Read urhobo 2 Ikun rẹ Ivie 10 Bible Online

2 Ikun rẹ Ivie 10 - urhobo bible

2 Ikun rẹ Ivie 10

¹Rehoboam de kpo Shikẹm, kidie Izrẹl ejobi ra ghwẹ koko Shikẹm rere e vwo mu ovie.

²Ọke ri Jeroboam ọmọ ri Nebat vwo nyo (kidie obo Ijipt ọ epha jovwo, oboyi ọ djẹ ra re sioma nu kẹ Solomọn), etiyin Jeroboam de rhivwi nẹ Ijipt rhe.

³Ayen de ji ohwo re se; etiyin Jeroboam vẹ Izrẹl ejobi da rhe rhe ta kẹ Rehoboam,

⁴Ọsẹ wẹn kru oghwa ọhọhọhọ nyẹ avwanre. Asakiephana gbe ru oghwa na pharhe kugbe urhekpe ọhọhọ ro mu nyẹ avwanre na, avwanre ke ga wẹ.

⁵Ọ da ta kẹ ayen, We rhivwi rhe ẹdẹ rerha. Etiyin ihwo na da yanran.

⁶Etiyin Rehoboam da vwẹ iroro nẹ ekpako na, ihwo ri mudia cha ọsẹ rọye vwẹ ọke rọ vwọ hẹ akpọ, tanẹ, Mavọ wọ tanẹ Me kpahe kẹ ihwo nana?

⁷Ayen da ta kẹ, Ọ da dianẹ wo ni arodọvwẹ kẹ ihwo nana wo de phoraro kẹ ayen, wọ da kpahe ota esiri kẹ ayen, ayen ke dia idibo wẹn bẹdẹ.

⁸Ẹkẹvuọvo ọ da sen uchebro rẹ ekpako na vwọ kẹ, o de re nene imighene na jẹ iroro ihwo re vẹ ọye gba hẹ otu re yan nene na.

⁹Ọ da ta kẹ ayen, Die we rori nẹ me kpahe kẹ ihwo nana re ta kẹ vwẹ nẹ, Ru urhekpe rẹ ọsẹ wẹn mu kpahe avwanre na pharhe?

¹⁰Imighene re vẹ ọye gba ghwanre rhe na da ra kẹ, E nẹ wọ cha ta kẹ ihwo na re ta kẹ wẹ na nẹ, Ọsẹ wẹn mu urhekpe ọhọhọ nyẹ avwanre, ẹkẹvuọvo ku wo ruo pharhe kẹ avwanre; E nẹ wọ cha ta kẹ ihwo na re ta kẹ wẹ na nẹ, Ọsẹ wẹn mu urhekpe ọhọhọhọ nyẹ avwanre, ẹkẹvuọvo ku wo ruo pharhe kẹ avwanre; kẹnẹ wọ ta kẹ ayen, Urhiabọ rẹ ewaewae mẹ na che vwo ọkpa nọ otehu rẹ ọsẹ mẹ.

¹¹Asakiephana, rẹ ọsẹ mẹ vwo mu urhukpẹ ọhọhọhọ nyẹ ovwan na, ke me vwọ ba urhekpe na. Uphiaphẹ ọsẹ mẹ vwọ fa ovwan, ẹkẹvuọvo akpakpasimagha kọye me vwọ fa ovwan.

¹²Etiyin Jeroboam vẹ ihwo na ejobi de bru Rehoboam rhe vwẹ ẹdẹ re erha, kirobo rẹ ovie tare, We rhivwi rhe ẹdẹ rerha.

¹³Ovie na da kpahe ota waewae kẹ ayen, ọ da sen uchebro rẹ ekpako na,

¹⁴Ovie Rehoboam da kpahe kẹ ayen kirobo rẹ imighene na ta kẹ, tanẹ, Ọsẹ mẹ ru urhekpe rẹ ovwan họhọ, ẹkẹvuọvo me cha vwọ ba; uphiaphiẹ ọsẹ mẹ vwọ fa ovwan, ẹkẹvuọvo akpakpasimagha kọye me vwọ fa ovwan.

¹⁵Ọtiọye na ovie na gbe kerhọn rẹ ihwo na-a; fikiridie ọye obo rẹ Ọghẹnẹ ruru nẹ Ọrovwohwo ru ota rọye gba, ro wan unu rẹ Ahijah ri Shilo ta kpahe Jeroboam ọmọ ri Nebat.

¹⁶Ọke rẹ Izrẹl ejobi vwọ mrẹ nẹ ovie na gbe rha kerhọn rẹ aye-en, ihwo na da kpahe kẹ ovie na, Didi ẹkẹn ri te avwanre vwẹ oma ri Devid? Didi uku ri te avwanre vwẹ oma rẹ ọmọ ri Jẹssi. Dohwo duwevwi rọye ra, E Izrẹl Gbe sun uwevwi re obọ wẹn, Devid. Etiyin Izrẹl ejobi da vẹn kpo uwevwi rayen

¹⁷Ẹkẹvuọvo Rehoboam da re vwẹ enu rẹ ihwo rẹ Izrẹl re dia irere ri Juda.

¹⁸Etiyin Ovie Rehoboam de ji Hadotam, onotu rọ gba ihwo vwo ru iruo, ihwo rẹ Izrẹl da vwẹ oragha phio hwe. Ovie Rehoboam de pho ro iyesi rọye kpata kpata, ọ da djẹ kpo Jerusalẹm.

¹⁹Kọye ihwo rẹ Izrẹl vwo mu kpahe uwevwi ri Devid rhi te nonẹ na.