Read urhobo 1 Ikun rẹ Ivie 5 Bible Online

1 Ikun rẹ Ivie 5 - urhobo bible

1 Ikun rẹ Ivie 5

¹Emọ ri Rubẹn rẹ ọmọkpako rẹ Izrẹl, (fikiridie ọye ọmọkpako; kidie o miovwi ehwa rẹ ọsẹ rọye ku, a da reyọ ọmọkpako rọye vwọ kẹ emọ ri Josẹf rẹ ọmọ rẹ Izrẹl fiki rẹ ọtiọye o gbi je kere phihọ orua rẹ ọmọkpako-o kirobo rẹ urhi rẹ ọmọkpako epha,

²owenẹ Juda hirhe ohwo ọgangan vwẹ ohri rẹ iniọvo rọye ọ dianẹ ovie nẹ oma rọye rhe, jẹ ogangan rẹ ọmọkpako ọ ri Josẹf).

³Emọ ri Rubẹn rẹ ọmọkpako rẹ Izrẹl: Ọye Hanọk, Pallu, Bẹzrọn kugbe Carmi.

⁴Emọ ri Joẹl: Shemaya rẹ ọmọ rọye. Gọg rẹ ọmọ rọye, Shemei rẹ ọmọ rọye,

⁵Mikah rẹ ọmọ rọye, Reayah rẹ ọmọ rọye, Baal rẹ ọmọ rọye.

⁶Beerah rẹ ọmọ rọye, ri Tilgatpilnesar, ovie rẹ Assyria muru: Ọye ọhọnvwọre rẹ orua ri Rubẹn.

⁷Ji kugbe imoni rọye vwẹ oruorua rayen: vwẹ ọke re de kere uvwiẹ rẹ orua rayen: Ọhọnvwọre, Jeiel, kugbe Zekaraya,

⁸kugbe Bela rẹ ọmọ rẹ Azaz, rẹ ọmọ ri Shema rẹ ọmọ ri Joẹl, rọ dia Aroer, rhiri re te Nebo kugbe Baalmeom.

⁹Ọ da dia obaro ọnre rhiri re duvwu asan ra wan ro aton na vwẹ ẹbẹre obonẹ ri Yufretis fikiridie erhuẹn rayen rhi buphihọ vwẹ otọ ri Giliad.

¹⁰Vwẹ ọke ri Saul ayen da vwẹ ofovwi so ihwo ri Hag, ayen de hwe ayen; ayen da dia itughẹ rayen vwẹ ẹbẹre rẹ obaro ọnre ri Giliad.

¹¹Emọ ri Gad da de vwọ so ayen vwẹ otọ ri Bashan rhiri re te Salekah:

¹²Joẹl kẹ ọhọnvwọre, Shafam kẹ ọrivẹ, Janal kugbe Shafat vwi Bashan.

¹³Imoni rayen vwẹ uwuwevwi rẹ esẹ rayen: Maikẹl, Meshullam Sheba, Jorai, Jakan, Zia, kugbe Eber, ighwrẹ.

¹⁴Enana emọ rẹ emeshare rẹ Abihail ọmọ ri Huri, rẹ ọmọ ri Jaroah, ọmọ ri Gilead rẹ ọmọ ri Maikẹl, ọmọ ri Jeshishai, rẹ ọmọ ri Jahdo, rẹ ọmọ ri Buz:

¹⁵Ahi rẹ ọmọ rẹ Abdiẹl, rẹ ọmọ ri Guni, ọye ọmọ rọ ma rho vwẹ uwevwi rẹ esẹ rayen.

¹⁶Ayen da dia Gilead, vwi Bashan kugbe irho rọye ejobi, kugbe etọ rẹ egbri vwi Sharọn re te ughwru rayen.

¹⁷Enana ejobi e si phihọ otọ uvwuvwiẹ vwẹ ọke ri Jotam vwọ hẹ ovie vwi Juda, kugbe ọke ri Jeroboam rẹ ovie rẹ Izrẹl vwọ herọ.

¹⁸Emọ ri Rubẹn, emọ ri Gad kugbe ubro rẹ orua ri Manasse vwo ihwo ri yivwaro ri mu ọlọkọ vẹ ekpọfia, ayen ji se si umurhabọ, ewena rẹ ofovwi, ayen uriori ujuvẹ gbẹ ẹne kugbe ujori ighwrẹ kugbe ujorha re choma rẹ ofovwi.

¹⁹Ayen da vwẹ ofovwi so emọ ri Hag, Jetur, Nafish kugbe Nodab,

²⁰Ayen rhe vwọ mrẹ ọchuko kpahe ivwighrẹ rayen, emọ rẹ Hag kugbe ihwo re vẹ ayen gba hẹ obọ ejobi e de phi ayen phihọ ayen obọ, kidie ayen kperi se Ọghẹnẹ vwẹ ọke ofovwi na, o de nyo orẹ rayen fikiridie ayen vwẹ ẹro vwọ suọ.

²¹Ayen de mu eranvwe rayen kpo, uriori ujuvẹ gbẹ ihwe ri Karmẹl, uriori ujori ivẹ kugbe ujuvẹ gbẹ ihwe rẹ igegede, uriori ivẹ rẹ ekẹtẹkẹtẹ, uriori ujori rẹ ihwo re muru ekpokpọ.

²²Fikiridie ihwo buebu e hweri, kidie ofovwi na ọ rẹ Ọghẹnẹ. Ayen da dia ẹdia rayen bẹsiẹ e rhi vwo mu ayen kpo imu.

²³Ubro rẹ orua ri Manasse pha buebu ayen da dia otọ na: nẹ Bashan re te Baal-hetmọn, Senir, Ugbenu ri Hermọn.

²⁴Enana igbuyovwi vwẹ iwevwi rẹ esẹ rayen: Efer, Ishi, Eliẹl, Azriẹl, Jeremaya, Hodavia, kugbe Jahdiẹl, egba rẹ ofovwi, ihwo ri kperi usi, ihwo ride vwẹ uwevwi rẹ esẹ rayen,

²⁵Ẹkẹvuọvo ayen de gbe urhi rẹ Ọghẹnẹ rẹ esẹ rayen ku, ayen da gọ edjọ rẹ ihwo rẹ otọ na rẹ Ọghẹnẹ ghwọre nẹ obaro rayen na.

²⁶Etiyin Ọghẹnẹ rẹ Izrẹl da kpare ẹnwẹ ri Pul ovie rẹ Assiria re ji se Tilgatpilnesa ovie rẹ Assiria, o de mu ekru ri Rubẹn, Gad, ubro rẹ orua ri Manasse, ọ da vwẹ ayen rhe Halah, Habọr, Hara, kugbe urhie ri Gozan re te nonẹ.