Read urhobo 2 Ikun rẹ Ivie 25 Bible Online

2 Ikun rẹ Ivie 25 - urhobo bible

2 Ikun rẹ Ivie 25

¹Amazaya da dia ikpe uje gbe iyori ọ kpako te vwẹ ọke ro vwo mu ovie phihọ ẹriọ, ọ da re ikpe uje gbe irhiri vwi Jerusalẹm. Odẹ rẹ oni rọye Jehoadan ri Jerusalẹm.

²O de ru obo ri yoma vwẹ ẹro rẹ Ọrovwohwo, ọ dianẹ kẹ abe ghwa kare udu rọye-e.

³Rẹ ogangan rẹ uvie na ejobi ghwe vwo te obọ nu o de hwe idibo na ri hwe ovie na ọsẹ rọye.

⁴Ẹkẹvuọvo o rhe hwe emọ raye-en; kirobo re siri phihọ urhi na, vwẹ ọbe ri Mosis, vwẹ asan rẹ Ọrovwohwo de ji iji, E hwe esẹ sohọ emọ raye-en, eyẹ emọ na sohọ esẹ raye-en; ẹkẹvuọvo kohwo kohwo ri che ghwu phihọ umwemwu robọ rọye.

⁵Etiyin Amazaya da ghwẹ ihwo ri Juda koko, vwẹ uwuwevwi rẹ esẹ na vwẹ otọ rẹ isun rẹ uriori kugbe isun rẹ ujori vwọ kẹ Juda vi Bẹnjamin ejobi. Ọ da ghwẹ ihwo rẹ ikpe uje kpenu, ọ da mrẹ nẹ i te ihwo uriori ujori erha rẹ ihwo ra nabọ sanọ, ri te ofovwi, re sa yọnrọn ubiri kugbe ekpọfia.

⁶Ọ de ji durhie ihwo uriori ujori egba ri yivwaro nẹ Izrẹl rhe ra hwa talẹnt ujori rẹ idọnọ kẹ.

⁷Ẹkẹvuọvo ohwo rẹ Ọghẹnẹ ọvo de bro rhe ọ da ta, E ovie, wo jẹ unuofovwi rẹ Izrẹl na nene uwe-e, kidie Ọrovwohwo vẹ Izrẹl herọ-ọ, ọ vẹ ihwo rẹ Ifrem nana-a.

⁸Ẹkẹvuọvo wo de roro nẹ idjerhe nana wọ vwọ gan vwẹ ofovwi, Ọghẹnẹ cha vwẹ owẹ hwaotọ kẹ ivwighrẹ wẹn; kidie Ọghẹnẹ vwo ogangan rọ vwọ cha uko eyẹ ro vwo gere she.

⁹Amazaya da ta kẹ ohwo rẹ Ọghẹnẹ na, Ẹkẹvuọvo komavọ mi ru talẹnt ujori re Me vwọ kẹ unuofovwi rẹ Izrei na? Ohwo rẹ Ọghẹnẹ na da kpahe, Ọrovwohwo sa kẹ wẹ bu nọ tiọna.

¹⁰Etiyin Amazaya de siobọ nẹ unuofovwi ro bruro rhe vwẹ Ifrẹm, nẹ i rhivwi kpo. Ivun ri Juda de miovwo ayen gangan, ayen de rhivwi kpo vẹ ivun emiovwo.

¹¹Ẹkẹvuọvo Amazaya kẹ ohwo vẹ udu, o de sun ihwo rọye, kpo Iyara re Ughweraka o de hwe ihwo uriori ihwe ri Seir.

¹²Etiyin ihwo ri Juda de rhe mu ihwo uriori ihwe ekpokpọ kpo, ayen de mu ayen kpo enu rẹ ugbenu kẹ oboyi e de phi ayen rhi she teye oragha; ayen da sanvwe ibribro.

¹³Ẹkẹvuọvo ihwo rẹ ofovwi na rẹ Amazaya siobọ nu kpo na, ri rhe nene kpo ofovwi na-a, da ra vẹn ro irere ri Juda, nẹ Sameria re te Bẹthọrọn, ayen de hwe ihwo uriori erha vwẹ evun rẹ ayen, ayen de gborho ekuakua buebu.

¹⁴Rẹ Amazaya vwo nẹ ihwehwe rẹ ihwo rẹ Idọm rhe nu, ọ da reyọ ẹdjọ rẹ ihwo ri Seir rhe, ọ da vwẹ ayen vi kẹ ẹdjọ rọye, ọ da ga ayen, o de ze izobo kẹ ayen.

¹⁵Ọtiọye na ophu de mu Ọrovwohwo kpahe Amazaya o de ji ọmraro rọye bro ra, ọ da ta kẹ, Die wọ rha vwọ reyọ ẹdjọ rẹ ihwo efa, ri se sivwi ihwo ri vwo ayen nẹ obọ wẹ-ẹn?

¹⁶Ẹkẹvuọvo rọ ghwa vwọ ta ota na ovie na da ta kẹ, Avwanre vwẹ owẹ ru oboiroro rẹ ovie? Fotovwi! Die nẹrhẹ a teye owẹ hwe? Etiyin ọmraro na de fotovwi, ẹkẹvuọvo ọ da ta, Me riẹnre nẹ Ọghẹnẹ jẹ iroro rọ vwọ ghwọrọ owẹ, fikiridie wo ru ọnana wọ rha kerhọn rẹ uchebro mẹ-ẹ.

¹⁷Etiyin Amazaya ovie ri Juda da jẹ iroro o de ji ikọn bru Joash ọmọ ri Jehoahaz, ọmọ ri Jehu, ovie rẹ Izrẹl, tanẹ, Mọ, rere avwanre ni ohwohwo opharo.

¹⁸Joash ovie rẹ Izrẹl da vuẹ ovuẹ rhe Amazaya ovie ri Juda akpia ri Lebanọn de ji ikọn bru igẹdu ri Lebanọn, tanẹ, Vwẹ ọmọtẹ wẹn vwọ kẹ ọmọ mẹ vwọ rọvwọ; etiyin eranvwe re djotna vwi Lebanọn da wan vrẹn re chiyin akpia na muotọ.

¹⁹Wọ tare, Nighe, me ghwiẹ Idọm hwe, oma ko mu we ku wọ yeyan. Ẹkẹvuọvo asakiephana hwe oma mu vwẹ uwevwi wẹn; die wọ vwẹ obọ se okpetu kẹ oma wẹn, vẹ Juda rhe bẹsiẹ ru wo vwo she?

²⁰Ẹkẹvuọvo Amazaya da vwerhọ-ọn; kidie obọ rẹ Ọghẹnẹ o nurhe, rere o vwo phi ayen phihọ obọ rẹ ivwighrẹ rayen, kidie ẹdjọ rẹ Idọm kọye ayen bru ra re duotọ rẹ oma.

²¹Etiyin Joash ovie rẹ Izrẹl da yanran; te ọye te Amazaya ovie re Juda da rhe gbare oma vwẹ ofovwi vwi Bẹtshemesh, vwẹ otọ ri Juda.

²²Izrẹl de phi Juda kparobọ, dohwo duwevwi rọye da djẹ ra.

²³Joash ovie ri Izrẹl de mu Amazaya ovie ri Juda, ọmọ ri Joash, ọmọ rẹ Ahazaya, vwi Bẹtshemesh, ọ da reyọ vwo rhe Jerusalẹm, o de kporo igbẹhẹ ri Jerusalẹm kubit ujori ẹne, nẹ Anurhoro rẹ Ifrem ri te Anurhoro rẹ Akakọ.

²⁴Ọ de gborho oro vi; idọnọ ejobi kugbe ekuakua ejobi ra mrẹ re vwẹ uwevwi rẹ Ọghẹnẹ, kugbe e Ọbẹd-e-dọm vẹ ayen; o de ji gborho ekuakua ejobi rẹ hẹ uwevwi rẹ ovie, kugbe ijọpha ejobi, o de rhivwi kpo Sameria.

²⁵Amazaya ọmọ ri Joash ovie ri Juda da dia ikpe ihwiori ri Joash ọmọ ri Jehoahaz, Ovie rẹ Izrẹl vwo ghwu nu.

²⁶Asakiephana uruemu rẹ Amazaya, nẹ ẹsosuọ re te oba, e rhe si ayen phihọ Ọbe rẹ Ivie ri Juda vẹ Izrẹl?

²⁷Nẹ ọke ro vwo chuko ku Ọrovwohwo nu a da ghwa ro ero kpahọ vwi Jerusalẹm, ọ da djẹ kpo Lakish. Ẹkẹvuọvo ayen de ji ikọn nene kpo Lakish a da ghwiẹ hwe vwẹ oboyi.

²⁸Ayen de muo phihọ iyesi vwo rhe; e de sho kugbe esẹ rọye vwẹ orere ri Devid.