Read urhobo 2 Ikun rẹ Ivie 1 Bible Online

2 Ikun rẹ Ivie 1 - urhobo bible

2 Ikun rẹ Ivie 1

¹Solomọn rẹ ọmọ ri Devid da nabọ rhuẹrẹ oma phihọ otọ vwẹ evun rẹ uvie rọye, Ọrovwohwo rẹ Ọghẹnẹ rọye vẹ ọye da herọ o de ruo rho gangan.

²Solomọn da ta ota kẹ Izrẹl ejobi, kẹ inotu rẹ uriori kugbe ujori, kẹ iguẹdjọ, kugbe isun na ejobi vwẹ Izrẹl, igbuyovwi rẹ iwevwi rẹ esẹ na.

³Solomọn, vẹ ọghwẹgbe rẹ ihwo re vẹ ọye gba herọ, da yanran kpo asan ro kpenu rọ hẹ Gibiọn; kidie utughẹ ra da vwa oma rẹ Ọghẹnẹ, ri Mosis odibo rẹ Ọrovwohwo bọnre vwẹ obo aghwa ọ hẹ etiyin.

⁴(Ẹkẹvuọvo Devid mu ekpeti rẹ Ọghẹnẹ nẹ Kiriat-jearim rhe kpo asan ri Devid rhuẹrẹ vwọ kẹ jovwo, kidie ọ bọn utughẹ vwọ kẹ vwi Jerusalẹm nure).

⁵Ọfa agbada rẹ ẹrovwo ri Bezalẹl rẹ ọmọ rẹ Uri, ọmọ ri Hur, ruru, ọ jẹ etiyin vwẹ obaro rẹ ọgarivi rẹ Ọrovwohwo na. Te Solomọn te ọghwẹgbe na da yanran kpo otọ eduo vwẹ obọ rẹ Ọrovwohwo.

⁶Etiyin Solomọn da yanran kpo obo agbada rẹ ẹrovwo rẹ Ọrovwohwo na, rọ hẹ obo utughẹ ra da vwa oma na, o de ze izobo uriori vwẹ enu rọye.

⁷Vwẹ ason yena Ọrovwohwo da vwẹ oma phia kẹ Solomọn, ọ da ta kẹ, Nọ ọbo mi ru kẹ wẹ.

⁸Solomọn da ta kẹ Ọghẹnẹ, Wo vwo ẹguọnọ ro jẹrhẹriẹ rode kẹ Devid rẹ ọsẹ mẹ, wọ da vwẹ ovwẹ ru ovie vwẹ asan ro nuru.

⁹E Ọrovwohwo Ọghẹnẹ, gbe ru ive ru wo ve kẹ Dẹvid rẹ ọsẹ mẹ gba vwẹ asakiephana, kidie wọ vwẹ ovwẹ mu ovie vwẹ enu rẹ ihwo re pha buebu kerẹ ibiekpẹn rẹ otọ na.

¹⁰Asakiephana gba kẹ vwẹ obọ vẹ ẹriẹn re mi vwo sun ayen, kidie kono ri se sun ihwo nana, re epha buebu na?

¹¹Ọghẹnẹ da kpahe kẹ Solomọn, Fiki rẹ obo rẹ ọnana vwọ udu wẹn na, wọ gbe rha nọ ekpẹn rẹ eyere, efe, ọghọ, eyẹ arhọ rẹ otu ri mu kpahe owẹ-ẹ, wọ je nọ ekpẹn rẹ otọnvwe-e, ẹkẹvuọvo wọ da nọ ekpẹn rẹ obọ vẹ ẹriẹn kẹ oma wẹn rere wo vwo sun ihwo mẹ re me vwẹ owẹ mu ovie kẹ,

¹²Te ọhọ te ẹriẹn me vwẹ ayen kẹ wẹ. Me je vwẹ efe kẹ wẹ rhe, eyere, kugbe ọghọ, ọ tiẹ oghẹre rẹ ivie re karo kẹ wẹ na se vwo-o, eyẹ e re cha vwọ kpahe owẹ-ẹ.

¹³Etiyin Solomọn de rhivwi nẹ asan ro kpenu vwi Gibiọn rhe, nẹ utughẹ ra da vwa oma na rhe Jerusalẹm. Ọ da re vwẹ enu rẹ Izrẹl.

¹⁴Solomọn da ghwẹ ekpẹrẹ vẹ ihwo re gua iyesi koko; o de vwo ekpẹrẹ uriori ihwẹne kugbe ihwo re gua iyesi uriori ihwivẹ, ọ da fan orere rẹ ekpẹrẹ kẹ ayen yẹ ekpuyovwi rẹ ovie dia Jerusalẹm.

¹⁵Ovie na de ru idọnọ vẹ oro kueku kerẹ ibieragha vwi Jerusalẹm, ọ de rhe ru igedu kueku kerẹ sikamọ ri Shẹfela

¹⁶Ijipt vi kue kẹ oboyi Solomọn dẹ iyesi nẹ cha, o vwo uchunu rẹ ineki rẹ ovie dẹ ayen mie Kuẹ.

¹⁷Ayen dẹ ekpẹrẹ ọvo shekẹl ujori esan rẹ idọno vwẹ Ijipt, iyesi ọvo ke rha shekẹl ujori ọvo gbẹ ujuvẹ gbe ihwe rẹ idọnọ; ke rha vwẹ ayen re rha shẹ ayen kẹ ivie ri Hẹt ejobi kugbe ivie ri Siria.