Read urhobo 2 Ikun rẹ Ivie 20 Bible Online

2 Ikun rẹ Ivie 20 - urhobo bible

2 Ikun rẹ Ivie 20

¹Rẹ Ọnana vwọ wan nu ihwo ri Moab vẹ Ammọn, kugbe ihwo ri Meu ẹvo re vwọ ba ayen, da kpare ofovwi vwọ so Jehoshafat.

²Ihwo ẹvo da rhe vuẹ Jehoshafat, urogho rode kpare ofovwi nẹ Idọm bru we cha, nẹ obo ovrẹn rẹ abadi; gbe, nighe ayen hẹ obi Hazazọtanar (kọye, Ẹngedi).

³Etiyin oshọ de mu Jehoshafat, ọ da ghwa fọkotọ rẹ duotọ rọye vwẹ obọ rẹ Ọrovwohwo, ọ de ghwoghwo nẹ Juda ejobi chiri owẹvwe.

⁴Juda da ghwẹ koko rhe guọnọ ọchuko vwẹ obọ rẹ Ọrovwohwo, ayen de nẹ irere ri Juda ejobi rhe rhi duotọ rọye vwẹ obọ rẹ Ọrovwohwo.

⁵Jehoshafat de mudia vwẹ ukoko ri Juda vi Jerusalẹm, vwẹ uwevwi rẹ Ọrovwohwo na, vwẹ obaro rẹ ọguan ekpokpọ na,

⁶Ọ da ta, E Ọrovwohwo, Ọghẹnẹ rẹ esẹ rẹ avwanre, ọ dia owẹ Ọghẹnẹ rọ hẹ obo odjuvwu-u? Ọ dia owẹ ri suẹn vwẹ enu rẹ ẹgborho na ejobi-i? Obọ wẹn ọye ogangan vẹ ẹgba epha, ọtiọye na ohwo gbe sa hẹrhẹ owẹ-ẹ.

⁷Ọ dia owẹ-ẹ, E Ọghẹnẹ rẹ avwanre, re djẹ ihwo re ka dia otọ nana no vwọ kẹ ihwo wẹn Izrẹli-i, wo de siobọ no bẹdẹ kẹ uvwiẹ rẹ Ebraham ugbeyan wẹn na?

⁸Ayen da dia rhabae rhe, ayen da rha bọn ọguan rẹ ẹshẹ phihọ vwọ kẹ odẹ wẹn.

⁹Ayen da ta, Ọ da dianẹ okpetu rhi she vwa avwanre, ọlọkọ, ẹdjọ eguo, eyẹ ọtiekọ, eyẹ owẹvwe, avwanre ki che mudia vwẹ uwevwi nana, rhe viẹ se we vwẹ ukpokpogho rẹ avwanre, ku wo nyo rere wo sivwi avwanre.

¹⁰Asakiephana gbe nighe, ihwo rẹ Ammọn vi Moab kugbe ugbenu ri Seir, ro wọ djẹ Izrẹl nẹ ayen phiẹ-ẹ vwẹ ọke rẹ ayen vwo nẹ otọ rẹ Ijipt cha, rẹ ayen kẹnẹ oma kẹ rẹ ayen guọghọre-e —

¹¹Nighe, osa rẹ ayen hwa kẹ avwanre kọye ẹcha nana rẹ ayen rhere rhe djẹ avwanre nẹ ughwẹ rẹ avwanre re wọ vwọ kẹ avwanre vwo reuku na.

¹²E Ọghẹnẹ re avwanre, wo rhe brorhiẹ hwe aye-en? Kidie avwanre vwo ogangan ro te urogho rode nana re kpare ohọnre bru avwanre cha na-a. Avwanre riẹn obo rẹ avwanre ru-u, ẹkẹvuọvo ẹro rẹ avwanre ri ni we.

¹³Vwẹ ọke yena ihwo ri Juda de mudia vwẹ obaro rẹ Ọrovwohwo na, vẹ emoboba rayen, eya rayen, vẹ imitete rayen.

¹⁴Erhi rẹ Ọrovwohwo da ro Jahaziẹl oma ọmọ ri Zekaraiya, ọmọ ri Benaiya, ọmọ ri Jẹiẹl, ọmọ ri Mattanaiya, ohwo ri Livae ọmọ rẹ Asaf, vwẹ uherevie rẹ ukokọ na.

¹⁵Ọ da ta, Kerhọn, ovwan Juda ejobi kugbe ihwo ri Jerusalẹm, kugbe Ovie Jehoshafat; E nẹ Ọrovwohwo ta kẹ wẹ, wọ djẹ oshọ-ọ; wo jẹ ofu rẹ urogho rode na dje we-e; kidie ofovwi na dia ọwẹ-ẹ ẹkẹvuọvo ọ rẹ Ọghẹnẹ.

¹⁶Vwẹ odẹ rọ cha na kpare ofovwi bru ayen; nighe, ayen cha wan asan umugbenu ri Ziz rhe; wọ cha mrẹ ayen vwẹ obo oba rẹ iyara na, vwẹ obaro ọnre vwẹ obo aton ri Jẹruẹl.

¹⁷Wọ rha lagha oma họnra vwẹ ofovwi nana-a, wa gbro phihọ, we hwe oma mu, re wọ mrẹ ẹkparọ obọ rẹ Ọrovwohwo cha vwọ kẹ wẹ, E Juda vi Jerusalẹm. Wọ djẹ oshọ-ọ, wo jẹ ofu dje we-e; odẹ rọ cha na kpare ofovwi bru ayen, Ọrovwohwo nene uwe dia.

¹⁸Etiyin Jehoshafat de gbe uyovwi vẹ opharo kpotọ, ihwo ri Juda ejobi kugbe Jerusalẹm de she gbunie otọ kẹ Ọrovwohwo ayen da ga Ọrovwohwo na.

¹⁹Ihwo ri Livae, ihwo ri Kohat kugbe ihwo ri Korat de vrẹn re jiri Ọrovwohwo, Ọghẹnẹ rẹ Izrẹl na, vẹ urhuru ọgangan.

²⁰Ayen de vrẹn vwẹ irhiọke ride ayen da yanran kpo aton ri Tekoa; rẹ ayen vwọ yanran re, Jehoshafat de mudia ọ da ta, Nyo vwe, Juda kugbe ihwo ri Jerusalẹm! Se Ọrovwohwo Ọghẹnẹ wẹn gbuyota, kọ vwẹ owọ wẹn muotọ; se emraro rọye gbuyota, ku wọ kparobọ.

²¹Rẹ ọ ve ihwo na vwọ jẹ iroro nu, ọ da vwẹ ihwo re cha so ine kẹ Ọrovwohwo mu ri ku iwun efuanfon phihọ vwo jiro, jẹ ayen ka obaro kẹ unuofovwi re sua, ayen me ta, vwẹ ẹkpẹvwẹ kẹ Ọrovwohwo na, kidie ẹguọnọ ro jẹrhẹriẹ rọye na dia bẹdẹ.

²²Ọke rẹ ayen vwọ so ine rẹ ayen vwo jiro re, Ọrovwohwo de ji ihwo ra hwa phihọ hẹrhẹ ihwo rẹ Ammọn, Moab, kugbe ihwo rẹ Ugbenu ri Seir, re rhe họnre Juda na, etiyin ayen da vẹn.

²³Kidie ihwo rẹ Ammọn vi Moab vrẹnri ayen da họrhọ ro ihwo rẹ Ugbenu ri Seir, ayen da ghwọrọ ayen tototo, ọke rẹ ayen rha vwọ ghwọrọ ihwo ri Seir tototo nu, ayen ohwohwo kẹ rhẹriẹ oma ghwọrọ ohwohwo.

²⁴Ọke ri Juda rhi vwo te ọguan rẹ ohẹrhẹ rọ hẹ evun rẹ aton na, ayen da kpare aro ni urogho na; gbe nighe, irivwi rayen riẹn nene otọ; ọvuọvo djẹ vabọ-ọ.

²⁵Ọke ri Jehoshafat vẹ ihwo rọye vwọ rhe rhe ghwẹ ekuakua rẹ ayen reyọ, ayen da mrẹ uchuru buebu gbidi, ekuakua, emwa, kugbe erọvwọ eghaghare, ayen da ghwẹ reyọ bẹsiẹ rọ rhe vwọ bẹn ayen. Ẹdẹ erha soso ọye ayen ghwẹ ekuakua na, kidie i bunọ.

²⁶Vwẹ ẹdẹ rẹne ayen da rhe ghwẹ koko vwẹ Iyara ri Beraka, kidie etiyin ayen de bruba kẹ Ọrovwohwo na; fiki rẹ ọtiọye na odẹ rẹ asan na e de se Iyara ri Beraka rhi te nonẹ na.

²⁷Etiyin ayen de rhivwi, kohwo kohwo ri Juda vi Jerusalẹm, Jehoshafat da ka obaro kẹ ayen, ri vwo rhivwi kpo Jerusalẹm vẹ aghọghọ, kidie Ọrovwohwo nẹrhẹ ayen ghọghọ vwẹ enu rẹ ivwighrẹ rayen.

²⁸Ayen de rhi te Jerusalẹm vẹ ekpata vẹ isorogun kugbe ewanre, rhi te uwevwi rẹ Ọrovwohwo na.

²⁹Oshọ rẹ Ọrovwohwo de rhi mu uvie rẹ irho na ejobi ọke rẹ ayen vwo nyo nẹ Ọrovwohwo re họnre ivwighrẹ rẹ Izrẹl kẹ ayen.

³⁰Ọtiọye na otọ ri Jehoshafat suẹn da rhe fọ, kidie Ọghẹnẹ vwẹ omaerovwo vwọ riariẹ phihọ.

³¹E nẹ kọye Jehoshafat rere vwẹ enu ri Juda ikpe ọgban gbe iyori ọ ghwanre te ọke ro vwo mu ẹriọ phihọ, ọ da re ikpe uje gbẹ iyori vwi Jerusalẹm. Odẹ rẹ oni rọye kẹ Azuba ọmọtẹ ri Shilhi.

³²Ọ da yan vwẹ idjerhe rẹ Asa ọsẹ rọye o kuoma rhẹriẹ no-o; o de ru ọbo ri Shephihọ vwẹ obaro rẹ Ọrovwohwo na.

³³Ẹkẹvuọvo, asan ri kpenu na, e si ayen no-o; ihwo na je ghwa vwẹ udu rayen kpahe Ọghẹnẹ rẹ esẹ raye-en.

³⁴Asakiephana eyere ri Jehoshafat ro chekọ, nẹ ẹsosuọ re te oba, e si ayen phihọ ọbe rẹ ikun ri Jehu ọmọ ri Hanani, re si phihọ Ọbe rẹ Ivie rẹ Izrẹl.

³⁵Rẹ Ọnana vwọ wan nu Jehoshafat ovie ri Juda de re kuoma gbe Ahazaya ovie rẹ Izrẹl, ro ru umwemwu gangan.

³⁶Ọ de kuoma gbe vwọ kare ekọ ri che bi kpo Tarshish, ayen da kare ekọ na vwẹ Eziọngeba.

³⁷Etiyin Ẹliẹza ọmọ ri Dodavahu ọ ri Maresha da mraro kpahe Jehoshafat, tanẹ, fikiridie wo kuoma kugbe Ahazaya, Ọrovwohwo kọ guọghọ obo ru wo ruru ekọ na de shu i gbi se kpo Tarshish ọfa-a.