Read urhobo 1 Ikun rẹ Ivie 21 Bible Online

1 Ikun rẹ Ivie 21 - urhobo bible

1 Ikun rẹ Ivie 21

¹Idẹbono de rhi gbe kpahe Izrẹl, o de fovwo Devid nẹ o kere ihwo rẹ Izrẹl.

²Devid da ta kẹ Joab vẹ ilori rẹ ofovwi na, Yanran, re kere Izrẹl nẹ Beersheba re te Dan, wa rhe nẹ iyẹnrẹn kẹ vwẹ, rere me riẹn unu rayen.

³Ẹkẹvuọvo Joab da ta, E jẹn Ọrovwohwo vwọ ba ihwo rọye asakon ujori no obo rayen bute na. Ọ dia ọtiọye ayen epha-a, ọrovwovwe ovie, ayen ejobi na dia idibo rẹ ọrovwovwe? Die sorọ rẹ ọrovwovwe vwọ vwẹ abe tughẹ uyovwi rẹ Izrẹl?

⁴Ẹkẹvuọvo ota rẹ ovie de gbe ota rẹ Joab phihọ otọ. Joab de vrẹn ọ da yan nene Izrẹl ejobi o de rhe hirhe rhe Jerusalẹm.

⁵Joab da vwẹ unu rẹ ihwo ro keri kẹ Devid. Ayen ejobi da dia oduduru ọvo kugbe uriori iyori rẹ eshare re vwẹ ọlọkọ họnra, vwi Juda uriori ujori ẹne gbẹ ujorha gbẹ ihwe rẹ ihwo re vwẹ ọlọkọ họnra.

⁶Ẹkẹvuọvo o kere Livae vi Benjamin kugbe-e, kidie urhi rẹ ovie na tu Joab oma.

⁷Ẹkẹvuọvo emu nana de miovwo Ọghẹnẹ ivun, ọ da ghwiẹ Izrẹl.

⁸Devid da ta kẹ Ọghẹnẹ, Mi ru umwemwu gangan fiki rẹ emu nana ri mi ruru na. Ẹkẹvuọvo asakiephana, me rẹ wẹ, gbe si orukuruku na nẹ odibo wẹn oma kidie mi ru ẹkpa gangan.

⁹Ọrovwohwo da ta ota kẹ Gad, ọmraro ri Devid, tanẹ,

¹⁰Yanran wọ ra ta kẹ Devid, Ẹnẹ Ọrovwohwo tare, Emu erha me vwọ kẹ wẹ; jẹn ọvo reyọ vwẹ usun rayen rere mi ruo kẹ wẹ.

¹¹Etiyin Gad de bru Devid rhe ọ da ta kẹ, Enẹ Ọrovwohwo tare, Reyọ o ro je we:

¹²Owẹnvwe rode rẹ ikpe erha, yẹrẹ ivwighrẹ wẹn re guọghọ owẹ emeranvwe erha bẹsiẹ rẹ ọlọkọ rẹ ivwighrẹ wẹn vwo phi we kua; yẹrẹ ẹdẹ erha rẹ ọlọkọ rẹ Ọrovwohwo, emianvwe vwẹ enu rẹ otọ na, rẹ amakashe rẹ Ọrovwohwo da guọghọ ihwo vwẹ otọ rẹ Izrẹl na ejobi. Asakiephana gba jẹ rere me mrẹ iyẹnrẹn nẹ kẹ ọ ro ji vwe.

¹³Etiyin Devid da ta kẹ Gad, Mi hẹ evun rẹ ọdjarhe rode; ju vwe she phihọ obọ rẹ Ọrovwohwo, kidie ehrọre rọye pha rhuarho; ẹkẹvuọvo wo ju vwe she phihọ obọ rẹ ohwo rẹ akpọ-ọ.

¹⁴Ọrovwohwo da vwẹ emianvwe mu Izrẹl; ihwo uriori ujorha gbẹ ihwe de ghwu vwẹ Izrẹl.

¹⁵Ọghẹnẹ de ji amakashe na kpo Jerusalẹm ra ghwọrọ; ọke rọ cha vwọ guọghọ, Ọrovwohwo da mrẹ, ọ de kurhẹriẹ nẹ emu umwemwu ro che ru jovwo, ọ da ta kẹ amakashe rọ guọghọ na, ọ teri, da obo ji asakiephana. Yẹ amakashe rẹ Ọrovwohwo na mudia vwẹ oma rẹ utuwevwi rẹ ewuye rẹ Onan rẹ ohwo ri Jebu.

¹⁶Devid vwọ kpare ẹro kpenu ọ da mrẹ amakashe rẹ Ọrovwohwo ro mudia uherevie rẹ akpọ vẹ odjuvwu vẹ ọlọkọ rọ riẹn phihọ Jerusalẹm. Etiyin Devid vẹ ekpako na de ku esiso phihọ, ayen de she bọvwọ opharo rhuotọ.

¹⁷Etiyin Devid da ta kẹ Ọghẹnẹ, ọ dia omẹvwẹ re tanẹ ekere ihwo na? Mẹvwẹ ri ru umwemwu mi ru obo re brare gangan. Ẹkẹvuọvo igodẹ nana, kidie ayen ruru? Jẹn obọ wẹn, me rẹ wẹ, Ọrovwohwo Ọghẹnẹ mẹ, gbe kpahe ovwẹ vẹ uwevwi rẹ ọsẹ mẹ; ẹkẹvuọvo wo jẹn emianvwe nana dia uyovwi rẹ ihwo wẹ-ẹn.

¹⁸Etiyin amakashe rẹ Ọrovwohwo na de ji urhi kẹ Gad nẹ ọ ta kẹ Devid nẹ, Devid yanran kpenu re o ra so agbada kẹ Ọrovwohwo vwẹ utuwevwi rẹ ewuye rẹ Onan rẹ ohwo ri Jebu.

¹⁹Etiyin Devid da yanran kirobo ri Gad ta kẹ na, rọ tare vwẹ odẹ rẹ Ọrovwohwo na.

²⁰Asakiephana yi Onan re wuye ọka, rọ vwọ rhẹriẹ oma ọ da mrẹ amakashe na, emọ rọye ẹne re vẹ ọye gba etiyin de si oma rayen nu.

²¹Ri Devid vwo bru Onan, Onan vwọ kpare opharo ọ da mrẹ Devid, o de vrẹn nẹ utuwevwi rẹ ewuye rọye na, ọ da ra vwarọ Devid, ọ da vwẹ arhare rọye vwo te otọ kẹ.

²²Devid da ta kẹ Onan, Kẹvwẹ asan vwẹ utuwevwi rẹ ewuye wẹ na re me so agbada kẹ Ọrovwohwo, vwọ kẹ vwẹ obo rọ ghare te ejobi rere emianvwe na vwo nẹ ihwo na oma.

²³Etiyin Onan da ta kẹ Devid, Reyọ; ọrovwovwe ovie vwo ru obo ri jere ejobi, nighere, me je vwẹ irhuẹn re vwo ze izobo rẹ ẹtorhẹ vwọ kẹ wẹ kugbe ekpẹrẹ re vwo wuye ra vwọ ghwẹ irhe kugbe ọka ra vwọ torhẹ izobo, me vwẹ ayen ejobi kẹ wẹ.

²⁴Ẹkẹvuọvo ovie Devid da ta kẹ Onan, Ẹjo, ẹkẹvuọvo me hwa osa rọye gba kẹ wẹ; Mẹ sa vwẹ emu rọ dia ọwẹn vwọ kẹ Ọrovwohwo-o, eyẹ vwo ze izobo rẹ ẹtorhẹ re me hwa osa phihọ-ọ.

²⁵Etiyin Devid da hwa shekẹl uri erha rẹ oro vwẹ ovwanvwọn phihọ asan na vwọ kẹ Onan.

²⁶Devid da so agbada phihọ etiyin kẹ Ọrovwohwo o de ze izobo rẹ ẹtorhẹ vẹ izobo rẹ ufuoma, o de se odẹ rẹ Ọrovwohwo, ọ da vwẹ erhanre nyo nẹ obo odjuvwu rhe vwẹ enu rẹ agbada rẹ izobo ẹtorhẹ na.

²⁷Etiyin Ọrovwohwo da ta kẹ amakashe na; o de phi ọlọkọ rọye phihọ ako rọye.

²⁸Vwẹ ọke yena, ri Devid vwọ riẹn nẹ Ọrovwohwo nyo kẹ vwẹ utuwevwi rẹ ewuye ri Onan ohwo ri Jebu, o de ze izobo rọye vwẹ etiyin.

²⁹Kidie ọgarivi rẹ Ọrovwohwo ri Mosis bọnre vwẹ evun rẹ aghwa, kugbe agbada rẹ izobo ẹtorhẹ vẹ asan ro kpenu vwi Gibiọn,

³⁰ẹkẹvuọvo Devid gbe sa yanran ra nọ mie Ọghẹnẹ-ẹ, kidie ọ djẹ oshọ rẹ amakashe rẹ Ọrovwohwo na.