Read urhobo Ivie rẹ Ivẹ 7 Bible Online

Ivie rẹ Ivẹ 7 - urhobo bible

Ivie rẹ Ivẹ 7

¹Ẹkẹvuọvo Ilaesha da ta, Nyo ota rẹ Ọrovwohwo; enẹ Ọrovwohwo tare, Odẹ rọ cha ọke ọtiọna a cha shẹ ovwanvwọ rẹ emuọre shekẹl ọvo, ovwanvwọn ivẹ; bali shekẹl ọvo vwẹ unurhoro ri Sameria.

²Etiyin onotu rẹ ovie na vwẹ oma rẹrẹ da kpahe kẹ ohwo rẹ Ọghẹnẹ na, Ọ da dianẹ ekpuyovwi rẹ Ọrovwohwo de muobọ bru evakpo phihọ odjuvwu dede ọ ro wọ ta na phia? Ẹkẹvuọvo ọ da ta, Wọ cha vwẹ ẹro wẹn mrẹ, ẹkẹvuọvo wọ cha sa re vwọ-ọ.

³Asakiephana ihọnvw oti ẹne herọ vwẹ asan ughere na; ayen da ta kẹ ohwohwo Die sorọ rẹ avwanre vwọ dia etinẹ bẹsiẹ rẹ avwanre vwo ghwu?

⁴Ọ da dianẹ avwanre tare, E jẹn avwanre ro orere na, owẹvwe na ji fiẹ vwẹ evun rẹ orere na, avwanre ki ji ghwu vwẹ etiyin; avwanre de ji tidia vwẹ etinẹ, avwanre ji che ghwu rhe. Asakiephana a yanrhe, e je avwanre yan kpo obo erhọn rẹ ihwo ri Siria na; ayen de ni arodọvwẹ rẹ avwanre avwanre ke rhọ, ayen de hwe avwanre avwanre ki ghwu.

⁵Ọtiọye ayen de vrẹn vwẹ ọke phophoro kpo obo erhọn rẹ ihwo ri Siria, ẹkẹvuọvo ọke rẹ ayen rhi vwo te egbẹn rẹ erhọn rẹ ihwo ri Siria na, nighe ohwo ọvuọvo gbe hẹ etiyi-in.

⁶Fikiridie Ọrovwohwo ru ituofovwi rẹ ihwo ri Siria nyo edo rẹ ekpẹrẹ vẹ iyesi rẹ ituofovwi ride, kọye ayen da ta kẹ ohwohwo, Nighe, ovie rẹ Izrẹl durhie ivie ri Het vẹ ivie rẹ Ijipt rhe rhẹ họnre avwanre.

⁷Kọye ayen da djẹ vwẹ ọke phophoro yan jẹ itughẹ rayen, vẹ iyesi rayen, vẹ ekẹtẹkẹtẹ rayen vwo, ayen da djẹ jẹ erhọn na vwo obọdẹn, ayen da djẹ fiki rẹ arhọ rayen.

⁸Ọke rẹ ihonvwoti na rhi vwo te orhoma rẹ erhọn na, ayen da ro evun rẹ utughẹ ọvo, ayen da re, ayen da da, ayen da ghwẹ idọnọ vẹ iro vẹ emwa, re sinu; ayen de rhivwi rhe ayen da rọ utughẹ ọfa, ayen da ghwẹ ekuakua no, ayen da ghwẹ ayen yanran re sinu.

⁹Etiyin ayen da ta kẹ ohwohwo, Ọ dia obo ri fori avwanre ruẹ na-a. Ẹdẹ ri nonẹ na ẹdẹ rẹ ikun esiri, avwanre da de fọ hẹrhẹ te irhiọke, ekan rọye kọ dia ọ rẹ avwanre, e jẹn avwanre vrẹn asakiephana rere avwanre ra nẹ iyẹnrẹ kẹ evwruwevwi rẹ ovie.

¹⁰Ọtiọye ayen da rhe ri se erhẹrotọ re dẹrẹ ughere rẹ orere na, ayen da ta kẹ ayen, Avwanre te asan erhọn re ihwo ri Siria na nighe, kaka ohwo ọvuọvo rha hẹ etiyi-in jokpa rẹ iyesi re churu vẹ ekẹtẹkẹtẹ re churu vẹ itughẹ ra yan jovwo.

¹¹Etiyin erhẹrotọ na da yanran, a da nẹ iyẹnrẹ rẹ ota na kẹ evwruwevwi rẹ ovie.

¹²Ovie na de vrẹn vwẹ ason na, ọ da ta kẹ idibo rọye, Ke me ta kẹ ovwan obo rẹ ihwo ri Siria na rhuẹrẹ kpahe kẹ avwanre. Ayen riẹnre nẹ owẹvwe hwe avwanre; kẹ ayen ma yan nẹ asan erhọn na re si oma nu vwẹ uphephẹn ki roro nẹ ọke rẹ ayen de nẹ obo orere na rhe ro uphephẹn, ke mu ayen ọkpokpọ ka mrasan ro orere na.

¹³Ọvo vwẹ idibo rọye na da ta, E jẹn eshare ẹvo reyọ iyesi iyori ri chekọ na, kidie e ra yan jovwo vwẹ etinẹ jẹ cha dia kerẹ otu rẹ Izrẹl re ghwọrọ nure na; e jẹn avwanre ji ikọn ra mrẹ asan na.

¹⁴Ọtiọye ayen da reyọ eshare ivẹ re gua iyesi, ovie na de jẹ ayen bru ituofovwi ri Siria, tanẹ, Ovwan yanran ra mrẹ.

¹⁵Kọye ayen da vwọ kpahe ayen re te Jọdan, nighere, idjerhe na ejobi vọnre vẹ iwun vẹ ekuakua rẹ ofovwi rẹ ihwo ri Siria vwẹ okpakpa kpare kufia vwẹ ọke rẹ ayen vwọ djẹ. Ikọn na de rhivwi ayen da ra nẹ iyẹnrẹ kẹ ovie na.

¹⁶Etiyin ihwo na da ro uphephẹn ayen da ra kua erhọn rẹ ihwo ri Siria na. Ọtiọye na a da rhe shẹ ovwanvwọn rẹ emuọre shekẹl ọvo, a da rhe shẹ evwanvwọn ivẹ ri bali shekẹl ọvo, kirobo rẹ Ọrovwohwo tare.

¹⁷Asakiephana ovie na da vwẹ onotu rọ vwẹ oma rẹrẹ obọ rọye na mu olori rọ vwẹ ẹro te anurhoro; ihwo de chiyo muotọ vwẹ unu rẹ anurhoro na, o de ghwu kirobo rẹ ohwo rẹ Ọghẹnẹ na tare vwẹ ọke rẹ ovie na vwo bro rhe.

¹⁸Kidie ọke rẹ ohwo rẹ Ọghẹnẹ na vwọ ta kẹ ovie na, A cha shẹ ovwanvwọn rẹ eka ivẹ shekẹl ọvo, ovwanvwọn rẹ emuọre shekẹl ọvo vwẹ ọke ọtiọna rẹ odẹ rọ cha vwẹ anurhoro ri Sameria,

¹⁹onotu na da kpahe ta kẹ ohwo rẹ Ọghẹnẹ na, Ọ da dianẹ ekpuyovwi rẹ Ọrovwohwo de muobọ bru evakpo phihọ obo odjuvwu dede, ọ ro wọ ta na sa phia? Ẹkẹvuọvo ọ da ta, Wọ cha vwẹ ẹro wẹn mrẹ, ẹkẹvuọvo wọ cha sa re vwọ-ọ.

²⁰Etiyin ọ ghine phia kẹ, kidie ihwo chiyiro muotọ vwẹ unu rẹ anurhoro na o de ghwu.