Read urhobo 1 Ikun rẹ Ivie 17 Bible Online

1 Ikun rẹ Ivie 17 - urhobo bible

1 Ikun rẹ Ivie 17

¹Asakiephana ri Devid vwọ dia uwevwi rọye re, Devid da ta kẹ Natan rẹ ọmraro, Nighere, me dia uwevwi ri igẹdu, ẹkẹvuọvo ekpeti rẹ ọphọ rẹ Ọrovwohwo na hẹ otọ rẹ utughẹ.

²Natan da ta kẹ Devid, Ru obọ ri hẹ udu wẹn, kidie Ọghẹnẹ vẹ owẹ herọ.

³Ẹkẹvuọvo vwẹ ason ọvuọvo na ota rẹ Ọrovwohwo de bru Natan rhe,

⁴Yanran ra ta kẹ odibo mẹ Devid, Enẹ Ọrovwohwo tare: Wọ cha bọn uwevwi kẹ vwẹ dia-a.

⁵Kidie me dia uwevwi rhavwẹ ẹdẹ mi vwo sun Izrẹl re duvwẹ ẹdẹ ri nonẹ-ẹ, ẹkẹvuọvo me yan nẹ utughẹ kpo utughẹ, nẹ ẹdia kpo ẹdia.

⁶Vwẹ asan ejobi re me vẹ Izrẹl yan te, me je ta ota kẹ iguẹdjọ rẹ Izrẹl dẹvo-o, re mi ji urhi kẹ no sun ihwo mẹ, nẹ, Die sorọ wọ gbe bọn uwevwi rẹ igẹdu kẹ vwẹ-ẹ?

⁷Asakiephana enẹ wọ ta kẹ Devid odibo mẹ, Enẹ Ọrovwohwo rẹ ofovwi tare, me reyọ owẹ nẹ otọ rẹ eghri ru wo de churu igodẹ rhe, nẹ wo gbi nene igodẹ-ẹ, nẹ wọ dia ọmọ rẹ ovie vwẹ enu rẹ ihwo mẹ Izrẹl;

⁸Me vẹ owẹ da dia vwẹ asan kasan wọ rare ejobi, me da djẹ ivwighrẹ wẹn ejobi nẹ uwe oma; ki mi mu odẹ kẹ wẹ, kerẹ odẹ rẹ ihwo re rhoro vwẹ akpọ na.

⁹Ki me vwẹ asan kẹ ihwo mẹ Izrẹl, ke me kọn ayen, rere ayen vwọ sa dia ẹdia rẹ obọ rayen, e gbi kpokpo ayen ọfa-a; ihwo ogharogha gbe rhaphiẹ ayen ọfa-a, kirobo rọ ephan jovwo.

¹⁰Nẹ ọke me vwọ vwẹ iguẹdjọ mu ni sun ihwo mẹ Izrẹl rhe na, ki mi phi ivwighrẹ wẹn ejobi kparobọ. Ọ rọ marho mi ghwoghwo kẹ ovwan nẹ Ọrovwohwo cha bọn uwevwi kẹ ovwan.

¹¹Ọke rẹ ẹdẹ wẹn da gba ru we de ghwu bru esẹ rẹ ovwan rare, ke me cha kpare emọ rẹ ovwan re cha vwẹ obuko rẹ ovwan vrẹn, ọvo vwẹ usun rẹ emọ rẹ ovwan na ki mi ru uvie rọye gan.

¹²Ọye cha bọn uwevwi kẹ vwẹ, ke me vwẹ uvie rọye mudia bẹdẹ.

¹³Me dia ọsẹ kẹ, kọ dia ọmọ mẹ; me cha reyọ ẹguọnọ ro jẹrhẹriẹ mẹ na mie-e, kirobo re me reyerọ mie ọrọ ka obaro kẹ wẹ,

¹⁴ẹkẹvuọvo mi ruo gan vwẹ uwevwi mẹ vẹ uvie mẹ bẹdẹ. Ekete rọye ko mudia gan bẹdẹ.

¹⁵Kirobo rẹ eta nana ejobi epha, vẹ ọtiobo rẹ emramrẹ nana ejobi epha, ọye Natan ta kẹ Devid.

¹⁶Etiyin ovie Devid da ro uwevwi o de tidia obaro rẹ Ọrovwohwo ọ da ta, ono o mẹvwẹ, E Ọrovwohwo rẹ Ọghẹnẹ, die uwevwi mẹ epha ru wọ vwọ vwẹ ovwẹ yan sheri ọtiọna?

¹⁷Ọnana kẹ emu otete vwẹ ẹro wẹn, E Ọghẹnẹ; wọ je ta ota kpahe uwevwi rẹ odibo wẹn vwẹ ọke grogro rọ cha, wọ da rha vwẹ uvwiẹ me rọ cha vwẹ obaro nẹ vwẹ, E Ọrovwohwo Ọghẹnẹ!

¹⁸Die ọfa Devid sa ta kẹ wẹ ru wọ vwọ vwẹ ọghọ kẹ odibo wẹn? Kidie wọ riẹn odibo wẹn.

¹⁹Fiki rẹ odibo wẹn E Ọrovwohwo, vẹ ọtiobo rẹ udu wẹn epha, ọye wo vwo ru emu ride nana ejobi, wọ vwọ vwẹ emu ride nana ejobi phia.

²⁰O vwo ohwo rọ họhọ owẹ-ẹ, E Ọrovwohwo, Ọghẹnẹ ọfa herọ nọ wẹ-ẹ, kirobo rẹ avwanre vwẹ erhọn rẹ avwanre nyo-o.

²¹Didi ẹgborho ọfa vwẹ akpọ na rọ họhọ ihwo wẹn Izrẹl, rẹ Ọghẹnẹ na tan hirhe nọ dia ihwo rọye, wọ vwọ re odẹ kẹ oma wẹn vwẹ emu ride vẹ emu ro muoshọ, ro wọ vwọ djẹ ẹgborho buebu nẹ obaro rẹ ihwo wẹn ru wọ tan nẹ Ijipt rhe?

²²Wo de rhe ru ihwo wẹn Izrẹl ne dia ihwo wẹn bẹdẹ; wẹ E Ọrovwohwo, da rhoma rhe dia Ọghẹnẹ rayen.

²³Asakiephana, E Ọrovwohwo, gbe jẹ ota na re wọ ta kpahe odibo wẹn vẹ uwevwi rọye na sẹ bẹdẹ, wo ru kirobo ru wọ tare.

²⁴Odẹ wẹ kọ dia, ka je kparọ kpenu bẹdẹ; nẹ Ọrovwohwo rẹ ofovwi, Ọghẹnẹ rẹ Izrẹl ọye Ọghẹnẹ ri Izrẹl, uwevwi rẹ odibo wẹn Devid kọ dia vwẹ obaro wẹn.

²⁵Kidie wẹ, Ọghẹnẹ mẹ, vwerọ phia kẹ odibo wẹn nẹ wọ bọn uwevwi kẹ; fiki rẹ ọtiọye odibo wẹn vwo vwo arueyivwo vwọ nẹ ẹrhovwo vwẹ obaro wẹn.

²⁶Asakiephana, E Ọrovwohwo, wẹ Ọghẹnẹ, we ri ve emu esiri nana kẹ odibo wẹn.

²⁷Asakiephana gbe je o je we re wo bruphihọ kẹ uwevwi rẹ odibo wẹn, rere ọ dia obaro wẹn bẹdẹ; wẹ, E Ọrovwohwo, obo wo bruba kẹ ọye e bruphihọ kẹ bẹdẹ.