Read urhobo 2 Ikun rẹ Ivie 2 Bible Online

2 Ikun rẹ Ivie 2 - urhobo bible

2 Ikun rẹ Ivie 2

¹Asakiephana Solomọn jẹ iroro rọ vwọ bon uwevwi kẹ odẹ rẹ Ọrovwohwo, kugbe uwevwi rẹ ovie kẹ oma rọye.

²Solomọn da vwẹ ihwo uriori ujorha gbẹ ihwe mu re ghwa oghwa kugbe ihwo uriori ujọne ri she eragha vwẹ obo orho rẹ ugbenu, ihwo uriori erha gbẹ ujori esan ke rha hẹ inotu ri suẹn ayen.

³Solomọn da vuẹ ovuẹ rhe Huram ovie ri Taya; Obo wọ vẹ Devid ọsẹ mẹ yeri te ru wo vwo she igẹdu rhe vwo bọn uwevwi kẹ oma rọye rọ dia na, gbe ji nene uvwe yeri ọtiọye.

⁴Nighe, mi re muegbe me vwọ bọn uwevwi kẹ odẹ rẹ Ọrovwohwo Ọghẹnẹ mẹ rere e ruo fon kẹ ẹtorhẹ ugboduma ri gbo ọnrhe ororo hwe, kugbe izobo re kọke kọke rẹ ikara ra vwọ nẹ, kugbe izobo rẹ ẹtorhẹ te irhiọke te ovwọnvwọn, vwẹ edidjana ve ọtuphro rẹ emeranvwe kugbe ẹdorẹ re bruru kẹ Ọrovwohwo Ọghẹnẹ rẹ avwanre, kirobo re vwiro mu bẹdẹ kẹ Izrẹl.

⁵Uwevwi na re me cha bọn na cha rho, kidie Ọghẹnẹ rẹ avwanre na ọ rhonọ ẹdjọ ejobi.

⁶Ẹkẹvuọvo kono re sa bọn uwevwi kẹ, yẹ odjuvwu tobọ odjuvwu ro me kpenu na, sa gba-a? Mẹvwẹ ono re me vwọ bọn uwevwi kẹ, jokpa rẹ amasan ra da torhẹ insẹns kẹ?

⁷Vwẹ ọtiọye na gba vwẹ owena rhe vwe ri se duvwu oro, idọnọ, ẹrovwo, utehru, kugbe i ri rhuo ifenudu, isene, kugbe emwa rẹ ọgiọgiọ, re yonori brona, ri nene ewena na dia re vẹ ovwẹ herọ vwi Juda kugbe Jerusalẹm, ri Devid ọsẹ mẹ vwori.

⁸Ji she igẹdu rhe vwe, owangha, kugbe uloho nẹ Lẹbanọn rhe, kidie me riẹnre nẹ idibo wẹn riẹn obo re she igẹdu vwi Lẹbanọn. Idibo mẹ ki che nene idibo wẹn dia,

⁹kare igẹdu na rere ayen rhuẹrẹ ayen kẹ vwẹ buebu, kidie uwevwi re me cha bọn na cha rho o ki rhe ji gbunu.

¹⁰Me cha kẹ idibo wẹn, ri che she irhe na, egbedi rẹ ọka re wuyeri uriori uje, oze rẹ udi uriori uje, oze rẹ evwri uriori uje.

¹¹Etiyin Huram ovie ri Taya da kpahe phihọ ọbe vwo rhe Solomọn, Fikiridie Ọrovwohwo guọnọ ihwo rọye ọye ọ vwọ owẹ mu ovie vwẹ enu rẹ ayen.

¹²Huram da rhoma ta, Ebruba kẹ Ọrovwohwo Ọghẹnẹ rẹ Izrẹl, rọ ma odjuvwu vẹ akpọ, rọ vwẹ ọmọ rọ ghwanre vwọ kẹ Ovie Devid ro vwo erhi rẹ evughe vẹ ẹruọ, rọ sa bọn uwevwi kẹ Ọrovwohwo, kugbe uwevwi rẹ ovie kẹ oma rọye.

¹³Asakiephana mi ji ọwena cha, ro vwo erianriẹn Huramabi,

¹⁴Ọmọ rẹ aye vwẹ usun rẹ emetẹ ri Dan, ọsẹ rọye kẹ ohwo ri Taya. E yoniro phihọ iruo rẹ oro, idọnọ, ẹrovwo, utehru, oragha, kugbe urhe, vwẹ emwa evwavware, ọgiọgiọ, kugbe emwa rẹ isene vẹ esada, ro ji se brona kona ejobi kugbe oghẹre re ekpakpẹnẹ re dje kẹ nẹ o ru, ọ vẹ ewena wẹn, ewena rẹ ọrovwovwe, rẹ Devid ọsẹ wẹn.

¹⁵Asakiephana eka re wuyeri na, evwri vẹ udi, rẹ ọrovwovwe tare na, e jo ghwẹ ayen rhe idibo rọye;

¹⁶avwanre ki she kurhe kurhe ru wọ guọnọre vwi Lẹbanọn, rere e phorho ayen wan urhie re fi Jọpa, rere wa dia etiyin da ghwa ayen kpo Jerusalẹm.

¹⁷Etiyin Solomọn de kere erhorha re hẹ otọ rẹ Izrẹl ejobi, yi Devid kere ihwo na nure; etiyin a da mrẹ ihwo uriori ujughwrẹ gbẹ ihwerha.

¹⁸Uriori ujorha gbẹ ihwe eye re ghwa oghwa, uriori ujọne eye ri she eragha vwẹ obo orho rẹ ugbenu, uriori erha kugbe ujori esan ke rha inotu re ghwọ ayen kpo iruo.