Read urhobo Ivie rẹ Ivẹ 4 Bible Online

Ivie rẹ Ivẹ 4 - urhobo bible

Ivie rẹ Ivẹ 4

¹Asakiephana aye rẹ ọvo vwẹ emọ rẹ emraro na de kperi se Ilaesha, Odibo wẹn ọshare mẹ ghwuru, wọ riẹnre nẹ odibo wẹn djẹ oshọ rẹ Ọrovwohwo na; ohwo rẹ avwanre re osa rọye rhere rhe reyọ emọ mẹ ivẹ re vwo ru eviẹn rọye.

²Ilaesha da kpahe kẹ, Die mi ru kẹ wẹ? Ta kẹ vwẹ; die wo vwori vwẹ uwevwi na? Ọ da kpahe, Ọmọtẹ wẹn odibo wẹn vwo ugogo rẹ oravwọ vwẹ evun rẹ uwevwi na-a jokpa rẹ oghwara rẹ evwri.

³Etiyin ọ da ta kẹ, Yan ro otafe wọ ra yare eghwara miẹ irivẹ wẹn ejobi, eghwara ifefe e ghwa havwa nọ-ọ.

⁴Gba ro uwevwi, huhu ẹchẹ gbe oma wẹn vẹ emọ wẹn, rere wo ku evwri phihọ eghwara nana; ọke rọ da vọn, muo phihọ akakọ.

⁵Ọtiọye aye na da yan nẹ obaro rọye o de huhu ẹchẹ gbe oma rọye vẹ emọ rọye; o kuẹ, yẹ ayen vwẹ eghwara kẹ.

⁶Ọke rẹ eghwara na vwọ vọn nu, ọ da ta kẹ ọmọ rọye, Vwẹ oghwara ọfa kẹ vwẹ. Ọ da ta kẹ, Ọfa gbe herọ-ọ. Etiyin evwri na da ghwa ka.

⁷Ọ da yanrhe rhe nẹ iyẹnrẹn kẹ ohwo rẹ Ọghẹnẹ na, ọ da ta kẹ, Yanran, ra shẹ evwri na rere wọ hwa esa wẹn; rere wọ vẹ emọ wẹn vwẹ iri chekọ ghẹrẹ oma.

⁸Ẹdẹ ọvo Ilaesha de kpo Shunẹm, asan rẹ ọdafe rẹ aye ọvo dia aye na kọ ta kẹ nẹ ọ re ememu. Kọke kọke rọ vwọ wan idjerhe yena vrẹn kọ vwẹriẹ asan na re emu.

⁹Aye na da ta kẹ ọshare rọye, Nighe asakiephana, me mrẹ vughe nẹ ohwo nana ohwo ọfuanfon rẹ Ọghẹnẹ, ọ rọ wan asan rẹ avwanre vrẹn na.

¹⁰E jẹn avwanre bọn umuwevwi kẹ, rere e mu ehwa, emẹjẹ, agbara vẹ urhukpẹ phihọ kẹ, rere ọke ro de bru avwanre rhe o wo phihọ etiyin.

¹¹Ẹdẹ ọvo ọ da rhe etiyin, o de wo phihọ uvun na,

¹²o de rovwoma vwẹ etiyin. Ọ da ta kẹ Gehazi rẹ odibo rọye, se ohwo ri Shunẹm na. Ọke ro vwo se, o de rhi mudia vwẹ obaro rọye.

¹³Ọ da ta kẹ, Ta kẹ aye na, Wọ mrẹrẹ rọ lagha oma nana ejobi kẹ avwanre; die kọye e ru kẹ wẹ? Wo vwo ota ra ta kẹ ovie eyẹ onotu rẹ otuofovwi kẹ wẹ? Ọ da kpahe, Ohri rẹ ihwo mẹ me epha.

¹⁴Ọ da ta, Kidie e ru kẹ? Geheza da kpahe, Nighe, o vwo ọmọ-ọ, yẹ ọshare rọye ghwore.

¹⁵Ọ da ta, Se rhe. Ọke ro vwo se, ọ da yanrhe ri mudia anurhoro.

¹⁶Ọ da ta, Ọke ọtiọna ke rhoma te, ku wọ cha gbanẹ ọmọ. Ọ da ta, Ẹjo, ọrovwovwe, E ohwo rẹ Ọghẹnẹ, wọ vwọrọ efian kẹ odibo wẹn rẹ ọmọtẹ-ẹ.

¹⁷Ẹkẹvuọvo aye na da mrevun, o de vwiẹ ọmọshare vwẹ oma rẹ ọke yena rọ kpahe ọke evwru, kirobo rẹ Ilaesha ta kẹ.

¹⁸Ọke rẹ ọmọ na rhe vwọ rho, o de bru ọsẹ rọye kpo obo rẹ otu rẹ ivuevun de vuẹn orhọ.

¹⁹Ọ da ta kẹ ọsẹ rọye, E, uyovwi mẹ, uyovwi mẹ! Ọsẹ na da ta kẹ odibo rọye, Muo rhe oni rọye.

²⁰Ro vwo muo rhe oni rọye, oni rọye de muo tidia awọ, ọnre vwo vi uyovwi ọmọ na de ghwu.

²¹Ọ da yanran re muo sherhẹ ehwa rẹ ohwo rẹ Ọghẹnẹ na, o de huhu ẹchẹ gbe, ọ da ro otafe.

²²Etiyin o de se ọshare rọye, ọ da ta kẹ, Siobọ nẹ odibo ọvo vẹ ekẹtẹkẹtẹ ọvo kẹ vwẹ, rere me yanran kpata kpata ra mrẹ ohwo rẹ Ọghẹnẹ na rere mi rhivwi rhe.

²³Ọshare rọye da ta, Die nẹrhẹ wọ ra nonẹ? Nonẹ dia otuphro rẹ emeranvwe eyẹ edidjala-a. Aye na da ta, Ọ che shehọ.

²⁴Etiyin ọ da rhuẹrẹ ekẹtẹkẹtẹ na oma, ọ da ta kẹ odibo rọye, Jẹ eranvwe na djẹ kpata, wo jẹn o muẹdia-a jokpa nẹ me vuẹ wẹ.

²⁵Ọtiọye o de ghwe mu oyan phihọ, o de te asan rẹ ohwo rẹ Ọghẹnẹ na vwẹ Ugbenu ri Kamẹl. Ọke rẹ ohwo rẹ Ọghẹnẹ na vwọ mrẹ aye ro bro cha, ọ da ta kẹ Gehazi rẹ odibo rọye, Nighe, aye ri Shunẹm na vwẹ oboyi,

²⁶djẹ phẹrẹkpẹ ra vwa, rere wọ nọ, Oma wẹn dori? Ọshare wẹn herọ? Oma rẹ ọmọ na ganre? Aye na da kpahe, O dori.

²⁷Ọke ro rhi vwo te ugbenu na asan rẹ ohwo rẹ Ọghẹnẹ na, ọ da gbanọ awọ rọye, Gehazi da rhe rhe karhiẹn no. Ẹkẹvuọvo ohwo rẹ Ọghẹnẹ na da ta, Yan jovwo, fikiridie ivun miovwo gangan; Ọrovwohwo de sionu kẹ vwẹ, O sa ta kẹ vwẹ-ẹ.

²⁸Etiyin ọ da ta, Me nọ ekpẹn rẹ ọmọ mie ọrovwovwe? Me vuẹ wẹ dẹvọ nẹ wọ phiẹn vwẹ-ẹ?

²⁹Ọ da ta kẹ Gehazi, Chobiẹ amwa wẹn, wọ reyọ ọkpọ mẹ yọnrọn obọ, wọ yanran. Ọ dianẹ wọ mrẹ ohwo wo yere-e; Ohwo de yere uwe wọ kpaha kẹ-ẹ; wọ vwẹ ọkpọ mẹ na gbere opharo rẹ ọmọ na.

³⁰Etiyin oni rẹ ọmọ na da ta, Kirobo rẹ Ọrovwohwo herọ na, kirobo rẹ arhọ wẹn herọ na, Me cha yan jẹ uwe vwo-o. Kọye ọ da kparoma o de nene yanran.

³¹Gehazi da karo kẹ yanran ra vwẹ ọkpọ na gbere opharo rẹ ọmọ na, ẹkẹvuọvo ọ mrẹ irhivwẹ eyẹ oka rẹ arhọ ọvuọvo-o. Kọye o de rhivwi ra vwa, ọ da ta kẹ, Ọmọ na je rhọvwo-ọn.

³²Ọke rẹ Ilaesha rhi vwo te uwevwi na, ọ da mrẹ orivwi rẹ ọmọ na re mu sherhẹ enu rẹ ehwa rọye.

³³Ọtiọye ọ da ro uwevwi o de bi ẹchẹ na gbe ayen ivẹ, ọ da nẹ ẹrhovwo kẹ Ọrovwohwo.

³⁴Etiyin o de yeri kpenu ọ da riẹn oma nene ọmọ na, ọ da vwẹ ugbunu rọye te ugbunu rọye, ọ da vwẹ ẹro rọye te ọrọye, ọ da vwẹ abọ rọye te abọ rọye; rọ vwẹ riẹn nene enu rẹ ọmọ na oma rẹ ọmọ na da rhe rhorho.

³⁵Etiyin ọ da rhoma vrẹn mudia, ọ da yan kpo enẹ kpo enẹ vwẹ uwevwi na, o de rhe yeri kpenu o de sherhẹ riẹn oma nene ọmọ na; ọmọ na da rhevwe abọ ighwrẹ, o de rhiẹ ẹro rọye.

³⁶O de se Gehazi, ọ da ta, Se aye ri Shunẹm na. O de se. Ọke ro vwo bro rhe, ọ da ta kẹ, Mu ọmọ wẹn.

³⁷Ọ da rhe, rhi shiguẹ vwẹ awọ rọye, ọ da nuẹ uyovwi te otọ, etiyin o de mu ọmọ rọye ọ da ro otafe.

³⁸Ilaesha de rhivwi rhe Gilgai ọke rẹ owẹvwe vwo fiẹ vwẹ otọ na. Ọke rẹ Emọ rẹ emraro na ejobi vwo tidia vwẹ obaro rọye, ọ da ta kẹ odibo rọye, Mu itaso rode na chere rere wo chere ukodo kẹ emọ rẹ emraro na.

³⁹Ọvo vwẹ ayen da yanran kpo obo udju ra kọrọ ifọ, ọ da mrẹ vain ro mu djẹ, ọ da kọrọ ibi rọye rhe, o de bru ibi na phihọ itaso re vwo chere ukodo na, yẹ ọ riẹn obo rẹ ayen epha-a.

⁴⁰A da jẹ kẹ ihwo na re. Ẹkẹvuọvo ọke rẹ ayen vwọ ria ukodo na, ayen de kperi phia, E ohwo rẹ Ọghẹnẹ, ughwu hẹ evun rẹ itaso na! Ayen gbe sa riọ-ọ.

⁴¹Ọ da ta; Gbe mu emu na rhe. Ọ de ku emu na phihọ evun rẹ itaso na, ọ da ta, A je kẹ eshare na rere ayen re. Obo ri hwe ohwo ọvuọvo gbe daji evun rẹ itaso na-a.

⁴²Ọshare ọvo de nẹ Baal-shalishah rhe, ọda ghwa ikara rẹ emamọ rẹ ẹsosuọ vwo rhe ohwo rẹ Ọghẹnẹ na, ọkon rẹ ikara ri bali uje, kugbe eka eboba vwẹ evun rẹ esiso. Ilaesha da ta, Vwọ kẹ eshare na, rere ayen rẹ.

⁴³Ẹkẹvuọvo odibo rọye da ta, Mavọ me ghare enana kẹ eshare ujori wan? Ọ da vwariẹn ta, Mu ayen kẹ eshare na, rere ayen re, kidie enẹ Ọrovwohwo tare, Ayen cha ria, ayen me je re chekọ.

⁴⁴O de muo kẹ ayen. Ayen da rẹ, evo de ji chekọ, kirobo rẹ ota rẹ Ọrovwohwo epha.