Read urhobo 1 Ikun rẹ Ivie 12 Bible Online

1 Ikun rẹ Ivie 12 - urhobo bible

1 Ikun rẹ Ivie 12

¹Asakiephana enana ihwo ri bru Devid rhe vwi Ziklag, vwẹ ọke rọ gbe sa yan odedede-e fiki ri Sọl rẹ ọmọ ri Kish; enana je hẹ ohri rẹ egba re dia ochuko kẹ vwẹ ofovwi.

²Ayen esedada, ayen sa sa edada ayen je ghwa vwẹ obọrhe vẹ obọhwẹre vwẹ uruhrẹ phi ukpokpo; ayen ihwo ri Bẹnjamin, imoni ri Sọl.

³Ọ rọ marho vwọ ọ ye Ahieza, kẹsiẹye a ke mrẹ Joash, ayen ivẹ na emọ ri Shima ri Gibia; ọtiọye ji Jeziẹl vi Pẹlẹt emọ rẹ Azmavẹt; Baraka, Jehu rẹ Anatọt,

⁴Ishmaya ri Gibiọn, ọgba vwẹ ohri rẹ ọgban na kugbe ohwo ro suẹn ọgban na; Jerimaya, Jahaziẹl, Johanan, Jozahad ri Gidirah

⁵Iluzai, Jerimot, Biliah, Shimariah, Shifatiah, ri Haruf,

⁶Elkana, Ishiah, Azarẹi, Jozah, kugbe Jashobim ri Kọrah

⁷kugbe Joelah kugbe Zebadiah, emọ ri Jeroham ri Gedo.

⁸Ihwo ri Gad re egba ji vwo ọhọ de bru Devid kpo asan odjahọ vwẹ obo aton na, oma rẹ ofovwi na, ihwo re riẹn obo ra kpoda vẹ oshuẹ, ihwo vẹ opharo kerẹ ikpohrokpo, ihwo re djonẹ frẹfrẹ vwẹ enu rẹ igbenu:

⁹Eza ọye ohwo rode, Obadiah kẹ ọrivẹ, Eliab kẹ ọrerha

¹⁰Mishmannah kẹ ọrẹne, Jerimaya kẹ ọriyori,

¹¹Attai kẹ ọresan, Eliẹl kẹ ọrighwrẹ,

¹²Johanan kẹ ọrẹrenren, Elzabad kẹ ọrirhiri,

¹³Jeremaya kẹ ọrihwe, Makbannai, kẹ ọrihwọvo.

¹⁴Ihwo ri Gad nana inotu rẹ ofovwi, iri kpotọ suẹn ujori ọtiọye irikpenu suẹn uriori.

¹⁵Enana ihwo re shariẹ Jọdan vrẹn vwẹ emeranvwe rẹ ẹsosuọ, ọke rọ vwọ vọn ro otọ, ọ da nẹrhẹ ihwo re dia iyara na ejobi kua yanran kpo obaro ọnre vẹ obuko ọnre.

¹⁶Ẹvo vwẹ ihwo ri Bẹnjamin vi Juda da rhe asan omesiono bru Devid rhe.

¹⁷Devid de vrẹn ra vwa ayen, ọ da ta kẹ ayen, Wo de bru vwe rhe vwẹ ọ rẹ ugbeyan re wọ rhe cha vwẹ uko, ẹnwẹ mẹ vẹ owẹ ke dia ọvo, ẹkẹvuọvo wọ da tanẹ wọ shẹ vwẹ kẹ ọvweghrẹ mẹ, ji mi ru obo re chọre-e, e gbe jẹn Ọghẹnẹ rẹ esẹ rẹ avwanre mrẹ wẹ re ọ ghwọ ku we.

¹⁸Etiyin erhi de bru Amasai, olori rẹ ihwo ọgban na, ọ da ta, Avwanre ọwẹn, E Devid; avwanre vẹ owẹ obọ, E ọmọ ri Jesi! Ufuoma, ufuoma dia kẹ wẹ Ufuoma dia kẹ ihwo re cha wẹ uko! Kidie Ọghẹnẹ wẹn cha wẹ uko. Etiyin Devid da reyọ ayen, ọ da vwẹ ayen ru iruiruo vwẹ otuofovwi rọye.

¹⁹Evo vwẹ ihwo ri Manasse sa djẹ bru Devid rọ vẹ Filistia rhi vwo phi Sọl (Dede jẹ ọ cha ayen uko-o, fikiridie isun ri Filistia jẹ irọro ayen da djẹ kpo tanẹ, ọ de rhi miovwi kẹ avwanre kọ djẹ jẹ avwanre vwo bru onini rọye, Sọl)

²⁰Rọ vwọ yanran kpo Ziklag ihwo ri Manasse nana da djẹ bro: Adna, Jozabad, Jediael, Makaẹl, Jozabad, Elihu vẹ Zilletai, inotu rẹ uriori vwi Manasse.

²¹Ayen da cha Devid uko kpahe ihwo ri gborhugborho; fikiridie ayen egba ri yivwaro, ayen je ihwo ri suẹn unuofovwi.

²²Kẹdẹ kẹdẹ kọye ihwo vwo bru Devid cha chuko, bẹsiẹ, ra ke rhe mrẹ unuofovwi rode, kerẹ unuofovwi rẹ Ọghẹnẹ.

²³Enana ihwo rẹ ogharọ rẹ unuofovwi na, ri bru Devid rhe vwi Hibrọn, re vwọ rhẹriẹ uvie ri Sọl bro rhe, kirobo rẹ ota rẹ Ọrovwohwo tare.

²⁴Ihwo ri Juda re ghwa ekpọfia vẹ oshuẹ da dia ihwo uriori esan gbẹ ujori ẹne ri mu oda.

²⁵Vwẹ ihwo ri Simiọn na, egba ri yivwaro, ri phi ofovwi, da dia uriori ighwrẹ gbẹ ujori.

²⁶Vwẹ ihwo rẹ Livae da dia uriori ẹne gbẹ ujori esan.

²⁷Ọmọ rẹ ovie Jehoiada, rẹ unuwevwi rẹ Erọn, kugbe okpuyovwi rọye da dia uriori erha gbẹ ujori ighwrẹ.

²⁸Zadọk, emeghene ọgba ro yivwaro, vẹ ihwo uje gbẹ ivẹ ri suẹn ofovwi de nẹ uwevwi rẹ ọsẹ rọye rhe.

²⁹Vwẹ ihwo ri Benjamin, rẹ imoni ri Sọl uriori erha, ayen buebu ri vẹ uwevwi ri Sọl gba hẹ obọ jovwo.

³⁰Vwẹ ihwo rẹ Ifrem da dia uriori uje gbẹ ujori ẹne, egba ri yivwaro, ihwo ri kperi usi vwẹ uwevwi rẹ ọsẹ rayen.

³¹Vwẹ ubro rẹ ihwo rẹ uvwiẹ ri Manasse da dia uriori ihwe gbe ẹrenre re keri rhe rere ayen rhi vwi Devid mu ovie.

³²Vwẹ ihwo rẹ Issakar ihwo re riẹn obo rẹ ọke yena muru, re riẹn obo rẹ Izrẹl se ru, da dia inotu ujori ivẹ, imoni rayen je hẹ otọ rẹ isuesun rayen.

³³Vwẹ ihwo ri Zẹbulọn da dia uriori ujuvẹ gbẹ ihwe emamọ isodje rẹ ẹro teri, ra ghwẹ ekuakua rẹ ofovwi kẹ, da rhe vwẹ evun ọvo rhe cha Devid uko.

³⁴Ihwo ri Naftali da dia ilori rẹ ofovwi uriori vẹ ihwo uriori ọgban gbẹ ighwrẹ vẹ oshuẹ vẹ ekpọfia.

³⁵Ihwo ri Dan da dia uriori uje gbẹ ẹrenre gbẹ ujori erha re choma rẹ ofovwi.

³⁶Ihwo rẹ Asha da dia uriori ujuvẹ rẹ ẹro teri re choma hẹrhẹ ofovwi.

³⁷Ihwo ri Rubẹn vi Gad vẹ ubro rẹ orua ri Manasse ri nẹ ẹbẹre oboyi ri Jọdan rhe da dia uriori ujosan rẹ ihwo re ghwa ekuakua rẹ ofovwi phihọ.

³⁸Enana ejobi na, ihwo rẹ ofovwi, ayen da karedje rẹ ofovwi; ayen da rhe Hebrọn vẹ iroro rayen vwọ reyọ Devid mu ovie vwẹ enu rẹ Izrẹl; ihwo rẹ Izrẹl ejobi je ghwa choma ra vwọ vwi Devid mu ovie.

³⁹Ayen vi Devid da dia etiyin ẹdẹ erha re ria re da, fikiridie imoni rayen choma hẹrhẹ ayen.

⁴⁰Ihwo re dia kẹrẹ ayen re te asan kerẹ Issakar, Zẹbulọn vi Naftali da ghwa emuọre rhe vwẹ enu rẹ ekẹtẹkẹtẹ, Kamẹl, nama vẹ erhuẹn vọn asan ejobi, ikara ri fig, erheghe ri rezin, wain vẹ ọfigbo, erhuẹn, igegede, kidie aghọghọ vọn Izrẹl ejobi.