Read urhobo 1 Ikun rẹ Ivie 16 Bible Online

1 Ikun rẹ Ivie 16 - urhobo bible

1 Ikun rẹ Ivie 16

¹E de mu ekpeti rẹ Ọghẹnẹ na rhe uwevwi, e de muo phihọ evun rẹ utughẹ ri Devid bọn kẹ; ayen da torhẹ izobo vẹ izobo rẹ ufuoma kẹ Ọghẹnẹ.

²Ọke ri Devid vwo ze izobo rẹ ẹtorhẹ vẹ ọ rẹ ufuoma nu, ọ da vwẹ ẹrhovwo kẹ ihwo na vwẹ odẹ rẹ Ọrovwohwo.

³Ọ da ghare ikara vẹ eranvwe vẹ ikara ri rezin kẹ eshare vẹ aye ọvuọvo.

⁴Ọye ọ da vwi ihwo ri Livae evo mu ri gbe odibo vwẹ obaro rẹ ekpeti rẹ Ọrovwohwo na, re nẹ ẹrhovwo, kpẹvwẹ jiri Ọrovwohwo na, Ọghẹnẹ rẹ Izrẹl.

⁵Asaf kọye olori, ọrivẹ rọ vwọ kpahọ ọye Zekariah, Jeiel, Shemiramọt, Jehiẹl, Matitiah, Eliab, Benayah Obẹdedọm, kugbe Jeiel, ri hworo akpata kugbe isorogun. Asaf kọye hworo ekpagha.

⁶Benayah kugbe Jahazii rẹ irherẹn kọye hworo owanre kọke kọke vwẹ obaro rẹ ekpeti rẹ ọphọ rẹ Ọghẹnẹ na.

⁷Kọye vwẹ ẹdẹ yena Devid vwo tu ji urhi nẹ Asaf vẹ imoni rọye gba suine rẹ ẹkpẹvwẹ kẹ Ọrovwohwo na.

⁸E wa vwẹ ẹkpẹvwẹ kẹ Ọrovwohwo, se odẹ rọye, ghwoghwo uruemu rọye vwẹ ohri rẹ ihwo na.

⁹Suine kẹ, suine re ejiro kẹ, ta iruo rẹ igbunu Rọye!

¹⁰Vwẹ urinrin kẹ odẹ ọfuanfon rọye; jẹn udu re guọnọ Ọrovwohwo ghọghọ!

¹¹Guọnọ Ọrovwohwo vẹ ogangan Rọye, guọnọ asan rọ ephan kọke kọke.

¹²Karohọ iruo rẹ igbunu rọye ro ruru, igbunu ro ruru, orhiẹn ro bruru.

¹³Uvwiẹ rẹ Abraham odibo rọye, emọ ri Jekọp, rọ jẹreyọ!

¹⁴Ọye Ọrovwohwo Ọghẹnẹ rẹ avwanre; orhiẹbro rọye hẹ evun rẹ akpọ na ejobi.

¹⁵Ọ karohọ ọphọ rọye rhiri bẹdẹ, Ota ro ji urhi rọye, vwọ kẹ orua uriori.

¹⁶Ọphọ rọ vẹ Ebraham rere iveve ro veri kẹ Aizik,

¹⁷Ro ru gan phihọ urhi ki Jekọp, kerẹ ọphọ ri bẹdẹ kẹ Izrẹl

¹⁸Ọ tanẹ, Wẹ me vwẹ otọ ri Kenan kẹ nẹ ọ dia ẹkẹn uku wẹn.

¹⁹Ọke rẹ ayen vwọ epha tutuno krẹn, ri fi emuọvo-o, erhorha ri di ghoro vwọ

²⁰ri suosuo nẹ ẹgborho re te ẹgborho nẹ uvie ọvo bru ihwo efa ra.

²¹Ọ rhọvwere nẹ ohwo ọvuọvo shenyẹ aye-en ọ vwi fiki rẹ ayen harhe ivie,

²²tanẹ, Wọ vwẹ obọ te ihwo re me vwẹ evwri ghworo-o wo ru emraro mẹ obo re brare-e!

²³So une kẹ Ọrovwohwo, akpọ ejobi! Ta esivwo rọye nẹ ẹdẹ ra ro ẹdẹ.

²⁴Ghwoghwo urinrin rọye vwẹ ohri rẹ ẹgborho na ghwoghwo iruo rẹ igbunu rọye vwẹ ohri rẹ ihwo rẹ akpọ!

²⁵Kidie Ọrovwohwo rhoro, ohwo re jiri rhuarho e je lo vẹ udidi nẹ edjọ ejobi.

²⁶Kidie edjọ na ejobi rẹ ihwo vwori na ema diodi ẹkẹvuọvo Ọrovwohwo re ma odjuvwu na.

²⁷Ọghọ vẹ orhuarho e hẹ obaro rọye, egba vẹ aghọghọ e hẹ asan rọye.

²⁸Wa vwọ kẹ Ọrovwohwo, E uvwiẹ rẹ ihwo, wa vwọ kẹ Ọrovwohwo urinrin vẹ egba!

²⁹Wa vwọ kẹ Ọrovwohwo urinrin ro fori kẹ odẹ rọye vwẹ izobo bro rhe, ru wọ yan bro rhe! Ga Ọrovwohwo na vẹ osẹnvwe ọfuanfon,

³⁰phariẹ kẹ, akpọ na ejobi e akpọ na mudia gigirigi, e se ghwie nẹ ẹdia-a.

³¹Jẹn idjuvwu ghọghọ, rere oma vwerhe akpọ, jẹn ayen ta vwẹ ohri rẹ ẹgborho na, Ọrovwohwo re uvie.

³²Jẹn urhie do vẹ obo re vọnrọ, jẹn aghwa ghọghọ, vẹ obo re vọnrọ ejobi!

³³Kẹ irhe rẹ aghwa na so ine rẹ aghọghọ vwẹ obaro rẹ Ọrovwohwo, kidie o che guẹdjọ rẹ akpọ na.

³⁴E vwẹ ẹkpẹvwẹ kẹ Ọrovwohwo kidie ẹguọnọ ro jẹrhẹriẹ rọye dia rhiri bẹdẹ

³⁵Je ta rhe: Sivwi avwanre, E Ọghẹnẹ rẹ esivwo rẹ avwanre, ghwẹ avwanre koko wo sivwi avwanre nẹ ohri rẹ ẹgborho na rere ma vwẹ ẹkpẹvwẹ kẹ odẹ ọfuanfon wẹn, kugbe urinrin rẹ ejiro wẹn.

³⁶Ebruphihọ kẹ Ọrovwohwo na, Ọghẹnẹ rẹ Izrẹl nẹ bẹdẹ bẹdẹ re te rhiri bẹdẹ. Etiyin ihwo na ejobi da ta, Isẹ!, ayen de jiri Ọrovwohwo.

³⁷Ọye Devid da yan jẹ Asaf vẹ imoni rọye vwo etiyin vwẹ obaro rẹ ekpeti rẹ ọphọ rẹ Ọrovwohwo na rere o gbe odibo kẹ kọke kọke kirobo rẹ iruo rẹ ẹdẹ ọvuọvo guọnọre.

³⁸Ọtiọye ji Obẹdedọm rhe vẹ imoni rọye ujorha gbẹ ẹrenre, jẹ Obẹdedọm, ọmọ ri Jedutọn, vi Hosa ke dia erhẹrẹ anurhoro.

³⁹Ọ da yan ji Zadọk rẹ orherẹn vẹ imoni rọye rẹ irherẹn vwo vwẹ obaro rẹ ọgarivi rẹ Ọrovwohwo na vwẹ asan ro kpenu rọye vwi Gibion.

⁴⁰Ayen ki ze izobo rẹ ẹtorhẹ kẹ Ọrovwohwo vwẹ enu rẹ agbada rẹ izobo rẹ ẹtorhẹ na kọke kọke te irhiọke te ovwọnvwọn, kirobo re siro phihọ urhi rẹ Ọrovwohwo na ro ji kẹ Izrẹl.

⁴¹Himan vi Jẹdutọn ji kugbe ayen, kugbe isun rẹ ihwo ra jẹreyọ e de rhe se ayen odẹ nẹ ayen vwẹ ẹkpẹvwẹ kẹ Ọrovwohwo na, kidie ẹguọnọ ro jẹrhẹriẹ rọye herọ bẹdẹ.

⁴²Himan kugbe Jẹdutọn vwo owanre vẹ ekpagha rẹ ihwehworo vẹ ekuakua ra vwọ so ine efuanfon. Emọ ri Jẹdutọn a da vwẹ ayen mudia anurhoro.

⁴³Etiyin ihwo na ejobi de rhivwi kpo dohwo duwevwi rọye, Devid da yanran ra nẹ ẹrhovwo kẹ evwruwevwi rọye.