Read urhobo Ivie rẹ Ivẹ 5 Bible Online

Ivie rẹ Ivẹ 5 - urhobo bible

Ivie rẹ Ivẹ 5

¹Neman, onotu rẹ unuofovwi rẹ ovie ri Siria, okpohwo rode vwẹ obọ rẹ onini rọye ọ ke je mrẹ aroesiri rọye, fikiridie oma rọye Ọrovwohwo da vwẹ obọ ẹkparo kẹ Siria. Ẹkpuyovwi rọye ọgba rọ yivwaro ẹkẹvuọvo kẹ ọhonvwoti.

²Asakiephana ihwo ri Siria vwẹ imu ọvo rẹ ayen rare ayen de mu ọmọtẹ rẹ Izrẹl ọvo rhe, ọmọtẹ na ko gbe odibo kẹ aye ri Neman.

³Ọ da ta kẹ aye rẹ onini rọye, Manẹ kẹ ọrovwovwe se bru ọmraro rọ hẹ obi Sameria na vwonẹ! Yo sivwi oti rọye na kpo.

⁴Ọtiọye Neman da yanran ra vuẹ ọrovworo, Enẹ gbẹ enẹ ọye ọmọtẹ re mu nẹ obo otọ rẹ Izrẹl rhe na tare;

⁵Ovie ri Siria da ta, Yanran asakiephana, mẹ cha vwẹ ọbe vwo rhe ovie rẹ Izrẹl. Ọtiọye ọ da yanran, ọ da ghwa talent ihwe rẹ idọnọ nene oma, shekẹl rẹ iro uriori esan, kugbe emwa rẹ orẹ ihwe.

⁶Ọ da vwẹ ọbe na vwo rhe ovie rẹ Izrẹl, rọ tare nẹ, Ọke rẹ ọbe nana de te we obọ, gba riẹn nẹ mi ji Neman rẹ odibo me bru we rhe rere wo sivwi oti rọye kpo.

⁷Ọke rẹ ovie rẹ Izrẹl vwo se ọbe na nu, ọ da bẹrẹ emwa rọye ọ da ta, Mẹvwẹ Ọghẹnẹ, ro se hwe rọ je sa kẹ arhọ rẹ ohwo nana vwọ vuẹ vwẹ ni mi sivwi oti rẹ ọshare nana kpo? Gbe nighe, wọ mrẹ obo rọ guọnọ ẹghwọ mẹ.

⁸Ẹkẹvuọvo ọke rẹ Ilaesha rẹ ohwo rẹ Ọghẹnẹ vwo nyo nẹ ovie rẹ Izrẹl bẹrẹ emwa rọye, ọ da vuẹ rhẹ ovie na tanẹ, Die wọ vwọ bẹrẹ emwa wẹn? Jo bru vwe rhe asakiephana, rere ọ vwọ riẹn nẹ ọmraro ghinẹ hẹ Izrẹl.

⁹Kẹ ọtiọye Neman vẹ iyesi tẹ ekpẹre rọye da rhe, ayen de rhi mudia anurhoro rẹ uwevwi rẹ Ilaesha.

¹⁰Ilaesha de ji ikọn bro tanẹ, Yanran wọ ra họ vwi Jọdan asia ighwrẹ, oma wẹn kọ cha varhe, oti wẹn ko kpo.

¹¹Ẹkẹvuọvo ophu de mu Neman, ọ da yanran, tanẹ, Nighe, mi rori nẹ ọ cha ro otafe bru vwe rhe, ri mudia, ko se odẹ rẹ Ọrovwohwo Ọghẹnẹ rọye, o mi kpogho obọ rọye phihọ asan na, ro de sivwi oti na.

¹²Abana vẹ Fapa rẹ irhie ri Damaskọs rhe yovwi nọ irhie rẹ Izrẹl ejobi? Kidie me gbe họ vwẹ ayen re me fo-on? Kọye re o de kuoma rhẹriẹ, ọ da yanran vwẹ ophu.

¹³Ẹkẹvuọvo idibo rọye de si kẹrẹ, e da ta kẹ, Ọsẹ mẹ, ọ dianẹ ọmraro na tare nẹ wo ru emu ọvo rọ rhoro, wo rhe ruo jovwo? Kidie ọnana rọ ta kẹ wẹ nẹ, Ra họ, rere wọ fon.

¹⁴Ọtiọye ọ da yanran re djoma phihọ ame asia ighwrẹ vwi Jọdan na, kirobo rẹ ọmraro rẹ Ọghẹnẹ na tare; oma rọye da varhe tẹntẹn kerẹ oma rẹ ọmọboban, ọ da fon.

¹⁵Etiyin o de rhivwi bru ohwo rẹ Ọghẹnẹ na ra, te ọye te usun rọye o de rhi mudia obaro rọye; ọ da ta Nighe, Me riẹnre nẹ Ọghẹnẹ hẹ akpọ na ejobi-i jokpa rẹ Izrẹl, ọtiọye gbe rhie abọ wọ reyọ okẹ nana mie odibo wẹn.

¹⁶Ẹkẹvuọvo ọ da ta Kirobo rẹ Ọrovwohwo herọ, ọ re me ga na, me cha reyọ emuọvo-o. Ọ da rẹ nẹ ọ reyọ, ẹkẹvuọvo ọ da sen.

¹⁷Etiyin Neman da ta, Ọ gbe dia eriyi-in, manẹ me rẹ wẹ nẹ jẹn odibo wẹn vwanvwe oghwa rẹ ekpẹn ivẹ ghwa kpo, fikiridie kẹ nonẹ yanran odibo wẹn gbẹ cha torhẹ izobo-o eyẹ ze izobo kẹ edjọ-ọ ẹkẹvuọvo Ọrovwohwo na.

¹⁸Vwẹ ota nana Ọrovwohwo vwo rhovwo odibo wẹn siẹrẹ ọrovwovwo de kpo iyẹgọ vwẹ ivun rẹ uwevwi ri Rimọn, rọ da vwẹ oma rẹrẹ ovwẹ, rẹ ekpuyovwi mẹ de gbe uyovwi otọ vwẹ evun rẹ uwevwi ri Rimọn, ọke mi de gbe uyovwi otọ vwẹ evun rẹ uwevwi ri Rimọn e jẹn Ọrovwohwo vwẹ oruchọ mẹ vwo rhovwo uvwe vwẹ oma rẹ ota nana.

¹⁹Ọ da ta kẹ, yanran vwẹ ufuoma. Neman de kuoma rhẹriẹ, ọ da yanran nẹ obaro rọye umuvwre krẹkrẹ.

²⁰Gehazi odibo rẹ Ilaesha ohwo rẹ Ọghẹnẹ na, da ta, No, ọrovwovwe siobọ nẹ Neman, ohwo ri Siria na kpo, yọ reyọ emu ọvuọvo mie vwe usun rẹ emu rọ ghwarhe na-a. Kirobo rẹ Ọrovwohwo herọ na, me cha djẹ bro ra, rere me reyọ eravwọn evo mie.

²¹Ọtiọye Gehazi de nene Neman. Neman vwọ kparo mrẹ ohwo ọvo rọ djẹ nene, o de wotọ nẹ akpẹrẹ rọye rhe ra vwa, ọ da ta, Arherha?

²²Ọ da ta, O dori. Ọrovwovwe ji uvwe rhe ta nẹ, Emọ rẹ emraro ivẹ nẹ Ifrem rhe orho ro obo ugbenu na rhi wo vwe, biko kẹ ayen talent rẹ idọnọ kugbe iwun ivẹ rẹ orẹ.

²³Neman da ta, Biko jo je we wọ reyọ talẹnt ivẹ, Ọ da rẹ, e de krun talẹnt rẹ idọnọ ivẹ na phihọ isiso ivẹ kugbe iwene rẹ iwun rẹ orẹ ivẹ, e de mu ayen kpahe idibo rọye ivẹ, ayen da ghwa ayen nene Gehazi.

²⁴Ọke rẹ o rhi vwọ te ugbenu na, o de mie ayen eghwa na re o mu phihọ uwevwi, ọ da vuẹ ihwo na nẹ ayen gbe hirhe, ayen da yanran.

²⁵Ọ ro uwevwi, o de re mudia kẹrẹ ọrovworo, Ilaesha da ta kẹ, Tivọ wọ nurhe Gehazi? Ọ da kpahe nẹ, Odibo wẹn nẹ asan ọvo rhe-e.

²⁶Ẹkẹvuọvo ọ da kpahe kẹ, Wọ riẹnre nẹ erhi mẹ nene uwe ọke re ọshare na vwo wotọ nẹ akpẹrẹ rhe rhe vwa wẹ? Ọna ọke ra vwọ reyẹ igho vẹ iwun, ọgbọ rẹ oliv kugbe vain, igegede vẹ irhuẹn, idibo rẹ eshare vẹ e rẹ eya?

²⁷Fiki rẹ ọtiọye na oti ri Nenam kọ tamu we vẹ uvwiẹ wẹn bẹdẹ. Oma rẹ oti, fuanfon kerẹ imicho kọye o vwo nẹ obaro rọye.