Read urhobo 1 Ikun rẹ Ivie 23 Bible Online

1 Ikun rẹ Ivie 23 - urhobo bible

1 Ikun rẹ Ivie 23

¹Ọke ri Devid vwo ghwọ re, ọ da vwẹ Solomọn ru ovie vwẹ enu rẹ Izrẹl.

²Devid da ghwẹ isun rẹ Izrẹl ejobi vẹ irherẹn vẹ ihwo ri Livae koko.

³Ihwo ri Livae ri te ikpe ọgban kpenu, e de kere ayen, ayen ejobi da dia uriori ọgban gbẹ ẹrenre.

⁴Uriori uje gbẹ ẹne rẹ enana, Devid tare nẹ, e vwẹ ẹro te iruo rẹ uwevwi rẹ Ọrovwohwo na, uriori esan re dia ihwo ri suẹn vẹ iguẹdjọ.

⁵Uriori ẹne re hẹrhẹ vwẹ inurhoro, uriori ẹne re vwẹ akpata so ejiro kẹ Ọrovwohwo.

⁶Devid da ghare ayen ẹkuẹko re vẹ emọ ri Livae she phihọ: Gẹshọm, Kohat, vi Merari.

⁷Emọ ri Gẹshọm eye Ladan kugbe Shimei.

⁸Emọ ri Ladan: Jehiẹl ọye olori, vi Zetam, kugbe Joẹl, erha.

⁹Emọ ri Shimei: Shelomot, Haziẹl, vi Haran, erha. Ẹnana ihwo ri vwo uyovwi vwẹ uwevwi rẹ esẹ rayen re se Ladan.

¹⁰Emọ ri Shimei: Jahat, Zina vi Jeush vẹ Beriah. Enana ẹne na eye emọ ri Shimei.

¹¹Jahat ọye olori, Zina kẹ ọrivẹ; ẹkẹvuọvo Jeush vi Beriah vwo emọ buebu-u, fiki rẹ ọtiọye ayen de hirhe phihọ uwevwi rẹ ọsẹ ọvo.

¹²Emọ ri Kohat: Amram, Izhar, Hibrọn vẹ Uzziẹl, ẹne.

¹³Emọ rẹ Amram: Erọn vi Mosis. E phi Erọn phihọ akakọ ro vwo ru emu re ma fon, rere te ọye vẹ emọ rọye vwọ torhẹ incẹns vwẹ obaro rẹ Ọrovwohwo bẹdẹ; re ayen gbe odibo nẹ ẹrhovwo kẹ ihwo vwẹ odẹ rọye bẹdẹ.

¹⁴Ẹkẹvuọvo emọ ri Mosis rẹ ohwo rẹ Ọghẹnẹ na e de phi ayen phihọ uvwiẹ rẹ Livae.

¹⁵Emọ ri Mosis: Gẹshọm vẹ Eliẹza.

¹⁶Emọ ri Gẹshọm: Shebuẹl ọye olori.

¹⁷Emọ rẹ Eliẹza: Rehabiah ọye olori: Eliẹza vwo ọmọ ọfa-a, ẹkẹvuọvo emọ ri Rehabiah buru gangan.

¹⁸Emọ rẹ Izhar: Shelomit ọye olori.

¹⁹Emọ rẹ Hibrọn: Jeriah ọye olori, Amariah ọrivẹ, Jahaziẹl ọrerha vi Jekameam ọrẹne.

²⁰Emọ rẹ Uziẹl: Mikah ọye olori vẹ Isshiah ọrivẹ.

²¹Emọ ri Merari: Mahli vi Mushi Emọ ri Mahli: Eleaza vi Kish.

²²Eleaza de ghwu o vwo emeshare-e ẹkẹvuọvo emetẹ ọvo: imoni rayen, emọ ri Kish, da rọvwọ ayen.

²³Emọ ri Mushi: Mahli, Eda, vi Jeremọt, erha.

²⁴Enana emọ ri Livae vwẹ ẹbẹre rẹ esẹ rayen, ilori rẹ uwevwi rẹ esẹ kirobo re si ayen phihọ otọ odẹ rẹ ohwo ọvuọvo nẹ ikpe uje kpenu ihwo ri ru iruo vwẹ uwevwi rẹ Ọrovwohwo na.

²⁵Kidie Devid tare, Ọrovwohwo rẹ Ọghẹnẹ rẹ Izrẹl vwẹ ufuoma kẹ ihwo rọye: kọ dia Jerusalẹm bẹdẹ.

²⁶Ihwo ri Livae na gbi rhe mu ọgarivi na-a yẹrẹ ekuakua rẹ ẹga rọye-e —

²⁷kidie ota rẹ ọkoba ri Devid tare na nẹ ihwo ri Livae dia ihwo rẹ ukpe uje kpenu.

²⁸Ẹkẹvuọvo iruo rayen kẹ ayen vwẹ ọchuko kẹ emọ rẹ Erọn vwẹ iruo rẹ uwevwi rẹ Ọrovwohwo na, re vwẹ ẹro te ọguan vẹ ivun na, orufuọn rẹ emu ejobi re fonro, kugbe kiruo kiruo rẹ ẹga rẹ uwevwi rẹ Ọghẹnẹ na.

²⁹Ayen ke je chuko vwẹ ẹgharọ rẹ ikara ra vwọ nẹ, ọka ra nọre re vwo ze izobo rẹ ọka, vẹ ikara phẹghẹphẹghẹ rẹ ikara ro jephuo, izobo ra kakere kugbe izobo ra vwẹ ọfigbo gua, vẹ evwanvwọn ejobi vẹ obo rayen rho te.

³⁰Kẹ ayen mudia kirhiọke kirhiọke, kpẹvwẹ, jiri Ọrovwohwo na, ọtiọye je te ovwọnvwọn.

³¹Kọke kọke ra da torhẹ izobo vwọ kẹ Ọrovwohwo vwẹ ẹdidjala, otuphro rẹ emeranvwe ẹdorẹ, kerẹ ọtiobo ra guọnọre vwẹ obọ rayen kẹdẹ kẹdẹ vwẹ obaro rẹ Ọrovwohwo.

³²Enẹ ayen vwẹ erọ te utughẹ ra da vwa oma na vẹ asan ọfuanfon na, kẹ ayen ga emọ rẹ Erọn imoni rayen, fiki rẹ ẹga rẹ uwevwi rẹ Ọrovwohwo na.