Read urhobo 2 Ikun rẹ Ivie 17 Bible Online

2 Ikun rẹ Ivie 17 - urhobo bible

2 Ikun rẹ Ivie 17

¹Jehoshafat rẹ ọmọ rọye da re vwẹ ẹdia rọye, ọ da cha oma gangan hẹrhẹ Izrẹl.

²Ọ de phi unuofovwi phihọ irere ri Juda ra gba ogba riariẹ, o de phi unuofovwi buebu phihọ otọ ri Juda, kugbe irere rẹ Ifrem rẹ Asa rẹ ọsẹ rọye reyọre jovwo.

³Ọrovwohwo vi Jehoshafat da herọ, fikiridie ọ ka yan phihọ idjerhe rẹ ọsẹ rọye rẹ ẹsosuọ; o re duotọ rẹ emu ọvuọvo vwẹ obọ ri Baal na-a.

⁴Ẹkẹvuọvo ọ da guọnọ Ọrovwohwo rẹ ọsẹ rọye, ọ da yan nene irhi rọye, o gbi rhe nene idjerhe rẹ Izrẹli-i.

⁵Fiki rẹ ọtiọye na Ọrovwohwo de ru uvie rọye na ghwaotọ vwẹ obọ rọye; Juda ejobi da ghwẹ ẹga rhe Jehoshafat; o de rhi fe efe rode vẹ ọghọ.

⁶Udu rọye da vọn vẹ arueyivwo vwẹ idjerhe rẹ Ọrovwohwo na; ọ rọ marho o de si asan ri kpenu na ejobi vẹ ighriki nẹ otọ ri Juda.

⁷Vwẹ ukpe rẹ erha rẹ ẹriọ rọye o de ji isun rọye, Bẹnhail, Obadiah, Zehadia, Asahel, Shemiramọt, ni re yono vwẹ irere ri Juda;

⁸Ihwo ri Livae na je vwọ ba ayen, Shemaiya, Netania, Zehadia, Asahel, Shemiramọt, Jehonatan, Adonija, Tohija, kugbe Tobadonija; Ẹlishama vi Jehoram irherẹn na da vwọ ba ihwo ri Livae na.

⁹Ayen de yono vwi Juda, yẹ ọbe rẹ urhi rẹ Ọrovwohwo na rhe ayen; ayen da yan nẹ orere kpo orere ri Juda ejobi ayen de yono vwẹ ohri rẹ ihwo na.

¹⁰Oshọ rẹ Ọrovwohwo de rhi mu uvie rẹ otọ na re riariẹ Juda phihọ na, ayen gbe rha vwẹ ofovwi so Jehoshafati-i.

¹¹Ihwo ri Filistia ẹvo da phare eko rhe Jehoshafat, ẹvo da vwẹ idọnọ ga ẹga rhe; ihwo rẹ Arebia da vwẹ egbo uriori ighwrẹ kugbe ujori ighwrẹ vwo rhe kugbe ẹkpro ujori ighwrẹ.

¹²Jehoshafat ememerha ọ da rhe rho. Ọ da bọn uwevwi rẹ ohẹrhẹ phihọ Juda kugbe irere ra ghwẹ emu phihọ,

¹³O de vwo evun buebu vwẹ irere ri Juda. Ọ vwo otuofovwi, egba ri yivwaro, vwi Jerusalẹm.

¹⁴Ọnana kọye re ghwẹ koko vwẹ uwuwevwi rẹ esẹ na; Vwẹ ọ ri Juda osun rẹ uriori; Adna rẹ osun na, ọ vẹ ihwo uriori ujori erha ri yivwaro,

¹⁵Ọ rọ vwọ kpahọ Jehohanan rẹ osun na, vẹ uriori ujori ivẹ gbe ujọne,

¹⁶Ọ rọ rha vwọ kpahọ kẹ Amasia ọmọ ri Zikri, ohwo rọ sa oma phia kẹ ẹga rẹ Ọrovwohwo ọ vẹ ihwo uriori ujori ivẹ ri yivwaro.

¹⁷Vwẹ ọ ri Bẹnjamin; Eliada, ọgba ro yivwaro, ọ vẹ ihwo uriori ujori ivẹ ri muẹ okọlọ vẹ umurhabọ,

¹⁸Ọ rọ vwọ kpahọ ki Jehozabad vẹ ihwo uriori ujori gbe ujọne re choma hẹrhẹ ofovwi.

¹⁹Enana ejobi na kẹ ẹga rẹ ovie na ayen epha, je vwọ ba ihwo rẹ ovie phi phihọ irere ra gba ogba riariẹ rẹ hẹ otọ ri Juda ejobi.