo ayen sa wan vrẹ-ẹn.

²⁷Etiyin ọ da reyọ owanran rọye ro che suẹn vwẹ ẹdia rọye, o de vwo ze izobo rẹ ẹtorhẹ vwẹ enu rẹ igbẹhẹ. Ophu de mu ihwo rẹ Izrẹl gangan.

²⁸Ayen de ku oma rhẹriẹ rhe otọ rẹ obọ rayen.