Read urhobo 1 Ikun rẹ Ivie 27 Bible Online

1 Ikun rẹ Ivie 27 - urhobo bible

1 Ikun rẹ Ivie 27

¹Ọnana ọbe re si ihwo rẹ Izrẹl phihọ, ihwo ri vwo uyovwi vwẹ iwevwi rẹ esẹ na, inotu rẹ uriori vẹ ujori, kugbe iruiruo re ga ovie vwẹ eta rẹ ẹgharọ rẹ iruo re yancha vẹ e re yankpo, vwẹ emeranvwe kemeranvwe vwẹ ukpe na ejobi, ogharọ ẹkuọvo da uriori uje gbẹ ẹne.

²Jashobim rẹ ọmọ ri Zabdiẹl ọye hẹ enu ogharọ rẹ ẹsosuọ; vwẹ emeranvwe rẹ ẹsosuọ vwẹ evun rẹ ogharọ rọye da dia ihwo uriori uje gbẹ ẹne.

³O de nẹ uvwiẹ ri Pẹrẹz rhe, ọye olori rẹ inotu rẹ unuofovwi na emeranvwe rẹ ẹsosuọ na.

⁴Dodai ohwo rẹ Aho ọye vwẹ ẹro te ogharọ na vwẹ emeranvwe rivẹ: vwẹ ogharọ rọye ihwo uriori uje gbe ẹne.

⁵Onotu rerha, vwẹ emeranvwe rerha, ọye Benayah, ọmọ ri Jehoyada rẹ orherẹn, ọye olori vwẹ ogharọ rọye ihwo uriori uje gbẹ ẹne o vwori.

⁶Ọnana Benayah rẹ ọgba rode na vwẹ usun rẹ eshare ọgban na, ọye ri suẹn ayen. Amizabad rẹ ọmọ rọye ọye ri suẹn ogharọ rọye.

⁷Asahẹl rẹ omomi ri Joab ọye ọrẹne, vwẹ emeranvwe rẹne, ọmọ rọye Zehadia ọye vwọ kpahọ; vwẹ ogharọ rọye ihwo uriori uje gbẹ ẹne.

⁸Olotu riyori, vwẹ emeranvwe riyori ọye Shamhut, rẹ ihwo rẹ Izrah, vwẹ ogharọ rọye ihwo uriori uje gbẹ ẹne.

⁹Ọresan, vwẹ emeranvwe resan, ọye Ira, ọmọ rẹ Ikẹsh rẹ ohwo ri Tekọ; vwẹ ogharọ rọye uriori uje gbẹ ẹne.

¹⁰Ọrighwrẹ, vwẹ emeranvwe righwrẹ, ọye Hẹlẹz rẹ ohwo ri Pẹlọn, vwẹ emọ rẹ Ifrem; vwẹ ogharọ rọye ihwo uriori uje gbẹ ẹne.

¹¹Ọrẹrenre, vwẹ emeranvwe rẹrenre, ọye Sibbika rẹ ohwo rẹ Hushat, ohwo ri Zerata vwẹ ogharọ rọye uriori uje gbẹ ẹne.

¹²Ọrirhiri, vwẹ emeranvwe rirhiri, ọye Abieza ri Anatọt, ri Benjamin; vwẹ ogharọ rọye, uriori uje gbẹ ẹne.

¹³Ọrihwe vwẹ emeranvwe rihwe, ọye Maharai, ri Netofah, ri Zerat, vwẹ ogharọ rọye, uriori uje gbẹ ẹne.

¹⁴Ọruhwọvo, vwẹ emeranvwe ruhwọvo, ọye Benaya ri Paratọn, rẹ emọ rẹ Ifrem; vwẹ ogharọ rọye ihwo uriori uje gbẹ ẹne.

¹⁵Ọrihwivẹ, vwẹ emeranvwe rihwivẹ, ọye Heldai ri Netofat, rẹ Otniẹl vwẹ ogharọ rọye, ihwo uriori uje gbẹ ẹne.

¹⁶Vwẹ enu rẹ orua rẹ Izrẹl, vwọ kẹ emọ ri Rubẹn Elieza rẹ ọmọ ri Zikri ọye olori; kẹ emọ ri Simiọn, Shifatiah rẹ ọmọ ri Maka;

¹⁷vwọ kẹ emọ ri Livae Hashabiah rẹ ọmo ri Kemuẹl; vwọ kẹ emọ ri Erọn, Zadọk;

¹⁸vwọ kẹ Juda, Elihu, ọvo vwẹ iniọvo ri Devid; vwọ kẹ Issaka, Omri rẹ ọmọ ri Malkẹl,

¹⁹vwọ kẹ Zebulọn, Ishamayah ọmọ rẹ Obadiah; vwọ kẹ Naftali, Jerimot ọmọ rẹ Azriẹl;

²⁰vwọ kẹ emọ rẹ Ifrem Hoshea rẹ ọmọ rẹ Azaziah; vwọ kẹ ubro rẹ orua ri Manasse, Joẹl ọmọ rẹ Pidayah;

²¹vwọ kẹ ubro ri Manasse vwi Gilead, Ido ọmọ ri Zakarayah; vwọ kẹ Benjamin Jasiẹl, ọmọ rẹ Abna;

²²vwọ kẹ Dan, Azarẹl rẹ ọmọ ri Jeroham. Enana eye isun vwẹ orua rẹ Izrẹl.

²³Devid kere ihwo ri te ikpe uje-e, fikiridie Ọrovwohwo veri nẹ ọye ru Izrẹl bu kerẹ isio re hẹ obenu.

²⁴Joab rẹ ọmọ ri Zeruiah de mu ekere phihọ, je o kere re-e; jẹ ẹkẹvuọvo ophu da rhe enu rẹ ihwo rẹ Izrẹl fiki rẹ ọnana, je e rhe sio phihọ ẹbe rẹ ikun rẹ ovie Devidi-i.

²⁵Ohwo rẹ ọ vwẹ ẹro te uwevwi rẹ efe rẹ ovie ọye Azmavẹt ọmọ rẹ Adiẹl; vwẹ enu rẹ uwevwi rẹ efe re hẹ obo orho, vẹ orere, vwẹ ẹko kugbe uwevwi rẹ ohẹrhẹ, ọye Jonatan rẹ ọmọ rẹ Uziah.

²⁶Vwẹ enu rẹ ihwo ri ruiruo rẹ udju kugbe ihwo ri voro ivoro ọye Ezri ọmọ ri Chelub.

²⁷Ọ rọ vwẹ ẹro te ogba ri vain ọye Shimei rẹ ohwo ri Rama. Vwẹ enu rẹ emamọ ri vain rọ vwẹ ẹro tẹ ọgọdọ ri vain ọye Zahdi rẹ ohwo ri Shifim.

²⁸Vwẹ enu rẹ oliv vẹ irhe ri Sikamọ vwẹ obi Shifẹla ọye Bahanan ohwo ri Gederi. Ohwo rọ vwẹ ẹro te evwri ọye Joash.

²⁹Vwẹ enu rẹ uchuru re ria odi vwi Sharọn ọye Shitrai rẹ ohwo ri Sharọn; vwẹ enu rẹ uchuru vwẹ iyara na ọye Shafat ọmọ rẹ Adnai.

³⁰Vwẹ enu ri kamẹl ọye Obil ohwo rẹ Ishmaẹl; vwẹ enu rẹ ekẹtẹkẹtẹ ọye Jehdeiah rẹ ohwo ri Mẹronọt. Vwẹ enu rẹ igodẹ ọye Jaziz ohwo ri Hagar.

³¹Enana ejobi eye idibo re vwẹ ẹro te ekuakua ri Devid ovie.

³²Jonatan rẹ oniọvo rẹ ọsẹ ri Dẹvid, rẹ ọvwiroro rọye, ohwo ro vọnre vẹ erianriẹn kugbe osiẹbe; ọye kugbe Jehiel rẹ ọmọ ri Hakmoni vwẹ ẹro te emọ rẹ ovie.

³³Ahitofel ọye ọvwiroro rẹ ovie, Hushai rẹ ohwo rẹ Ak ke rha ugbeyan rẹ ovie.

³⁴Jehoiada rẹ ọmọ rẹ Benayah kugbe Ahiata da reyọ ẹdia rẹ Ahitofẹl. Joab kọye olotu rẹ unuofovwi rẹ ovie.