Read urhobo 2 Ikun rẹ Ivie 23 Bible Online

2 Ikun rẹ Ivie 23 - urhobo bible

2 Ikun rẹ Ivie 23

¹Ẹkẹvuọvo vwẹ ukpe righwrẹ Jehoiada da vwẹ arueyivwo, ọ vẹ inotu ri suẹn ujori de re kuoma gbe, Azaraya ọmọ ri Jehoram, Ishmael ọmọ ri Jehohanan, Azaraya ọmọ rẹ Ọbẹd, Maaseiya ọmọ rẹ Adaiya kugbe Elishafat ọmọ ri Zichri.

²Ayen da yan ro Juda ejobi ayen de re se ihwo ri Livae na ejobi koko nẹ irere ri Juda rhe, kugbe igbuyovwi rẹ iwevwi rẹ esẹ rẹ Izrẹl, ayen da rhe Jerusalẹm.

³Ukoko na ejobi vẹ ovie na da re ọphọ vwẹ uwevwi rẹ Ọghẹnẹ Jehoiada da ra kẹ ayen, Nighe, ọmọ rẹ ovie na! E jẹn ọ rẹ, kirobo rẹ Ọrovwohwo ta kpahe emọ ri Devid.

⁴Ọnana kọye emu ri we che ru; vwẹ usun rẹ irherẹn vẹ ihwo ri Livae ri siobọ nẹ iruo vwẹ edidjana na, akarha ke rhẹrẹ anurhoro,

⁵akarha ọfa me rha dia obo uwevwi rẹ ovie akarha ro chekọ kẹ asan Anurhoro rẹ Uchivwo na; ihwo ri chekọ ejobi ke cha dia ọguan rẹ uwevwi rẹ Ọrovwohwo na.

⁶E jẹn ohwo ọfa vwẹriẹ uwevwi rẹ Ọrovwohwo na-a jokpa rẹ irherẹn na kugbe ihwo ri Livae rẹ odibo egbe teri; ayen sa ruọ, kidie ayen epha fuanfon, ẹkẹvuọvo na ihwo ejobi ke cha rhẹrẹ Ọrovwohwo na.

⁷Ihwo ri Livae na ke gba riariẹ ovie na, dohwo dekuakua rẹ ofovwi rọye vwẹ obọ; kohwo kohwo rọ ro uwevwi na ke hwe. Wa gba riariẹ ovie na siẹ rọ da ro uwevwi; kugbe ọke rọ daro otafe.

⁸Ihwo ri Livae na kugbe Juda ejobi de ru kirobo ri Jehoiada orherẹn na ji iji kẹ ayen. Ayen ohwo ọvuọvo de se ihwo rọye rhe, ri che siobọ nẹ iruo vwẹ edidjana na; kidie Jehoiada orherẹn na siobọ nẹ ogharọ na-a.

⁹Jehoiada orherẹn na da ghwẹ ibiri na kugbe ekpọfia ride vẹ itete na rẹ Ovie Devid re hẹ uwevwi rẹ Ọghẹnẹ na, vwọ kẹ inotu na;

¹⁰ọ da ta nẹ ihwo na ejobi gba rhẹrẹ ovie na, dohwo dekuakua rẹ ofovwi rọye vwẹ obọ, nẹ abọ rẹ obọrhe rẹ uwevwi na re te abọ rẹ obọhwere rẹ uwevwi na, riariẹ asan agbada rẹ uwevwi na.

¹¹Etiyin ọ da reyọ ọmọ rẹ ovie na vwọ phia, ọ da vwẹ erhu rẹ ovie vwo tughẹ ọ da vwẹ ọbe rẹ ogangan vwọ kẹ; ayen de vwo mu ovie, Jehoiada vẹ emọ rọye da vwẹ evwri te, ayen da ta, Ovie wọ tọn.

¹²Ọke rẹ Araiaya vwo nyo umri rẹ edo rẹ ihwo re djonẹ jiri ovie na, ọ da yanran kpo uwevwi rẹ Ọrovwohwo na brn ihwo na;

¹³O vwo no, ovie na mudia kẹrẹ uchivwo vwẹ asan anurhoro na, re inotu na ve ihworowanre mudia kẹrẹ ovie na, ihwo rẹ otọ na ejobi ra ghọghọ hworo ewanre, ihwo re sua ine vẹ ekuakua rẹ ihwehworo rayen re ka obaro rẹ eha na. Atalaya da bẹrẹ emwa rọye, o de kperi Ivwiẹ yo! Ivwiẹ yo!

¹⁴Orherẹn Jehoiada da vwẹ inotu re vwo mu kẹ isodje na vwọ phia, ọ da ta kẹ ayen nẹ, Ovwan reyọ phihọ otafe rere wan vwẹ ọlọkọ vwo ghwe vẹ ihwo ri nene ejobi vwẹ ohri rẹ isodje na. Ovwan hwe vwẹ evun rẹ uwevwi rẹ Ọrovwohwo na-a.

¹⁵Ro vwo hirhẹ ẹro ku anurhoro rẹ iyesi wan ruẹ egodo rẹ ovie na, ayen de shabọ phihọ ayen de hwe vwẹ etiyin.

¹⁶Etiyin Jehoiada vẹ ihwo na ejobi kugbe ovie na da re ọphọ nẹ ayen dia ihwo rẹ Ọrovwohwo.

¹⁷Etiyin ihwo na ejobi de kpo uwevwi ri Baal, ayen de kporo te otọ; te egbada rọye te ema rọye ayen da guọghọ ayen ibribro, ayen da teye Matan orherẹn ri Baal hwe vwẹ asan egbada na.

¹⁸Jehoiada da vwẹ ihwo mu ne rhẹrẹ uwevwi rẹ Ọrovwohwo na nẹ irherẹn ri Livae na gba vwẹ ẹro te ayen ihwo ri Livae ri Devid yono phihọ iruo rẹ ẹga rẹ Ọrovwohwo na, kẹ eye rhe ze izobo kẹ Ọrovwohwo na, kirobo re siro phihọ urhi ri Mosis, vẹ aghọghọ kugbe ine, kirobo ri Devid ghaerọ utute.

¹⁹Ọ da vwẹ ihwo ne rhẹrẹ anurhoro rẹ Ọrovwohwo na rere ohwo ro jẹfuọn vwo jẹ vwẹriẹ.

²⁰Ọ da reyọ inotu na, ehọnvwọre na, isun rẹ ihwo na, kugbe ihwo rẹ otọ na ejobi; ayen da reyọ ovie na nẹ uwevwi rẹ Ọrovwohwo na rhe, ayen de vwo nẹ udje wan anurhoro rọ obenu vwẹ uwevwi rẹ ovie na. Ayen da vwẹ ovie tidia ekete rọye.

²¹Etiyin ihwo rẹ otọ na ejobi da ghọghọ, orere na da fọ riẹi, ra vwọ vwẹ oda hwe Araiaya nu.