Read urhobo 1 Ikun rẹ Ivie 10 Bible Online

1 Ikun rẹ Ivie 10 - urhobo bible

1 Ikun rẹ Ivie 10

¹Asakiephana ihwo ri Filistia da họnre Izrẹl; ihwo rẹ Izrẹl da djẹ kẹ ihwo ri Filistia, e de hwe ayen vwẹ enu rẹ rẹ ugbenu ri Gilboa.

²Ihwo ri Filistia da rhe djẹ vwa Sọl vẹ emọ rọye; ihwo ri Filistia de hwe Jonatan, Abinadab kugbe Malkishua rẹ emọ ri Sọl.

³Ofovwi na da rhe gan kẹ Sọl, esedada na da mrẹ; ayen da woma.

⁴Etiyin Sọl da ta kẹ ọghwekpo rọye, Reyọ ọlọkọ wẹn ru wo duvwu vwe, ọ dia ọtiọye-e ihwo nana rẹ upheruphe na da rha vwẹ ovwẹ jehwẹ. Ẹkẹvuọvo ọghwekpo rọye se yivwi ruo-o; kidie oshọ muro gangan. Fiki rẹ ọtiọye na Sọl da reyọ ọlọkọ rọye o de vwo hwe oma rọye.

⁵Ọghwekpo rọye vwọ mrẹ nẹ Sọl ghwu nure, ọ da vwẹ ọlọkọ ro obọ rọye vwo hwe oma rọye.

⁶Ọtiọna Sọl ru ghwu; te ọye vẹ emọ rọye erha vẹ ihwo rẹ uwevwi rọye ejobi.

⁷Eshare rẹ Izrẹl ejobi re hẹ evun rẹ iyara na rhe vwọ mrẹ nẹ unuofovwi rọye djẹre, nẹ Sọl vẹ emọ rọye ghwuru ayen da siẹn irere rayen ayen da djẹ; ihwo rẹ Filistia da rhe dia irere rayen.

⁸Rẹ ọke vwo rhie rẹ ihwo ri Filistia vwọ rhe ban amwa nẹ ihwo ri ghwuru, ayen da mrẹ Sọl vẹ emọ rọye ghwu phihọ enu rẹ ugbenu ri Gilboa.

⁹Ayen ban amwa rọye reyọ ayen da-nyavwe uyovwi rọye reyọ, vẹ ekuakua rẹ ofovwi, ayen de ji ikọn nene otọ ri Filistia ejobi, nẹ ayen ghwa iyẹnrẹn rhẹ ẹdjọ rayen kugbe ihwo na.

¹⁰Ayen de phi ewun rẹ ofovwi rọye phihọ uwevwi rẹ edjọ rayen, ayen da vwẹ uyovwi rọye ya uwevwi ri Dagọn.

¹¹Ẹkẹvuọvo ọke rẹ ihwo ri Jabesh Gilead vwo nyo obo rẹ ihwo ri Filistia ru kẹ Sọl,

¹²egba ri yivwaro na ejobi de vrẹn re mu orivwi ri Sọl vẹ emọ rọye rhe Jabesh. Ayen de shi ibekun rayen phihọ otọ rẹ ohahe vwi Jabesh, ayen de chiri owẹvwe ẹdẹ ighwrẹ.

¹³Etiyin Sọl de ghwu fiki ri je segbuyota rọye, o se Ọrovwohwo gbuyota-a kidie ijẹmienyo, ọ yọnrọn urhi rẹ Ọrovwohwo-o, ọ je ra guọnọ uchuko vwẹ asan ọfa ọ je ra bọ epha

¹⁴ọ rha guọnọ esuo rẹ Ọrovwohwo-o; Fiki rẹ ọtiọye Ọrovwohwo de hwe. Ọ da vwẹ uvie rọye kẹ Devid ọmọ ri Jese.