Read urhobo 2 Ikun rẹ Ivie 11 Bible Online

2 Ikun rẹ Ivie 11 - urhobo bible

2 Ikun rẹ Ivie 11

¹Ọke ri Rehoboam rhi vwo te Jerusalẹm re, o de se uwevwi ri Juda koko, kugbe Bẹnjamin, egba ofovwi uriori ujori kugbe ujọne, rere e ra họnre Izrẹl, rere a reyọ uvie na rhivwi rhe Rehoboam.

²Ẹkẹvuọvo ota rẹ Ọrovwohwo de bru Shemaiya rẹ ohwo rẹ Ọghẹnẹ rhe tanẹ.

³Ta kẹ Rehoboam ọmọ ri Solomọn ovie ri Juda, kugbe Izrẹl ri Juda vi Bẹnjamin,

⁴Enẹ Ọrovwohwo tare, Wọ ra-a eyẹ wọ ra họnre imoni wẹ-ẹn. Dohwo duwevwi rọye ra, kidie emu nana obọ mẹ o nurhe. Etiyin ayen de nyo ota rẹ Ọrovwohwo na, ayen de rhivwi ayen gbe họnre Jeroboam ọfa-a.

⁵Rehoboam da dia Jerusalẹm, ọ da bọn irere ra gba ogba phihọ vwi Juda.

⁶Ọ da bọn Bẹtlẹhẹm, Etam, Tekoa,

⁷Bẹtzọ, Sọkọ, Adullam,

⁸Gat, Maresha, Ziph,

⁹Adoraim, Lakish, Azeka,

¹⁰Zorah, Aijalọn, kugbe Hibrọn, irere ra gba ogba phihọ ri Juda kugbe Bẹnjamin.

¹¹Ọ da nabọ ru ogba na ga, o de phi isun phihọ ayen, kugbe ivun rẹ emuọre, evwri, vẹ udi.

¹²O de phi ekpọfia vẹ ibiri phihọ evun rẹ irere na, o de ru ayen gangan. Ọtiọye na Juda vi Bẹnjamin keye ri bru nene.

¹³Irherẹn vẹ ihwo ri Livae rẹ Izrẹl ejobi da ghwiẹ bro ra nẹ asan kasan rẹ ayen dia ejobi rhe.

¹⁴Kidie ihwo ri Livae da yan jẹ etọ rẹ ayen vwo kugbe obo rẹ ayen vwori ejobi vwo ayen da rhe Jerusalẹm, fikiridie Jeroboam vẹ emọ rọye djẹ ayen kufia nẹ ayen gbe dia irherẹn rẹ Ọrovwohwọ-o,

¹⁵Ọ da vwẹ irherẹn rọbọ rọye mu kẹ asan ri kpenu, vwọ kẹ ighoghori, kugbe irhuẹn ro duvwuru.

¹⁶Ihwo re vwẹ udu rayen kpahọ re guọnọ Ọrovwohwo Ọghẹnẹ rẹ Izrẹl de nene ayen nẹ orua rẹ Izrẹl ejobi rhe Jerusalẹm rhe ze izobo kẹ Ọrovwohwo, Ọghẹnẹ rẹ esẹ rayen.

¹⁷Ayen da rhe vwẹ ẹgba kẹ uvie ri Juda, vwẹ ikpe erha ayen da nẹrhẹ oma fu Rehoboam ọmọ ri Solomọn, kidie vwẹ ikpe erha na ayen da yan nene idjerhe ri Devid vi Solomọn.

¹⁸Rehoboam da reyọ aye re se Mahalat ọmọtẹ ri Jẹrimọt ọmọ ri Devid, kugbe Abihad omotẹ re Ehab ọmọ ri Jẹssi;

¹⁹O de vwiẹ emeshare kẹ, Jeush, Shemariah, vi Zaham.

²⁰Ọ da rha reyọ Maakah ọmọtẹ rẹ Absalọm vwọ kpahọ, o de vwiẹ Ahijah, Attai, Ziza, vi Shelọmit kẹ.

²¹Maakah ọmọtẹ rẹ Absalọm na kọye me je Rehoboam nọ eya vẹ esẹn ri chekọ (ọ reyọ eya ihwe gbe ẹrenre kugbe esẹn ujorha, o de rhe vwiẹ emeshare uje kugbe emetẹ ujorha);

²²Rehoboam da vwẹ Abijah ọmọ ri Maakah vwo ru olori rẹ isun vwẹ ohri rẹ imoni rọye, kidie ọ jẹ iroro nẹ ọye cha vwọ ma ovie.

²³Ọ da vwẹ ẹghwanre ruo, ọ da ghare emu rọye ẹvo phihọ otọ ri Juda vi Bẹnjamin, vwẹ evun rẹ irere ra gba ogba phihọ na; ọ da ghwẹ ekuakua buebu kẹ ayen, ọ ke rha vwẹ eya vwọ kẹ ayen.