Read urhobo 2 Ikun rẹ Ivie 16 Bible Online

2 Ikun rẹ Ivie 16 - urhobo bible

2 Ikun rẹ Ivie 16

¹Vwẹ ikpe ọgban gbe esan rẹ ẹriọ rẹ Asa, Baasha ovie rẹ Izrẹl da vwọ so Juda, ọ da bọn ramah, rere ọ vwọ sa sen kẹ ohwo ọvuọvo ro che bru Asa ovie ri Juda ra.

²Etiyin Asa da reyọ idọnọ vẹ oro nẹ uwevwi rẹ efe rẹ Ọrovwohwo na rhe kugbe uwevwi rẹ ovie na, ọ da vwẹ ayen rhe Bẹnhadad ovie ri Siria, rọ dia Damaskọs, tanẹ,

³Gbe jẹn uvwe vẹ owẹ dia obo, kirobo rẹ ọsẹ mẹ vẹ ọsẹ wẹn ruru, nighere, me vwẹ ọko rẹ idọnọ vẹ oro vwo rhe we; yanran, rere wọ ra fan obọ re wọ vẹ Bashan ovie rẹ Izrẹl epha kufia, rere o vwo bi nẹ uvwe oma.

⁴Bẹnhadad de ghine nyo ota rẹ Asa ovie, o de ji inotu rẹ unuofovwi rọye kpo irere rẹ Izrẹl, ayen da kua Ijọn, Dan, Ahẹl-malm, kugbe irere rẹ uwevwi rẹ enu ri Naftali.

⁵Ọke ri Baasha vwo nyo, ọ da da obọ rẹ ebabọn ri Ramah ji, iruo na de ghwe mudje.

⁶Etiyin Ovie Asa da reyọ Juda ejobi, ayen da ghwẹ eragha ri Ramah ejobi reyọ kugbe irhe rọye, ra vwọ bọn Baasha jovwo na, kẹ eye a ra vwọ bọn Geba ri Mizpah.

⁷Vwẹ ọke yena Hanani rọ ọmrẹ na de bru Asa ovie ri Juda rhe, ọ da ta kẹ, Fikiridie wọ vwẹ ẹro so ovie ri Siria, wọ gbe rha vwẹ ẹro so Ọrovwohwo Ọghẹnẹ wẹ-ẹn, unuofovwi rẹ ovie ri Siria va wẹ abọ djẹ nure.

⁸Ihwo rẹ Itiopia vi Libya rhe vwo unuofovwi rhuarho gangan vẹ ekpẹrẹ buebu kugbe ihwo rẹ gua iyesi? Fiki rẹ obo wọ vwọ vwẹ ẹro so Ọrovwohwo na, o de phi ayen phihọ obọ wẹn.

⁹Kidie ẹro rẹ Ọrovwohwo djuẹ kpenẹ kpenẹ wan akpọ na ejobi, ro vwo dje ẹgba rọye kpahe ihwo rẹ udu rọye fon kpahọ. Wo ru emu ẹkpa vwẹ Ọnana, kẹ etinẹ yanran ku wọ cha mrẹ ofovwi phi.

¹⁰Etiyin ivun rẹ ọmrẹ na de miovwi Asa, ọ da vwẹ igoni karọ phihọ evun rẹ uwodi, fikiridie ivun miovwiro fiki rẹ ọnana. Asa da djoma brabra kpahe ihwo na ẹvo vwẹ ọke nana ọvuọvo na.

¹¹Eyere rẹ Asa, nẹ ẹsosuọ re te oba, e si ayen phihọ Ọbe rẹ Ivie ri Juda kugbe Izrẹl.

¹²Vwẹ ikpe ọgban gbi irhiri rẹ ẹriọ rẹ Asa emiavwe de mu awọ rọye, emiavwe na da rhe gan gangan; yẹ evun rẹ emiavwe na dede o duotọ rọye vwẹ obọ rẹ Ọrovwohwo-o, ẹkẹvuọvo ẹbo kọye ọ djẹ bru ra.

¹³Asa da vwerhẹ kugbe esẹ rọye, o de ghwu vwẹ ikpe ujuvẹ gbe ọvo rẹ ẹriọ rọye.

¹⁴Ayen de sho phihọ ushi rọ tọn kẹ oma rọye vwẹ evun rẹ orere ri Devid. Ayen de muo phihọ okọ ra ghwẹ egẹn ri gbo ọnrhe dohwo doka, e de koko ogiderhanre vwo mu ọghọ kẹ.