Read urhobo 2 Ikun rẹ Ivie 24 Bible Online

2 Ikun rẹ Ivie 24 - urhobo bible

2 Ikun rẹ Ivie 24

¹Joash da dia ikpe ighwrẹ ọ ghwu te vwẹ ọke rọ vwọ re ovie, ọ da re ikpe ujuvẹ vwi Jerusalẹm; odẹ rẹ oni rọye ki Zibia ri Bẹẹrsheba.

²Joash de ru obo ri yoma vwẹ ẹro rẹ Ọrovwohwo vwi kemu kemu ejobi vwẹ ọke ri Jehoiada orherẹn na.

³Jehoiada da reyọ eya ivẹ kẹ, o de vwiẹ emeshare kugbe emetẹ.

⁴Rẹ Ọnana vwọ wan nu Joash da jẹ iroro nẹ ọye rhuẹrẹ uwevwi rẹ Ọrovwohwo.

⁵O de se irherẹn kugbe Livae koko, ọ da ta kẹ ayen, Wa yanran ro irere ri Juda, re we re toro igho mie Izrẹl ejobi ra vwọ rhuẹrẹ uwevwi rẹ Ọghẹnẹ rẹ ovwan nẹ ukpe re te ukpe; we mi ruo phẹrẹkpẹ. Ẹkẹvuọvo ihwo ri Livae na rhe ruo phẹrẹkpẹ-ẹ.

⁶Etiyin ovie de se Jehoiada rẹ ọhọnvwọre, ọ da ta kẹ, Die sorọ rẹ ihwo ri Livae na gbi rhe toro igho ri Mosis, odibo rẹ Ọrovwohwo na bruru nẹ e toro mie Juda vi Jerusalẹm, kugbe ukoko rẹ Izrẹl nẹ a vwọ bọn utughẹ rẹ iseri na-a?

⁷Kidie emọ rẹ Araiaya, aye umwemwu na, ra guọghọ ẹchẹ ro uwevwi rẹ Ọghẹnẹ; ayen da ghwẹ ekuakua efuanfon rẹ uwevwi rẹ Ọrovwohwo na reyọ ra vwọ rhuẹrẹ ọ ri Baal.

⁸Ọtiọye kọye ovie ji iji, ayen da kare ekpeti, e de mu phihọ oma rẹ anurhoro rẹ uwevwi rẹ Ọrovwohwo na.

⁹E de ghwoghwo urhi nene Juda vi Jerusalẹm ejobi; ne toro arhọghọ na ri Mosis odibo rẹ Ọrovwohwo bru kẹ Izrẹl vwẹ evun rẹ Aghwa re a vwẹ ayen rhe Ọrovwohwo.

¹⁰Isun na ejobi kugbe ihwo na ejobi da ghọghọ ayen de toro arhọghọ na rhe ghwẹ phihọ ekpeti na bẹsiẹ re vwo toro re.

¹¹Ọke rẹ ihwo ri Livae na de mu ekpeti na rhe inotu rẹ ovie, rẹ ayen da mrẹ nẹ igho buebu hẹ evun rẹ ekpeti na, osiọbe rẹ ovie na kugbe onotu rode rẹ irherẹn na me rhe rhe ghwẹ obo re hẹ evun rẹ ekpeti na no ayen mi re muo phihọ ẹdia rọye. Kẹnẹ ayen ruru kẹdẹ kẹdẹ ayen de toro igho buebu.

¹²Etiyin ovie na kugbe Jehoiada da ghwẹ ayen kẹ ihwo re vwẹ ẹro te uwevwi rẹ Ọrovwohwo na, ayen de durhie ihwo re ma uwevwi kugbe ihwo re kare irhe rere ayen rhuẹrẹ uwevwi rẹ Ọrovwohwo na, kugbe ihwo ri duvwu utehru vẹ ẹrovwo rere ayen rhuẹrẹ uwevwi rẹ Ọrovwohwo na.

¹³Ọtiọye na ihwo ra reyọ phihọ iruo na da wian, iruo rẹ erhuarhuẹrẹ na da yan hẹ obaro vwẹ obọ rayen, ayen de rhi hirhe uwevwi na phihọ obo rọ epha jovwo ayen da vwẹ ogangan kẹ.

¹⁴Ọke rẹ ayen vwo ru nu, ayen da ghwẹ igho ri chekọ vwo rhe ovie vi Jehoiada, igho na kọye e vwo duvwu ekuakua phihọ uwevwi rẹ Ọrovwohwo na, te i re vwo ru iruo rẹ ẹga rẹ izobo rẹ ẹtorhẹ, kugbe idjokpo rẹ insẹns, vẹ ekuakua rẹ oro vẹ idọnọ. Ayen de ze izobo rẹ ẹtorhẹ vwẹ uwevwi rẹ Ọrovwohwo kọke kọke vwẹ ẹdẹ rẹ akpọ ri Jehoiada ejobi.

¹⁵Ẹkẹvuọvo Jehoiada da nabọ rhe ghwo hẹrẹhẹrẹ, o de ghwu; ikpe ujosan gbe ihwe ọ ghwo te ro ki ghwu.

¹⁶E de sho phihọ orere ri Devid vwẹ ohri rẹ ivie na, fikiridie o ru emu esiri kẹ Izrẹl, kugbe Ọghẹnẹ vẹ uwevwi rọye.

¹⁷Asakiephana ri Jehoiada vwo ghwu nu isun ri Juda da ghwẹ ẹga rhe ovie na; etiyin ovie na da kerhọn rayen.

¹⁸Etiyin uwevwi rẹ Ọrovwohwo na da chọrọ ayen ẹro, rọ dia Ọghẹnẹ rẹ esẹ rayen, Etiyin ayen da gọ ighriki vẹ ema. Ophu da rhe dia uyovwi ri Juda vi Jerusalẹm fiki rẹ abe rayen.

¹⁹Yẹ o ji ji emraro rhe ohri rayen rere ọ vwẹ ayen rhivwi rhe Ọrovwohwo; enana ki se oseri hwe ayen, ẹkẹvuọvo yẹ ayen davwerhọ-ọn.

²⁰Etiyin Erhi rẹ Ọghẹnẹ de re mu Zekaraya ọmọ ri Jehoiada rẹ orherẹn na; o de mudia kenu kẹ ihwo na, ọ da ta kẹ ayen, E nẹ Ọghẹnẹ tare, Die wa vwọ chọ urhi rẹ Ọrovwohwo, vwẹ ọtiọye na o rhe yovwi kẹ ovwa-an? Fikiridie wa sen Ọrovwohwo na kọ je sen ovwan.

²¹Ẹkẹvuọvo ayen da ro ẹro riariẹ phihọ, vwẹ urhi rẹ ovie kẹ ayen, ayen de phio hwe vwẹ ọguan rẹ uwevwi rẹ Ọrovwohwo na.

²²Kẹnẹ Joash gbe Karophihọ arodọvwẹ ri Jehoiada, ọsẹ ri Zekaraya, vwọ kẹ-ẹ, ẹkẹvuọvo o de hwe ọmọ rọye. Ọke ro vwo ghwẹ, ọ da ta, Gbe jẹn Ọrovwohwo mrẹ re ọ reihri.

²³Vwẹ oba rẹ ukpe na unuofovwi ri Siria da họnre Joash. Ayen da rhe Juda vi Jerusalẹm, ayen da rhe ghwọrọ isun na nẹ ohri rẹ ihwo na, ayen da ghwẹ ekuakua rayen rhe ovie ri Damaskọs.

²⁴Dede na unuofovwi ri Siria na buru na, Ọrovwohwo de phi unuofovwi rode na phihọ obọ rayen, fikiridie ayen sen Ọrovwohwo na, Ọghẹnẹ rẹ esẹ rayen. Kẹnẹ a vwi Joash vwọ reihri.

²⁵Ọke rẹ ayen vwọ yanran nu, rẹ ayen vwọ woma phihọ otọ gangan nu, idibo rọye da ta phihọ fiki rẹ ọbara rẹ ọmọ ri Jehoiada rẹ orherẹn na, ayen da teyọ hwe phihọ enu rẹ ehwa rọye. Etiyin o de ghwu; ayen de sho phihọ orere ri Devid, ẹkẹvuọvo ayen shiro phihọ ushi rẹ ivie-e.

²⁶Ihwo re tarọ phihọ na kẹ ena Zabad ọmọ ri Shimear ọmọtẹ rẹ ohwo rẹ Ammọn, kugbe Jehozabad ọmọ ri Shimrit ọmọtẹ ri Moab.

²⁷Ikun rẹ emọ rọye vẹ epha buebu ra bọ kpahọ, kugbe obo rọ rhoma bọn uwevwi rẹ Ọghẹnẹ te e si ayen phihọ ọbe rẹ ikun rẹ Ọbe rẹ Ivie na. Amazaya ọmọ rọye da re vwẹ ẹdia rọye.