Read urhobo 1 Ikun rẹ Ivie 29 Bible Online

1 Ikun rẹ Ivie 29 - urhobo bible

1 Ikun rẹ Ivie 29

¹Ovie Devid da ta kẹ ọghwẹgbe na ejobi, Solomọn rẹ ọmọ mẹ, rẹ Ọghẹnẹ jẹreyọ, omotete o ruẹ o ji vwo ọhọ-ọ yẹ iruo na ọ rhuarho; ighẹn na dia ọ rẹ ohwo-o ẹkẹvuovo ọ rẹ Ọrovwohwo Ọghẹnẹ.

²Ke me kokọn rẹ uwevwi rẹ Ọghẹnẹ mẹ phihọ otọ, kirobo rẹ udu mẹ gbare, oro vwọ kẹ emu rẹ oro, idọnọ vwọ kẹ emu rẹ idọnọ, ẹrovwo vwọ kẹ emu rẹ ẹrovwo, utehru vwọ kẹ emu rẹ utehru, irhe vwọ kẹ emu rẹ urhe, kugbe emu efa buebu kerẹ ọniks vẹ eragha re vwo muẹ uwevwi viẹ, eragha ri lo, eragha re ghare kugbe mabol.

³Enana ejobi re me rhuẹrẹ phihọ otọ vwọ kẹ uwevwi ọfuanfon na, mi ji vwo efe rẹ obọ mẹ rẹ oro vẹ idọnọ re me ghwẹ koko fiki rẹ iroro ri mi vwo kẹ Ọghẹnẹ mẹ, me je vwẹ ayen vwọ kẹ uwevwi rẹ Ọghẹnẹ mẹ na.

⁴Talent uriori erha rẹ oro ro nẹ Ọphir rhe, kugbe uriori ighwrẹ ri talent rẹ idọnọ ra fare, re vwo ru ighẹhẹ rẹ uwevwi na.

⁵Je vwọ kẹ iruo rẹ ewena che ruẹ, vwọ kẹ iruo rẹ oro, idọnọ vwọ kẹ eravwọ rẹ idọnọ. Ono re sa kẹ vẹ omavwerhovwẹ, e jo ru oma rọye fon kẹ Ọrovwohwo nonẹ na?

⁶Ilori rẹ iwevwi rẹ esẹ na ejobi da kẹ ọke rẹ ivuavwerhe, etiọye ji isun rẹ orua na, inotu rẹ uriori vẹ e rẹ ujori, kugbe iruiruo rẹ iruo rẹ ovie.

⁷Ayen da kẹ ọke ne vwo ru iruo rẹ uwevwi rẹ Ọghẹnẹ na talent uriori iyori kugbe talẹnt uriori ihwe ri darik rẹ oro, talẹnt uriori ihwe rẹ idọnọ, talẹnt uriori ihwe gbẹ ẹrenre rẹ ẹrovwo kugbe talẹnt uriori iyori rẹ utehru.

⁸Kohwo kohwo ro vwo eragha eghaghare da vwọ rhe uwevwi rẹ efe rẹ Ọrovwohwo rẹ Jehiẹl ohwo ri Gershọn vwẹ ẹro te.

⁹Etiyin ihwo ejobi da ghọghọ fikiridie ihwo na ejobi kẹ oke rẹ ẹguọnọ ro nẹ udu rayen rhe kẹ Ọrovwohwo, Devid ovie na da ghọghọ gangan.

¹⁰Ọtiọye na Devid de bruphihọ kẹ Ọrovwohwo vwẹ irharo rẹ ọghwẹgbe na ejobi; Devid da ta, Ebruphihọ kẹ wẹ, E Ọrovwohwo, Ọghẹnẹ rẹ Izrẹl ọsẹ rẹ avwanre, rhiri bẹdẹ.

¹¹Wẹ, E Ọrovwohwo, vwo ọrho, kugbe ogangan, vẹ urinrin vẹ ephiokparobọ vẹ ẹgba; fikiridie emu rẹ obo odjuvwu vẹ akpọ ejobi ewẹn; Ọwẹn ọye uvie na E Ọrovwohwo, wẹ a kpare kpenu vwẹ enu ri kemu kemu ejobi.

¹²Te efe te ọghọ obọ wẹn inẹcha, wọwẹ ri suẹn ayen ejobi; obọ wẹn ẹgba vẹ ogangan epha; obọ wẹn ri ruẹ ohwo rhua ọye je vwẹ ogangan kẹ ihwo ejobi.

¹³Asakiephana ma kpẹvwẹ owẹ, Ọghẹnẹ rẹ avwanre, me jiri odẹ wẹn rẹ urinrin na.

¹⁴Ẹkẹvuọvo kono omẹvwẹ, kidie ihwo mẹ epha, re sa kẹ wẹ okẹ vẹ ivuavwerhe ọtiọna? Kidie emu na ejobi obọ wẹn inẹcha, e rẹ obọ wẹn ọvo na ma rhoma vwọ kẹ wẹ na.

¹⁵Kidie avwanre erhorha vwẹ obaro wẹ, avwanre ihwo re kua rhe, kirobo rẹ esẹ rẹ avwanre epha; ẹdẹ rẹ avwanre vwẹ akpọ na họhọ uhoho, rọ sa dia bẹdẹ-ẹ,

¹⁶Ẹ Ọrovwohwo Ọghẹnẹ rẹ avwanre, ekuakua nana buebu na rẹ avwanre vwọ rhe na vwọ bọn uwevwi kẹ odẹ wẹn rẹ ọfuanfon na, obọ wẹn inurhe, je vwẹ ewẹn.

¹⁷Me riẹnre Ọghẹnẹ mẹ, nẹ wẹwẹ re davwẹ udu nẹ, Wo vwo omavwerhe kpahe ọsoso; vwẹ ọsoso rẹ udu mẹ mi vwo siobọ nẹ ekuakua nana ejobi kẹ wẹ, vwẹ asakiephana me mrẹ ihwo wẹn, re gba vwẹ etine na, ri siobọ nu vẹ aghọghọ kẹ wẹ.

¹⁸E Ọrovwohwo, Ọghẹnẹ rẹ Ebraham, Aizik, kugbe Izrẹl, esẹ rẹ avwanre, phi iroro nana bẹdẹ phihọ udu rẹ ihwo wẹn re wọ gare udu rayen vi we.

¹⁹Vwọ kẹ Solomọn rẹ ọmọ mẹ rere ọ vwẹ udu rọye ejobi vwọ sẹro rẹ irhi wẹn, iseri wẹn, kugbe iji wẹn, rere o ru ayen, rere ọ vwọ bọn asan re me rhuẹrẹ ekuakua rọye phihọ otọ kẹ na.

²⁰Etiyin Devid da ta kẹ ọghwẹgbe na ejobi, Bruphihọ kẹ Ọrovwohwo rẹ Ọghẹnẹ wẹn. Ọghwẹgbe na ejobi de bruphihọ kẹ Ọrovwohwo na, Ọghẹnẹ rẹ esẹ rayen, ayen de gbe uyovwi rayen kpotọ; ayen da ga Ọrovwohwo na, ayen da vware ovie na.

²¹Ayen de ze izobo kẹ Ọrovwohwo, ẹdẹ rivẹ ayen de ze izobo rẹ ẹtorhẹ kẹ Ọrovwohwo, erhuẹn uriori, vẹ egbo uriori vẹ umuomuo rẹ igodẹ uriori, vẹ izobo rẹ udi rayen, kugbe izobo buebu vwọ kẹ Izrẹl ejobi;

²²ayen da re ayen da da vwẹ obaro rẹ Ọrovwohwo vwẹ ẹdẹ yena vẹ omavwerhe. Ayen da vwi Solomọn rẹ ọmọ ri Devid mu ovie vwẹ obọ rivẹ, ayen da vwẹ evwri ghworo uyovwi kerẹ ọmọ rẹ ovie kẹ Ọrovwohwo, Zadọk ke rha orherẹn.

²³Etiyin Solomọn de tidia enu rẹ ekete rẹ Ọrovwohwo kerẹ ovie vwẹ ẹdia rẹ ọsẹ rọye Devid; o de yovwi kẹ, Izrẹl ejobi da vwẹ ọghọ kẹ.

²⁴Isun na ejobi kugbe egba na ejobi, ji kugbe emọ rẹ Ovie Devid, de ve nẹ ayen vwẹ uyovwi kpotọ kẹ Ovie Solomọn.

²⁵Ọrovwohwo da vwẹ otitivwe kẹ Solomọn vwẹ obaro rẹ Izrẹl ejobi, ọ da vwẹ ọtioghẹre rẹ orhuarho ọtiọye vwọ kẹ uvie rọye ọtiọ ra je vwọ kẹ ovie ọfa vwẹ Izrẹl na dẹvo-o.

²⁶Ọtiọna kọye Devid rẹ ọmọ ri Jẹse rere vwẹ enu rẹ Izrẹl ejobi.

²⁷Ọke rọ rere vwẹ enu rẹ Izrẹl da dia ikpe ujuvẹ; ọ rere ikpe ighwrẹ vwi Hibrọn, ikpe ọgban vwi Jerusalẹm.

²⁸Etiyin o de ghwu ọ ghworo hẹnrẹhẹnrẹ, ọ mrẹ efe, ikpe buebu, vẹ ọghọ; Solomọn rẹ ọmọ rọye da re vwẹ ẹdia rọye.

²⁹Asakiephana, irueru rẹ ovie Devid, nẹ ẹsosuọ re duvwu oba, e si ayen phihọ ẹbe rẹ Ikun ri Samuẹl rẹ ọmraro na, kugbe evun rẹ Ikun ri Natan rẹ ọmraro na, vẹ Ikun ri Gad rẹ ọmraro na,

³⁰kugbe iyẹnrẹn rẹ isuesun rọye ejobi vẹ ẹgba rọye vẹ obo re phia kẹ kugbe Izrẹl, kugbe uvie ejobi rẹ orho rẹ riariẹ ayen phihọ.