Read urhobo Ivie rẹ Ivẹ 9 Bible Online

Ivie rẹ Ivẹ 9 - urhobo bible

Ivie rẹ Ivẹ 9

¹Etiyin Ilaesha, ọmraro na de se ọvo vwẹ emọ rẹ emraro na, ọ da ta Chobiẹ amwa wẹn, wọ rẹyọ ukoko rẹ evwri nana vwẹ obọ wẹn, re wọ yanran kpo Ramọt-giliad.

²Ọke wo de te oboyi, gba nọ ekpẹ ri Jehu ọmọ ri Jehoshafat, ọmọ ri Nimshi; wọ ro uwevwi bro ra wo se vrẹn nẹ ohri otu rọye, rere wo suo kpo evun rẹ uvun.

³Gba reyọ ukoko rẹ evwri na, wo kuo ku uyovwi rọye, re wọ ta, Enẹ Ọrovwohwo na tare, Me kuẹ evwri ku we rere wọ dia ovie kẹ Izrẹl. Gbe rhiẹ ẹchẹ rere wọ djẹ; wo gbe eghẹrẹ-ẹ.

⁴Kọye emeghele na, ọmraro na da yanran kpo Ramọt-giliad.

⁵Ọke rọ vwọ rhe jẹ inotu rẹ ofovwi na ejobi ra rua aguare, ọ da ta, E je uvwe uwevwi bru we rhe, E osun. Jehu da kpahe, Ono vwẹ usun rẹ avwanre na ejobi? Ọ da ta kẹ, Wọwẹ E osun.

⁶Ọtiọye o de vrẹn, ọ da yanran ro evun rẹ uwevwi; emeghele rẹ ọshare na de ku evwri na ku uyovwi rọye, ọ da ta kẹ nẹ, Enẹ Ọrovwohwo Ọghẹnẹ rẹ Izrẹl tare, Me vwo wẹ mu ovie kẹ ihwo rẹ Ọrovwohwo na vwẹ Izrẹl.

⁷Kẹ wọ guọghọ uwevwi rẹ Ehab ọrovwowe te otọ, rere me vwọ reihri vwẹ obọ ri Jẹzibẹl ọbara rẹ idibo mẹ emraro na, vẹ ọbara rẹ idibo rẹ Ọrovwohwo na.

⁸Kidie uwevwi rẹ Ehab ejobi cha ghwọrọ; ki mi bru ọshare kọshare mie Ehab, o wenẹ ọ dia ọviẹn eyẹ ọmuvwiẹ vwẹ evun rẹ Izrẹl na.

⁹Ki mi ru uwevwi rẹ Ehab kerẹ uwevwi rẹ Jẹroboam ọmọ ri Nebat, kerẹ uwevwi ri Basha ọmọ rẹ Ahija.

¹⁰Eranko na ke cha re Jezibẹl vwẹ ubrotọ ri Jezrẹl, ohwo ọvuọvo che sho-o. Etiyin o de rhiẹ ẹchẹ ọ da djẹ.

¹¹Ọke ri Jehu vwọ ro otafe bru idibo rẹ ọrovworo rhe, ayen da ta kẹ, Arherha? Die nẹrhẹ ọrhuẹ nana bru we rhe? Ọ da ta kẹ ayen, Wọ riẹn ohwo nana vẹ ota rọye.

¹²Ayen da ta, Ọyena dia uyota-a, Ta kẹ avwanre asakiephana, ọ da ta, Enẹ gbe enẹ ọ ta kẹ vwẹ, tanẹ Enẹ Ọrovwohwo tare, Me vwẹ evwri ghworo uwe rere wọ dia ovie vwẹ enu rẹ Izrẹl.

¹³Etiyin okpokpakpa dohwo dewun rọye da reyọ, ayen da vwẹ ayen hwa otọ kẹ chiyi wan, ayen de hworo ọgban, ayen de ghwoghwo, Jehu ọye ovie.

¹⁴Jehu ọmọ ri Jehoshafat ọmọ ri Nimshi da ruẹro kpahe Joram. Asakiephana Joram vẹ Izrẹl ejobi ra hẹrhẹ ohẹrhẹ vwi Ramọt-giliad kpahe Hazel ovie ri Siria;

¹⁵ẹkẹvuọvo ovie Joram rhivwi kpo Jezrẹl re sivwi oma rẹ ihwo ri Siria wanrọ vwẹ ọke rọ vwọ họnre Hazel ovie ri Siria. Kọye Jehu da ta, Ọ da dianẹ ọnana iroro wẹn, e rhe jẹ ohwo ọvuọvo ranvwiẹ nẹ orere na kpo Jezril re gbe ikun na-a.

¹⁶Etiyin Jehu da ro akpẹrẹ rọye o de kpo Jezril fikiridie Joram sherhẹ vwẹ oboyi. Ahazaya ovie ri Juda kpo oboyi ra mrẹ Joram.

¹⁷Asakiephana ọrhẹrotọ na mudia vwẹ ohẹrhẹ vwi Jezril, ọ da kparo mrẹ usun ri Jehu rẹ ayen vwọ cha, ọ da ta, Me mrẹ usun rẹ ihwo re cha, Joram da ta, Jẹ ohwo rọ gua iyesi ra vwa ayen,wo jẹ ọ nẹ, Arherha?

¹⁸Kọye ọshare rọ hẹ enu rẹ iyesi na da djẹ yanran ra vwa, ọ da ta, ovie tare, Arherha? Jehu da ta, Die wọ vwẹ ufuoma ru? Rhẹriẹ oma wọ djẹ kpahe ovwẹ. Ọrhẹrotọ na da nẹ iyẹnrẹn tanẹ, Ikọn na te ayen oma, ẹkẹvuọvo o rhe rhivwi rhe-e.

¹⁹Etiyin ọ da rhoma ji ohwo rivẹ rọ gua iyesi, ro vwo te asan rẹ ayen epha, ọ da ta, Enẹ ovie tare, Arherha? Jehu da kpahe, Die wọ vwẹ ufuoma ru? Rhẹriẹ oma wọ gua kpahe ovwẹ uko.

²⁰Ọrhẹrotọ na da rhe nẹ iyẹnrẹn, O te ayen oma, ẹkẹvuọvo ọ rhe rhivwi rhe-e. Edjadjẹ na họhọ edjadjẹ ri Jehu ọmọ rẹ Nimshi, kidie ọ djẹ gidigidi.

²¹Joram da ta, Muegbe, Ayen da rhuẹrẹ akpẹrẹ rọye phihọ. Etiyin Joram ovie rẹ Izrẹl vẹ Ahazaya ovie ri Juda dohwo akpẹrẹ rọye da ro, ra vwa Jehu, ayen da vwa vwẹ ọgbọ ri Nabọt ohwo ri Jezril.

²²Ọke ri Joram vwọ mrẹ Jehu, ọ da ta, Arherha, Jehu? Ọ da kpahe, Ufuoma ridie re sa dia re igberadja vẹ erhan rẹ Jezibẹl rẹ oni wẹn de buẹn phihọ?

²³Etiyin Joram da rhẹriẹ oma, ọ da djẹ, ọ da ta kẹ Ahazaya, Ọriodọvwe E, Ahazaya!

²⁴Jehu de si umurhabọ rọye te oba, ọ da sa Joram udu, odada na da rhanre vi ubiudu rọye, o de she teye evun rẹ akpẹrẹ rọye.

²⁵Jehu da ta kẹ Bidka umuada rọye, Muo kpenu, wo do phihọ ọgbọ ri Nabọt ohwo ri Jezril na, kidie karohọ, ọke re me vẹ owẹ vwọ tẹnrẹn usun vwọ djẹ kpahe Ehab ọsẹ rọye ukuko, obo rẹ Ọrovwohwo ta ota rẹ aruẹmrẹ nana kpahọ.

²⁶O muẹro kirobo me mrẹre vwẹ odẹ ro kpori kpahe ọbara ri Nabọt vẹ ọbara rẹ emọ rọye — Ọrovwohwo tare — Me cha hwa ifo na kẹ wẹ vwẹ ubrotọ nana. Fiki rẹ ọtiọye na vwẹ asakiephana, gbe muo wo re do phihọ ubrotọ na kirobo rẹ Ọrovwohwo tare.

²⁷Ọke rẹ Ahazaya ovie ri Juda vwọ mrẹ ọnana, ọ da djẹ garo vi Bethagan. Jehu da vwọ tua, ọ da ta, Je sa, ayen da sa vwẹ evun rẹ akpẹrẹ na vwẹ asan ugbenu ri Gọr rọ kẹrẹ Ibliam. Ọ da djẹ kpo Megido, o de ghwu vwẹ oboyi.

²⁸Idibo rọye de muo phihọ akpẹrẹ kpo Jerusalẹm, ayen de sho phihọ ushi rọye kugbe esẹ rọye vwẹ orere ri Devid.

²⁹Vwẹ ẹgbukpe uhwọvo ri Joram ọmọ rẹ Ehab ọye Ahazaya vwo mu uvie phihọ ẹriọ vwi Juda.

³⁰Ọke ri Jehu vwọ rhe Jẹzril, Jẹzibẹl de nyo; o de si amiẹro rọye, ọ da rhuẹrẹ uyovwi rọye, ọ da wan evakpo ni otafe.

³¹Ri Jehu vwọ ro anurhoro, ọ da ta, Arherha, Wẹ Zimri, ozighẹ ro hwe ọrovworo?

³²Ọ da kparo opharo rọye ni evakpo na, ọ da ta, Ono hẹ ẹbẹre mẹ? Ono? Idibo ivẹ eyẹ erha da gẹrẹ aro no.

³³Ọ da ta, Do phihọ otọ. Ayen de do phihọ otọ; ọbara rọye da sare ku ighẹhẹ vẹ iyesi, ayen de chiyo muotọ.

³⁴Etiyin ọ da ro uwevwi, ọ da re, ọ da da; ọ da ta, We re nenesi rẹ eghwobi na rere e sho; kidie ọmọtẹ rẹ ovie o ruẹ.

³⁵Ẹkẹvuọvo ọke rẹ ayen vwọ yanran re sho, ayen gbe mrẹ emuọfa vrẹn ekpehre rẹ uyovwi vẹ awọ vẹ ẹkuabọ rẹ abọ rọye.

³⁶Ọke rẹ ayen vwo rhivwi rhe re nẹ iyẹnrẹn kẹ, ọ da ta, Ọnana ota rẹ Ọrovwohwo, rọ wan oma rẹ odibo rọye Ilaija ohwo ri Tish ta, Vwẹ ubrotọ ri Jẹzril eranko da cha re uvwo ri Jẹzibẹl;

³⁷Orivwi ri Jẹzibẹl cha dia kerẹ isọn vwẹ enu rẹ udju vwẹ evun rẹ ubrotọ ri Jẹzril, ohwo ọvuọvo gbe cha sa ta nẹ, Ọnana Jẹzibẹ-ẹl.