Read urhobo 1 Ikun rẹ Ivie 22 Bible Online

1 Ikun rẹ Ivie 22 - urhobo bible

1 Ikun rẹ Ivie 22

¹Etiyin Devid da ta, Etinẹ kọye uwevwi rẹ Ọrovwohwo Ọghẹnẹ etinẹ je cha dia agbada rẹ izobo ẹtorhẹ kẹ Izrẹl.

²Devid de ji urhi nẹ a ghwe erhorha rẹ Izrẹl ejobi koko, ọ da reyọ ihwo ri bro oragha nẹ ayen rhuẹrẹ eragha ra vwọ bọn uwevwi rẹ Ọghẹnẹ na.

³Devid da ghwẹ itehru buebu koko vwo bru ibibẹ, kẹ ẹchẹ vẹ inurhoro vẹ ahwa ọtiọye ji te ẹrovwo buebu ra sa vwanvwe-e,

⁴vẹ ephapha re igẹdu re se kere-e; fikiridie ihwo ri Saidọn vi Taya ghwẹ igẹdu buebu rhe Devid.

⁵Kidie Devid tare, Solomọn rẹ ọmọ mẹ omotete o ruẹ ọ riẹn emuọvo-o, uwevwi re a cha bọn kẹ Ọrovwohwo na me dia uwevwi yoyovwi gangan, ọ rẹ usi vẹ urinrin vwẹ otọ na ejobi; me choma kẹ. Devid da rhọrọ ekuakua rẹ uwevwi na koko buebu tavwe rẹ ọke rẹ ughwu rọye ki rhi te.

⁶Etiyin o de se Solomọn rẹ ọmọ rọye, ọ da vuẹ nẹ ọ bọn uwevwi kẹ Ọrovwohwo rẹ Ọghẹnẹ rẹ Izrẹl.

⁷Devid da ta kẹ Solomọn, ọmọ mẹ, me jẹn iroro phihọ udu re me vwọ bọn uwevwi kẹ odẹ rẹ Ọrovwohwo Ọghẹnẹ mẹ.

⁸Ẹkẹvuọvo ota rẹ Ọrovwohwo de bru vwe rhe, nẹ, Wo sun ọbara te otọ nọ wo ki ji phi okpo ofovwi nọ; wọ bọn uwevwi kẹ odẹ mẹ-ẹ, fikiridie wo sun ọbara buebu te otọ bunọ vwẹ obaro mẹ vwẹ akpọ na.

⁹Nighere, e vwiẹ ọmọshare kẹ wẹ; rọ dia ohwo rẹ ufuoma. Me vwẹ ufuoma kẹ nẹ obọ rẹ ivwighrẹ rọye re riariẹ rẹ phihọ; odẹ rọye kọ dia Solomọn, me vwẹ ufuoma vẹ ofuefu vwọ kẹ Izrẹl vwẹ ọke roye.

¹⁰Ọye re bọn uwevwi kẹ ọdẹ mẹ, Kọ dia ọmọ mẹ, ke me dia ọsẹ rọye, ke me vwẹ ekete re uvie rọye mu vwẹ enu rẹ Izrẹl bẹdẹ.

¹¹Asakiephana ọmọ mẹ, Ọrovwohwo vẹ owẹ dia, rere wo se phi kparobọ vwẹ uwevwi ẹbọn rẹ Ọrovwohwo rẹ Ọghẹnẹ wẹn kirobo rẹ ọ tare kpahe owẹ.

¹²Ọrovwohwo gba vwẹ ọhọ vẹ erianriẹn kẹ wẹ, rere ọ da vwẹ owẹ mu vwẹ enu rẹ Izrẹl nure wọ vwọ sa yọnrọn urhi rẹ Ọrovwohwo rẹ Ọghẹnẹ wẹn.

¹³Etiyin ko yovwi kẹ wẹ wọ da sa yọnrọn irhi vẹ iji rẹ Ọrovwohwo ta kẹ Mosis nẹ ọ vwọ kẹ Izrẹl. Wa gan oma we rhe yivwaro. Wọ djẹ oshọ-ọ.

¹⁴Oja buebu me vwọ kọn okọn koko vwọ kẹ uwevwi rẹ Ọrovwohwo na uriori iyori ri talent rẹ oro, oduduru rẹ talent rẹ idọnọ, vẹ ẹrovwo vẹ utehru ra sa vwanvwe-e fikiridie ibunọ; ephapha vẹ eragha eye me je choma rọye phihọ otọ. Wọ me je vwọ ba enana.

¹⁵Wo vwo ihwo buebu ri ru iruo; ibrikuta, ebọn uwevwi, ọkare-irhe, dohwo doghẹre rẹ ewena, ovwunu-u ri vwo eriẹnre rẹ iruo,

¹⁶rẹ oro, idọnọ, ẹrovwo, vẹ utehru. We vrẹn we ru iruo, Ọrovwohwo vẹ ovwan dia.

¹⁷Devid da ta kẹ isun rẹ Izrẹl ejobi nẹ ayen cha Solomọn rẹ ọmọ rọye uko, tanẹ,

¹⁸ọ dia Ọrovwohwo Ọghẹnẹ vẹ ovwan gba herọ? Ọ vwẹ ufuoma kẹ ovwan vwi kabọ kabọ. Kidie o phi ihwo rẹ otọ na phihọ obọ mẹ; Ọrovwohwo phi otọ na vẹ ihwo rọye kparobọ.

¹⁹Asakiephana wa vwẹ iroro vẹ ẹnwẹ rẹ ovwan vwọ guọnọ Ọrovwohwo rẹ Ọghẹnẹ rẹ ovwan. We vrẹn ra bọn ẹshẹ kẹ Ọrovwohwo rẹ Ọghẹnẹ asan re mu ekpeti rẹ ọphọ rẹ Ọrovwohwo na vẹ ekuakua efuanfon rẹ Ọghẹnẹ na phihọ rọ dia uwevwi ra tọn phihọ kẹ odẹ rẹ Ọrovwohwo na.