Read urhobo 2 Ikun rẹ Ivie 21 Bible Online

2 Ikun rẹ Ivie 21 - urhobo bible

2 Ikun rẹ Ivie 21

¹Jehoshafat da vwerhẹ kugbe esẹ rọye, e de sho kugbe esẹ rọye vwẹ orere ri Devid; Jehoram ọmọ rọye da re vwẹ ẹdia rọye,

²O vwo iniọvo emọ ri Jehoshafat; Azaria, Jehiẹl, Zekaraya, Azaria, Maikel, kugbe Shefatia; enana ejobi kẹ emọ ri Jehoshafat ovie ri Juda.

³Ọsẹ rayen de ru ẹse kẹ ayen buebu, idọnọ, oro, vẹ ekuakua ghaghare, kugbe irere ri Juda ra gba ogba phihọ; ẹkẹvuọvo ọ da vwe uviẹ na kẹ Jehoram, kidie ọye ọmọkpakọ.

⁴Ọke ri Jehọram rhi vwo tidia ekete rẹ uvie rẹ ọsẹ rọye nure rẹ owọ rọye vwo muotọ nu, ọ da vwẹ oda nyavwe iniọvo rọye na hwe, ji kugbe ẹvo vwẹ isun rẹ Izrẹl.

⁵Jehoram da dia ikpe ọgban gbe ivẹ vwẹ ọke rọ vwọ re ovie, ọ da re ikpe ẹrenre vwi Jerusalẹm.

⁶Ọ da yan vwẹ idjerhe rẹ ivie rẹ Izrẹl, kirobo rẹ uwevwi rẹ Ehab ruru; kidie ọmọtẹ rẹ Ehab ọye aye rọye. Ọ de ru obo re brare vwẹ obaro rẹ Ọrovwohwo.

⁷Yẹ Ọrovwohwo sa ghwọrọ uwevwi ri Devidi-i, fiki rẹ ọphọ rọ vẹ Devid rere, o ki rhe ji ve nẹ ọye vwẹ urhukpẹ kẹ vẹ emọ rọye bẹdẹ.

⁸Vwẹ ọke rọye ọye Idọm vwo mukpahe isuesun ri Juda, ayen da vwẹ oviẹ rẹ obọ rayen vwọ ma.

⁹Etiyin Jehoram da wan vrẹn vwẹ ason ọ vẹ inotu rọye kugbe ekpẹrẹ rọye, o de re hwe ihwo rẹ Idọm re riarierẹ phihọ na te ekpẹrẹ rọye vẹ inotu rọye.

¹⁰Ọtiọye Idọm mukpahe isuesun ri Juda rhi te ẹdẹ ri nonẹ. Vwẹ ọke yena Libya de ji mukpahe isuesun rọye, fikiridie ọ sen Ọrovwohwo na, Ọghẹnẹ rẹ esẹ rọye.

¹¹Ọ rọ marho o de ru asan rọ kpenu buebu phihọ obo orho rẹ ugbenu ri Juda, ọ da nẹrhẹ ihwo re dia Jerusalẹm jẹ esegbuyota evwo, o de rhi sun Juda ghwru.

¹²Ilaija rẹ ọmraro na de si ọbe rhe, tanẹ, E nẹ Ọrovwohwo tare, Ọghẹnẹ ri Devid ọsẹ wẹn, Fikiridie wọ vwọ kpahe idjerhe ri Johoshafat ọsẹ wẹ-ẹn na, eyẹ idjerhe rẹ Asa ovie ri Juda-a,

¹³ẹkẹvuọvo idjerhe rẹ ivie rẹ Izrẹl kọye wọ vwọ kpahe, wo de sun Juda kugbe ihwo re dia Jerusalẹm ghwru kirobo rẹ uwevwi rẹ Ehab sun Izrẹl ghwru, okpuyovwi wẹn ke rha nyavwe iniọvo wẹn hwe, emọ rẹ uwevwi rẹ ọsẹ wẹn, ri yovwi nọ ekpuyovwi wẹn;

¹⁴nighe, Ọrovwohwo cha vwẹ ọtiekọ rode rhe vwọ teye ihwo wẹn, emọ wẹn, eya wẹn, vẹ ekuakua wẹn ejobi,

¹⁵okpuyovwi wẹn kọ cha mwọ emiavwe ọgangan emiavwe rẹ orhẹ, bẹsiẹ rẹ orhẹ wẹn che vwo phu rhe tuke vẹ emiavwe na, kẹdẹ kẹdẹ.

¹⁶Ọrovwohwo da rhe kpare ophu rẹ ihwo ri Filistia vwọ so Jehoram kugbe ihwo rẹ Arebia re dia kẹre Itiopia;

¹⁷ayen da rhe vwọ so Juda, ayen de rhi phio, ayen da kua ekuakua rẹ ayen riẹn nẹ ovie vwori vwẹ uwevwi rọye ejobi reyọ, eriyin ji te ọmọ rọye vẹ eya rọye, ọtiọye na ọmọ ọvuọvo gbi chekọ kẹ-ẹ jokpa ri Jehoahaz, rẹ ubrevwiẹ rọye.

¹⁸Rẹ enana ejobi vwọ wan nu Ọrovwohwo na da ghwiẹ orhẹ rọye na vẹ emiavwe re je se sivwo.

¹⁹Ọ rhi vwo kri emerha, vwẹ oba rẹ ikpe ivẹ re, orhẹ rọye na da rhe sarhue fiki rẹ emiavwe na, ọ de ghwu vwẹ evun rẹ odjadja rode. Ihwo rọye koko ekuerhanre rode vwo mu ọghọ kẹ-ẹ, kerẹ oghẹre rẹ erhanre re koko phihọ kẹ ọsẹ rọye-e.

²⁰Ikpe ọgban gbe ivẹ ọ ghwọ te vwẹ ọke ro vwo muphihọ ẹriọ ọ da re ikpe ẹrenre vwi Jerusalẹm; ro vwo ghwu ohwo ọvuọvo vwerhire-e. Ayen de sho phihọ orere ri Devid, ẹkẹvuọvo ayen shiro phihọ ohri rẹ ishi rẹ ivie-e.