Read urhobo 2 Ikun rẹ Ivie 18 Bible Online

2 Ikun rẹ Ivie 18 - urhobo bible

2 Ikun rẹ Ivie 18

¹Asakiephana Jehoshafat kẹ ọdafe rode o ki ji vwo ọghọ; ọ vẹ Ehab da vwi fiki rẹ orọvwe kuomagbe.

²Ikpe evo vwọ wan nu o de kpo Sameria bru Ehab. Ehab de hwe igegede buebu kugbe irhuẹn kẹ kugbe ihwo ri nenire, ọ da riẹriẹ nẹ ọ ra vwọ so Ramot-gilead.

³Ehab ovie rẹ Izrẹl da ta kẹ Jehoshafat ovie ri Juda. Wo se nene uvwe kpo Ramot-gilead? Ọ da kpahe, Me epha kirobo re wọ epha, ihwo mẹ kirobo re ihwo wẹn epha. Avwanre vẹ owẹ kpo ofovwi na.

⁴Jehoshafat da ta kẹ ovie rẹ Izrẹl, E ke re duotọ rẹ ota na vwẹ obọ rẹ Ọrovwohwo tavwe.

⁵Etiyin ovie rẹ Izrẹl de se emraro na koko, ihwo ujori ẹne, ọ da ta kẹ ayen, Avwanre rẹ phi Ramot-gilead, eyẹ e jovwo? Ayen da ta, Wa yanran; kidie Ọghẹnẹ che phio phihọ obọ rẹ ovie na.

⁶Ẹkẹvuọvo Jehoshafat da ta, Ọmraro rẹ Ọrovwohwo ọfa rha etinẹ ro se duotọ rọye kẹ avwanre?

⁷Ovie rẹ Izrẹl da ta kẹ Jehoshafat, ohwo ọvo je herọ ro ji se duotọ rẹ Ọrovwohwo vwẹ obọ rọye, Maikaiya ọmọ rẹ Imla, ẹkẹvuọvo o tu vwe oma, kidie ọ mraro esiri kpahe ovwẹ-ẹ, ẹkẹvuọvo umwumwemwu ọ mrẹ. Jehoshafat da ta, E jẹn ovie ta ọtiọye-e.

⁸Etiyin ovie rẹ Izrẹl de se onotn ọvo ọ da ta, Ra reyọ Maikaiya rẹ ọmọ rẹ Imla rhe phẹrẹkpẹ.

⁹Asakiephana ovie rẹ Izrẹl vi Jehoshafat ovie ri Juda tidia vwẹ enu rẹ ekete rayen, i ku edagba rayen phihọ, ayen tidia vwẹ utuwevwi re de wuye ọka rọ hẹ ughere rayen unurhoro ri Sameria; yẹ emraro na ejobi ra mraro vwẹ obaro rẹ ayen.

¹⁰Zẹdikaya ọmọ ri Chenaanah da kare ighoro rẹ utehru kẹ oma rọye, ọ da ta, E nẹ Ọrovwohwo tare, Enana na wo che vwo dje ihwo ri Siria bẹsiẹ ra vwọ ghwọrọ ayen.

¹¹Emraro na ejobi da mraro ọtiọye, ayen da ta, Yanran kpo Ramot-gilead re phio kparobọ; Ọrovwohwo che phio phihọ obọ rẹ ovie.

¹²Ikọn ro re se Maikaiya na da ta kẹ, Nighere, eta rẹ emraro na ejobi unuọvo yoyovwi kẹ ovie na; gbe jẹn ota wẹn je họhọ ọ rẹ ayen, rọ je dia yoyovwi rhe.

¹³Ẹkẹvuọvo Maikaiya da ta, kirobo rẹ Ọrovwohwo herọ na, obo rẹ Ọghẹnẹ mẹ tare, ẹye me cha ta.

¹⁴Ọke ro rhi vwo te asan rẹ ovie na epha, ovie na da ta kẹ, Maikaiya, avwanre kpo Ramot-gilead kpo ofovwi, eyẹ a ra-a? Ọ da kpahe, Yanran we phi kparobọ; e phi ayen phihọ obọ wẹn.

¹⁵Ẹkẹvuọvo ovie na da ta kẹ, Bro abọ me ta kẹ wẹ nẹ wọ ta emuọfa-a jokpa rẹ uyota ọvo ro nẹ obọ rẹ Ọrovwohwo rhe?

¹⁶Ọ da ta, Me mrẹ Izrẹl ejobi re hrabọ nene enu rẹ ugbenu na, kerẹ igegede ri vwo osu-un; Ọrovwohwo da ta, Enana vwo onini-i, jẹn dohwo duwevwi rọye ra vwe ufuoma.

¹⁷Ovie rẹ Izrẹl da ta kẹ Jehoshafat, Me ta kẹ wẹ nẹ ọ mraro oyoyovwi kpahe ovwẹ-ẹ, ẹkẹvuọvo umwemwu?

¹⁸Makaiya da ta, Fiki rẹ ọtiọye na gbe nyo ota rẹ Ọrovwohwo na; me mrẹ Ọrovwohwo na ro tidia vwẹ enu rẹ ekete rọye, otu rẹ obo odjuvwu na ejobi de mudia vwẹ obọrhe rọye vẹ obọhwẹre rọye;

¹⁹Ọrovwohwo na da ta, ono re sa riẹriẹ Ehab ovie rẹ Izrẹl, rere ọ yanran re she vwi Ramot-gilead? Etiyin ọvo da ta unu ọvo, ọfa da rha ta unu ọfa.

²⁰Etiyin erhi ọvo da yanrhe rhi mudia obaro rẹ Ọrovwohwo na, tanẹ, Me phiẹn. Ọrovwohwo da ta kẹ, Vwẹ idjerhe vọ?

²¹Ọ da ta, Me yanran, re me ra dia erhi rẹ efian vwẹ unu rẹ emraro rọye. Ọ da ta, ku wọ phiẹn, wo me phiẹn she; yanran wo re ru ọtiọye.

²²Asakiephana gbe nighe, Ọrovwohwo phi erhi rẹ ophiẹnvwe phihọ unu rẹ emraro wẹn nana; Ọrovwohwo ta ota umwemwu kpahe owẹ.

²³Etiyin Zẹdekaiya ọmọ ri Chenaanah de rhi bi kẹrẹ ọ da ghwiẹ Maikaiya ọhwa, ọ da ta, Idjerhe vẹ Erhi rẹ Ọrovwohwo wan nẹ uvwe oma rhe ta ota kẹ vwẹ?

²⁴Maikaiya da ta, Nighe, wọ cha mrẹ vwẹ ẹdẹ yena ri wo de che si ro evun rẹ uvun re sioma wẹn nu.

²⁵Ovie rẹ Izrẹl da ta, Shabo họ Maikaiya, re wo muo rhe Amọn osun rẹ orere na kugbe Joash rẹ ọmọ rẹ ovie;

²⁶re wọ ta, Phi ohwo nana phihọ uwodi, re wọ vwẹ imikara fighọ fighọ vwọ ghẹrẹ vẹ ame, bẹsiẹ mi vwo rhivwi rhe vwẹ ufuoma.

²⁷Maikaiya da ta, Wo de se rhivwi rhe vwẹ ufuoma, yẹ Ọrovwohwo rha ghene ta ota kẹ vwẹ-ẹ. Ọ da ta, Nyo, ovwan ihwo ejobi.

²⁸Ọtiọye ovie rẹ Izrẹl kugbe Jehoshafat ovie ri Juda da yanran kpo Ramat-gilead.

²⁹Ovie rẹ Izrẹl da ta kẹ Jehoshafat Mi wenoma ri mi kpo ofovwi na, ẹkẹvuọvo ku edagba wẹn phihọ. Ovie rẹ Izrẹl de wenoma rọye o de kpo ofovwi na.

³⁰Asakiephana ovie ri Siria nabọ ji iji kẹ inotu rẹ ekpẹrẹ rọye, we nene ohwo rode eyẹ otete honra-a, ẹkẹvuọvo ovie rẹ Izrẹl na ọvo.

³¹Ọke rẹ inotu rẹ ekpẹrẹ na vwọ mrẹ Jehoshafat, ayen da ta, ovie rẹ Izrẹl na ye. Etiyin ayen de hirhe aro rẹ ofovwi kuo; Jehoshafat de kperi phia, Ọrovwohwo da cha uko. Ọghẹnẹ de bi ayen no oma,

³²ọke rẹ inotu rẹ ekpẹrẹ na vwọ mrẹ nẹ ọ dia ovie rẹ Izrẹli-i, ayen gbe vwọ tua-a.

³³Ẹkẹvuọvo ọshare ọvo de di si umurhabọ rọye kerẹ eha, ọ de re shemu ovie rẹ Izrẹl vwẹ asan uphrophro rẹ evun rọye vẹ emekpo udu rọye; Etiyin ọ da ta kẹ ohwo rọ gua akpẹrẹ rọye, Rhoma, re wo mu vwe kpo nẹ ofovwi na, kidie a wan vwẹ oma.

³⁴Ofovwi na da rhe rhorho vwẹ ẹdẹ yena, ovie rẹ Izrẹl da de dẹdẹ oma vwẹ evun rẹ akpẹrẹ rọye hirhe aro ku ihwo ri Siria na re te ovwọnvwọn; rẹ ọnre vwo she nu o de ghwu.