Read urhobo 1 Ikun rẹ Ivie 11 Bible Online

1 Ikun rẹ Ivie 11 - urhobo bible

1 Ikun rẹ Ivie 11

¹Etiyin Izrẹl ejobi da ghwẹ koko bru Devid vwi Hẹbrọn, ayen da ta, Nighere avwanre vẹ owẹ oma ọvo.

²Ọke rọ wanre, mrẹmrẹ ọke ri Sọl vwọ hẹ ovie, wọwẹ re sun Izrẹl ro otafe je ro uwevwi; Ọrovwohwo rẹ Ọghẹnẹ wẹn da ta kẹ wẹ, wọ dia osuigodẹ rẹ ihwo mẹ Izrẹl, wọ dia ovie vwẹ enu rẹ ihwo mẹ Izrẹl.

³Ọtiọye ekpako rẹ Izrẹl ejobi de bru ovie rhe vwi Hẹbrọn; Devid vẹ ayen da re ọphọ vwi Hẹbrọn vwẹ obaro rẹ Ọrovwohwo, a da vwẹ evwri ghworo Devid uyovwi rọ dia ovie vwẹ enu rẹ Izrẹl kirobo rẹ ota rẹ Ọrovwohwo vwẹ unu Samuẹl epha.

⁴Devid vẹ Izrẹl ejobi de kpo Jerusalẹm, ọye Jebu, asan rẹ ihwo ri Jebu epha jovwo, ihwo re dia otọ na.

⁵Ihwo ri Jebu da ta kẹ Devid, Wọ sa rhe etinẹ-ẹ. Devid da reyọ asan ọgangan ri Zayọn, kọye orere ri Devid.

⁶Devid da ta, Kohwo kohwo ro ke hwe ihwo ri Jebu kọye dia olotu rẹ ofovwi. Etiyin Joab rẹ ọmọ ri Zẹruyah kọye ka ra ọ da rhe dia olotu.

⁷Devid da dia asan ọguan na fiki rẹ ọtiọye na e de se orere ri Devid.

⁸Ọ da bọn orere na ki riariẹ nẹ Millo na hrẹbẹ hrẹbẹ; etiyin Joab da rhuẹrẹ asan ro chekọ vwẹ orere na.

⁹Devid da rho phihọ, kidie Ọrovwohwo rẹ ofovwi na vẹ ọye herọ.

¹⁰Asakiephana ena hẹ ikpihwo rẹ egba ri Devid, re vwẹ ọchuko rọ ganre vwọ kẹ vwẹ uvie rọye, kugbe ihwo rẹ Izrẹl ejobi, re vwer mu ovie, kirobo rẹ ota rẹ Ọrovwohwo rọ ta kpahe Izrẹl epha.

¹¹Ọnana ikun rẹ egba rẹ ihwo ri Devid; Jeshobeam, ohwo ri Hakmọn, ọye ma rho vwẹ ohri rẹ erha na; ọye ọvo vwẹ oshuẹ rọye vẹn ihwo ujori erha o de hwe ayen.

¹²Ọ rọ vwọ kpahọ vwẹ usun rẹ ihwo erha na re dia egba na kọye Eliaza rẹ ọmọ ri Dodo, rẹ ohwo rẹ Ahoh.

¹³Ọ vi Devid gba herọ vwi Pasdammim rẹ ihwo ri Filistia vwo koko etiyin fiki rẹ ofovwi. Ubrotọ ọvo etiyin rọ vọnre vẹ ọka, ihwo na da djẹ kẹ ihwo ri Filistia na.

¹⁴Ẹkẹvuọvo ọ da rhanre vi vwẹ uherevie rẹ ubrotọ na, o de sivwo, o de hwe ihwo ri Filistia na, Ọrovwohwo de sivwi ayen vẹ ephiokparobọ rode.

¹⁵Ihwo erha vwẹ ihwo ọgban re rhoro na da yanran kpo obo oragha na bru Devid vwẹ evun rẹ emua rẹ Adullam, ọke rẹ unuofovwi ri Filistia vwo won phihọ iyara ri Rifem.

¹⁶Yẹ Devid hẹ evun ra asan rọ odjahọ na; jẹ unuofovwi ri Filistia won phihọ Bẹtlẹhẹm ọke yena.

¹⁷Devid da ta vẹ ẹguọnọ, Manẹ ka mrẹ ohwo ọvo ro vo ame kẹ vwẹ da vwẹ orhanre ri Betlẹhẹm rọ hẹ oma rẹ anurhoro na.

¹⁸Etiyin eshare erha rẹ egba na da bẹrẹ asan erhọn ri Filistia na wan, ayen de re vo ame vwẹ orhanre ri Bẹtlẹhẹm rọ hẹ oma rẹ anurhoro na, ọ da reyọ vwo rhe Devid. Ẹkẹvuọvo Devid darọ-ọ, o de kuo kẹ Ọrovwohwo,

¹⁹ọ da ta, A sa mrẹ nẹ mi ru emu nana vwẹ obaro rẹ Ọghẹnẹ-ẹ. Me da ọbara rẹ ihwo nana? Fikiridie ayen ku uyovwi rayen kufia ra reyọ ame na. Fiki rẹ ọtiọye na o jọ da-a. Emu nana egba rẹ ofovwi na ruru.

²⁰Asakiephana Abishai, rẹ omoni ri Joab ọye me kpenu vwẹ ihwo ọgban na. Ọ da vwẹ oshuẹ rọye vwo hwe ihwo ujori erha rọ nẹrhẹ o vwo odẹ vwẹ usun rẹ ihwo erha na.

²¹Ọye ohwo ro me kperi usi vwẹ ihwo ọgban na, o de rhi hirhe hẹ ohwo ro suẹn ayen; je o te ihwo erha na-a.

²²Etiyin Benayah ọmọ ri Jehoiada, ohwo ro yivwaro vwi Kabzeel, ohwo ro ruẹ emu ride; o de hwe ariẹl ivẹ ri Moab, o ji hwe okpohrokpo vwẹ evun rẹ ọgọdọ vwẹ ẹdẹ rẹ imicho sheri.

²³Ọ de hwe ohwo rẹ Ijipt, ohwo rhuarho ro gro te kubit iyori. Ohwo rẹ Ijipt na vwo oshuẹ vwẹ obọ ro lo wrowro kerẹ ubiurhe re vwo rhuo amwa; ẹkẹvuọvo Benayah da yan bro vẹ ọkpọ, o de fru oshuẹ rọye mie o de vwo hwe.

²⁴Enana emu ri Benayah rẹ ọmọ ri Jehoyada ruru o de vwo odẹ rode kẹ oma rọye vwẹ usun rẹ ihwo erha re ganre na.

²⁵Ọ kpere usi vwẹ ohri rẹ ihwo ọgban na, jo te ihwo erha na-a. Devid de vwo ru osun vwẹ ihwo re rhẹrẹ.

²⁶Egba ro ofovwi na da dia Asahel rẹ oniọvo ri Joab, Elhanan rẹ ọmọ ri Dodo ri Bẹtlẹhẹm,

²⁷Shamọt ri Herọd, Hẹlẹz ohwo ri Pẹlọn,

²⁸Ira rẹ ọmọ ri Ikkesh ri Tekoa, Abieza rẹ Anatọt,

²⁹Sibekai rẹ ohwo ri Hush, Ilai rẹ Ahoh,

³⁰Meharai ri Netofa, Heled rẹ ọmọ ri Baanah ri Netofah,

³¹Itai ọmọ ri Ribai ri Gibea ri Bẹnjamin, Benayah ri Piratọn,

³²Hurai rẹ umurhẹ ri Gaash, Abiẹl rẹ Arbat,

³³Azmavet ri Baharum, Eliahba rẹ Shaalbọn,

³⁴Hashem rẹ ohwo ri Gizọn, Jonatan rẹ ọmọ ri Shagii rẹ ohwo ri Hara,

³⁵Ahiam rẹ ọmọ ri Saka rẹ ohwo ri Harar, Elifal rẹ ọmọ rẹ Ur,

³⁶Hefa rẹ ohwo ri Mekirat, Ahija ri Pẹlọn

³⁷Hẹzro ri Kamẹl, Naarai rẹ ọmọ rẹ Ezbai,

³⁸Joẹl rẹ oniọvo ri Natan, Mibha rẹ ọmọ ri Hagri,

³⁹Zelek ohwo rẹ Amọn, Naharai rẹ ohwo ri Bierot, Ọghwekpo ri Joab rẹ ọmọ ri Zeruyah,

⁴⁰Ira rẹ ohwo rẹ It, Gareb rẹ ihwo ri It,

⁴¹Uraya rẹ ohwo ri Hit, Zabad ọmọ rẹ Ahlai,

⁴²Adina ọmọ ri Shiza rẹ ohwo ri Rubẹn, osun rẹ ihwo ri Rubẹn kugbe ihwo ọgban na vẹ ọye,

⁴³Hanan ọmọ ri Maaka, kugbe Joshafat rẹ ohwo ri Mit.

⁴⁴Uzia rẹ ohwo rẹ Ashterat, Shama kugbe Jeiel emọ ri Hotam rẹ ohwo rẹ Aroer,

⁴⁵Jidiael rẹ ọmọ ri Shimri kugbe Joha rẹ omoni rọye rẹ ohwo ri Tiz,

⁴⁶Eliẹl rẹ ohwo ri Mahau, Jeribai kugbe Joshaviah rẹ emọ rẹ Elnam kugbe Itmah ri Moab,

⁴⁷Eliẹl, kugbe Obẹd, kugbe Jaasiẹl rẹ ohwo ri Mezoba.